Fa Yɛ Wo Botae Sɛ Wobɛsom Onyankopɔn Daa
Ti 18
Fa Yɛ Wo Botae Sɛ Wobɛsom Onyankopɔn Daa
1, 2. Onyankopɔn ho nimdeɛ a obi wɔ akyi no, dɛn na ɛho hia?
FA NO sɛ wugyina ɔdan bi a ademude a ɛsom bo yiye wom pon a wɔatom ano. Ma yɛmfa no sɛ obi a ɔwɔ so tumi de ne safe ama wo aka akyerɛ wo sɛ fa saa ademude yi bi. Sɛ woamfa saa safe no anni dwuma a, ɛso remma wo mfaso. Saa ara nso na ɛsɛ sɛ wode nimdeɛ di dwuma na woanya so mfaso.
2 Eyi yɛ nokware yiye wɔ Onyankopɔn ho nimdeɛ ho. Nokwarem no, Yehowa Nyankopɔn ne Yesu Kristo ho nokware nimdeɛ kyerɛ daa nkwa. (Yohane 17:3) Nanso, nimdeɛ kɛkɛ a wowɔ no ntumi mma saa anidaso no mma mu. Ɛho hia sɛ wode Onyankopɔn ho nimdeɛ di dwuma wɔ w’asetra mu sɛnea wode safe bi a ɛsom bo bedi dwuma no. Yesu kae sɛ wɔn a wɔreyɛ Onyankopɔn apɛde ‘bɛkɔ ahenni no mu.’ Saafo yi benya hokwan asom Onyankopɔn daa!—Mateo 7:21; 1 Yohane 2:17.
3. Dɛn na Onyankopɔn pɛ sɛ yɛyɛ?
3 Bere a woahu dekode a Onyankopɔn apɛde yɛ awie no, ɛho hia sɛ woyɛ. Wususuw sɛ dɛn na Onyankopɔn pɛ sɛ woyɛ? Yebetumi de asɛm yi aka no tiawa: Suasua Yesu. Petro Nhoma a Edi Kan 2:21 ka kyerɛ yɛn sɛ: “Eyi na wɔbɔɔ din frɛɛ mo, efisɛ Kristo nso huu amane maa mo gyaw mo nhwɛso, sɛ munni n’anammɔn akyi.” Enti, sɛ wobɛyɛ Onyankopɔn apɛde a, ɛho hia sɛ wudi Yesu nhwɛso akyi pɛɛ sɛnea ebetumi ayɛ yiye biara. Saa na wode Onyankopɔn ho nimdeɛ bedi dwuma.
SƐNEA YESU DE ONYANKOPƆN HO NIMDEƐ DII DWUMA
4. Dɛn nti na Yesu nim Yehowa ho nsɛm pii saa, na ɔde saa nimdeɛ yi adi dwuma dɛn?
4 Yesu Kristo wɔ Onyankopɔn ho nimdeɛ pii sen afoforo. Ɔne Yehowa Nyankopɔn trae yɛɛ adwuma boom wɔ soro bere tenteenten ansa na ɔreba asase so. (Kolosefo 1:15, 16) Na dɛn na Yesu de saa nimdeɛ no nyinaa yɛe? Annɔɔso amma no sɛ na ɔwɔ bi kɛkɛ. Yesu traa ase ma ɛne no hyiae. Ɛno nti na ɔne ne mfɛfo nnipa dii wɔ ayamye, boasetɔ ne ɔdɔ mu no. Ná Yesu nam saayɛ so resuasua ne soro Agya no, na na ɔreyɛ ade ma ɛne Yehowa akwan ne ne nipasu ho nimdeɛ a ɔwɔ no ahyia.—Yohane 8:23, 28, 29, 38; 1 Yohane 4:8.
5. Dɛn nti na Yesu gyee asubɔ, na ɔkwan bɛn so na ɔtraa ase ma ɛne nea n’asubɔ kyerɛ no hyiae?
5 Nimdeɛ a na Yesu wɔ no nso ma ɔyɛɛ biribi a ɛho hia. Ofii Galilea baa Asubɔnten Yordan ho, faako a Yohane bɔɔ no asu. (Mateo 3:13-15) Na Yesu asubɔ no yɛ dɛn ho sɛnkyerɛnne? Sɛ́ Yudani no, wɔwoo no too ɔman a na wɔahyira so ama Onyankopɔn mu. Enti, na Yesu ahyira ne ho so fi awo mu. (Exodus 19:5, 6) Bere a ɔde ne ho mae ma wɔbɔɔ no asu no, na ɔde ne ho rema Yehowa ayɛ ɔsoro apɛde a ɛwɔ hɔ ma no saa bere no. (Hebrifo 10:5, 7) Na Yesu traa ase ma ɛne nea n’asubɔ kyerɛ no hyiae. Ɔyeree ne ho wɔ Yehowa som mu, de hokwan biara kaa Onyankopɔn ho nimdeɛ ho asɛm kyerɛɛ nkurɔfo. Yesu ani gyee Onyankopɔn apɛde a ɔyɛe no ho, na ɔkaa mpo sɛ na eyi te sɛ aduan ma no.—Yohane 4:34.
6. Ɔkwan bɛn so na Yesu paa ne ho akyi?
6 Yesu huu no yiye sɛ Yehowa apɛde a na ɔreyɛ no bɛma wahwere ade kɛse—kyerɛ sɛ, ɛbɛma wahwere ne nkwa mpo. Nanso, Yesu paa ne ho akyi, na wamfa n’ankasa ahiade anni kan. Ɔde Onyankopɔn apɛdeyɛ dii kan bere nyinaa. Yɛbɛyɛ dɛn atumi asuasua Yesu nhwɛso a ɛyɛ pɛ no wɔ eyi mu?
NNEYƐE A ƐKOWIE DAA NKWA MU
7. Nneɛma a ɛsɛ sɛ obi yɛ na wafata ama asubɔ no bi ne dɛn?
7 Esiane sɛ yɛnte sɛ Yesu nti, yɛnyɛ pɛ na yebetumi adu ade titiriw a ɛne asubɔ no ho bere a yɛayɛ nneɛma foforo a ɛho hia nkutoo. Eyi fi ase bere a yɛde Yehowa Nyankopɔn ne Yesu Kristo ho nokware nimdeɛ hyɛ yɛn komam no. Eyi a yɛyɛ no ma yɛda gyidi adi na yenya ɔdɔ a emu yɛ den ma Onyankopɔn. (Mateo 22:37-40; Romafo 10:17; Hebrifo 11:6) Ɛsɛ sɛ Onyankopɔn mmara, nnyinasosɛm, ne gyinapɛn ahorow sodi ka yɛn ma yenu yɛn ho, na yedi yɛn kan bɔne ahorow ho yaw a ɛfata. Eyi ma yɛsakra yɛn adwene, kyerɛ sɛ, yɛdan yɛn ho na yɛpow ɔkwammɔne biara a yɛfaa so bere a na yenni Onyankopɔn ho nimdeɛ no. (Asomafo no Nnwuma 3:19) Sɛnea ɛte no, sɛ yɛda so ara reyɛ bɔne bi wɔ kokoam sen sɛ anka yɛbɛyɛ nea ɛteɛ a, ɛnde na yɛnnan yɛn ho ankasa, na saa ara nso na yɛnnaadaa Onyankopɔn. Yehowa hu nyaatwomyɛ biara.—Luka 12:2, 3.
8. Dɛn na ɛsɛ sɛ woyɛ bere a wopɛ sɛ wunya Ahenni asɛnka adwuma no mu kyɛfa?
8 Seesei a worenya Onyankopɔn ho nimdeɛ no, ɛmfata sɛ w’ankasa besusuw honhom fam nneɛma ho? Ebia wo ho pere wo sɛ wobɛka nea woresua no akyerɛ w’abusuafo, wo nnamfo, ne afoforo. Nokwarem no, ebia woreyɛ eyi dedaw sɛnea Yesu kaa asɛmpa no kyerɛɛ afoforo wɔ bɔnnɔ so no. (Luka 10:38, 39; Yohane 4:6-15) Ebia seesei wopɛ sɛ woyɛ pii. Kristofo mpanyimfo ani begye ho sɛ wɔne wo bɛkasa na wɔahu sɛ ebia wofata na wubetumi anya Yehowa Adansefo Ahenni asɛnka adwuma no mu kyɛfa daa. Sɛ ɛte saa a, mpanyimfo no bɛyɛ nhyehyɛe ama wo ma woaka Ɔdansefo bi ho akɔyɛ ɔsom adwuma no. Yesu asuafo no dii n’akwankyerɛ ahorow akyi sɛnea ɛbɛyɛ na wɔayɛ wɔn som adwuma no wɔano wɔano. (Marko 6:7, 30; Luka 10:1) Wubenya mmoa a ɛte saa ara so mfaso bere a wunya Ahenni asɛm a wɔtrɛw mu wɔ afie afie ne akwan foforo so mu kyɛfa no.—Asomafo no Nnwuma 20:20, 21.
9. Ɔkwan bɛn so na obi hyira ne ho so ma Onyankopɔn, na ɔkwan bɛn so na ahosohyira ka onipa no asetra?
9 Asɛmpa no a wobɛka akyerɛ nnipa ahorow nyinaa wɔ mo asafo no asasesin mu ne ɔkwan a wobɛfa so ahwehwɛ nnipa a wɔwɔ koma pa, na ɛka nnwuma pa a ɛkyerɛ sɛ wowɔ gyidi no ho. (Asomafo no Nnwuma 10:34, 35; Yakobo 2:17, 18, 26) Kristofo nhyiam horow a wobɛkɔ daa anya asɛnka adwuma no mu kyɛfa sɛnea ɛfata nso yɛ akwan a wobɛfa so akyerɛ sɛ woanu wo ho asakra w’adwene na mprempren woasi wo bo sɛ wobɛtra ase ma ɛne Onyankopɔn ho nimdeɛ ahyia. Dɛn na edi hɔ a ntease wom sɛ woyɛ? Ɛne sɛ wubehyira wo ho so ama Yehowa Nyankopɔn. Eyi kyerɛ sɛ wobɛka akyerɛ Onyankopɔn wɔ mpaebɔ a efi komam mu sɛ wufi wo pɛ ne wo koma nyinaa mu de wo nkwa rema no ayɛ n’apɛde. Eyi ne ɔkwan a wobɛfa so ahyira wo ho so ama Yehowa na woagye Yesu Kristo mmɔborohunu kɔndua no atom.—Mateo 11:29, 30.
ASUBƆ—NEA ƐKYERƐ MA WO
10. Dɛn nti na ɛsɛ sɛ wɔbɔ wo asu bere a woahyira wo ho so ama Yehowa no akyi?
10 Sɛnea Yesu kyerɛ no, ɛsɛ sɛ wɔbɔ wɔn a wɔbɛyɛ n’asuafo nyinaa asu. (Mateo 28:19, 20) Dɛn nti na eyi ho hia bere a woahyira wo ho so ama Onyankopɔn akyi no? Esiane sɛ woahyira wo ho so ama Yehowa nti, onim sɛ wodɔ no. Nanso akyinnye biara nni ho sɛ wopɛ sɛ woyɛ biribi foforo sɛnea ɛbɛyɛ na afoforo ahu ɔdɔ a wowɔ ma Onyankopɔn no. Asubɔ ma wunya hokwan ma wohu w’ahosohyira ma Yehowa Nyankopɔn no wɔ baguam.—Romafo 10:9, 10.
11. Dɛn na asubɔ kyerɛ?
11 Asubɔ kyerɛ pii wɔ sɛnkyerɛnne kwan so. Bere a wɔde wo hyɛ nsu no ase anaa wɔma “ɛkata” wo so no, ɛte sɛ nea woawu ama wo kan asetra kwan no. Sɛ wufi nsu no mu pue a, ɛte sɛ nea woresɔre ama asetra foforo, nea Onyankopɔn apɛde na ɛkyerɛ no kwan na ɛnyɛ wo de. Nokwarem no, ɛno nkyerɛ sɛ wunni mfomso biara bio, efisɛ yɛn nyinaa nyɛ pɛ na yɛyɛ bɔne da biara. Nanso, sɛ́ Yehowa somfo a woahyira wo ho so ma wɔabɔ wo asu no, wo ne no benya abusuabɔ soronko bi. Esiane w’adwensakra ne ahobrɛase mu a wufi ma wɔbɔ wo asu nti, Yehowa wɔ ɔpɛ sɛ obegyina Yesu agyede afɔrebɔ no so de wo bɔne afiri wo. Enti asubɔ ma wunya ahonim pa wɔ Onyankopɔn anim.—1 Petro 3:21.
12. Ɛkyerɛ dɛn sɛ wɔbɛbɔ obi asu (a) wɔ ‘Agya no din’ mu? (b) ‘wɔ Ɔba no din mu’? (d) ‘wɔ honhom kronkron din mu’?
12 Yesu de ahyɛde maa n’akyidifo sɛ wɔmmɔ asuafo foforo asu “nhyɛ Agya ne Ɔba ne honhom kronkron din mu.” (Mateo 28:19) Ná Yesu kyerɛ dɛn? Asubɔ ‘wɔ Agya no din mu’ kyerɛ sɛ onipa a wɔrebɔ no asu no fi ne koma nyinaa mu gye Yehowa Nyankopɔn tom sɛ Ɔbɔadeɛ ne Otumfoɔ a ɔfata sɛ odi amansan no so. (Dwom 36:9; 83:18; Ɔsɛnkafo 12:1) Asu a wɔbɔ obi ‘wɔ Ɔba no din mu’ kyerɛ sɛ onii no gye Yesu Kristo tom—titiriw N’agyede afɔrebɔ no—sɛ ɔkwan biako pɛ a Onyankopɔn de ama a wɔnam so nya nkwagye. (Asomafo no Nnwuma 4:12) Asubɔ ‘wɔ honhom kronkron no din mu’ kyerɛ sɛ nea ɔhwehwɛ asubɔ no gye Yehowa honhom kronkron, anaasɛ n’adeyɛ tumi, no tom sɛ Onyankopɔn adwinnade a ɔde di N’atirimpɔw ahorow ho dwuma de hyɛ n’asomfo den ma wɔne N’ahyehyɛde a ne honhom kyerɛ no kwan yɛ Ne trenee apɛde.—Genesis 1:2; Dwom 104:30; Yohane 14:26; 2 Petro 1:21.
WOASIESIE WO HO AMA ASUBƆ?
13, 14. Dɛn nti na ɛnsɛ sɛ yesuro sɛ yɛbɛpaw sɛ yɛbɛsom Yehowa Nyankopɔn?
13 Esiane sɛ asubɔ kyerɛ pii na ɛyɛ obi asetra mu ade a ɛho hia sen biara nti, ɛyɛ adeyɛ a ɛsɛ sɛ wusuro? Ɛnsɛ sɛ ɛba saa koraa! Ɛwom sɛ ɛnsɛ sɛ wubu gyinae a wubesi sɛ wobɛbɔ asu no adewa de, nanso akyinnye biara nni ho sɛ ɛne nea nyansa wom sen biara a wubetumi asi.
14 Asubɔ de paw a woapaw sɛ wobɛsom Yehowa Nyankopɔn ho adanse ma. Susuw nnipa a wunim wɔn ho. Wɔn mu biara nsom owura bi wɔ ɔkwan bi so? Ebinom som ahonyade. (Mateo 6:24) Afoforo nso de nsi yɛ wɔn asetra mu nnwuma anaasɛ wɔsom wɔn ho denam wɔn ankasa akɔnnɔde a wɔn nsa bɛka a wɔma ɛyɛ wɔn asetra mu ade titiriw no so. Afoforo nso som atoro anyame. Nanso woapaw sɛ wobɛsom nokware Nyankopɔn, Yehowa. Obi foforo biara nni hɔ a ɔda ayamye, ayamhyehye ne ɔdɔ kɛse adi saa. Onyankopɔn de adwuma a atirimpɔw wom a ɛkyerɛ nnipa kwan kɔ nkwagye mu di wɔn ni. Ɔde daa nkwa tua n’asomfo ka. Nokwarem no, Yesu nhwɛso akyi a wubedi ne wo nkwa a wode bɛma Yehowa no nyɛ adeyɛ a ɛsɛ sɛ wusuro. Nokwarem no, ɛno ne ade biako pɛ a ɛsɔ Onyankopɔn ani na ntease wom koraa.—1 Ahene 18:21.
15. Nsɛm a ɛtaa siw asubɔ kwan no bi ne dɛn?
15 Nanso, asubɔ nyɛ ade a ɛsɛ sɛ wɔhyɛ wo ma woyɛ. Ɛyɛ wo ne Yehowa nkutoo ntam asɛm. (Galatifo 6:4) Bere a woanya honhom mu nkɔso no, ebia woabisa sɛ: “Ɛdɛn na esiw me asubɔ ho kwan?” (Asomafo no Nnwuma 8:35, 36) Wubetumi abisa wo ho sɛ, ‘So abusua mu ɔsɔretia resiw me kwan? Meda so ara de me ho hyɛ biribi a Kyerɛwnsɛm mma ho kwan anaa nneyɛe bɔne mu? Ebetumi aba sɛ misuro sɛ nnipa ani rennye me ho bio wɔ mpɔtam hɔ?’ Eyinom ne nneɛma a ɛsɛ sɛ wususuw ho no bi, nanso fa nokwaredi susuw ho.
16. Ɔkwan bɛn so na wubenya Yehowa a wobɛsom no so mfaso?
16 Nyansa nnim sɛ wubesusuw nea wobɛhwere ho bere a wunsusuw Yehowa a wobɛsom no no so mfaso horow ho. Sɛ nhwɛso no, susuw asɛm a ɛne abusua mu ɔsɔretia ho. Yesu hyɛɛ bɔ sɛ sɛ n’asuafo hwere wɔn abusuafo esiane n’akyi a wodi nti a, wobenya honhom fam abusua kɛse bi. (Marko 10:29, 30) Wo mfɛfo gyidifo yi beyi onuadɔ adi akyerɛ wo, aboa wo ma woagyina ɔtaa ano, na wɔagyina w’akyi wɔ nkwa kwan no so. (1 Petro 5:9) Ne titiriw no, asafo no mu mpanyimfo betumi aboa wo ma woagyina ɔhaw ne nsɛnnennen afoforo ano. (Yakobo 5:14-16) Ɛdefa nnipa anim dom a wobɛhwere wɔ wiase yi mu ho no, ebia ɛbɛyɛ papa sɛ wubebisa wo ho sɛ, ‘Dɛn na metumi de atoto amansan no Bɔfo anim dom a menya, na ama wadi asetra kwan a mapaw no ho ahurusi no ho?’—Mmebusɛm 27:11.
TRA A WOBƐTRA ASE MA ƐNE W’AHOSOHYIRA NE W’ASUBƆ AHYIA
17. Dɛn nti na ɛsɛ sɛ wubu asubɔ sɛ mfiase na ɛnyɛ awiei?
17 Ɛho hia sɛ wokae sɛ asubɔ nyɛ wo honhom mu nkɔso no awiei. Ɛyɛ Onyankopɔn a wode wo nkwa nna nyinaa bɛsom no sɛ obi a wɔahyɛ wo somfo ne Yehowa Adansefo mu biako no mfiase. Ɛwom sɛ asubɔ ho hia yiye de, nanso ɛnyɛ nkwagye ho bɔhyɛ. Yesu anka sɛ: ‘Obiara a wɔabɔ no asu no benya nkwa.’ Mmom no ɔkae sɛ: “Nea obegyina akodu awiei no, ɔno na wobegye no.” (Mateo 24:13) Enti, ɛho hia sɛ wohwehwɛ Onyankopɔn Ahenni kan denam ɛno a wode bɛyɛ w’asetra mu ade titiriw no so.—Mateo 6:25-34.
18. Asubɔ akyi no, botae horow a ɛsɛ sɛ wudi akyi no bi ne nea ɛwɔ he?
18 Sɛ wubegyina wɔ ɔsom a wode ma Yehowa no mu a, wobɛpɛ sɛ wode honhom mu botae horow sisi hɔ ma wo ho. Botae biako a ɛfata ne sɛ wobɛfa Onyankopɔn Asɛm a wubesua no daa so ama ne ho nimdeɛ a wowɔ no akɔ anim. Yɛ da biara Bible akenkan ho nhyehyɛe. (Dwom 1:1, 2) Kɔ Kristofo nhyiam horow daa, efisɛ fekubɔ a wubenya wɔ hɔ no bɛboa wo ma woanya honhom mu ahoɔden. Wo fam no, dɛn nti na w’ankasa womfa nyɛ wo botae sɛ wobɛma mmuae wɔ asafo nhyiam horow ase na wonam saayɛ so akamfo Yehowa abɔ mmɔden sɛ wobɛhyɛ afoforo den? (Romafo 1:11, 12) Botae foforo nso betumi ayɛ wo mpaebɔ a wobɛma atu mpɔn.—Luka 11:2-4.
19. Su horow bɛn na honhom kronkron betumi aboa wo ma woada no adi?
19 Sɛ wobɛtra ase ma ɛne nea w’asubɔ kyerɛ no ahyia a, ɛho hia sɛ woma w’ani ku nea woyɛ ho bere nyinaa, woma kwan ma Onyankopɔn honhom kronkron ma wunya su horow te sɛ ɔdɔ, anigye, asomdwoe, abodwokyɛre, ayamye, papayɛ, gyidi, odwo, ne ahosodi wɔ wo mu. (Galatifo 5:22, 23; 2 Petro 3:11) Kae, Yehowa de ne honhom kronkron ma wɔn a wɔbɔ ho mpae na wotie no sɛ n’asomfo anokwafo no nyinaa. (Luka 11:13; Asomafo no Nnwuma 5:32) Enti bɔ Onyankopɔn mpae srɛ ne honhom na ka kyerɛ no sɛ ɔmmoa wo mma wonna su horow a ɛsɔ n’ani adi. Su horow a ɛtete saa no bɛda adi kɛse wɔ wo kasa ne w’abrabɔ mu bere a woma Onyankopɔn honhom de wo di dwuma no. Nokwarem no, Kristofo asafo no muni biara rebɔ mmɔden sɛ obenya “nipasu foforo no” na ama wasɛ Kristo kɛse. (Kolosefo 3:9-14, NW) Bere a yɛyɛ eyi no, yɛn mu biara hyia nsɛnnennen soronko efisɛ yɛn honhom mu nkɔso nyɛ pɛ. Esiane sɛ wonyɛ pɛ nti, ɛsɛ sɛ woyere wo ho sɛ wubenya Kristo nipasu. Nanso mpa aba wɔ eyi mu da, efisɛ wonam Onyankopɔn mmoa so betumi ayɛ.
20. Akwan bɛn so na wubetumi asuasua Yesu wɔ ɔsom adwuma no mu?
20 Nea ɛka honhom mu botae ahorow a ɛsɛ sɛ wunya ho ne sɛ wubesuasua Yesu anigye ho nhwɛso no yiye. (Hebrifo 12:1-3) Na n’ani gye ɔsom adwuma no ho. Sɛ woanya hokwan reyɛ Ahenni asɛnka adwuma no bi a, ɛnde mma ɛnnyɛ ade a wotaa yɛ kɛkɛ. Bɔ mmɔden sɛ wubenya akomatɔyam bere a wokyerɛkyerɛ afoforo Onyankopɔn Ahenni no ho ade sɛnea Yesu yɛe no. Fa akwankyerɛ a asafo no de ma na aboa wo ma woatu mpɔn sɛ ɔkyerɛkyerɛfo no di dwuma. Na nya awerɛhyem sɛ Yehowa betumi ama wo ahoɔden de ayɛ wo som adwuma no.—1 Korintofo 9:19-23.
21. (a) Yɛyɛ dɛn hu sɛ Yehowa bu anokwafo ankorankoro a wɔabɔ wɔn asu no sɛ wɔsom bo? (b) Dɛn na ɛkyerɛ sɛ asubɔ ho hia na yɛanya yɛn ti adidi mu wɔ atemmu a Onyankopɔn de bɛba nneɛma nhyehyɛe bɔne yi so no mu?
21 Onyankopɔn bu onipa a wahyira ne ho so abɔ asu a ɔde nokwaredi bɔ mmɔden sɛ obedi Yesu anammɔn akyi no sɛ ɔyɛ onipa titiriw ma no. Yehowa hwehwɛ nnipa koma ɔpepepem pii no nyinaa mu, na onim sɛnea saa nnipa no da nsow. Obu wɔn sɛ ademude, “ade a wɔpɛ.” (Hagai 2:7) Bible nkɔmhyɛ ahorow kyerɛ sɛ Onyankopɔn bu saafo no sɛ wɔahyɛ wɔn agyirae ama nkwagye wɔ n’atemmu a ɛrenkyɛ ɔde bɛba nneɛma nhyehyɛe bɔne yi so no mu. (Hesekiel 9:1-6; Malaki 3:16, 18) ‘Wɔayi wo ama daa nkwa’? (Asomafo no Nnwuma 13:48) Wufi wo koma mu pɛ sɛ wɔhyɛ wo agyirae sɛ obi a woresom Onyankopɔn? Ahosohyira ne asubɔ yɛ saa agyiraehyɛde no fã, na ɛho hia ma nkwagye.
22. Nneɛma bɛn na “nnipakuw kɛse” no betumi ahwɛ kwan?
22 Wiase nyinaa Nsuyiri no akyi no, Noa ne n’abusua fii adaka no mu baa asase a wɔasiesie so so. Saa ara na nnɛ, “nnipakuw kɛse” a wɔde Onyankopɔn ho nimdeɛ di dwuma wɔ wɔn asetra mu na wonya Yehowa anim dom no anidaso ne sɛ wobenya wɔn ti adidi mu wɔ nneɛma nhyehyɛe bɔne yi awiei, anya daa nkwa atra asase a wɔasiesie so a ɛbɛtra hɔ daa so. (Adiyisɛm 7:9, 14) Saa asetra no bɛyɛ sɛ dɛn?
SƆ WO NIMDEƐ HWƐ
Ɔkwan bɛn so na Yehowa pɛ sɛ wode ne ho nimdeɛ a wowɔ no di dwuma?
Nneyɛe a ɛkowie asubɔ mu no bi ne dɛn?
Dɛn nti na asubɔ nyɛ awiei na mmom mfiase?
Yɛbɛyɛ dɛn atumi atra ase ma ɛne yɛn ahosohyira ne yɛn asubɔ ahyia?
[Adesua no ho nsɛmmisa]
[Kratafa 172 mfonini]
So woahyira wo ho so ama Onyankopɔn wɔ mpaebɔ mu?
[Kratafa 174 mfonini ahorow]
Dɛn na esiw wo kwan sɛ mmɔ asu?
