“Nnipakuw Kɛse” Kamfo Ɔhene No
Ti 16
“Nnipakuw Kɛse” Kamfo Ɔhene No
1, 2. (a) Yehowa fii ase maa ne nkɔmhyɛ a ɛwɔ Yesaia 60:22 no baam dɛn? (b) Ɔsoro nokware bɛn na woyii no adi wɔ 1935 mu wɔ ɔkwan a ɛyɛ nwonwa so?
YEHOWA nam ne diyifo so kae sɛ: “Nea osua koraa no bɛdan apem, na akumaa adan ɔman a ɛyɛ den. Me [Yehowa], mɛyɛ no ntɛm ne bere mu.” (Yesaia 60:22) Na, anwonwakwan so no, Yehowa ma ɛyɛɛ “ntɛm.” Wɔ 1935 mu no, Yehowa Adansefo boaboaa wɔn ho ano wɔ ɔmantam nhyiam ase wɔ Washington D. C., U.S.A. Ɛhɔ na wɔma wohui sɛ Yehowa reboaboa “nguan foforo” mu “nnipakuw kɛse” bi ano—nnipa a wosuro Onyankopɔn a, ɛnam Onyankopɔn Ahenni no ‘ba’ so no, wobenya daa nkwa wɔ paradise asase so.—Yohane 10:16; Adiyisɛm 7:9.
2 Adiyisɛm ti 7 ka ho asɛm sɛ: Wɔsɔw “kuw ketewa” a wɔyɛ Ahenni adedifo a wɔn dodow yɛ 144,000 no ano “akyi” no, wohu “nnipakuw kɛse a obi ntumi nkan wɔn a wofi aman ne mmusuakuw ne nkurɔfo ne ɔkasa nyinaa mu” sɛ wogyinagyina Onyankopɔn ahengua no anim. Wogye Yehowa amansan tumi a ɔnam ne Kristo so di no tom. Wɔde anigye kyerɛ sɛ nkwagye fi Onyankopɔn ne Oguammaa no. Sɛ́ kuw no, ɛrenhia sɛ wowu da, efisɛ wɔne “wɔn a wofi ahohia kɛse no mu” no nya daa nkwa wɔ asase a wɔatew so no so.—Adiyisɛm 7:4, 9, 10, 14; Luka 12:32.
3. (a) “Nea osua koraa” adan “apem” ampa? (b) Wobɛyɛ dɛn anya Adiyisɛm 7:15-17 no mmamu mu kyɛfa?
3 Woakogyina asomfo “nnipakuw kɛse” yi mu nnɛ anaa? Woyɛ eyinom a wɔyɛ 4,900,000 ne akyi a ‘wɔde ɔsom kronn ma Onyankopɔn’ wɔ asase so nyinaa no mu biako anaa? Ampa, Satan wiase bɔne a ɛhyɛ nnipa so no da so ara atwa wo ho ahyia na ebia ɛsɛ sɛ wugyina nhyɛso pii ano wɔ wo da biara da asetra mu. Nanso sɛ woyɛ Awurade “nguan” no mu biako a, wowɔ Onyankopɔn ɔhwɛ a ahobammɔ wom no ase. Ɛnsɛ sɛ ɔkɔm anaa osukɔm de wo bio esiane sɛ wunya honhom mu aduan nti. Na enhia bio sɛ wusuro Onyankopɔn abufuhyew, efisɛ Oguammaa no rehwɛ wo kyerɛ wo kwan kɔ “nkwa asuti ho.” Ne saa nti, sɛnkyerɛnne kwan so no, worenya bɔhyɛ no mmamu mu kyɛfa dedaw sɛ: “Na Onyankopɔn bɛpopa nusu nyinaa afi wɔn aniwa mu.”—Adiyisɛm 7:15-17.
ƆHENE NO HYIRA NE “NGUAN”
4. Abusuabɔ bɛn na Yesu ne ne “kuw ketewa” no wɔ?
4 Bible mmere mu ne besi yɛn bere so mpo no, Apuei Fam oguanhwɛfo ne ne nguan nya ayɔnkofa a emu yɛ den yiye. Ɔde wɔn mu biara din frɛ no, na wonim ne nne na wotie no ntɛm ara bere a ɔkyerɛ wɔn kwan kɔ nguannan no mu na ɔde wɔn fi mu pue no. Wɔ Yohane ti 10 no Yesu de eyi yɛɛ mfatoho, na ɔde ayɔnkofa a ɔdɔ wom a ɛda ɔne “kuw ketewa” 144,000 a wɔyɛ n’akyidifo a wɔasra wɔn ntam no dii kan kae sɛ: “Mene guanhwɛfo pa no; na minim me de, na me de nso nim me, sɛnea agya no nim me, na me nso minim agya no; na mede me kra meto hɔ mema nguan no.” Eyinom bɛyɛ ‘Abraham aseni’ a wɔnam ne so behyira “asase so mmusua nyinaa” no fã.—Yohane 10:14, 15; Genesis 12:3; Galatifo 3:28, 29.
5. (a) Abusuabɔ a ɛyɛ anigye foforo bɛn bio na wɔka ho asɛm wɔ Yohane 10:16? (b) Hokwan ahorow bɛn na “nguan foforo” no wɔ nnɛ, na dɛn na kuw yi hwɛ kwan sɛ ɛbɛba daakye?
5 Ɛnde na ayɔnkofa bɛn na ɛda “guanhwɛfo pa no” ne adesamma mmusua a wɔbɛtra asase so daa no ntam? Ɛyɛ nea nhyira wom yiye! Efisɛ Yesu ka eyinom ho asɛm sɛ:
“Na mewɔ nguan foforo a womfi [“kuw ketewaa”] ban yi mu; wɔn nso na etwa sɛ mede wɔn meba, na wobetie me nne, na ayɛ kuw biako ne ɔhwɛfo biako.”
Ɛnnɛ, wohu “nguan foforo” yi mu “nnipakuw kɛse” bi a wɔne “kuw ketewa” no didi—a wɔn nyinaa tie wɔn hwɛfo no “nne” wɔ “ahenni ho asɛmpa yi” a wɔreka wɔ “wiase nyinaa de adi amanaman nyinaa adanse” no mu. Sɛ woyɛ eyinom mu biako a, na wo kyɛfa no yɛ nea anigye wom yiye! (Yohane 10:16; Mateo 24:14) Ahenni no tumidi ase no, “nguan foforo” no dodow bɛkɔ so adɔɔso abɛyɛ ɔpepem pii denam asase so awufo sɔre no so, bere a Onyankopɔn atirimpɔw sɛ ɔde adesamma a wɔteɛ bɛhyɛ asase so ma no rebɛn n’awiei no.—Genesis 1:28.
6. Ɔkwan bɛn so na Yesu nkɔmhyɛ no kyerɛ bere ko a wobehu “nguan foforo” no yiye?
6 Wɔnam mfatoho a Yesu de wiee ne nkɔmhyɛ a ɛfa ba a waba ho “sɛnkyerɛnne” ho no so kyerɛ sɛ wobehu “nguan foforo” no yiye “nneɛma nhyehyɛe no awiei.” (Mateo 24:3) Ose:
“Na onipa ba no bɛba n’anuonyam mu a n’abɔfo nyinaa ka ne ho no, ɔbɛtra n’anuonyam ahengua so. Na wɔbɛboaboa amanaman nyinaa ano n’anim. Na ɔbɛpaapae wɔn mu, sɛnea oguanhwɛfo paapae nguanten ne mpapo mu. Na ɔde nguanten no begyina ne nifa, na ɔde mpapo no agyina ne benkum.” (Mateo 25:31-33)
Esiane sɛ ɔdesani aniwa ntumi nhu Ɔhene onuonyamfo yi ne n’abɔfo no nti, ɔkwan bɛn so na ɔnam yɛ mpaapaemu adwuma no?
7. (a) Ɔkwan bɛn so na wɔnam kyerɛ mpaapaemu adwuma no kwan? (b) Dɛn na ɛsɛ sɛ woyɛ na wɔabu wo bem, na dɛn ntia?
7 Abɔfo kronkron no na wɔkyerɛ saa adwuma no kwan. (Adiyisɛm 14:6-12; fa toto Asomafo no Nnwuma 8:26-29; 10:1-8 ho.) Na asase so ha no, “kuw ketewa” no nkaefo a wɔfrɛ wɔn Ɔhene no “nuanom” wɔ Mateo 25:40 no na wodi “asɛmpa” no ka anim. Ɔhene no bu nkurɔfo ntɛn denam sɛnea wotie ne “nuanom” ne Ahenni nkrasɛm a wɔka no fa so. Obu nea wɔde yɛ ne “nuanom” no sɛ n’ankasa na wɔde yɛ no. Nkurɔfo a wogye Ɔhene no “nuanom” fɛw so no benya nhyira. Woyɛ eyinom mu biako anaa? Ampa, ɛsɛ sɛ woyɛ saa, na wufi wo koma nyinaa mu gye Ahenni nkrasɛm no tom na wobɛyɛ Yehowa somfo a wahyira ne ho so ma wɔabɔ no asu, Yesu din mu—efisɛ “nkwagye nni obi foforo biara mu.”—Asomafo no Nnwuma 4:12, NW; Mateo 25:35-40.
8. Ɔfrɛ ne bɔhyɛ ahorow bɛn mu kyɛfa na wubetumi anya?
8 Sɛ́ Awurade “nguan foforo” no mu biako no, dɛn na wubetumi ahwɛ kwan? Dɛn na ebefi wo “guanhwɛfo pa” ne “ɔhene” no “nne” a wubetie no mu aba? Ɔhene no rebu ntɛn no, ɔka kyerɛ “nguanten” ahobrɛasefo a wɔwɔ ne nifa a ɔdom wom no sɛ: “Mo a m’agya ahyira mo, mommra mmɛfa ahenni a wɔasiesie ama mo fi wiase asefi mu no nni!” Wubetumi ahwɛ kwan sɛ wubenya Ahenni nhyira horow a efi yɛn Agya hɔ no mu kyɛfa, bere a ‘nnipa trenee no kɔ daa nkwa mu’ no. (Mateo 25:34, 46) Yiw, wubetumi ahwɛ kwan sɛ wubenya nkɔmhyɛ mu bɔhyɛ ahorow pii mmamu mu kyɛfa, te sɛ nea ɛwɔ Yesaia a ɛka Yehowa ho asɛm sɛɛ no: “Ɔbɛmene owu akosi daa, na [Yehowa] bɛpopa aniwa nyinaa so nusu, na wayi ne man ahohora afi asase nyinaa so akɔ, efisɛ [Yehowa] na waka.” Bere tiaa bi kɛkɛ na nnipa bɔne bɛkɔ so abɔ wo ahohora akosi. Efisɛ Onyankopɔn bɔhyɛ ne sɛ ɛrenkyɛ na wɔn a wɔn ani da Yehowa so no nyinaa akɔ nneɛma pa ho ‘apontow’ ase wɔ “asase foforo” bi so. Wopɛ sɛ wunya saa ‘apontow’ no mu kyɛfa, anaa ɛnte saa?—Yesaia 25:6-9; 66:22.
“MPAPO” NE ƆTAA AHOROW
9, 10. (a) Dɛn nti na ɛnyɛ mmerɛw sɛ wobedi trenee akyi nnɛ? (b) Su bɛn na ɛsɛ sɛ wuyi adi wɔ asɔretiafo ho, na mmoa bɛn na wubetumi ahwɛ kwan afi Onyankopɔn nkyɛn?
9 Ebia ɛrenyɛ mmerɛw mma wo sɛ wobɛfa trenee kwan so wɔ “nna a edi akyiri” yi mu. Ebia Satan ne n’akyidifo bedi wo ho fɛw, bere a wɔbɔ mmɔden a etwa to a wobetumi nyinaa sɛ wɔbɛsɛe asase yi ne adesamma a wɔwɔ so no. (2 Petro 3:3, 4; 2 Timoteo 3:1) Bere a wode Ahenni nkrasɛm no kɔ w’afipamfo nkyɛn no, ebia wubehu ebinom a woyi mpapo su bi adi. Wɔyɛ eyi denam asɛm no ho anibiannaso anaasɛ animtiaabu anaa ɔsɔretia ankasa a woyi no adi so.—Mateo 25:33, 42-45.
10 Nanso, sɛ́ Awurade “nguan” no mu biako no, ɛnsɛ sɛ wobɔ mmɔden sɛ wubebu ntɛn de akyerɛ nea ebia ɔyɛ “ɔpapo.” Ɔhene no na obebu ntɛn no, na ɛnyɛ ne “nguan” a wɔwɔ asase so ha. (Fa toto Romafo 14:10-12 ho.) Na, ɛwom sɛ wubetumi ahyia ɔsɔretia esiane “asɛmpa” no dawurubɔfo a wabɛyɛ no nti de, nanso Onyankopɔn bɛhyɛ wo den ma woayɛ n’apɛde, sɛnea ɔsomafo Petro kyerɛe wɔ nsɛm yi mu no: ‘Ɔdom nyinaa Nyankopɔn no besiesie mo pɛ, ɔbɛma mo ase atim, ɔbɛhyɛ mo den.’ (1 Petro 5:10; fa toto 2 Korintofo 12:10 ho.) Afei nso, ɔsomafo Paulo de afotu fɛfɛ yi ma sɛ: “Monnyɛ [Ahenni ho] mmɔdenbɔ mu nyaa, monyɛ honhom mu hyew, monsom [Yehowa] no! Momma mo ani nnye anidaso mu, ahohia mu montɔ mo bo ase, munkura mpaebɔ mu ara!”—Romafo 12:11, 12.
11. Anigyesɛm bɛn na ebetumi afi Kristoni abrabɔ pa mu aba?
11 Nokwaredi a wode som Yehowa ne mpae a efi komam a wobɔ no, ne afei wo Kristofo abrabɔ pa no betumi ama ebinom a mfiase no na wɔte sɛ “mpapo” abɛyɛ “nguanten.” Mpɛn pii na ɔyerenom a wɔyɛ Kristofo no boasetɔ ne obu atumi ama wɔanya okununom a wonnye nni ma wɔabɛyɛ gyidifo “a ɔkasa nni mu.” (1 Petro 3:1, 2) Nokwarem no, yɛmpɛ sɛ yehu nkurɔfo sɛ ‘wɔrekɔ daa ɔsɛe mu,’ na mmom ɛsɛ sɛ yenya ɔpɛ sɛ yɛbɛboa wɔn ma wɔatow mpapo su no agu, sɛnea ɛbɛyɛ na wɔanya daa nkwa.—Mateo 25:41, 46.
“NGUAN” ANOKWAFO KURA MUDI MU
12. Ɔkwan bɛn so na Ɔhene no “nuanom” ne “nguanten” no aboa wɔn ho wɔn ho wɔ nnɛ bere yi mu?
12 Hyɛ no nsow sɛ Yesu bɛ no mu “nguanten” no fii wɔn pɛ mu som Ɔhene no “nuanom” no bere a na eyinom yare na wogu afiase. Na asase so mmeae bi nnɛ no, ɛnyɛ “kuw ketewa” no nko na ehia wɔn na wɔtaa wɔn, wɔyare na wɔde wɔn gu afiase, na mmom “nguan foforo” a wɔne wɔn resom wɔ biakoyɛ ne nokwaredi mu no nso. Sɛ nhwɛso no, wɔ 1933 kosi 1945, bere a Nasini Hitler rebɔ mmɔden sɛ obedi wiase nyinaa so tumi no, wɔtaa Yehowa Adansefo denneennen—wɔ Nasifo ne Fasistfo aman mu nea edi kan, ne akyiri yi wɔ aman a na wɔreko no nyinaa mu nso. Wokunkum “kuw ketewa” no mufo ne Awurade “nguan foforo” no mufo pii. Nanso wodii nkonim anwonwakwan so wɔ wɔn mudi mu a wokura denneennen ma Ɔhene no ne n’Ahenni no mu!
13, 14. Nsonsonoe bɛn na wɔahu wɔ Kristoman nyamesom ahorow no gyinabea ne Yehowa Adansefo de ntam?
13 Mpɛn pii na abakɔsɛm akyerɛwfo aka nsonsonoe a ɛda Kristoman nyamesom a wogyae nsɛm mu siesiee no gyinabea ne Yehowa Adansefo mudi wɔ nhyɛso ase ntam no ho asɛm. Sɛ́ nhwɛso no, wɔ nhoma A History of Christianity a wɔkyerɛwee wɔ London, England, wɔ 1976 mu no, Paul Johnson di kan ka Katolek ne Evangelic asɔre ahorow no ho asɛm wɔ Hitler Germany sɛ: “Titiriw no asɔre abien no nyinaa de mmoa kɛse maa nniso no. Katolek asɔfo mpanyin gyee ‘Germany man no tumi foforo a wosi so dua denneennen no toom’; Ɔsɔfo panyin Bornewasser ka kyerɛɛ Katolek mmerante ne mmabaa wɔ Trier Asɔredan Kɛse no mu sɛ: ‘Yɛamoma yɛn ti so de nantew a ɛmma yenhinhim ahyɛn tumidi foforo no mu na yɛasiesie yɛn ho sɛ yɛde yɛn nipadua ne yɛn kra ahoɔden nyinaa bɛsom no.’ Wɔ January 1934 no, Hitler hyiaa Evangelic mpanyimfo dumien, na nhyiam yi akyi no, . . . wɔde amanneɛbɔ bi too gua sɛ ‘Germany Evangelic Asɔre no mu mpanyimfo nyinaa de ano koro asi so dua sɛ wofi wɔn pɛ mu bedi Tumidi a Ɛto so Abiɛsa ne ne kannifo no nokware.’”
14 Afei nhoma kyerɛwfo no reka nnipa kakraa bi a wɔkyerɛ sɛ wɔyɛ Kristofo a ɔkaa wɔn ho asɛm sɛ “wɔde wɔn ho afam wɔn nnyinasosɛm ahorow ho denneennen” ho asɛm no, ɔtoa so ka sɛ: “Akokodurufo a wɔsen biara ne Yehowa Adansefo a wɔkaa wɔn nkyerɛkyerɛ a ɛbɔ afoforo abira no pen fi mfiase na wohuu ho amane no. Wɔampene sɛ wɔne Nasi man a wɔkasa tiae sɛ ɛyɛ bɔne koraa no bɛbom ayɛ adwuma. . . . Wobuu wɔn mu pii kumfɔ wɔ pene a wɔampene sɛ wɔbɛyɛ asraafo adwuma no ho . . . ; anaasɛ wɔde wɔn koguu Dachau anaasɛ abɔdamfo ayaresabea. Wokunkum wɔn mu nkyem abiɛsa mu biako ankasa; wɔtaa wɔn mu ɔha mu nkyem aduɔkron ason akwan horow so. Wɔn nkutoo ne Kristofo kuw a Himmler ani sɔɔ wɔn.”
15. (a) Wote nka dɛn wɔ krataa a wɔkyerɛw ho nhwɛso a ɛwɔ ha no ho? (b) Mmɔden bɛn na Satan bɔe wɔ Wiase Ko II mu, na adanse bɛn na ɛkyerɛ sɛ odii nkogu?
15 Wɔnyɛ nnipa a wokyi akodi kɛkɛ, na mmom wɔyɛ Kristofo a wonni obiara afã na wogyina Onyankopɔn Ahenni a ɛreba no akyi, Adansefo mmerante ne mmabaa hyiaa afiase nna ne okum mmom sen sɛ wobegyina wɔn mudi mu, sɛnea ‘krataa a etwa to’ a ɛwɔ ha yi kyerɛ no. Wɔ asase so nyinaa, sɛ́ ɛyɛ Axis aman a ɛne Germany, Italy ne Japan, anaa Nkabom aman mu no, wɔtow hyɛɛ Ɔhene no “nuanom” ne wɔn ahokafo a wɔyɛ “nguanten” no so boroo wɔn de wɔn koguu afiase, na wɔyɛɛ wɔn ayayade. Nanso wodii wɔn honhom mu akodi no mu nkonim. Ɔbonsam antumi ansɛe wɔn nokwaredi ma Ahenni no. Sɛnea Yesu a odii wɔn anim yɛe no, wɔdaa wɔn ho adi sɛ wɔnyɛ Satan wiase “no fã.”—Yohane 15:19, NW.
AHENNI NO ƆKYERƐKYERƐ NHYEHYƐE
16, 17. (a) Ɔkyerɛkyerɛ dwumadi ne ntrɛwmu adwuma bɛn na afei abue? (b) Aba a adwuma yi asow bɛn na wobetumi ahu?
16 Ɔwɛn Aban Asafo no titrani J. F. Rutherford wui wɔ afe 1942 mu na Nathan H. Knorr besii n’ananmu. Ɛno akyi bere tiaa bi no wɔhyehyɛɛ Teokrase Ɔsom Sukuu wɔ Yehowa Adansefo asafo ahorow nyinaa mu, na eyi aboa kɛse ma wɔatete Adansefo mmarima ne mmea ma wɔaka Ahenni nkrasɛm no ma atu mpɔn yiye de ama afoforo agye atom. Wɔ mfe no mu no, wɔayɛ nhoma ahorow ama sukuu ahorow yi. Na wɔammu ani angu asɛmpatrɛw adwuma no nso so. Wɔ February 1, 1943 no, wɔtew Ɔwɛn Aban Gilead Bible Sukuu no wɔ New York Mantam no mu. Wɔde bere nyinaa asomfo (“akwampaefo”) mpempem pii a wɔn ho akokwaw yiye afi asase so aman pii mu aba U.S.A. abɛtete wɔn de wɔn akɔ “asase nyinaa so” ma wɔakɔka “ahenni ho asɛmpa yi.”—Mateo 24:14; Romafo 10:18.
17 Aba a ɛyɛ nwonwa bɛn ara na asase nyinaa so ɔkyerɛkyerɛ ho ɔsatu yi asow sɛɛ yi! Bere a yɛkɔ anim wɔ 1990 mfe no mu no, nnipa a wodi abodoo no nom bobesa no bi wɔ afe afe Yesu wu Nkaedi no ase na wɔnam saayɛ so kyerɛ sɛ wɔwɔ anidaso sɛ wɔbɛkɔ akɔka ne ho wɔ ne soro Ahenni no mu no dodow so atew ma ennu 9,000, bere a Ɔhene no “nuanom” pii kura wɔn mudi mu de wie wɔn asase so adwuma no. Nanso afoforo a wɔba ase a wɔn ani gye ho sɛ wɔbɛtra asase so daa sɛ Ahenni no nkoa no dodow akɔ soro bɛboro 12,000,000. Wɔ Yehowa Adansefo asafo ahorow bɛboro 75,000 a ɛwɔ asase so nyinaa nnɛ mu no, “nguan foforo” no mu “nnipakuw kɛse” no reyɛ adanse adwuma no mu fã kɛse no ara. Hokwan a wubenya sɛ wobɛyɛ eyinom mu biako no yɛ kɛse dɛn ara!
18. (a) “Akoa nokwafo ne ɔbadwemma” no akɔ so ayɛ n’adwuma dɛn? (b) Adwuma kɛse bɛn na wubetumi anya mu kyɛfa nnɛ?
18 Ɛwom sɛ wɔn dodow so rehuan de, nanso Yesu “kuw ketewa” a wɔasra wɔn no nkaefo, “akoa nokwafo ne ɔbadwemma” kuw no kɔ so hwɛ Ahenni adwuma no so. (Mateo 24:45-47) Sɛnea ɛbɛyɛ na wɔayɛ eyi no, ɛnam sodikuw bi so na ɛyɛ adwuma, nhyehyɛe a ɛte sɛ nea na ɛwɔ hɔ wɔ afeha a edi kan Kristofo asafo no mu no. (Asomafo no Nnwuma 15:6; Luka 12:42-44) N. H. Knorr wui wɔ 1977 mu no, Frederick W. Franz, a na wadi mfe 83 no bɛyɛɛ Ɔwɛn Aban Asafo no titrani a ɔto so anan. Na July 1, 1979 no, Ɔwɛn-Aban nsɛmma nhoma no ankasa nso nyaa mfe 100! Adi Ahenni adanse mfirihyia ɔha. Yiw, ɛdenam nkrataa a wɔatintim ne asɛm a wɔde ano ka so no, wɔaka Ahenni a wɔde asi hɔ no ho “asɛmpa yi” asase so nyinaa de adi adanse. Woyɛ obi a onya adwuma a ɔdom wom yi mu kyɛfa de di nhwɛso a Yesu gyawee no akyi anaa? Sɛnea Paulo tuu fo no:
“Momma yɛmfa no so mmɔ Onyankopɔn ayeyi afɔre daa, ɛne anofafa a ɛbɔ no abodin no aba.”—Hebrifo 13:15.
19. (a) Asetra kwan bɛn na Paulo hyɛɛ ho nkuran a ɛfa “koma” ne “ano” ho? (b) Nsɛm a ɛyɛ ne bere mu de bɛn na wobisa wɔ ha, na wubua dɛn?
19 Ɔsomafo Paulo kae wɔ krataa foforo mu sɛ: “Na koma na wɔde gye di kɔ trenee mu, na ano na wɔde pae mu ka kɔ nkwagye mu.” (Romafo 10:10) So wugye “asɛmpa” a seesei ɛtwe adwene si Onyankopɔn Ahenni a wɔde sii hɔ wɔ ɔsoro fi 1914 no so di anaa? So ‘worepae mu aka akɔ nkwagye mu’ bere, a wobɔ mpae sɛ Onyankopɔn Ahenni no “mmra” na ɛmfa ne tumi a ano yɛ den no nyinaa mmeyi Satan ahyehyɛde mfi asase so no? Wode nnamyɛ ka Ahenni nhyira horow a adesamma nyinaa benya bere a ɛnkyɛ wɔbɛyɛ Onyankopɔn apɛde wɔ “asase so sɛnea ɛyɛ ɔsoro” no kyerɛ afoforo wɔ ‘baguam ne afi mu’ anaa? Wode nokwaredi reboa nokware Kristofo a wɔasra wɔn no “akoa nokwafo ne ɔbadwemma” kuw no bere a wɔkɔ so di Ahenni nkrasɛm a wɔka kyerɛ no anim ‘kɔ asase nyinaa so kosi asase ano nohɔ” na ‘wɔyɛ amanaman nyinaa asuafo, na wɔbɔ wɔn asu na wɔkyerɛkyerɛ wɔn’ no anaa?—Mateo 6:10; 24:14, 45-47; 28:19, 20; Asomafo no Nnwuma 5:42; 20:20; Romafo 10:18.
20. Hokwan kɛse bɛn na wubetumi anya nnɛ?
20 Wubetumi anya hokwan kɛse nnɛ ma enti wode ‘ɔsom kronn ama awia ne anadwo Onyankopɔn ahengua anim.’ Bere koro no ara mu no, wode wo ho resi hɔ sɛ wobɛyɛ “nnipakuw kɛse” a wobenya daa nkwa wɔ asase a wɔbɛyɛ so fɛfɛɛfɛ no so no biako. (Adiyisɛm 7:9-17) Nanso ɛsɛ sɛ Ahenni no di kan ‘ba’ na ɛbɛko Harmagedon ko no ansa! Dɛn na Harmagedon bɛkyerɛ ama adesamma ne yɛn asase yi?
[Adesua no ho Nsɛmmisa]
[Kratafa 159 adaka]
WANNYINA AFÃ BIARA DE KOSII OWU MU
Wɔ wiase ko a ɛto so abien no mu no, Yehowa Adansefo mmerante ne mmabaa pii de wɔn nkwa twaa afã biara a wonni no so. Krataa a edi so yi yɛ ‘nkrataa a etwa to’ a Adansefo akokodurufo a wɔtete saa kyerɛw kɔmaa wɔn abusuafo no ho nhwɛso. Marcel Sutter a na wadi mfe 23 a ofi Alsace-Lorraine na ɔkyerɛwee nnɔnhwerew kakraa bi ansa na wɔde abonnua twaa ne ti wɔ Torgau afiase a ɛwɔ Germany wɔ August 1942 mu.
“M’awofo ne me nuabeanom a medɔ mo kɛse,
“Bere a mo nsa bɛka krataa yi no, na minni nkwa mu bio. Nnɔnhwerew kakraa bi na ɛda me ne me owu ntam. Mesrɛ mo sɛ mo ho nyɛ den na mo bo nyɛ duru; munnsu, efisɛ madi nkonim. Mawie ɔkwan no twa na makura gyidi no mu. Ɛmmra sɛ Yehowa Nyankopɔn bɛboa me akosi awiei. Bere tiaa bi nko na ɛda yɛne yɛn Awurade Yesu Kristo Ahenni no ntam. Ɛrenkyɛ yebehu yɛn ho bio wɔ asomdwoe ne trenee wiase bi a eye kyɛn so mu. Saa da no ho a midwen ma m’ani gye, esiane sɛ saa bere no apinisi biara ni hɔ bio nti. Ɛno bɛyɛ nwonwa dɛn ara! Me kɔn dɔ asomdwoe. Nnɔnhwerew kakraa a aka yi mu no meredwen mo ho, na me koma werɛ ahow kakra sɛ merentumi mfew mo ano mfa nkra mo. Nanso ɛsɛ sɛ yɛtɔ yɛn bo ase. Bere no abɛn a Yehowa bɛsan ne Din ho na wada no adi akyerɛ abɔde nyinaa sɛ ɔno nkutoo ne nokware Nyankopɔn. Afei mepɛ sɛ mihyira nnɔnhwerew kakraa a aka a mede bɛtra ase no so ma no, enti mede krataa yi bɛba awiei, na me ne mo adi nkra kosi sɛ ɛnkyɛ yebehyia bio. Ayeyi nka yɛn Nyankopɔn Yehowa! Mede me dɔ nkyia a emu yɛ hyew ma mo nyinaa.
“Mo ba ne mo nuabarima a modɔ no,
Marcel”
