Ti 106

Bobe Turo Ho Mmɛ Pa Wɔn Ho Ntama

YESU wɔ asɔrefi hɔ. Ɔmaa nyamesom akannifo a wɔpɛ sɛ wohu tumi a ɔde yɛ nneɛma no yɛɛ basaa nkyɛe. Ansa na wɔn ani so tetew wɔn fi basaa a wɔayɛ no mu no, Yesu bisa sɛ: “Mudwen ho dɛn?” Na afei ɔde ɛbɛ bi ma wohu nnipa a wɔyɛ ankasa.

Yesu ka sɛ: “Ɔbarima bi wɔ mma baanu; na ɔkɔɔ nea odi kan no nkyɛn sɛ: Ɔba, nnɛ kɔyɛ me bobe turom adwuma! Na obuae sɛ: Wiɛ, owura, na wankɔ. Na ɔkɔɔ nea ɔka ho no nkyɛn kɔkaa saa ara kyerɛɛ no. Na obuae sɛ: Merenkɔ! Na akyiri no, onuu ne ho, na ɔkɔe.” Yesu bisa sɛ: “Wɔn baanu yi mu hena na ɔyɛɛ nea n’agya pɛ?”

N’asɔretiafo no bua sɛ: “Nea odi akyiri no.”

Enti Yesu kyerɛkyerɛ mu sɛ: “Nokware mise mo sɛ, towgyefo ne nguaman redi mo anim akɔ Onyankopɔn ahenni mu.” Ɛte sɛ nea mfiase no towgyefo ne nguaman ampɛ sɛ wɔsom Onyankopɔn. Nanso, te sɛ ɔba a ɔto so abien no, wonuu wɔn ho na wɔsom no. Nea ɛne eyi bɔ abira no, te sɛ ɔba panyin no, nyamesom akannifo no ka sɛ wɔsom Onyankopɔn nanso sɛnea Yesu ka no: “Yohane [Osuboni] nam trenee kwan mu baa mo nkyɛn, na moannye no anni; na towgyefo ne nguaman na egyee no dii, na mo nso muhui no, moannu mo ho akyiri yi annye no anni.”

Afei Yesu kyerɛ sɛ saa nyamesom akannifo no ntereho no nyɛ Onyankopɔn a wɔpow sɛ wɔnsom no ara kwa. Dabida, mmom no wɔyɛ nnipa bɔne amumɔyɛfo ankasa. Yesu ka sɛ: “Ofiwura bi wɔ hɔ a ɔyɛɛ bobe turo, na ogyee ho ban hyiae, na otuu mu nsa-kyi-amoa, na ɔtoo abantenten, na ɔde fɛm akuafo bi, na ogyaw hɔ kɔɔ baabi. Na aduaba bere dui no, ɔsomaa ne nkoa kɔɔ akuafo no nkyɛn sɛ wonkogye n’aduaba mmra. Na akuafo no faa ne nkoa no, na wɔhwee bi, na wokum bi, na wosiw bi abo. Bio ɔsomaa nkoa foforo a wɔdɔɔso sen kan de no; nanso wɔyɛɛ wɔn saa ara.”

“Nkoa” no ne adiyifo a “ofiewura” Yehowa Nyankopɔn soma wɔn ne “bobe turo” no mu “akuafo” no nkyɛn no. Akuafo yi ne Israel man a Bible no bu wɔn sɛ Onyankopɔn “bobe turo” mu mpanyimfo no.

Esiane sɛ “akuafo no” yɛ “nkoa” no ayayade na wokum wɔn nti Yesu kyerɛkyerɛ mu sɛ: “Akyiri no, [bobe turo wura no] somaa ne ba kɔɔ wɔn nkyɛn se: Wɔbɛfɛre me ba. Nanso akuafo no huu ɔba no, wɔkekae wɔn mu sɛ: Oyi ne ɔdedifo no; mommra mma yenkum no, na n’apɛgyade no nyɛ yɛn de! Na wɔfaa no twee no fii bobe turom hɔ kokum no.”

Afei Yesu bisa nyamesom akannifo no sɛ: “Enti da a bobe turo wura no bɛba no, ɛdɛn na ɔbɛyɛ akuafo no?” Nyamesom akannifo no bua sɛ: “Ɔbɛsɛe nnipa bɔne no pasaa, na ɔde bobe turo no ama akuafo foforo a wɔde aduaba bɛbrɛ no ne bere mu.”

Wɔnam saayɛ so bu wɔn ho fɔ a wonnim, efisɛ wɔka Yehowa Israel “bobe turo” man no mu Israelfo “akuafo” no ho. Aduaba a Yehowa hwehwɛ afi akuafo yi nkyɛn ne gyidi a ɛsɛ sɛ wonya wɔ ne Ba ne nokware Mesia no mu. Esiane aduaba yi a wɔamfa amma nti, Yesu bɔ kɔkɔ sɛ: “Monkan kyerɛw nsɛm [a ɛwɔ Dwom 118:22, 23] no mu pɛn sɛ: Ɔbo a abantofo apo no, ɛno ara na ɛbɛyɛ twea tibo; [Yehowa] na ɔmaa eyi yɛe; na ɛyɛ nwonwa yɛn ani so? Eyi nti na mise mo sɛ: Wobegye Onyankopɔn Ahenni afi mo nsam de akɔma ɔman a wɔde mu aduaba bɛba. Na nea ɔbɛhwe ɔbo yi so no, ɛbɛpɛtɛw no.”

Afei kyerɛwfo ne asɔfo mpanyin no hu sɛ Yesu ka wɔn ho asɛm na wɔhwehwɛ sɛ wokum nokware “ɔdedifo” no. Enti wobegye hokwan a wobenya de ayɛ ahene wɔ Onyankopɔn Ahenni mu no afi wɔn nsam sɛ ɔman, na wɔahyehyɛ ‘bobe turom akuafo’ ɔman foforo a ɛde mu aduaba bɛba.

Esiane sɛ nyamesom akannifo no suro nnipakuw no a wobu Yesu sɛ odiyifo no nti, wɔmmɔ mmɔden sɛ wobekum no saa bere yi. Mateo 21:28-46; Marko 12:1-12; Luka 20:9-19; Yesaia 5:1-7.

▪ Mmofra a wɔwɔ Yesu bɛ no mu no gyina hɔ ma henanom?

▪ Wɔ ɛbɛ a ɛto so abien no mu no, henanom na “ofiewura” no, “bobe turo” no, “akuafo” no, “nkoa” no ne “ɔdedifo” no gyina hɔ ma wɔn?

▪ Dɛn na ɛbɛba ‘bobe turom akuafo’ no so, na henanom na wobesi wɔn ananmu?