Ti 87

Fa Nyansa Siesie Wo Ho ma Daakye

NÁ YESU aka ɔba hohwini no ho asɛm a na ɔreka akyerɛ nnipadɔm a n’asuafo, towgyefo asisifo ne abɔnefo afoforo a wonim wɔn ne kyerɛwfo ne Farisifo ka ho no awie bere tiaa bi. Afei bere a ɔrekasa akyerɛ n’asuafo no, obu bɛ bi a ɛfa ɔdefo bi a na ne nsa aka ne fiehwɛfo anaa n’akoa ho amanneɛbɔ bi a enye no ho.

Sɛnea Yesu kyerɛ no, ɔfrɛ n’akoa no na ɔka kyerɛ no sɛ ɔrebeyi no adi. Akoa no bisa sɛ: “Menyɛ dɛn, efisɛ me wura rebegye me panyinni afi me nsam? Minni ahoɔden a mede metutu, na ahua nso yɛ me aniwu. Mahu nea mɛyɛ, na wotu me fi me panyinni so a, wɔagye me akɔ wɔn afi.”

Ná dɛn nhyehyɛe na akoa no bɛyɛ? Wiɛ, ɔfrɛ wɔn a wɔde ne wura ka no. Obisa sɛ: “Wode me wura ahe?” Nea odi kan no bua sɛ: ‘oliva ngo galɔn 580.’ Ɔka kyerɛ no sɛ: ‘Gye wo nhoma, na tra ase ntɛm na kyerɛw 290!’

Obisa ɔfoforo sɛ: “Na wo nso ahe na wode?” Ose: ‘awi ntwaa 630.’ ‘Fa wo nhoma, na kyerɛw 504.’

Akoa no wɔ hokwan sɛ ɔtew ka a nkurɔfo de ne wura no so, efisɛ ɔda so ara hwɛ ne wura sika so. Enti ɔnam ka a ɔtew so no so ne wɔn a wobetumi ayɛ no adɔe bere a n’adwuma afi ne nsa no refa nnamfo.

Bere a ne wura no te nea asi no, n’ani gye ho. Nokwarem no, ‘oyii ofiepanyin kontomponi no ayɛ sɛ wadi no nyansam.’ Nokwarem no Yesu de ka ho sɛ: “Wiase yi mma wɔ nyansa sen hann mma wɔn mfɛfo mu.”

Afei bere a Yesu rema n’asuafo ahu asuade a ɛwom no, ɔde nkuranhyɛ ma sɛ: “Momfa ahonyade a ɛnteɛ no bi nyɛ nnamfo, na sɛ ehia mo a, wɔagye mo akɔ daa afi no mu.”

Ɛnyɛ sɛ Yesu rekamfo akoa no wɔ ne nneyɛe a ɛnteɛ no ho, na mmom sɛnea otumi hwɛ ade kɔ akyiri, ne nyansa no. Mpɛn pii no “wiase yi mma” fi anitew mu de wɔn sika anaa wɔn dibea di dwuma de fa wɔn a wɔn nso wobetumi ayɛ wɔn adɔe akyiri yi no nnamfo. Enti ɛho hia sɛ Onyankopɔn nkoa, “hann mma” no de wɔn honam fam nneɛma, “ahonyade a ɛnteɛ” no di dwuma nyansam na ama wɔn ankasa anya mu mfaso.

Nanso sɛnea Yesu ka no, ɛsɛ sɛ wɔfa saa ahonyade yi so ne wɔn a wobetumi agye wɔn akɔ ‘daa afi mu’ no yɛ nnamfo. Kuw ketewa no de, mmeae yi wɔ soro; wɔ nguan foforo no fam no, ɛwɔ paradise asase so. Esiane sɛ Yehowa Nyankopɔn ne ne Ba no nkutoo na wobetumi agye nnipa akɔ mmeae yi nti, ɛsɛ sɛ yɛyere yɛn ho fa wɔn nnamfo denam “ahonyade a ɛnteɛ” biara a yɛwɔ a yɛde bɛboa Ahenni nneɛma no so. Afei, sɛ honam fam ahonyade di yɛn huammɔ anaasɛ ɛsɛe a, ade a nea ɛbɛyɛ biara ɛbɛba no, wɔbɛma yɛanya daakye a ɛtra hɔ daa.

Yesu kɔ so ka sɛ nnipa a wodi nneɛma yi anaa anyɛ yiye koraa no nneɛma a wɔhwɛ so mpo mu nokware no bedi nokware wɔ nsɛm a ɛho hia kɛse a wodi ho dwuma mu. Ɔtoa so sɛ: “Enti sɛ moanni ahonyade a ɛteɛ no mu nokware a, hena ne ɔde anokwade [honhom mu anaa Ahenni nneɛma] bɛhyɛ mo nsa? Na sɛ moanni obi ade [Ahenni nneɛma a Onyankopɔn de hyɛ ne nkoa nsa no] mu nokware a, hena na ɔde mo de [akatua a ɛne daa nkwa wɔ daa afi no mu] nso bɛma mo?”

Yɛrentumi nyɛ Onyankopɔn nokware nkoa na bere koro no ara yɛayɛ ahonyade a ɛnteɛ, honam fam ahonyade nkoa sɛnea Yesu de ba awiei no: “Ofienipa biara ntumi nsom awuranom baanu. Na ɔbɛtan obiako, na wadɔ obiako no anaasɛ ɔbɛbata obiako ho, na wabu obiako no animtiaa. Muntumi nsom Nyankopɔn ne mammon.” Luka 15:1, 2; 16:1–13; Yohane 10:16.

▪ Ɔkwan bɛn so na akoa a ɔwɔ Yesu bɛ no mu no fa wɔn a wobetumi aboa no akyiri yi nnamfo?

▪ Dɛn ne “ahonyade a ɛnteɛ” no, na ɔkwan bɛn so na yebetumi de anya nnamfo?

▪ Henanom na wobetumi agye yɛn akɔ “daa afi no mu,” na ɛyɛ he?