Dɛn na Yebetumi Asua nhoma no te sɛ Bible Kyerɛkyerɛ nhoma no ara. Yɛde ne nyinaa kyerɛkyerɛ nkurɔfo nokware no. Yɛahyehyɛ Dɛn na Yebetumi Asua nhoma no mu nsɛm te sɛ Bible Kyerɛkyerɛ nhoma no. Nanso Dɛn na Yebetumi Asua nhoma no mu nyɛ den, na emu mfatoho nso da fam. Wɔn a Bible Kyerɛkyerɛ nhoma no mu yɛ den ma wɔn no na yɛayɛ nhoma foforo yi ama wɔn. Dɛn na Yebetumi Asua nhoma no, nkekaho nnim. Nea yɛde asi anan ne “nsɛm bi mu nkyerɛkyerɛmu.” Nsɛmfua ne nsɛm bi a emu yɛ den no, yɛakyerɛkyerɛ mu wɔ hɔ. Dɛn na Yebetumi Asua nhoma no, nsɛmmisa nni eti biara mfiase. Adaka a yɛde yɛ ntĩmu nso nnim. Mmom wohwɛ eti biara awiei a, Bible mu nokware a ɛwom no, wɔabɔ no mmua wɔ hɔ. Yebetumi de Dɛn na Yebetumi Asua nhoma no ama bere biara, te sɛ Bible Kyerɛkyerɛ nhoma no. Sɛ yɛde Dɛn na Yebetumi Asua nhoma no reyɛ Bible adesua a, “nsɛm bi mu nkyerɛkyerɛmu” ne “nsɛntitiriw” afã no, yɛde bɛyɛ adwuma sɛn?

NSƐNTITIRIW: Nnipa pii wɔ hɔ a, sɛ yɛne wɔn reyɛ Bible adesua na yɛkenkan nkyekyɛm a ɛwɔ Bible Kyerɛkyerɛ nhoma no mu na yɛbisa wɔn nsɛm no a, ɛkɔ yiye paa. Nanso yɛmfa no sɛ osuani no nnim akenkan papa anaa ɔnte kasa no yiye. Ɛba saa a, wubetumi de “nsɛntitiriw” a ɛwɔ Dɛn na Yebetumi Asua nhoma no ti biara awiei ayɛ adesua no. Muwie a, na woahyɛ no nkuran sɛ n’ankasa nkenkan eti no mu nsɛm no. Mofa “nokwasɛm” baako biara a, mubetumi de bɛyɛ simma 15 asua. Nsɛntitiriw afã no nkyerɛkyerɛ nsɛm mu nkɔ akyiri, enti wo a woyɛ ɔdawurubɔfo no, ɛsɛ sɛ wusua no yiye paa, na ama woahu nea ɛbɛboa osuani no. Sɛ ɔdawurubɔfo no de eti no yɛ adesua no a, ɛnde obetumi de “nsɛntitiriw” no ayɛ ntĩmu.

NSƐM BI MU NKYERƐKYERƐMU: Nsɛmfua ne nsɛm bi a emu yɛ den wɔ nhoma no mu. Sei na yɛahyehyɛ no wɔ “nsɛm bi mu nkyerɛkyerɛmu” afã hɔ: Eti a edi kan mu deɛ na edi kan, na eti a ɛto so mmienu adi so. Saa ara na wɔahyehyɛ no kosi eti a etwa to. Ɔdawurubɔfo no pɛ a, nsɛm bi mu nkyerɛkyerɛmu afã a ɛwɔ Dɛn na Yebetumi Asua nhoma no mu no, obetumi ne osuani no asusuw ho aka adesua no ho.