Ahohiahia kɛse no abɛn paa, enti yɛn asɛnka adwuma no nso gye ntɛmpɛ. (Mme 24:11, 12, 20) Ade biako a yebetumi de aboa nkurɔfo ne wɛbsaet kaad a yɛde bɛtwe wɔn adwene akɔ Onyankopɔn Asɛm ne yɛn wɛbsaet no so. Ahyɛnsode bi wɔ kaad no so a sɛ woskaane a etumi de wo kɔ baabi a wubehu video a ɛne Adɛn Nti na Ɛsɛ sɛ Wusua Bible? na sɛ ofiewura no pɛ nsɛm foforo anaa ɔpɛ sɛ yɛne no sua Bible nso a, obetumi abisa wɔ hɔ. Ebinom mpɛ sɛ wogye yɛn nhoma, nanso wɔn ani gye ho sɛ wɔbɛkɔ yɛn wɛbsaet hɔ. Ɛba saa a, ntwentwɛn wo nan ase sɛ wode wɛbsaet kaad no bi bɛma wɔn. Nanso sɛ obi ani nnye asɛm no ho a, ɛnsɛ sɛ yɛma no kaad no bi.

Ɛmfa ho baabiara a wowɔ no, wubetumi ne obi abɔ wɛbsaet kaad no ho nkɔmmɔ. Wubetumi aka sɛ: “Mewɔ biribi a mepɛ sɛ mede ma wo. Kaad yi de wo bɛkɔ wɛbsaet bi so a wubenya video ne nsɛm foforo pii a wuntua hwee.” (Yoh 4:7) Wɛbsaet kaad yi yɛ nketewa, enti wubetumi de kakra ahyɛ wo ho na sɛ wunya kwan a wode ama nkurɔfo.