NEA ENTI A ƐHO HIA: Sɛnea nnwinnade pii te no, sohyial nɛtwɛk betumi aboa yɛn anaa apira yɛn. Kristofo binom asi gyinae sɛ wɔremfa sohyial nɛtwɛk nyɛ adwuma. Kristofo binom nso de, wɔfa so ne wɔn abusuafo ne wɔn nnamfo di nkitaho. Nanso Ɔbonsam mpɛ sɛ yɛde sohyial nɛtwɛk yɛ adwuma nyansam. Wei betumi asɛe yɛn din ne yɛne Yehowa ntam. Sɛnea Yesu yɛe no, yebetumi de nnyinasosɛm a ɛwɔ Onyankopɔn Asɛm mu ayɛ adwuma de ahu asiane ahorow, na yɛatwe yɛn ho afi ho.—Lu 4:4, 8, 12.

ASIANE AHOROW A ƐSƐ SƐ YƐKWATI:

• Bere pii a yɛsɛe wɔ sohyial media so. Sɛ yɛsɛe bere pii wɔ sohyial nɛtwɛk anaa sohyial media so a, bere a ɛho hia pa ara a ɛsɛ sɛ yɛde yɛ Onyankopɔn som mu nneɛma no, ebetumi aba sɛ yɛrennya.

  Bible nnyinasosɛm: Efe 5:15, 16; Flp 1:10

• Nneɛma a ɛmfata a yɛbɛhwɛ. Sɛ obi hwɛ nneɛma a ɛkanyan akɔnnɔ bɔne a, ebetumi ama wahwɛ ponografi na ɛbɛyɛ den sɛ obegyae. Afei nso, ebetumi ama ɔde ne ho ahyɛ ɔbrasɛe mu. Sɛ obi kenkan nneɛma a awaefo de agu Intanɛt so a, ebetumi asɛe ne gyidi.

  Bible nnyinasosɛm: Mt 5:28; Flp 4:8

• Nsɛm ne mfoni a ɛmfata a wɔde gu Intanɛt so. Esiane sɛ koma no yɛ ɔdaadaafo nti, obi adwene betumi ayɛ no sɛ ɔmfa nsɛm anaa mfoni a ɛnyɛ papa ngu sohyial nɛtwɛk so. Nanso, wei betumi asɛe obi din anaa ama ne gyidi ayɛ mmerɛw.

  Bible nnyinasosɛm: Ro 14:13; Efe 4:29

HWƐ VIDEO A YƐATO DIN WOKƆ SOHYIAL NƐTWƐK SO A, HWƐ YIE, NA DWINNWEN SƐNEA WOBƐKWATI TEBEA A EDIDI SO YI: