Nhwɛso bebree wɔ Bible mu a ɛkyerɛ sɛ Yehowa tiee n’asomfo mpaebɔ. Bere a wohui sɛ Yehowa atie wɔn abisade na waboa wɔn no, akyinnye biara nni ho sɛ ɛhyɛɛ wɔn gyidi den. Yɛn nso, sɛ yɛde yɛn abisade reto Yehowa anim a, ɛsɛ sɛ yɛma ohu dekode pɔtee a yehia, na yɛde yɛn ani to fam hwɛ sɛnea obebua mpae no. Kae hu sɛ, sɛnea obebua mpaebɔ no, ebia ɛnyɛ saa na wohwɛ kwan. Obetumi mpo ayɛ aboro nea worehwehwɛ no. (2Ko 12:7-9; Efe 3:20) Nneɛma a Yehowa betumi ayɛ de abua yɛn mpaebɔ no bi ne dɛn?

• Obetumi ama yɛn honam mu ahoɔden, gyidi a ɛyɛ den, ne akomatɔyam, na yɛatumi agyina yɛn haw ano.—Flp 4:13

• Obetumi ama yɛn nyansa a yɛde besi gyinae pa.—Yak 1:5

• Obetumi ama yɛn ɔpɛ ne ahoɔden a yɛde bɛyɛ nea ehia sɛ yɛyɛ.—Flp 2:13

• Dadwen hyɛ yɛn so a, obetumi ama yɛn ho adwo yɛn.—Flp 4:6, 7

• Obetumi akanyan afoforo ama wɔakyekye yɛn werɛ ahyɛ yɛn nkuran, na wɔama yɛn nneɛma a yehia.—1Yo 3:17, 18

• Obetumi aboa wɔn a yɛbɔ mpae ma wɔn no.—Aso 12:5, 11

HWƐ VIDEO A YƐATO DIN YEHOWA YƐ “MPAEBƆ TIEFO.” WUWIE A, BUA NSƐMMISA A EDIDI SO YI:

• Sɛ yare nti yentumi nyɛ pii a, sɛn na Onua Shimizu asɛm no hyɛ yɛn nkuran?

• Yɛbɛyɛ dɛn asuasua Onua Shimizu?