Ahenni no ‘Ba’—Efi He?
Ti 4
Ahenni no ‘Ba’—Efi He?
1. Nea 1 Timoteo 1:17 ne Adiyisɛm 15:3 ka no nti, nsɛm a ehia bɛn na wobisa?
ESIANE sɛ Bible ka Yehowa ho asɛm sɛ “mmeresanten Hene” nti, dɛn nti na ɛsɛ sɛ ahenni bi ‘ba’ na abɛtew ne din ho? (1 Timoteo 1:17; Adiyisɛm 15:3) Na efi he na ɛba?
2. Tebea horow a ɛwɔ nniso mu bɛn na ɛde ahohorabɔ aba Onyankopɔn din so, na ɔkwan bɛn so?
2 Nea edi kan no, ɛda adi pefee sɛ ɛsɛ sɛ nsakrae kɛse bi ba sɛnea ɛbɛyɛ a wɔbɛsan de trenee, asomdwoe ne anigye aba asase yi so. Ɛnyɛ sɛ nniso nkorɛnkorɛ antumi anni wɔn aman mma yiyedi ho dwuma akwan horow pii so nko, na mmom basabasayɛ rekɔ so wɔ amanaman no ankasa ntam. Nitan, apereperedi ne aman ntam adwemmɔne paapae nkurɔfo ne mmusua mu. Tebea horow yi nka Ɔbɔadeɛ no atirimpɔw ho asɛmpa koraa na ama wɔde ahohorabɔ bebree aba ne din so.—Romafo 2:24; Hesekiel 9:9.
3. (a) Onyankopɔn Ahenni ‘ba’ asɛm yi mu dɛn? (b) Dɛn na ɛyɛ soronko koraa wɔ Ahenni no ho?
3 Sɛnea ɛbɛyɛ na wɔayɛ tebea no yiye no, yehia nniso soronko koraa bi. Na ɛno ne nea Yehowa de ma. Efi he na ɛba? Efi Yehowa ankasa a ɔte soro no hɔ. Ɛyɛ ahenni a ɛdan foforo, a ɛda Yehowa ankasa amansan tumidi adi kyerɛ. Enya ne tumi fi ahenni a Yehowa adi so fi mfiase no mu, bere tenteenten ansa na wɔbɔɔ yɛn soro ne asase yi. Esiane sɛ wonya fii Onyankopɔn soro ahyehyɛde no mu nti, saa ɔsoro nniso soronko yi nya Yehowa ahenni a ɛwɔ hɔ fi teteete no su ahorow a ɛyɛ nwonwa no bi.—Adiyisɛm 12:1, 2, 5.
YEHOWA AMANSAN TUMIDI
4. Asɛm a wɔkae wɔ Adiyisɛm 4:11 bɛn na ɛka Yehowa tumidi ho asɛm ma ɛfata?
4 Esiane sɛ Onyankopɔn na “ɔbɔɔ ade nyinaa” nti, ɔne abɔde a ɛwɔ hɔ nyinaa so Hene a ɔfata. Ɛsɛ sɛ wɔn a Onyankopɔn ma wɔn so de wɔn di hene wɔ soro mpo ‘hwehwe ase wɔ nea ɔte ahengua no so no anim, na wɔkotow nea ɔte ase daadaa no.’ Eyinom de ahobrɛase gye “mmeresanten Hene” no ahenni a ɛkorɔn sen biara no tom—sɛnea wɔn ho asɛm a wɔka bio yi kyerɛ no:
“Na woyiyi wɔn abotiri no gu ahengua no anim ka sɛ: [Yehowa], wofata sɛ wugye anuonyam ne nidi ne tumi, efisɛ wo na wobɔɔ nneɛma nyinaa, na wo pɛ nti na ɛyeyɛe na wɔbɔe.” (Adiyisɛm 4:10, 11; Efesofo 3:9)
Saa na wubu Onyankopɔn Ahenni anaa? Ɛsɛ sɛ ɛyɛ saa.
5. Sɛ wɔde toto nnipa nniso horow ho a, ɔkwan bɛn so na Yehowa ahenni di ade nyinaa so?
5 Wɔ adesamma mu no, ahenni di tumi sɛnea mmara te. Eyi hia na nhyehyɛe pa atra hɔ. Nea ɛtaa ba ne sɛ atemmufo a wodi nsɛm, mmarahyɛ bagua a wɔhyɛ mmara horow, ne ɔhene anaa ɔmampanyin a ɔhwɛ ma wodi mmara no so ka nniso ahorow ho. Wɔ amansan a Yehowa Nyankopɔn bɔe no mu no, odi dibea ahorow abiɛsa a ɛte saa nyinaa, sɛnea odiyifo Yesaia kyerɛ, bere a ɔka eyi no: “Na [Yehowa] ne yɛn temmufo, [Yehowa] ne yɛn mmarahyɛfo, [Yehowa] ne yɛn hene.” (Yesaia 33:22) Na Ɔhene Dawid de nsɛm yi ka ho sɛ: “[Yehowa] de n’agua asi soro na n’ahenni di ade nyinaa so.” (Dwom 103:19) Momma yɛnhwehwɛ saa ahenni no afã horow bi mu.
ONYANKOPƆN AMANSAN MMARA HOROW
6. Dɛn na ɛkyerɛ sɛ Onyankopɔn mmara horow korɔn?
6 Nnipa nniso horow hwehwɛ sɛ wɔkyerɛ wɔn nkoa a wɔyɛ adesamma no nneyɛe kwan, nanso wontumi nni abɔde mu tumi horow a ɛka wɔn asetra kɛse no so. Yehowa, a ɔyɛ Amansan Hene no, betumi, na ɔyɛ. Nyansahufo ho adwiriw wɔn wɔ sɛnea mmara horow a amansan a ani hu no kɔ so de di dwuma no yɛ pɛpɛɛpɛ no ho mpɛn pii. Eyinom yɛ Onyankopɔn mmara horow. Efisɛ mmara horow yi yɛ adwuma a ɛnsakra ma enti nnipa atumi akɔ ɔsram so, nam ahunmu mfiri horow so adi nkitaho, tumi di kan kyerɛ bere a owia bɛkyere ɔsram, na wɔayeyɛ nneɛma a ɛyɛ nwonwa mpempem pii. Onyankopɔn mmara horow na edi owia ne osutɔ so nso, na obetumi akyerɛ eyinom kwan ma ɛde nhyira abrɛ wɔn a wotie no.—Dwom 89:8, 11-13; Hiob 38:33, 34; Sakaria 14:17.
7. (a) Ɔkwan bɛn so na Yehowa mmara horow di Onyankopɔn a ɔyɛ no ho adanse? (b) Te sɛ Hiob no, ɛsɛ sɛ yebu Onyankopɔn akwan dɛn?
7 Onyankopɔn diyifo no reka ɔsoro abɔde akɛse pii no ho asɛm no, ose: “Momma mo ani so nhwɛ ɔsoro, na monhwɛ nea ɔbɔɔ eyinom. Ɔno na obu wɔn dɔm ano yi wɔn adi, na ɔbobɔ wɔn nyinaa din frɛfrɛ wɔn; ne tumi dodow ne n’ahoɔden kɛse nti obiara nka akyiri. So wunhui? So wontee ɛ? Daa Onyankopɔn ne [Yehowa] a ɔbɔɔ asase awiei no.” (Yesaia 40:26, 28) Mfe ɔpepepem pii mu na Yehowa nam nea wɔfrɛ no “adebɔ” mmara horow so adi n’amansan tɛtrɛɛ no nyinaa so. Adesamma abɔ mmɔden sɛ wɔbɛte saa mmara horow yi mu ahintasɛm no ase, nanso pii wɔ hɔ a ɛsɛ sɛ wosua! Wɔakɔ wɔn anim kakraa bi sen ɔbarima nokwafo a ɔtraa ase mfe 3,500 ni a ɔkaa eyi no: “Hwɛ eyinom ne n’akwan ano ano, na ɛho asutu bi nko na yɛte, na ne mmaninyɛ aprannaa a ɛbom no, hena na obehu mu?”—Hiob 26:14.
8. Onyankopɔn su ahorow bɛn nso na ɛba mu a ɛda no adi sɛ ɔyɛ Ɔdemafo Kɛse?
8 Nanso, wɔ yɛn asase yi bɔ mu no, Yehowa yɛɛ pii sen abɔde ho mmara horow so a obegyina de asi hɔ ara kwa. Ɔkaa ne nyansa a wontumi nte ase nwie ne ne dɔ a enni ano no ne ne tumi ne mmara horow boom de yɛɛ nsiesiei a ɛyɛ nwonwa maa asase sotefo a wɔbɛba daakye. Ayamye a wɔde hwɛ ade kɔ akyiri, ahokokwaw a ɛso nni bɛn ara na yebetumi ahu wɔ Onyankopɔn adebɔ nnwuma a ɛwɔ asase yi so no mu sɛɛ yi! (1 Yohane 4:8; Dwom 104:24; 145:3-5, 13) Sɛnea yehui wɔ ti a edi anim no bi mu no, Yehowa yɛ Ɔdemafo Kɛse ampa!
9. Dɛn ne nneɛma a ɛsɛ sɛ yɛda Onyankopɔn ase wɔ ho no bi?
9 Ɛsɛ sɛ yɛda Onyankopɔn ase wɔ ne nsiesiei horow a ɛyɛ nwonwa no nyinaa ho. Afei nso, ɛsɛ sɛ yɛda no ase wɔ ɔkwan a ɔfaa so nwenee yɛn nnipa na ɔyɛɛ yɛn a yɛwɔ yɛn honam ne adwene fam tumi horow ne yɛn nkate horow a yɛnam so betumi anya n’abɔde ahorow no mu anigye, no. Yiw ɛsɛ sɛ yesiesie yɛn ho gye tom wɔ Onyankopɔn anim sɛnea odwontofo no yɛe no, sɛ: “Meda wo ase sɛ woyɛɛ me ma ɛyɛɛ hu ne nwonwa; wo nneyɛe yɛ nwonwa, na me kra nim saa yiye. Me nnompe anhintaw wo, bere a woyɛɛ me ahintawee mu na wɔnwenee me, asase mu tɔnn no. Meyɛ mogya tɔw nko no, w’aniwa huu me, na wo nhoma mu wɔakyerɛw ne nyinaa, nna a wɔahyɛ asie na emu biako pɛ nnya mmae no.”—Dwom 139:14-16.
10. Dɛn na ɛkyerɛ sɛ Yehowa betumi atoto nsɛm yiye koraa wɔ asase so?
10 Amansan Hene Yehowa a ɔbɔɔ amansan ne nea ɛwɔ mu nyinaa, na ofi ne dɔ ne ne nyansa mu de nneɛma nhyehyɛe horow no sii hɔ maa ɛne ne trenee mmara hyiae no na Bible ka wɔ ne ho sɛ: “Trenee ne atemmu ne w’ahengua nnyinaso, adɔe ne nokware gyina w’anim.” (Dwom 89:14) Ampa ara sɛ Yehowa betumi de Ahenni nniso bi a ebesiesie nneɛma nyinaa wɔ asase yi so no aba. (Dwom 40:4, 5) Nanso ɔkwan bɛn so na ɔnam yɛ eyi?
AHINTASƐM BI ADIYI
11. (a) Dɛn nti na ɛsɛ sɛ yɛn ani gye nnɛ sɛ nokware nimdeɛ wɔ hɔ? (b) Yɛbɛyɛ dɛn ahu nea ɔne “Mikael” no, na ne din kyerɛ dɛn?
11 Bible no mu na yehu nkɔmhyɛ pii a ɛka sɛ Onyankopɔn de ahenni bi besi hɔ a ɛbɛtew ne din ho na ama wɔayɛ n’apɛde wɔ asase so no ho asɛm. Eyinom mu biako ne Daniel nkɔmhyɛ a ɛka “awiei bere” a “nimdeɛ adɔɔso” ho asɛm no. Yebetumi anya anigye sɛ nimdeɛ a ɛte saa wɔ hɔ ma yɛn nnɛ. Efisɛ Daniel ka kyerɛ yɛn sɛ:
“Na ɛbɛyɛ ahohia bere a efii sɛ ɔman bae no besi bere no so no ɛmmae da, na bere no mu na wobegye wo manfo afi mu.”
Sɛnea Daniel kae no, eyi bɛyɛ bere a ɔbapɔmma kɛse Mikael sɔre gyina hɔ ma Onyankopɔn nkurɔfo. Bible kyerɛ sɛ Mikael ne Yesu Kristo a ɔne Onyankopɔn atamfo ko sɛnea ɛbɛyɛ a ɔbɛtew Yehowa din ho. Ɛnde, sɛnea ɛfata no, edin “Mikael” kyerɛ sɛ “Hena Na Ɔte Sɛ Onyankopɔn?” efisɛ Mikael na ɔkyerɛ sɛ obiara nni hɔ a obetumi ne Yehowa amansan tumidi adi asi na wadi nkonim.—Daniel 12:1, 4; Adiyisɛm 12:7-10.
12. Dɛn ne nkɔmhyɛ mfonini a ɛwɔ Daniel 2:31-33 no, na dɛn nti na ɛsɛ sɛ yɛn ani gye ho nnɛ?
12 Daniel nkɔmhyɛ no nso kaa ɔdae bi a Babilon hene Nebukadnesar soe ho asɛm, ɔdae a ɛfa ahenni horow a ebedidi so aba ho. Ɔhene no werɛ fii nea ɔdae no fa ho ntɛm ara, ɛwom sɛ ɛkɔɔ so haw no kɛse de. Awiei no, “Nea oyi ahintasɛm adi,” Yehowa Onyankopɔn, de Daniel dii dwuma na ɔmaa ɔhene no huu nea ɔdae no kyerɛ nso na ɛnyɛ ɔdae no nko. (Daniel 2:29) Esiane sɛ nkɔmhyɛ mu dae yi mmamu kɔ so ara de bedu yɛn bere so na ɛtra nti, ɛsɛ sɛ yɛn ani gye nea ɛkyerɛ no ho yiye. Ɔdae no fa onipa “ohoni kɛse bi”—a ne hwɛbea yɛ hu ho. Wubetumi akenkan ho asɛm wɔ Daniel 2:31-33. Dɛn ho mfonini na saa ohoni no yɛ?
13. Dɛn ho mfonini na ohoni no afã horow no yɛ?
13 Daniel maa Nebukadnesar hui sɛ ne ti a ɛyɛ sika no gyina hɔ ma Babilon “hene,” ne sɛ ne nipadua no fã a ɛwɔ fam no gyina hɔ ma ahenni horow a ɛbɛba wɔ Babilon akyi no. Ɛnnɛ yebetumi ahu eyinom sɛ Medo Persia, Hela ne Roma ahemman ahorow a ɛwɔ tumi no, na “anan” no ateɛ abɛyɛ Anglo-Amerika Wiase Tumi a ɛbɔ ho abien wɔ nnɛ mmere yi mu no. Na nansoaa a emu bi yɛ “ɔnwemfo fã na emu bi yɛ dade” no nso ɛ? Wɔ nnansa yi mfe mu no, sohyialist akuw a agye din ama Anglo-Amerika Wiase Tumi a ɛte sɛ dade no ayɛ mmerɛw kɛse, sɛnea ohoni kɛse no nansoaa a ɛyɛ dade no ma ɛyɛɛ mmerɛw esiane sɛ ‘annya ɛfa mu afraye’ nti. Enti, ohoni a ɛyɛ hu yi gyina hɔ ma nnipa “ahene,” anaasɛ wiase tumi horow a wɔba nnidiso nnidiso a wɔba awiei bere a Onyankopɔn ahenni sɛe wɔn no.—Daniel 2:36-44.
14, 15. Dɛn na “ɔbo” no yɛ ohoni no, na yɛbɛyɛ dɛn atumi ahu nea saa “ɔbo” no yɛ?
14 Na, hwɛ! “Ɔbo” bi tew fi bepɔw bi ho anwonwa kwan so a “nsa biara nkura mu.” Dwumadi yi mfi onipa ahyehyɛde biara. Mmom no, Yehowa ankasa na ɔde ba, sɛnea ne pɛ kronkron te. Ɔbo no de ahoɔhare kɔ ohoni kɛse no so na ɛkɔbɔ ne nansoaa. Edwiriw nnipa nhyehyɛe mũ nyinaa ma enti ne nkae hwete sɛ mframa ano ntɛtɛw. Afei ɔbo no ankasa dan bepɔw kɛse a ɛyɛ asase so nyinaa ma.—Daniel 2:34, 35.
15 “Ɔbo” yi betumi ayɛ dɛn? Nkɔmhyɛ no yi akyinnyegye nyinaa fi hɔ bere a ɛka sɛ:
“Na ahene [Anglo-Amerika Wiase Tumi ne wiase tumi horow a edidi n’anim bae no nkae a ɛda so wɔ hɔ] no nna no mu no, ɔsoro Nyankopɔn bɛma ahenni a wɔrensɛe no da, na wɔrennyaw n’ahenni mma ɔman foforo bi so, na ebebubu ahenni horow no nyinaa ma asã, na ɛno de ebegyina daa.”—Daniel 2:44.
16. Sɛ yɛbɔ mpae sɛ “w’ahenni mmra” a, na nneɛma bɛn na yɛresrɛ?
16 Dɛn na eyi kyerɛ ma yɛn nnɛ? Ɛkyerɛ sɛ bere a yɛbɔ Onyankopɔn Ahenni no ‘ba’ ho mpae no, nokwarem no, yɛresrɛ sɛ ɔsoro Ahenni no mfa ne tumi a ɛsɛe ade no nsɛe nnipa nniso horow a antumi amfa asomdwoe ne yiyedi amma koraa no nyinaa mfi hɔ. Nea ɛyɛ anigye no, sɛ saa “ɔbo” no wie ne sɛe adwuma no yɛ a, ɛno ankasa benyin abɛyɛ nniso bepɔw a ɛbɛyɛ asase so nyinaa ma. Ɛde asomdwoe a adesamma nhuu bi da fi Ɔhene Salomo bere so bɛba, ‘asomdwoe pii a ɛbɛba akodu sɛ ɔsram nni hɔ bio’—a ɛkyerɛ daapem!—Dwom 72:7.
17. (a) Dɛn nti na ɛsɛ sɛ ayɔnkofa a ɛda “ɔbo” no ne “bepɔw” a efi mu no ntam no ma yenya ahotoso? (b) Dwuma bɛn bio na Ahenni no di? (d) Sɛnea wɔaka wɔ Dwom 85:8-12 no, ahotoso bɛn na ɛsɛ sɛ yenya?
17 Na “bepɔw” a wɔtew Ahenni “ɔbo” no fii mu no nso ɛ? (Daniel 2:45) Ɛsɛ sɛ “ɔbo” no dwumadi gyina bepɔw a efi mu no so na emu nneɛma yɛ te sɛ nea ɛwɔ bepɔw no mu ara pɛ, na saa na ɛte ampa nso. Wɔtew Ahenni tumidi yi fii mmeresanten Hene—Yehowa Nyankopɔn—Ahenni a edi ade nyinaa so no mu. Sɛnea Yehowa amansan nyinaa tumidi no yi ne su pa ahorow no nyinaa adi kyerɛ no, saa ara na ɛsɛ sɛ Ahenni a wɔtew fii saa tumidi no mu no nso ma Yehowa Nyankopɔn ne N’atirimpɔw ahorow akɛse no so. Ɛtew ne din ho denam n’atamfo a ɛsɛe wɔn de kyerɛ sɛ ɛnyɛ wɔn nnebɔne no fafafo. Ɛno na afei ahenni a ɛnam Kristo Yesu so yi de mmara ne nhyehyɛe pa ne ɔdɔ ne anigye hyɛ asase so ma, sakra no yɛ trenee ne asomdwoebea bi a Onyankopɔn bɔɔ ne tirim fi mfiase sɛ ɛnyɛ no. Ampa, ɛsɛ sɛ yɛkɔ so bɔ mpae sɛ ‘Ahenni no mmra’!—Dwom 85:8-12.
[Adesua no ho Nsɛmmisa]
