Ti 44

Ɔma Ahum Bi a Ɛyɛ Hu Yɛ Komm

NÁ YESU ayɛ adwuma pii saa da no a nea ɛka ho ne nkurɔfokuw no a ɔkyerɛkyerɛ wɔn wɔ mpoano hɔ no, ne mfatoho ahorow no a ɛno akyi no ɔkyerɛkyerɛ mu kyerɛ n’asuafo no. Bere a ade sã no, ɔka sɛ: “Momma yentwa nkɔ asuogya nohɔ!”

Wɔ Galilea Po no ano apuei fam na Dekapoli, a ɛyɛ asɛm a efi Hela kasa de΄ka, a ɛkyerɛ “du” ne po΄lis, a ɛkyerɛ “kurow” mu no da. Dekapoli nkurow no mu na wosua Helafo amammerɛ, ɛwom mpo sɛ Yudafo pii tete hɔ de. Nanso nea Yesu yɛ wɔ ɔmantam no mu no sua koraa. Sɛnea yebehu akyiri yi, wɔ ne nsrahwɛ yi mu mpo no, biribi siw no kwan ma ɔntra ha nkyɛ.

Bere a Yesu ka sɛ wontwa nkɔ asuogya nohɔ no, asuafo no de ɔkorow fa no. Nanso nkurɔfo hu sɛ wɔkɔ. Ankyɛ afoforo tratra wɔn akorow mu na wɔne wɔn kɔ. Emu ntwe pii. Nokwarem no, Galilea Po no yɛ ɔtare kɛse bi ara kwa a ne tenten bɛyɛ akwansin 13, na ne trɛw bɛyɛ akwansin 7 1/2.

Yesu abrɛ ampa. Enti, wotui no akyi bere tiaa bi no, ɔda ɔkorow no to, na ɔde ne ti to sumii bi so na ɔda hatee. Asomafo no mu pii wɔ po so akwantu mu osuahu efisɛ wɔayi nam mfe pii wɔ Galilea Po no mu. Enti wɔhare ɔkorow no.

Nanso anyɛ akwantu a ɛyɛ mmerɛw. Esiane sɛ ɔtare a ɛwɔ fam sen po bɛyɛ anammɔn 700 no ani mframa mu yɛ hyew sen mframa a emu yɛ nwini a efi mmepɔw a ɛbɛn hɔ no so nti, ɛtɔ mmere bi a mframa a emu yɛ den bɔ wɔ hɔ na etumi dan mpofirim ahum kɛse wɔ ɔtare no so. Eyi na esi mprempren. Ankyɛ asorɔkye bɔ hyia ɔkorow no, na ɛbɔ nsu gu mu, enti ɛreyɛ amem. Nanso, Yesu ada araa!

Apofofo a wɔn ho akokwaw no bɔ mmɔden hare ɔkorow no. Akyinnye biara nni ho sɛ wɔahare ɔkorow bere a ahum retu pɛn. Nanso saa bere yi de wontumi nyɛ ho hwee. Esiane sɛ wosuro sɛ wobewu nti, wonyan Yesu. Wɔka sɛ, ‘Awurade, yɛreyera yi, ɛmfa wo ho?’ ‘Gye yɛn, yɛremem!’

Yesu sɔre, na ɔteɛ po no sɛ: “Mua w’ano, yɛ komm!” Na ahum a ɛretu no gyae na po no yɛ dinn. Ɔdan ne ho kyerɛ n’asuafo no na obisa sɛ, ‘adɛn nti na musuro? So munnyaa gyidi?’

Eyi ma ehu kɛse ka asuafo no. Wobisabisa wɔn ho wɔn ho sɛ: ‘Onipa bɛn ni? Efisɛ ɔkasa kyerɛ mframa ne nsu po na etie no.’

Tumi bɛn ara na Yesu de di dwuma sɛɛ yi! Hwɛ awerɛhyem ara a ɛyɛ sɛ yehu sɛ yɛn Hene no wɔ abɔde mu nneɛma ahorow no so tumi, na sɛ ɔdan n’adwene nyinaa ba yɛn asase yi so wɔ n’Ahenni nniso bere no mu a, nnipa nyinaa bɛtra ase dwoodwoo a asiane ahorow a ɛyɛ hu biara nka wɔn!

Ahum no gyae akyi bere bi no, Yesu ne n’asuafo no du apuei mpoano hɔ dwoodwoo. Ebia ahum no ano den no annka akorow a aka no na ɛsan kɔɔ fie dwoodwoo. Marko 4:35–5:1; Mateo 8:18, 23–27; Luka 8:22–26.

▪ Dɛn ne Dekapoli no, na ɛwɔ he?

▪ Nneɛma bɛn na ɛma ahum tu wɔ Galilea Po no so no?

▪ Bere a asuafo no suahu antumi annye wɔn no, dɛn na wɔyɛ?