Yesu Kristo—Onyankopɔn Ho Nimdeɛ Safe
Ti 4
Yesu Kristo—Onyankopɔn Ho Nimdeɛ Safe
1, 2. Ɔkwan bɛn so na wiase no som ahorow ama Onyankopɔn ho nimdeɛ safe no ho atɔ kyima?
WUGYINA wo pon ano, na wode ahopere hwehwɛ wo dan safe. Awɔw wom na esum aduru, na wo ho pere wo sɛ wobɛkɔ dan no mu—nanso safe no ntumi mmue. Ɛte sɛ nea ne safe nen, nanso ɔpon no mmue. Abasamtu bɛn ara ni! Wosan hwɛ wo nsafe no bio. Ɔpon no de na wode rebue no? Obi ama safe no ho aka anaa?
2 Ɛno yɛ mfatoho a ɛfata nea wiase yi som ahorow a ayɛ basaa no ayɛ wɔ Onyankopɔn ho nimdeɛ ho. Nokwarem no, nnipa pii ama safe a yɛnam so nya ntease—Yesu Kristo—ho atɔ kyima. Ɔsom ahorow bi ayi safe no afi hɔ, abu wɔn ani agu Yesu so koraa. Afoforo asakra afã a Yesu wɔ no, na wɔsom no sɛ Ade Nyinaa so Tumfoɔ Nyankopɔn. Sɛnea ɛte biara no, sɛ yɛannya saa onipa titiriw yi a ɔne Yesu Kristo no ho nokware ntease a, yentumi nnya Onyankopɔn ho nimdeɛ.
3. Dɛn nti na yebetumi afrɛ Yesu sɛ Onyankopɔn ho nimdeɛ safe?
3 Ebia wobɛkae sɛ Yesu kae sɛ: “Eyi ne daa nkwa, sɛ wobenya wo, nokware Nyankopɔn koro no, ne nea wosomaa no, Yesu Kristo, ho nimdeɛ.” (Yohane 17:3, NW) Eyi a Yesu kae no nkyerɛ sɛ na ɔrehoahoa ne ho. Kyerɛwnsɛm no si hia a ɛho hia sɛ yenya Kristo ho nokware nimdeɛ so dua mpɛn pii. (Efesofo 4:13; Kolosefo 2:2; 2 Petro 1:8; 2:20) Ɔsomafo Petro kae sɛ: “[Yesu Kristo] na adiyifo nyinaa di ne ho adanse.” (Asomafo no Nnwuma 10:43) Na ɔsomafo Paulo kyerɛwee sɛ: “[Yesu] mu na wɔde nyansa ne nimdeɛ ademude nyinaa akora.” (Kolosefo 2:3) Paulo kae mpo sɛ Yesu nti na Yehowa bɔhyɛ nyinaa bam. (2 Korintofo 1:20) Enti Yesu Kristo ne Onyankopɔn ho nimdeɛ safe ankasa. Ɛsɛ sɛ Yesu ho nimdeɛ a yɛwɔ a ɛfa ne nipasu ne n’afa wɔ Onyankopɔn nhyehyɛe mu ho no yɛ nea emu da hɔ pefee. Nanso dɛn nti na Yesu akyidifo bu no sɛ ɔyɛ onipa titiriw wɔ Onyankopɔn atirimpɔw ahorow mu?
MESIA A WƆHYƐƐ NE HO BƆ NO
4, 5. Anidaso ahorow bɛn na egyina Mesia so, na Yesu asuafo no buu No dɛn?
4 Efi ɔbarima nokwafo Habel bere so no, Onyankopɔn asomfo de ahopere ahwɛ Aseni a Yehowa Nyankopɔn ankasa hyɛɛ ne ho nkɔm no kwan. (Genesis 3:15; 4:1-8; Hebrifo 11:4) Ná wɔada no adi sɛ Aseni no bedi Onyankopɔn atirimpɔw ho dwuma sɛ Mesia, a asekyerɛ ne “Nea Wɔasra No.” ‘Ɔbɛma bɔne awie du,’ na wɔkaa n’Ahenni anuonyam ahorow ho asɛm siei wɔ nnwom no mu. (Daniel 9:24-26; Dwom 72:1-20) Hena na na ɛbɛda adi sɛ ɔne Mesia no?
5 Susuw anigye a Yudani aberante bi a wɔfrɛ no Andrea nyae bere a otiee nsɛm a Yesu a ofi Nasaret kae no ho. Andrea tuu mmirika kɔɔ ne nua Simon Petro nkyɛn kɔka kyerɛɛ no sɛ: “Yɛahu Mesia no.” (Yohane 1:41) Ná Yesu asuafo no gye di sɛ ɔne Mesia a wɔhyɛɛ ne ho bɔ no. (Mateo 16:16) Na nokware Kristofo anya ɔpɛ sɛ wobewu wɔ gyidi a ɛne sɛ Yesu ne Mesia anaa Kristo a wɔhyɛɛ ne ho nkɔm ampa no ho. Adanse bɛn na wɔanya? Ma yensusuw adanse ahorow abiɛsa ho.
ADANSE A ƐKYERƐ SƐ NA YESU NE MESIA NO
6. (a) Abusua bɛn na na ɛbɛwo Aseni a wɔhyɛɛ ne ho bɔ no, na yɛyɛ dɛn hu sɛ saa abusua anato no mu na wɔwoo Yesu? (b) Dɛn nti na obiara a ɔtraa ase wɔ 70 Y.B. akyi no rentumi nna no adi sɛ ɔne Mesia no?
6 Yesu anato na ɛde ade a edi kan a yegyina so hu no sɛ ɔne Mesia a wɔhyɛɛ ne ho bɔ no ma. Ná Yehowa aka akyerɛ Ne somfo Abraham sɛ Aseni a wɔhyɛɛ ne ho bɔ no befi n’abusua mu aba. Abraham ba Isak, Isak ba Yakob, ne Yakob ba Yuda nsa kaa bɔhyɛ a ɛte saa ara. (Genesis 22:18; 26:2-5; 28:12-15; 49:10) Mfehaha pii akyi no, wɔmaa Mesia no anato bɛnee abusua a wɔbɛwo no wom no bere a wɔka kyerɛɛ Ɔhene Dawid sɛ n’abusua na ɛbɛwo saa Onipa yi no. (Dwom 132:11; Yesaia 11:1, 10) Mateo ne Luka Nsɛmpa kyerɛwtohɔ no si so dua sɛ wɔwoo Yesu wɔ saa abusua anato no mu. (Mateo 1:1-16; Luka 3:23-38) Ɛwom sɛ na nnipa pii tan Yesu kɛse de, nanso wɔn mu biara annye abusua a ofi mu a wɔbɔɔ ho dawuru kɛse no ho kyim. (Mateo 21:9, 15) Ɛnde, ɛda adi pefee sɛ wontumi nnye n’anato ho kyim. Nanso, wɔsɛee Yudafo mmusua ho kyerɛwtohɔ no bere a Romafo no fow Yerusalem wɔ 70 Y.B. mu no. Akyiri yi, obiara antumi ankyerɛ pefee sɛ ɔne Mesia a wɔhyɛɛ ne ho bɔ no.
7. (a) Adanse a ɛto so abien a ɛkyerɛ sɛ Yesu ne Mesia no ne dɛn? (b) Ɔkwan bɛn so na Mika 5:2 nyaa mmamu wɔ Yesu so?
7 Nkɔmhyɛ a anya mmamu ne adanse a ɛto so abien. Hebri Kyerɛwnsɛm no mu nkɔmhyɛ pii ka Mesia no asetra mu nneɛma horow ho asɛm. Odiyifo Mika hyɛɛ nkɔm wɔ afeha a ɛto so awotwe A.Y.B. mu sɛ wɔbɛwo sodifo kɛse yi wɔ Betlehem a na ennyee din titiriw biara no mu. Ná wɔfrɛ Israel nkurow abien Betlehem, nanso nkɔmhyɛ yi kyerɛɛ nea ɛreka ho asɛm no: Betlehem a ɛwɔ Efrata, faako a wɔwoo Ɔhene Dawid no. (Mika 5:2) Ná Yesu awofo, Yosef ne Maria, te Nasaret a ɛwɔ bɛyɛ kilomita 150 wɔ Betlehem kusuu fam. Nanso, bere a na Maria afa afuru no, Roma sodifo Kaesare Augusto hyɛɛ nnipa no nyinaa sɛ wɔnkɔkyerɛw wɔn din wɔ wɔn kurom. * Enti Yosef de ne yere a ɔyem no kɔɔ Betlehem a wɔwoo Yesu wɔ hɔ no.—Luka 2:1-7.
8. (a) Bere bɛn na “adapɛn” 69 no fii ase, na asɛm bɛn na esii saa bere no? (b) Na “adapɛn” 69 no tenten yɛ ahe, na dɛn na esii bere a ɛbaa awiei no?
8 Wɔ afeha a ɛto so asia A.Y.B. mu no, odiyifo Daniel hyɛɛ nkɔm sɛ “obirɛmpɔn a wɔasra” no no bepue wɔ bere a wɔde ahyɛde ama sɛ wɔnsan nkɔkyekye Yerusalem no akyi “adapɛn” 69. (Daniel 9:24, 25) Ná “adapɛn” yi mu biara tenten yɛ mfe ason. * Sɛnea Bible no ne wiase abakɔsɛm kyerɛ no, wɔde ahyɛde a ɛkyerɛe sɛ wɔnsan nkyekye Yerusalem no mae wɔ 455 A.Y.B. mu. (Nehemia 2:1-8) Enti na Mesia no bepue mfe 483 (69 ahorow 7) wɔ 455 A.Y.B. akyi. Ɛno de yɛn ba 29 Y.B., afe koro no ara a Yehowa de honhom kronkron sraa Yesu no. Enti Yesu bɛyɛɛ “Kristo” (a asekyerɛ ne “Nea Wɔasra No”), anaasɛ Mesia.—Luka 3:15, 16, 21, 22.
9. (a) Ɔkwan bɛn so na Dwom 2:2 nyaa mmamu? (b) Nkɔmhyɛ afoforo a ɛbaam wɔ Yesu so no bi ne nea ɛwɔ he? (Hwɛ nsɛm a wɔahyehyɛ no.)
9 Nokwarem no, ɛnyɛ obiara na ogyee Yesu toom sɛ Mesia a wɔhyɛɛ ne ho bɔ no, na na Kyerɛwnsɛm no ahyɛ eyi ho nkɔm. Sɛnea na wɔakyerɛw wɔ Dwom 2:2 no, Onyankopɔn de honhom kaa Ɔhene Dawid ma ɔka siei sɛ: “Asase so ahene sɔre gyina, na atumfo bom tu agyina hyɛ [Yehowa] ne nea wasra no no.” Nkɔmhyɛ yi kyerɛe sɛ atumfo a wofi nsase ahorow so bɛyɛ biako sɛnea ɛbɛyɛ na wɔatow ahyɛ Nea Yehowa Asra no, anaa Mesia, no so. Na ɛbaa saa. Yudafo nyamesom akannifo, Ɔhene Herode, ne Roma amrado Pontio Pilato nyinaa ka ho bi na wokum Yesu. Efi saa bere no Herode ne Pilato a anka wɔyɛ atamfo no bɛyɛɛ nnamfo denneennen. (Mateo 27:1, 2; Luka 23:10-12; Asomafo no Nnwuma 4:25-28) Sɛ wopɛ adanse foforo a ɛkyerɛ sɛ na Yesu ne Mesia no a, yɛsrɛ sɛ hwɛ nsɛm a wɔahyehyɛ a asɛmti no ne sɛ “Mesia no Ho Nkɔmhyɛ Atitiriw Bi.”
10. Akwan bɛn so na Yehowa dii adanse sɛ Yesu ne Nea Wɔasra No a wɔhyɛɛ ne ho bɔ no?
10 Adanse a efi Yehowa Nyankopɔn hɔ ne adanse a ɛto so abiɛsa a esi so dua sɛ Yesu ne Mesia no. Yehowa somaa abɔfo sɛ wɔmma nkurɔfo nhu sɛ na Yesu ne Mesia a wɔhyɛɛ ne ho bɔ no. (Luka 2:10-14) Nokwarem no, wɔ Yesu asase so asetra mu no, Yehowa ankasa fi soro kae sɛ Yesu sɔ n’ani. (Mateo 3:16, 17; 17:1-5) Yehowa Nyankopɔn maa Yesu tumi ma ɔde yɛɛ anwonwade. Ná emu biara yɛ ɔsoro adanse foforo a ɛkyerɛ sɛ Yesu ne Mesia no, efisɛ Onyankopɔn remma ɔdaadaafo bi tumi da sɛ ɔmfa nyɛ anwonwade. Yehowa de ne honhom nso dii dwuma ma wɔde kyerɛw Nsɛmpa no, ma enti Mesia a Yesu yɛ no ho adanse bɛyɛɛ Bible no, nhoma a wɔakyerɛ ase akyekyɛ sen biara wɔ abakɔsɛm mu fã.—Yohane 4:25, 26.
11. Adanse ahe na ɛwɔ hɔ a ɛkyerɛ sɛ Yesu ne Mesia no?
11 Sɛ yɛka ne nyinaa bom a, nokwasɛm ɔhaha pii a ɛma yehu Yesu sɛ Mesia a wɔhyɛɛ ne ho bɔ no ka adanse ahorow yi ho. Ɛnde, ɛda adi sɛ nokware Kristofo abu no wɔ ɔkwan a ɛfata so sɛ ‘nea adiyifo nyinaa di ne ho adanse,’ ne nea wɔnam no so nya Onyankopɔn ho nimdeɛ. (Asomafo no Nnwuma 10:43) Nanso pii wɔ hɔ a yebesua afa Yesu Kristo ho sen nokwasɛm a ɛne sɛ ɔne Mesia no. Ɛhe na ofi? Ná ɔte dɛn?
YESU ASETRA ANSA NA ƆREBƐYƐ ƆDESANI
12, 13. (a) Yɛyɛ dɛn hu sɛ Yesu traa soro ansa na ɔreba asase so? (b) Hena ne “Asɛm no,” na dɛn na ɔyɛe ansa na ɔrebɛyɛ ɔdesani?
12 Yebetumi akyekyɛ Yesu asetra mu ayɛ no afã horow abiɛsa. Nea edi kan no fii ase bere tenteenten ansa na wɔrewo no wɔ asase so. Mika 5:2 kae sɛ Mesia no mfiase “fi tete nteredee, fi daa a enni ase nna mu.” Na Yesu kae pefee sɛ ofi “soro.” (Yohane 8:23; 16:28) Bere tenten bɛn na ɔde traa soro ansa na ɔreba asase so?
13 Wɔfrɛɛ Yesu sɛ Onyankopɔn “ba a ɔwoo no koro” efisɛ Yehowa ankasa na ɔbɔɔ no. (Yohane 3:16) Sɛ́ “abɔde nyinaa abakan” no, saa bere no Onyankopɔn de Yesu dii dwuma bɔɔ nneɛma afoforo nyinaa. (Kolosefo 1:15; Adiyisɛm 3:14) Yohane 1:1 ka sɛ “mfiase no” na “Asɛm no” (Yesu a na ɔmmɛyɛɛ ɔdesani) ne Onyankopɔn na ɛwɔ hɔ. Enti na Asɛm no ne Yehowa na ɛwɔ hɔ bere a wɔbɔɔ “ɔsoro ne asase” no. Ná Onyankopɔn ne Asɛm no na ɛrekasa bere a Ɔkaa eyi no: “Ma yɛnyɛ onipa wɔ yɛn suban so.” (Genesis 1:1, 26, NW) Saa ara nso na ɛbɛyɛ sɛ na Asɛm no ne Onyankopɔn ‘dwumayɛni a waben’ a ɔdɔ no, a wɔka ne ho asɛm sɛnkyerɛnne kwan so wɔ Mmebusɛm 8:22-31 sɛ nyansa a ɔkaa Yehowa ho ma wɔbɔɔ nneɛma nyinaa no. Bere a Yehowa de Asɛm no baa nkwa mu no akyi, ɔne Onyankopɔn traa soro mfe bebree ansa na ɔrebɛyɛ ɔdesani wɔ asase so.
14. Dɛn nti na wɔfrɛ Yesu sɛ “Onyankopɔn a wonhu no no suban”?
14 Ɛnyɛ nwonwa sɛ Kolosefo 1:15 frɛ Yesu sɛ “Onyankopɔn a wonhu no no suban”! Ɛdenam mfe bebree fekubɔ a emu yɛ den so no, Ɔba soɔmmerɛfo no abɛyɛ te sɛ n’Agya Yehowa. Eyi ne ade foforo a enti Yesu so na yɛnam nya Onyankopɔn ho nimdeɛ a ɛma nkwa no. Biribiara a Yesu yɛe wɔ asase so no te sɛ nea anka Yehowa bɛyɛ pɛpɛɛpɛ. Enti, Yesu a yebehu no kyerɛ sɛ Yehowa ho nimdeɛ a yɛwɔ bɛkɔ anim nso. (Yohane 8:28; 14:8-10) Ɛnde, ɛda adi sɛ ɛho hia sɛ yesua Yesu Kristo ho ade pii.
YESU ASETRA WƆ ASASE SO
15. Ɔkwan bɛn so na wɔwoo Yesu sɛ akokoaa a ɔyɛ pɛ?
15 Na Yesu asetra fã a ɛto so abien no wɔ asase so ha. Ofii ne pɛ mu de ne ho mae ma Onyankopɔn yii ne nkwa fii soro de bɛhyɛɛ Yudani ɔbaabun nokwafo bi a wɔfrɛ no Maria awotwaa mu. Yehowa honhom anaa adeyɛ tumi a ano yɛ den no ‘kataa Maria so’ na ɛma onyinsɛnee na awiei koraa no ɔwoo akokoaa a ɔyɛ pɛ. (Luka 1:34, 35) Yesu annya sintɔ biara amfi awo mu, efisɛ na ne nkwa fi Obi a ɔyɛ pɛ hɔ. Wɔtetee no wɔ ahiafo fie sɛ obi a duadwumfo Yosef faa no de no yɛɛ ne ba, na na ɔyɛ abusua no mu mmofra pii no abakan.—Yesaia 7:14; Mateo 1:22, 23; Marko 6:3.
16, 17. (a) Ɛhe na Yesu nyaa tumi de yɛɛ anwonwade ahorow, na ebi ne nea ɛwɔ he? (b) Su a Yesu daa no adi no bi ne nea ɛwɔ he?
16 Ná ahofama kɛse a Yesu wɔ ma Yehowa Nyankopɔn no ada adi dedaw bere a odii mfe 12 no. (Luka 2:41-49) Bere a Yesu nyinii na ofii ne som adwuma ase bere a na wadi mfe 30 no, ɔdaa ɔdɔ kɛse a ɔwɔ ma ne mfɛfo nnipa no nso adi. Bere a Onyankopɔn honhom kronkron no maa no tumi ma ɔde yɛɛ anwonwade no, ɔde ayamhyehye saa ayarefo, mmubuafo, wɔn a wɔadi dɛm, anifuraefo, asotifo ne akwatafo yare. (Mateo 8:2-4; 15:30) Yesu maa nnipa mpempem pii a na ɔkɔm de wɔn aduan. (Mateo 15:35-38) Ɔmaa ahum bi a na ɛreyɛ de ne nnamfo nkwa ato asiane mu no yɛɛ komm. (Marko 4:37-39) Nokwarem no, onyanee awufo mpo. (Yohane 11:43, 44) Anwonwade ahorow yi yɛ abakɔsɛm mu nokwasɛm turodoo. Yesu atamfo mpo gye toom sɛ ‘ɔyɛɛ nsɛnkyerɛnne pii.’—Yohane 11:47, 48.
17 Yesu tuu kwan kyinkyinii ne man mu nyinaa, na ɔkyerɛkyerɛɛ nkurɔfo Onyankopɔn Ahenni ho asɛm. (Mateo 4:17) Ɔyɛɛ boasetɔ ne ntease ho nhwɛso pa nso. Bere a n’asuafo dii no huammɔ mpo no, ɔde mmɔborohunu kae sɛ: “Honhom pɛ de, na ɔhonam na ɛyɛ mmerɛw.” (Marko 14:37, 38) Nanso, na Yesu wɔ akokoduru na ɔkaa nokware turodoo kyerɛɛ wɔn a wobuu nokware no animtiaa na wɔhyɛɛ abrɛfo so no. (Mateo 23:27-33) Nea ɛsen ne nyinaa no, osuasuaa n’Agya ɔdɔ nhwɛso no pɛpɛɛpɛ. Ná Yesu wɔ ɔpɛ mpo sɛ obewu sɛnea ɛbɛyɛ na adesamma a wɔnyɛ pɛ anya daakye ho anidaso. Ɛnde, ɛnyɛ nwonwa sɛ yebetumi aka Yesu ho asɛm sɛ nea yɛnam no so nya Onyankopɔn ho nimdeɛ! Yiw, ɔno ne safe a ɔte ase no! Nanso dɛn nti na yɛka sɛ ɔne safe a ɔte ase no? Eyi de yɛn ba n’asetra fã a ɛto so abiɛsa no so.
SƐNEA YESU TE NNƐ
18. Ɛsɛ sɛ yebu Yesu Kristo dɛn nnɛ?
18 Ɛwom sɛ Bible no ka Yesu wu ho asɛm de, nanso ɔte ase nnɛ! Nokwarem no, nnipa ɔhaha pii a wɔtraa ase wɔ afeha a edi kan Y.B. no mu yɛ nokwasɛm a ɛne sɛ wɔanyan no afi awufo mu no ho adansefo. (1 Korintofo 15:3-8) Sɛnea wɔhyɛɛ nkɔm no, ɛno akyi no ɔkɔtraa n’Agya nsa nifa twɛnee sɛ ne nsa bɛka ahenni tumi wɔ soro. (Dwom 110:1; Hebrifo 10:12, 13) Enti ɛsɛ sɛ yedwen Yesu ho dɛn nnɛ? Ɛsɛ sɛ yebu no sɛ akokoaa bi a ontumi nyɛ hwee a ɔda mmoa adididaka mu? Anaasɛ yemmu no sɛ onipa a ɔrehu amane a wɔrekum no? Dabi. Ɔyɛ Ɔhene tumfoɔ a ɔredi tumi! Afei, ɛnkyɛ koraa na wada ne tumi adi wɔ yɛn asase a ɔhaw wɔ so yi so.
19. Dɛn na Yesu bɛyɛ nnansa yi ara?
19 Wɔka Ɔhene Yesu Kristo ho asɛm fann wɔ Adiyisɛm 19:11-15 sɛ ɔde tumi kɛse reba abɛsɛe nnebɔneyɛfo. Hwɛ sɛnea ɛbɛyɛ sɛ ɔsoro Sodifo a ɔwɔ ɔdɔ yi ho pere no sɛ ɔbɛma amane a nnipa ɔpepem pii rehu nnɛ no to atwa! Na ne ho pere no saa ara sɛ ɔbɛboa wɔn a wɔbɔ mmɔden sɛ wobesuasua nhwɛso a ɛyɛ pɛ a ɔyɛe bere a na ɔwɔ asase so no. (1 Petro 2:21) Ɔpɛ sɛ ɔkora wɔn so de wɔn twa “Onyankopɔn, ade nyinaa so tumfoɔ no, da kɛse no mu ko” a ɛrebɛn ntɛmntɛm a wɔtaa frɛ no Harmagedon no, na ama wɔatumi atra ase daa sɛ Onyankopɔn soro Ahenni no asase so nkoa.—Adiyisɛm 7:9, 14; 16:14, 16.
20. Dɛn na Yesu bɛyɛ ama adesamma wɔ ne Mfirihyia Apem Nniso no mu?
20 Wɔ Yesu Mfirihyia Apem Nniso a asomdwoe wom a wɔkaa ho asɛm siei mu no, ɔbɛyɛ anwonwade ama adesamma nyinaa. (Yesaia 9:6, 7; 11:1-10; Adiyisɛm 20:6) Yesu bɛsa nyarewa nyinaa na wama owu to atwa. Obenyan nnipa ɔpepepem pii afi awufo mu sɛnea ɛbɛyɛ na wɔn nso wɔanya hokwan atra ase daa wɔ asase so. (Yohane 5:28, 29) W’ani begye ho sɛ wubesua ne Mesia Ahenni no ho ade pii wɔ ti bi a edi eyi akyi no mu. Nya awerɛhyem yi: Yentumi nhu sɛnea yɛn asetra bɛyɛ anigye wɔ Ahenni no mu mpo. Hwɛ hia a ɛho hia sɛ yebehu Yesu Kristo yiye! Yiw, ɛho hia sɛ yɛmma yɛn werɛ mfi Yesu da, safe a ɔte ase a yɛnam no so nya Onyankopɔn ho nimdeɛ a ɛde kɔ daa nkwa mu no.
[Ase hɔ nsɛm]
^ nky. 7 Saa dinkyerɛw yi maa Roma Ahemman no tumi gyigyee tow yiye. Enti, Augusto boae ma sodifo bi a ‘ɔbɛma towgyefo pempensifo bi abɛfa ahemman no mu’ ho nkɔmhyɛ bi nyaa mmamu a na onnim. Nkɔmhyɛ koro no ara ka siei sɛ ‘wobebu’ “apam birɛmpɔn,” anaa Mesia, no wɔ nea obedi sodifo yi ade no bere so. Wokum Yesu wɔ nea obedii Augusto ade, Tiberio, ahenni mu.—Daniel 11:20-22.
^ nky. 8 Na tete Yudafo no taa dwen mfepɛn ho. Sɛ nhwɛso no, sɛnea na da a ɛto so ason biara yɛ Homeda no, saa ara nso na na afe a ɛto so ason biara yɛ Homeda afe.—Exodus 20:8-11; 23:10, 11.
SƆ WO NIMDEƐ HWƐ
Ɔkwan bɛn so na Yesu anato foa ka a ɔkae sɛ ɔne Mesia no so?
Mesia ho nkɔmhyɛ a Yesu ma enyaa mmamu no bi ne nea ɛwɔ he?
Ɔkwan bɛn so na Onyankopɔn kyerɛe tẽẽ sɛ Yesu ne Nea Wɔasra No no?
Dɛn nti na Yesu ne safe a ɔte ase a yɛnam so nya Onyankopɔn ho nimdeɛ?
[Adesua no ho nsɛmmisa]
[Nsɛm a wɔahyehyɛ wɔ kratafa 37]
MESIA NO HO NKƆMHYƐ ATITIRIW BI
NKƆMHYƐ ASƐM A ESII MMAMU
NE MMOFRAASE
Yesaia 7:14 Ɔbaabun woo no Mateo 1:18-23 Yeremia 31:15 Wokunkum nkokoaa Mateo 2:16-18
wɔ n’awo akyi
NE SOM ADWUMA
Yesaia 61:1, 2 Adwuma a Onyankopɔn Luka 4:18-21
de maa no
Yesaia 9:1, 2 Ne som adwuma maa Mateo 4:13-16
nkurɔfo huu hann kɛse bi
Dwom 69:9 Ɔbɔɔ Yehowa fie ho mmɔden Yohane 2:13-17
Yesaia 53:1 Wɔannye no anni Yohane 12:37, 38
Sakaria 9:9; Ɔtraa afurum ba so kɔɔ Mateo 21:1-9
Dwom 118:26 Yerusalem; wɔbɔɔ no ose
sɛ ɔhene ne nea ɔreba wɔ
Yehowa din mu
NE YIMA NE NE WU
Dwom 41:9; 109:8 Ɔsomafo biako anni nokware; Asomafo no Nnwuma 1:15-20
oyi Yesu ma na akyiri yi
wɔde obi si n’ananmu
Sakaria 11:12 Woyi no ma gye nnwetɛbona 30 Mateo 26:14, 15
Dwom 27:12 Nkurɔfo di ne ho adansekurum Mateo 26:59-61 Dwom 22:18 Wɔbɔ ne ntade so ntonto Yohane 19:23, 24
Yesaia 53:12 Wɔkan no fra nnebɔneyɛfo Mateo 27:38
Dwom 22:7, 8 Wɔyaw no bere a ɔrewu Marko 15:29-32
Dwom 69:21 Wɔma no nsa nyinyanyinya Marko 15:23, 36
Yesaia 53:5; Wohwirow ne mu Yohane 19:34, 37; Sakaria 12:10
Yesaia 53:9 Wosie no wɔ adefo mu Mateo 27:57-60
Dwom 16:8-11 Wonyan no ma wamporɔw Asomafo no Nnwuma 2:25-32; 13:34-37
[Kratafa 35 mfonini]
Onyankopɔn maa Yesu tumi ma ɔde saa ayarefo yare
