Ti 131

Ahoyi a Etwa To, ne Pentekoste 33 Y.B.

YESU yɛ nhyehyɛe sɛ n’asomafo 11 no nyinaa ne no nhyiam wɔ bepɔw bi a ɛwɔ Galilea so. Ɛda adi sɛ wɔka nhyiam no ho asɛm kyerɛ asuafo afoforo, na nnipa bɛboro 500 behyiam. Nhyiam a ɛyɛ anigye bɛn na eyi yɛ sɛɛ, bere a Yesu ba na ofi ase kyerɛkyerɛ wɔn no!

Yesu kyerɛkyerɛ mu kyerɛ nnipakuw kɛse no ka nneɛma afoforo ho sɛ Onyankopɔn de ɔsoro ne asase so tumi nyinaa ama no. Otu wɔn fo sɛ: “Enti monkɔ nkɔyɛ amanaman nyinaa m’asuafo. Mommɔ wɔn asu nhyɛ Agya ne Ɔba ne honhom kronkron din mu, na monkyerɛkyerɛ wɔn sɛ wonni nea mahyɛ mo nyinaa so.”

Susuw ho hwɛ! Mmarima, mmea, ne mmofra nyinaa nya ahyɛde a ɛne sɛ wɔnyɛ asuafoyɛ adwuma no. Asɔretiafo bɛbɔ mmɔden sɛ wɔbɛma wɔagyae asɛnka ne nkyerɛkyerɛ no, nanso Yesu kyekye wɔn werɛ sɛ: “Hwɛ! Me ne mo wɔ hɔ nna nyinaa de bɛkɔ akosi wiase awiei.” Yesu nam honhom kronkron no so ne n’asuafo no kɔ so tra, na ɔboa wɔn ma wotumi wie wɔn som adwuma no.

Yesu de nnafua 40 yi ne ho adi kyerɛ n’asuafo no sɛ ɔte ase wɔ ne wusɔre akyi. Wɔ n’ahoyi ahorow yi mu no, ɔkyerɛkyerɛ wɔn Onyankopɔn Ahenni no ho nsɛm, na osi nea ɛyɛ wɔn asɛyɛde sɛ n’asuafo no so dua. Bere bi ɔda ne ho adi mpo kyerɛ ne nua Yakobo, na ɔma nea na kan onnye nni yi behu sɛ Ɔne Kristo no ampa.

Bere a asomafo no da so ara wɔ Galilea no, ɛda adi sɛ Yesu hyɛ wɔn sɛ wɔnsan nkɔ Yerusalem. Bere a ɔne wɔn hyiam wɔ hɔ no, ɔka kyerɛ wɔn sɛ: ‘Mummfi Yerusalem nnkɔ, na mmom monkɔ so ntwɛn Agya no bɔhyɛ a mote fii me nkyɛn no, sɛ Yohane de, ɔde nsu na ɛbɔɔ asu, na mo de, nna yi mu ɛrenkyɛ na wɔbɛbɔ mo asu honhom kronkron mu.’

Akyiri yi, Yesu hyia n’asomafo no bio na odi wɔn anim fi kurow no mu kɔ kodu Betania wɔ Ngo Bepɔw no apuei fam nsiane mu. Nea ɛyɛ nwonwa ne sɛ, nea na waka akyerɛ wɔn wɔ soro a ɛrenkyɛ ɔbɛkɔ ho nyinaa akyi no, wɔda so ara gye di sɛ ɔde n’Ahenni no besi hɔ wɔ asase so. Enti wobisa sɛ: “Awurade, bere yi mu na wobɛsan de ahenni no ama Israel anaa?”

Sɛ anka Yesu bɛbɔ mmɔden sɛ ɔbɛteɛteɛ wɔn nsusuwii a ɛmfata no bio no, obua tiawa sɛ: “Ɛnyɛ mo asɛm sɛ mubehu bere anaa nna a Agya no ahyɛ ato hɔ n’ankasa ne tumi mu.” Afei, osi adwuma a ɛsɛ sɛ wɔyɛ no so dua bio, bere a ɔka sɛ: “Sɛ honhom kronkron no nya ba mo so a, mubenya ahoɔden, na moayɛ m’adansefo Yerusalem ne Yudea nyinaa ne Samaria de akɔpem asase ano nohɔ.”

Bere a wɔda so ara rehwɛ no, Yesu fi ase foro kɔ soro, na afei omununkum kata no ho fi wɔn anim. Oyii ne honam nipadua no guu hɔ akyi no, Yesu foro kɔ soro sɛ honhom mu nipa. Bere a 11 no kɔ so hwɛ soro haa no, mmarima 2 a wɔhyɛ ntade fitaa begyina wɔn nkyɛn. Abɔfo a wɔafa ɔhonam nipadua yi bisa sɛ: “Galilea mmarima, adɛn na mugyina ha rehwɛ ɔsoro yi? Yesu yi ara a wɔafa no mo nkyɛn kɔ ɔsoro yi, ɔbɛba saa ara, sɛnea muhu no sɛ ɔrekɔ ɔsoro yi.”

Sɛnea na Yesu afi asase so no ne sɛ wɔanyɛ no baguam a gyegyeegyeyɛ ka ho na n’akyidifo anokwafo nkutoo na wohui. Enti ɔbɛsan aba saa kwan no ara so—ɛrenyɛ baguam a wɔyɛ no gyegyeegye, na n’akyidifo anokwafo nkutoo na ebehu sɛ wasan aba, na ne ba wɔ Ahenni tumidi mu no afi ase.

Afei asomafo no sian fi Ngo Bepɔw no so, wotwam wɔ Kidron Bon no mu, na wɔsan hyɛn Yerusalem. Wɔtra hɔ de yɛ osetie ma Yesu ahyɛde no. Dadu akyi, wɔ Yudafo Pentekoste Afahyɛ ase wɔ afe 33 Y.B. mu no, bere a asuafo bɛyɛ 120 ahyiam wɔ abansoro dan bi mu wɔ Yerusalem no, nnyigyei bi a ɛte sɛ mframa a emu yɛ den a ɛrebɔ bɛhyɛ ofi no mu nyinaa ma. Wohu tɛkrɛma a ɛte sɛ ogya, na biako besi wɔn a wɔwɔ hɔ no mu biara atifi, na asuafo no nyinaa fi ase ka kasa horow. Eyi ne honhom kronkron no a wɔde bɛma a na Yesu ahyɛ ho bɔ no! Mateo 28:16-20; Luka 24:49-52; 1 Korintofo 15:5-7; Asomafo no Nnwuma 1:3-15; 2:1-4.

▪ Hefo na Yesu ma wɔn nkradi ahyɛde ahorow wɔ bepɔw bi a ɛwɔ Galilea so, na dɛn ne ahyɛde ahorow yi?

▪ Awerɛkyekye bɛn na Yesu de ma n’asuafo no, na ɔkwan bɛn so na ɔne wɔn bɛtra?

▪ Yesu wusɔre akyi no, bere tenten bɛn na ne ho adi a oyi kyerɛ n’asuafo no di, na dɛn na ɔkyerɛkyerɛ wɔn?

▪ Hena a ɛda adi sɛ ansa na Yesu rebewu no, na ɔmmɛyɛɛ osuani no, na Yesu da ne ho adi kyerɛ no?

▪ Nhyiam abien a etwa to bɛn na Yesu ne n’asomafo no yɛ, na dɛn na esi wɔ saa mmere no mu?

▪ Ɔkwan bɛn so na sɛnea Yesu kɔe no, ɔbɛsan aba saa kwan no ara so?

▪ Dɛn na esi wɔ Pentekoste 33 Y.B.?