AFE A WƆWOO NO: 1941

ƆMAN A OFI MU: BENIN

KAN NO: NA ƆWARE MMEA BEBREE, NA NA ƆTAN YEHOWA ADANSEFO

ƆBRA A NA MEWOM:

Yɛwoo me wɔ Cotonou; ɛyɛ kurow kɛse bi a ɛwɔ Benin. Wɔde Katolek som na ɛtetee me, nanso na mentaa nkɔ asɔre. Baabi a na mete no, na Katolekfo pii ware mmienu anaa nea ɛboro saa. Saa bere no, sɛ obi ware mmea mmienu anaa nea ɛboro saa a, na aban nkasa ntia. Enti m’ani fii no, mewaree mmea nnan.

Afe 1970 mu no, ebinom tew aban no so atua. Ná ɛyɛ me sɛ nea wɔreyɛ no bɛboa ama nneɛma akɔ yiye wɔ ɔman no mu. Enti mede me ntoma kɔbɔɔ wɔn de ano, na mede me hyɛɛ amanyɔsɛm mu. Wɔn a mede me ho kɔbɔɔ wɔn no, na wɔmpɛ Yehowa Adansefo asɛm, efisɛ na Adansefo no mfa wɔn ho nhyehyɛ amanyɔsɛm mu. Enti yetuu yɛn ani sii wɔn so. Afe 1976 mu no, yɛpamoo Yehowa Adansefo a wɔyɛ asɛmpatrɛwfo a na wofi aman foforo so no fii ɔman no mu. Ná m’adwene yɛ me sɛ wɔrentu wɔn nan nsi ɔman no mu bio.

SƐNEA BIBLE NO SESAA M’ASETENA:

Afe 1990 mu no, atuatew no gyaee. Asɛmpatrɛwfo a yɛwɔɔ wɔn atikɔ a na ɛyɛ me sɛ wɔremma bio no, wɔsan yii wɔn ti. Ɛyɛɛ me nwonwa paa. Nea mekae ara ne sɛ, ‘Nkurɔfo yi, ɛbɛyɛ sɛ Onyankopɔn ka wɔn ho.’ Emu hɔ baabi no, minyaa adwuma foforo. Wɔn a na me ne wɔn yɛ adwuma no, na baako yɛ Ɔdansefo. Miduu hɔ no, ankyɛ na ofii ase sɛ ɔreka Bible mu asɛm akyerɛ me. Ɔne me kenkan kyerɛwnsɛm ahorow a ɛkyerɛ sɛ Yehowa yɛ Nyankopɔn a ɔwɔ ɔdɔ, na obu atɛntrenee. (Deuteronomium 32:4; 1 Yohane 4:8) Saa suban yi ma mebɛpɛɛ Yehowa asɛm paa, na na mepɛ sɛ misua ne ho ade pii. Ɛno nti mifii ase ne no suaa Bible.

Ankyɛ koraa na mifii ase kɔɔ Ahenni Asa so. Ade baako a na ɛyɛ me fɛ paa wɔ Adansefo no ho ne ɔdɔ kann a na ɛwɔ wɔn ntam no. Worenhu sɛ wei yɛ bibini anaa buroni, anaa wei yɛ sikani anaa hiani. Me ne Adansefo no bɔe no, mibehuu sɛ wɔn paa ne Yesu akyidifo anaa Kristofo amapa.—Yohane 13:35.

Mibehuu sɛ, sɛ metumi asom Yehowa a, ɛsɛ sɛ migyae Katolek asɔre no. Ná saa gyinaesi no nyɛ bayerɛ a aberewa adwo, efisɛ na misuro sɛ nkurɔfo bɛkeka me ho nsɛm. Ɛno nti ɛkyɛe paa ansa na meretumi asi saa gyinae no. Nanso Yehowa boaa me ma minyaa akokoduru kotwaa me din fii asɔre no mu.

Wei da nkyɛn a, na nsakrae kɛse bi wɔ hɔ a ɛsɛ sɛ meyɛ. Bere a meresua Bible no, mibehuu sɛ Onyankopɔn mpene awaredodow so. (Genesis 2:18-24; Mateo 19:4-6) Onyankopɔn ani so de, na me yere a odi kan no ne me yere. Enti me ne me yere a odi kan no de yɛn aware no kɔhyɛɛ aban nhoma mu, ɛnna memaa mmea a aka no kɔe. Nanso mannyaw wɔn saa; meyɛɛ nhyehyɛe a ɛbɛma wɔn nsa aka nea wohia nyinaa. Akyiri yi, mmea a na me ne wɔn te no, emu mmienu bɛyɛɛ Yehowa Adansefo.

SƐNEA ABOA ME:

Ɛwom, me yere da so ara yɛ Katolekni, nanso gyinae a masi sɛ mɛsom Yehowa no, ɔnkasa ntia. Me ara mihu sɛ mabɛyɛ okunu pa, na me yere nso di ho adanse.

Kan no, na ɛyɛ me sɛ, sɛ mede me ho hyɛ amanyɔsɛm mu a, metumi de mpontuo aba me mpɔtam. Nanso nea na mereyɛ no nyinaa, na ɛte sɛ nea merehwie nsu agu kɛntɛn mu. Mabehu sɛ Onyankopɔn Ahenni nko ara ne adasamma haw ano aduru. (Mateo 6:9, 10) Meda Yehowa ase sɛ, wakyerɛ me kwan a mefa so a, ɛbɛma m’ani agye paa wɔ abrabɔ mu.

AFE A WƆWOO NO: 1977

ƆMAN A OFI MU: BRAZIL

KAN NO: NÁ ƆYƐ PENTECOST SƆFO

ƆBRA A NA MEWOM:

Wɔtetee me wɔ kurow bi a wɔfrɛ no Itu a ɛwɔ São Paulo. Nea na wɔde nim kurow no paa ne korɔn ne atuturasɛm.

Ɛno nti, na mepɛ atuturasɛm paa, na na meyɛ oguamanfo. Afei nso na metɔn nnubɔne. Eduu baabi no, me ara mibehui sɛ, bra a merebɔ no, ɛyɛ nneɛma mmienu; sɛ mankɔda afiase a, wɔbɛbɔ m’amena. Enti mituu me ho fo gyaee. Mede me ho kɔbɔɔ Pentekostfo, na akyiri yi mebɛyɛɛ ɔsɔfo.

Ná migye di sɛ asɔfodwuma a mereyɛ no bɛma manya akwannya aboa nkurɔfo. Ná mekɔ radio steehyɛn a ɛwɔ mantam no so kɔka nyamesɛm, enti na nkurɔfo nim me paa. Nanso bere rekɔ so no, mibehui sɛ asɔre no akannifo nnwen asɔremma no ho. Nea na enye koraa ne sɛ, na wonni nyamesuro. Da biara wɔsɔre a, sɛnea wobenya sika nko ara na na ehia wɔn. Enti misii gyinae sɛ mɛtwe me ho afi wɔn ho.

SƐNEA BIBLE NO SESAA M’ASETENA:

Bere a mifii ase ne Yehowa Adansefo suaa ade no, ankyɛ koraa na mihui sɛ wɔda mu fua; wɔnte sɛ nsɔrensɔre a aka no. Nea edi kan, ɛnyɛ wɔn ano kɛkɛ na wɔde ka sɛ wɔdodɔ wɔn ho, mmom na wɔn abrabɔ nso kyerɛ saa. Nea ɛto so mmienu, wɔmfa wɔn ho nhyɛ amanyɔsɛm mu, na wɔnkɔ ɔko. (Yesaia 2:4) Saa nneɛma mmienu yi na ɛma mihuu sɛ, wɔn som no na ɛyɛ nokware. Wɔn na wɔnam ɔkwan ketewa a ɛkɔ daa nkwa mu no so.—Mateo 7:13, 14.

Metenaa ase hui sɛ, sɛ metumi asɔ Yehowa ani a, ɛsɛ sɛ meyɛ nsakrae akɛse wɔ m’abrabɔ mu. Ɛsɛ sɛ minya bere paa ma m’abusua. Afei nso na ɛsɛ sɛ mebrɛ me ho ase. Ná ɛnna fam sɛ mɛyɛ saa nsakrae yi, nanso Yehowa mmoa so mitumi yɛe. Me yere koraa de, na ɛyɛ no nwonwa sɛ matumi asesa saa. Nea ɛte ne sɛ, ofii ase ne Yehowa Adansefo suaa Bible ansa na me ne wɔn resua ade. Enti ɔno de na wasua ade adu akyiri. Yefii ase suaa Bible no, ankyɛ biara na yesii gyinae sɛ yɛpɛ sɛ yɛbɛyɛ Yehowa Adansefo. Enti wɔbɔɔ yɛn mmienu nyinaa asu da koro.

SƐNEA ABOA ME:

Me ne me yere ani agye paa. Mmofra mmiɛnsa a yɛwɔ no, seesei yɛreboa wɔn ama wɔne Yehowa afa adamfo. Mitumi hu sɛ, yɛn abusua no wɔ anigye ankasa. Meda Yehowa ase sɛ wama mahu nokware a ɛwɔ n’Asɛm Bible mu no. Sɛ ɛnyɛ ɛno a, anka minnim nea m’abrabɔ bɛyɛ.

AFE A WƆWOO NO: 1957

ƆMAN A OFI MU: AUSTRALIA

KAN NO: ƆFAA ATEETEE MU WƆ NE MMOFRAASE

ƆBRA A NA MEWOM:

Minyin wɔ kurow bi a wɔfrɛ no Newcastle mu; ɛwɔ New South Wales. Ná yɛyɛ mmofra nson, na me na na meyɛ panyin. Ná me maame ne me papa nyinaa yɛ basabasa. Me papa mpo de, na ɔwe nsã ka ho. Ná me maame boro me paa, na na ɔsan didi me atɛm. Ná ɔtaa ka kyerɛ me sɛ, meyɛ akwadaa bɔne, na wɔbɛhyew me wɔ bonsam gya mu. Ná saa asɛm no taa bɔ me hu paa.

Ɛtɔ da a, na me maame tumi boro me pirapira me. Enti na metaa toto sukuu mu. Midii mfe 11 no, aban no bɛtew me fii m’awofo ho. Akyiri yi, wɔde me kɔtenaa asɔrefo bi nkyɛn. Nanso midii mfe 14 no, miguan fii hɔ. Ná mempɛ sɛ mɛsan akɔ fie, enti mebɛyɛɛ adedamfikyiri. Ná mededa mmɔnten so wɔ Kings Cross wɔ Sydney.

Mifii ase nom nnubɔne, na na mewe nsã. Ɛno da nkyɛn a, na mehwɛ ponografi, na mebɛyɛɛ tuutuuni. Da koro bi, asɛm bi too me ma me ho mmoa nyinaa guanee. Baabi a na mete no, na ɛyɛ nightclub wura bi de. Anwummere bi, mihuu sɛ mmarima mmienu bi aba ne nkyɛn, enti ɔkaa sɛ menkɔ pia mu hɔ. Mehyɛ hɔ no, metee sɛ owura no a mete ne fie hɔ no ne mmarima no rebɔ nkɔmmɔ. Ná ɔpɛ sɛ ɔtɔn me ma saa mmarima no. Wɔyɛɛ sɛ wɔde me bɛhyɛ container mu afa po so de me akɔ Japan ama makɔyɛ adwuma wɔ hɔ. Metee no, me yam hyee me, enti mefaa mpomma no mu guanee.

Mihyiaa ɔbarima bi wɔ Sydney, na ɔyɛ ɔhɔho, na mekaa m’akosɛm kyerɛɛ no. Ná m’adwene yɛ me sɛ ɔbɛma me sika na makɔ me baabi. Nanso ɔde me kɔɔ baabi a ɔte. Yeduu hɔ no ɔmaa me nsu guaree, ɛpɛɛ biribi ma me dii. Obi a merebedidi na makɔ no, afei me na maka hɔ yi. Afe baako akyi, yɛwaree.

SƐNEA BIBLE NO SESAA M’ASETENA:

Bere a mifii ase ne Yehowa Adansefo suaa Bible a mibehui sɛ Satan na ɔhyɛ amane a yehu nyinaa akyi no, me bo fuwii paa. Efisɛ nea na wɔakyerɛkyerɛ me ne sɛ, Onyankopɔn na ɔma yehu amane. Ade foforo a mibehui nso ne sɛ, Yehowa nyɛ nnipa ayayade wɔ hellgya anaa bonsam gya mu. Wei maa me koma tɔɔ me yam paa, efisɛ efi me mmofraase nyinaa, na saa asɛm no bɔ me hu paa.

Nea na mepɛ wɔ Adansefo no ho ne sɛ, gyinae biara a wobesi no, na wɔde gyina Bible so. Afei na ɛnyɛ wɔn ano kɛkɛ na wɔde ka sɛ wogye Onyankopɔn di, mmom na wɔn abrabɔ nso kyerɛ saa. Ɛno da nkyɛn a, na m’asɛm yɛ den paa, nanso ne nyinaa akyi no, na wɔdɔ me, na na wobu me paa.

Ná me haw paa ne sɛ, mete nka sɛ me so nni mfaso. Ɛtɔ da a na ɛyɛ me sɛ mamma wiase koraa a anka eye. Mebɔɔ asu bɛyɛɛ Yehowa Danseni akyi mpo no, na meda so ara wɔ saa atenka no. Me ara mitumi hu sɛ medɔ Yehowa. Nanso na minnye nni sɛ ɔbɛdɔ obi te sɛ me.

Mebɔɔ asu wiei no, mfe 15 akyi, biribi sii ma m’adwene sesae. Onua bi maa ɔkasa wɔ Ahenni Asa so, na ɔkenkan asɛm a ɛwɔ Yakobo 1:23, 24. Saa kyerɛwsɛm no de Onyankopɔn Asɛm toto ahwehwɛ ho, na ɛma yehu sɛnea Yehowa hu yɛn. Enti mibisaa me ho sɛ, sɛnea mihu me ho no, saa ara na Yehowa nso hu me anaa? Mfitiase no de, na mempɛ sɛ megye atom sɛ me ho hia Yehowa, na ɔdɔ me.

Nna kakraa akyi no, mekan kyerɛwsɛm bi a ɛsesaa m’asetena. Kyerɛwsɛm no wɔ Yesaia 1:18. Yehowa kaa wɔ hɔ sɛ: “Afei mommra, na momma yɛntoto nneɛma yiye. Ɛwom, mo bɔne te sɛ koogyan, nanso ɛbɛyɛ fitaa sɛ sukyerɛmma.” Ná ɛte sɛ nea Yehowa reka akyerɛ me sɛ, “Hwɛ Vicky, bra ma yɛntoto nneɛma yiye. Minim wo, minim bɔne a woayɛ nyinaa, minim sɛ wowɔ koma pa. Medɔ wo.”

Saa anadwo no, nna baako mpo ankɔ m’ani. Ná meda so ara te nka sɛ Yehowa rentumi nnɔ me. Nanso mifii ase dwinnwen Yesu agyede afɔre no hɔ. Ɛhɔ ara mihuu sɛ, Yehowa anya me ho abotare akyɛ, na wada ɔdɔ adi akyerɛ me. Nanso na ɛte sɛ nea mereka akyerɛ no sɛ, “Minnye nni sɛ wo dɔ no betumi aso me so, na wɔn a wo Ba no bewu gyee wɔn no, minnye nni sɛ meka ho.” Ná ɛte sɛ nea matam agyede afɔre no atow abɔ Yehowa sɛ onnye n’ade. Nanso bere a metoo me bo ase dwinnwen agyede afɔre no ho kɔɔ akyiri no, mibehui sɛ ampa Yehowa dɔ me.

SƐNEA ABOA ME:

Seesei m’abrabɔ ho atew, manya anidaso, na mete nka sɛ me so wɔ mfaso. M’aware rekɔ yiye, na m’ani agye paa sɛ mede me suahu reboa afoforo. Seesei mete nka sɛ me ne Yehowa adamfofa no mu ayɛ den.

AFE A WƆWOO NO: 1974

ƆMAN A OFI MU: RUSSIA

KAN NO: NÁ N’ANI GYE AHUHUDWOM A ANO YƐ DEN HO

ƆBRA A NA MEWOM:

Yɛwoo me wɔ Votkinsk. Saa kurow no ara na wɔwoo odwontofo a wagye din a wɔfrɛ no Pyotr Ilich Tchaikovsky no. Ná yɛyɛ ahiafo. Ná me papa yɛ onipa pa, nanso na ne haw baako ne sɛ, ɔwe nsa. Enti da biara na efie redɛw; asomdwoe nni hɔ.

Bere a mekɔ sukuu no, na minnim ade papa. Eduu baabi mpo no, na mete nka sɛ mfaso biara nni me so. Ná menka me ho nkɔ nnipa mu, na na minnye afoforo nni. Ná sukuukɔ abɛyɛ adesoa ama me. Ɛtɔ da a wotumi ma yɛn dwumadi bi, na wɔaka sɛ yemmegyina sukuufo no anim na yɛnyɛ. Ɛba saa a, sɛ́ mebue m’ano akasa koraa no, na ayɛ asɛm. Nanso yɛreka yi, sɛ me nko ara na mewɔ hɔ a, anka metumi akyerɛkyerɛ mu. Ɛno nti, bere a merewie sukuu no, nea m’atikyafo kyerɛw faa me ho ne sɛ: “Kasa ho yɛ den ma me dodo.” Saa asɛm no beree me kuru mu, ade yi, me ara mete nka sɛ me so nni mfaso dedaw, ɛnna wɔasan akyerɛw wei afa me ho. Ebubuu me paa. Ɛma mibisaa me ho sɛ, ‘Me koraa mebaa wiase bɛyɛɛ dɛn?’

Mifii ase nom nsa. Saa bere no, na minnya nnii mfe 20. Mfiase no de, na mekaa sɛ nsa no reboa me. Nanso, sɛ meboro a, na ɛma me tiboa bu me fɔ. Ná asetena koraa afono me. Ɛtɔ da a na mitumi to pon mu hyɛ fie nna pii a mimpue. Eduu baabi mpo de, na mepɛ sɛ mikum me ho.

Bere a midii mfe 20 no, ahuhudwom a ano yɛ den bedii me ti. Ná mekaa sɛ, me haw no aduru ara no no. Sɛnea nnwom no ano yɛ den na ano yɛ hyew no, na m’ani gye ho. Sɛ mitie a, asɛ akɔm asi me so. Mifii ase ne wɔn a wɔn ani gye saa nnwom no ho bɔe. Eduu baabi no, migyaa me ti nwi ma efuu kuhaa, na mebɔɔ m’asom tokuro. Afei sɛnea na annwontofo a mepɛ wɔn nnwom no siesie wɔn ho no, mifii ase siesiee me ho saa. Nkakrankakra, m’ani so bɛyɛɛ krakra, na na metaa ne m’abusuafo ko.

Ná ɛyɛ me sɛ nnwom a ɛte saa bɛma m’ani agye. Nanso anigye a ɛde anigye de, na minni bi. Me ara mihui sɛ m’abrabɔ sɛe ara na ɛresɛe! Annwontofo a na m’ani gye wɔn nnwom ho no, akyiri yi mibehuu sɛ ebi abrabɔ nnye koraa. Wei haw me paa efisɛ mamfa saa ansusuw wɔn.

Ɛsan baa me mu sɛ minkum me ho. Wei koraa de na ano yɛ den sen kan no. Nanso mede m’ani too me maame, efisɛ miwu a, na minnim nea ɔbɛyɛ ne ho. Ná ɔdɔ me paa, na na wayɛ bi ama me. Enti na m’adwene atu afra. Ade yi, na mepɛ sɛ miwu fi wiase, nanso me maame nti na mintumi nkum me ho.

Nea ɛbɛyɛ na mayi m’adwene afi biribiara so no, mifii ase kenkan nhoma ahorow a agye din wɔ Russia kasa mu. Nhoma no baako a mekenkanee no, na ɛfa ɔbarima bi a ɔsom wɔ asɔredan mu ho. Mekenkan wiei no, prɛko pɛ, minyaa atenka bi sɛ menyɛ biribi mma Onyankopɔn, na memmoa nkurɔfo. Mebɔɔ mpae, na mekaa me koma mu asɛm nyinaa kyerɛɛ Onyankopɔn. Ná menyɛɛ biribi saa da. Mesrɛɛ no sɛ ɔmmoa me ma minhu sɛnea mɛbɔ me bra. Migu so rebɔ mpae no, mihuu sɛ me ho adwo me fɔmm. Nea ɛyɛ nwonwa koraa ne sɛ, nnɔnhwerew mmienu akyi no, metee sɛ obi rebɔ me pon mu. Menkɔhwɛ a Yehowa Danseni bi na ogyina hɔ yi; ɔse ɔpɛ sɛ ɔne me sua Bible. Migye di sɛ, saa da no, me mpaebɔ no ho mmuae na minyae no. Efi saa da no rekɔ no, nneɛma sesae wɔ m’abrabɔ mu.

SƐNEA BIBLE NO SESAA M’ASETENA:

Ahuhudwom a na mitie no, metoo ɛho biribiara gui. Ɛwom na wei nna fam, nanso mimiaa m’ani yɛe. Nnwom no de, ɛkyɛe paa ansa na mereyi afi me tirim. Sɛ menam baabi na mete sɛ wɔrebɔ saa nnwom no bi a, na ɛde me kɔ me nkyi. Ná mafi ase de nneɛma pa pii rehyɛ me koma ne m’adwene mu, enti na mempɛ sɛ mekaakae abrabɔ a na mewom no koraa. Nea meyɛe ne sɛ, mmeae a na minim sɛ wɔbɔ saa nnwom no, na mintwam hɔ koraa. Afei sɛ me kan abrabɔ no besi me tirim a, na mebɔ mpae denneennen. Mpae a na mebɔ no boaa me minyaa “Onyankopɔn asomdwoe a ɛboro ntease nyinaa so no.”—Filipifo 4:7.

Bere a meresua Bible no, mibehui sɛ, ɛsɛ sɛ Kristofo ka nea wɔresua no ho asɛm kyerɛ afoforo. (Mateo 28:19, 20) Ná ɛyɛ me sɛ merentumi nyɛ saa da. Nanso mehwɛ sɛnea Bible a meresua no ama m’ani agye, na ama me koma atɔ me yam no a, na mihu sɛ ehia sɛ afoforo nso te bi. Anwonwasɛm ne sɛ, adwene a na mewɔ sɛ me so nni mfaso no, sɛɛ ano aduru ara ne sɛ mɛka asɛmpa no bi akyerɛ afoforo. Amma mammu me ho abomfiaa bio. Esiane sɛ mekaa nea na meresua no ho asɛm kyerɛɛ afoforo nti, ɛmaa me gyidi yɛɛ den.

SƐNEA ABOA ME:

Seesei maware, na m’ani gye. Ɛyɛ me dɛ sɛ matumi aboa me maame ne me nuabea ne nnipa pii ama wɔasua Bible no. Seesei me ara mihu sɛ, mede m’abrabɔ reyɛ biribi a mfaso wɔ so, efisɛ meresom Onyankopɔn na mereboa nkurɔfo ama wɔasua ne ho ade.