Nea ɛmaa Dawid tumi dii Goliat so nkonim ne sɛ, ɔde ne ho too Yehowa so. (1Sa 17:45) Yehowa ani gye ho sɛ ɔde n’ahoɔden bedi ama n’asomfo nyinaa. (2Be 16:9) Dɛn na yɛyɛ a ɛbɛkyerɛ sɛ yɛde yɛn ho ato Yehowa so na ɛnyɛ yɛn suahu anaa yɛn ahoɔden so? Nneɛma mmiɛnsa a yebetumi ayɛ ni:

• Taa bɔ mpae. Sɛ wudi mfomso bi a, bɔ mpae srɛ bɔnefakyɛ. Nanso ne papa mu no, sɛ biribi resɔ wo ahwɛ a, bɔ mpae srɛ ahoɔden a wode begyina ano sen sɛ wobɛkɔ akɔyɛ bɔne ansa na woabɔ mpae. (Mt 6:12, 13) Sɛ wusi gyinae bi a, wubetumi abɔ mpae asrɛ Yehowa sɛ onhyira so. Nanso ne papa mu no, bɔ mpae srɛ no sɛ ɔmma wo nyansa ne akwankyerɛ ansa na woasi gyinae no.—Yak 1:5

• Yɛ nhyehyɛe a wode bɛkenkan Bible na woasua ade daa. Kenkan Bible da biara. (Dw 1:2) Nsɛm a esisii a Bible ka ho asɛm no, gye bere dwinnwen ho na fa asuade a ɛwom no yɛ adwuma. (Yak 1:23-25) Afei nso ɛyɛ a siesie wo ho ansa na woakɔ asɛnka; mfa wo ho nto wo suahu so. Ansa na wobɛkɔ adesua no, di kan sua nea yebesusuw ho no na ama woanya so mfaso pii

• Wo ne Yehowa ahyehyɛde no nyɛ baako. Mma Yehowa ahyehyɛde no nnkɔ nnnyaw wo; fa akwankyerɛ biara a wɔde ma yɛn no yɛ adwuma ntɛm. (Nu 9:17) Sɛ mpanyimfo no de afotu ne akwankyerɛ ma a, tie.—Heb 13:17

HWƐ VIDEO A YƐATO DIN BIRIBIARA NNI HƆ A ENTI ƐSƐ SƐ YESURO ƆTAA NO. WUWIE A, BUA NSƐMMISA A EDIDI SO YI:

• Nneɛma a ɛyɛ hu bɛn na anuanom faa mu?

• Dɛn na ɛboaa wɔn ma wotumi gyinaa ano?