Ti 71

Farisifo Fi Wɔn Pɛ Mu Annye Anni

NEA anka ɔyɛ onifuraefo a ɔsrɛsrɛ ade no awofo suro bere a wɔde wɔn kɔ Farisifo no anim no. Wonim sɛ wɔahyɛ sɛ obiara a obegye Yesu adi no wobetu no afi hyiadan mu. Ayɔnkofa a ɛte saa a wɔne afoforo betwa mu wɔ mpɔtam hɔ no betumi ama asetra ayɛ den, titiriw no wɔ abusua a wodi hia no fãm. Enti awofo no yɛ ahwɛyiye.

Farisifo no bisa sɛ: “Mo ba a moka sɛ wɔwoo no onifuraefo no ni anaa? Afei ɛyɛɛ dɛn na ohu ade yi?”

N’awofo si so dua sɛ: “Yenim sɛ yɛn ba no ni, na wɔwoo no onifuraefo; na sɛ ɛyɛe na afei ohu ade yi de, yennim. Na bio nso onipa ko a obuee n’ani no, yɛn de, yennim.” Akyinnye biara nni ho sɛ na wɔn ba no aka nea esii nyinaa akyerɛ wɔn, nanso awofo no de anifere ka sɛ: “Mummisa no, wanyin, na ɔno ara bɛkasa ama ne ho.”

Enti Farisifo no frɛ ɔbarima no bio. Saa bere yi de, wɔbɔ mmɔden sɛ wobehunahuna no denam ka a wɔka sɛ wɔwɔ adanse ahorow a ɛkyerɛ sɛ Yesu yɛ ɔdebɔneyɛfo no so. Wɔka sɛ: “Fa anuonyam ma Onyankopɔn! Yɛn de, yenim sɛ onipa yi yɛ ɔdebɔneyɛfo.”

Nea anka ɔyɛ onifuraefo no annye wɔn sobo no ho akyinnye, ɔka sɛ: “Sɛ ɔyɛ ɔdebɔneyɛfo a, minnim.” Nanso ɔka ka ho sɛ: “Ade biako na minim, sɛ anka meyɛ onifuraefo, na afei de, mihu ade.”

Farisifo no bɔ mmɔden sɛ wobehu mfomso bi wɔ n’adanse no mu nti, wobisa sɛ: “Dɛn na ɔyɛɛ wo? Obuee w’ani no dɛn?”

Ɔbarima no de ahometew bua sɛ: “Maka makyerɛ mo dedaw, na moante? Dɛn na mopɛ sɛ mote bio?” Ɔde fɛwdi bisa sɛ: “So mo nso mopɛ sɛ modan n’asuafo?”

Mmuae yi hyɛ Farisifo no abufuw. Wɔka sɛ: “Wo na woyɛ ne suani; yɛn de, Mose asuafo ne yɛn. Yenim sɛ Onyankopɔn kasa kyerɛɛ Mose; na oyi de, yennim nea ofi.”

Ɔdesrɛfo a n’ade yɛ mmɔbɔ no de ahodwiriw ka sɛ: “Eyi na ɛyɛ nwonwa sɛ munnim nea ofi, nanso obuee m’aniwa.” Dɛn na yehu fi eyi mu? Ɔdesrɛfo no twe adwene si nokwasɛm no so sɛ: “Yenim sɛ Onyankopɔn ntie nnebɔneyɛfo; na sɛ obi fɛre Onyankopɔn na ɔyɛ nea ɔpɛ a, ɔno na otie no. Efi wiase mfiase wɔntee sɛ obi abue nea wɔwoo no onifuraefo ani pɛn.” Enti asɛm no mu da hɔ sɛ: “Sɛ oyi mfi Nyankopɔn nkyɛn a, anka ɔrentumi nyɛ hwee.”

Farisifo no nni asɛm a ɛyɛ tee na nyansa wom yi ho mmuae biara. Wontumi nyɛ nokware no ho hwee, enti wɔyeyaw ɔbarima no sɛ: “Wo de, bɔne mu koraa na wɔwoo wo, na wo na wokyerɛkyerɛ yɛn?” Afei, wɔpam ɔbarima no fii adi, akyinnye biara nni ho sɛ wotuu no fii hyiadan no mu.

Bere a Yesu te nea wɔayɛ no, ɔhwehwɛ ɔbarima no na ɔka sɛ: “Wugye onipa ba no di anaa?” Nea anka ɔyɛ onifuraefo ɔdesrɛfo no bua sɛ: “Hena ne no, Owura, na minnye no minni?.”

Yesu bua sɛ: “Nea ɔne wo rekasa yi, ɔne no.” Amonom hɔ ara ɔbarima no kotow Yesu anim na ɔka sɛ: “Migye midi, Awurade!”

Afei Yesu kyerɛkyerɛ mu sɛ: “Atemmu nti na mebaa wi yi ase, na wɔn a wonhu ade no ahu, na wɔn a wohu ade no adan anifuraefo.”

Farisifo a wotie no bisa sɛ: “So yɛn nso yɛyɛ anifuraefo?” Sɛ anka wogye toom sɛ wɔyɛ adwenem anifuraefo a, ɛnde na wɔwɔ anoyi sɛ wɔsɔre tia Yesu. Yesu ka kyerɛ wɔn sɛ: “Sɛ moyɛ anifuraefo a, anka munni bɔne.” Nanso wɔde koma den ka sɛ wɔnyɛ anifuraefo nti wonhia honhom mu anibuei biara. Enti Yesu ka sɛ: “Na afei muse: Yehu, enti mo bɔne aka.” Yohane 9:19–41

▪ Dɛn nti na nea anka ɔyɛ onifuraefo a ɔsrɛ ade no awofo no suro bere a wɔde wɔn kɔ Farisifo no anim no, enti wɔde anifere ma mmuae dɛn?

▪ Ɔkwan bɛn so na Farisifo no bɔ mmɔden sɛ wobehunahuna ɔbarima a anka ɔyɛ onifuraefo no?

▪ Ɔbarima no nyansasɛm bɛn na ɛhyɛ Farisifo no abufuw?

▪ Dɛn nti na Farisifo no nni anoyi wɔ Yesu a wɔsɔre tia no no ho?