Sɛ yɛde botae ahorow sisi yɛn ani so wɔ Yehowa som mu a, ɛma yetumi de ahoɔden a yɛwɔ no yɛ adwuma yiye. (1Ko 9:26) Afei nso, seesei a wiase yi awiei adu yɛn pon ano yi, yɛde botae sisi yɛn ani so a, ɛboa ma yɛde bere a aka no di dwuma yiye. (Efe 5:15, 16) Enti sɛ moreyɛ abusua som a, adɛn nti na momfa botae nsisi mo ani so wɔ ɔsom afe a ɛreba no mu? Botae ahorow a mubetumi de asisi mo ani so no, mohwɛ adesua nhoma yi mu a, mubehu sɛ yɛaka bi ho asɛm. Enti mubetumi abɔ ho mpae ahwɛ nea mubetumi ayɛ.—Yak 1:5.

Botae baako ne daa akwampae adwuma no. Anyɛ hwee koraa no, adɛn na monhwɛ sɛ mubetumi aboa abusua no muni baako ama wayɛ daa kwampaefo? Sɛ wusuro sɛ anhwɛ a worennya wo nnɔnhwerew a, ɛne akwampaefo a wɔn tebea te sɛ wo de no mmɔ nkɔmmɔ. (Mme 15:22) Wubetumi mpo afrɛ ɔkwampaefo bi aba mo abusua som ase na mo ne no abɔ nkɔmmɔ. Afei, yɛ nhyehyɛe a ɛbɛma woatumi anya wo nnɔnhwerew no, na kyerɛw to hɔ. Sɛ nso woayɛ akwampae adwuma no bi pɛn a, ɛnde susuw ho hwɛ sɛ seesei wubetumi asan afa anaa.

Akwampae boafo adwuma no nso ɛ? Mo abusua no, ebinom betumi de bosome baako anaa nea ɛboro saa ayɛ bi anaa? Sɛ wunni ahoɔden papa mpo a, nea ebetumi aboa wo ama woayɛ akwampae boafo adwuma no bi ne sɛ, da biara wobɛkɔ asɛnka kakra. Ebi nso a, wo de, sukuu anaa adwuma nti, nnawɔtwe awiei na wunya bere kɔ asɛnka. Sɛ saa a, ɛnde bosome a nnawɔtwe awiei a ɛwom yɛ nnum anaa bosome a afoofi da bi wom no, wubetumi de ayɛ akwampae boafo. Pɛ kalenda na kyerɛw bere a wopɛ sɛ woyɛ akwampae boafo no hyɛ so. Afei kyerɛw nhyehyɛe a ɛbɛma woanya nnɔnhwerew no nso to hɔ.—Mme 21:5.

HWƐ VIDEO A YƐATO DIN DA AKOKODURU ADI . . . ƆKWAMPAEFO. WUWIE A, BUA ASƐMMISA A EDI SO YI:

• Wɔn a wɔde nneɛma bɔ afɔre na wɔatumi ayɛ akwampae adwuma no bi no, Yehowa dɔ wɔn, na ɔhwɛ wɔn. Sɛn na Onuawa Aamand suahu no ma yehu saa?