NEA ENTI A ƐHO HIA: Tɛlɛfon so adansedi yɛ ɔkwan baako a yebetumi afa so adi “asɛmpa no ho adanse fefeefe.” (Aso 20:24) * Sɛ tebea bi nti, yɛrentumi nkɔ nkurɔfo fie nkɔka asɛmpa no nkyerɛ wɔn a, yebetumi afa tɛlɛfon so ayɛ saa.

WOBƐYƐ NO SƐN:

• Siesie wo ho. Paw asɛm bi a nkurɔfo ani begye ho na kyerɛw nea wopɛ sɛ woka no to hɔ. Afei pɛ asɛm tiawa bi a ɛbɔ asɛm a wopɛ sɛ woka no mua, na sɛ ɛba sɛ onii a worefrɛ no no antumi amfa na afiri anaa voicemail no fa a, woatumi aka agu mu. Sɛ wotena pon ho na wode asɛm a woasiesie sɛ wobɛka no to so a, ɛboa paa. Ɛnyɛ ɛno nko ara, fa wo fon anaa tablɛt a woabue JW Library^® anaa jw.org^® wɔ so no nso to pon no so

• Mma wo yam nhyehye wo. Kasa sɛnea wokasa daa. Sereserew, na wo ne onipa no mmɔ nkɔmmɔ te sɛ nea wuhu no. Sɛ wo ne onipa no rekasa a, ma wo kasa nkɔ yɔɔ na ɛntoatoam. Sɛ wo ne ɔdawurubɔfo baako anaa mmienu bom yɛ tɛlɛfon so adansedi a, ɛboa paa. Sɛ ofiewura no bisa asɛm bi a, tĩ mu sɛnea ɛbɛyɛ a nea ɔka wo ho no bɛte na waboa wo

• Yɛ sankɔhwɛ ho nhyehyɛe. Sɛ onipa no kyerɛ asɛm no ho anigye a, wubetumi agyaw no asɛmmisa bi a mobɛbɔ ho nkɔmmɔ bere foforo. Bisa no sɛ, sɛ ɔpɛ a wubetumi afa e-mail so de nhoma pɔtee bi amena no. Ɔpɛ nso a wubetumi afa text message anaa e-mail so de yɛn video no bi amena no. Sɛ ɛbɛyɛ yiye a, ka biribi a ɛwɔ yɛn wɛbsaet hɔ ho asɛm kyerɛ no