Ti 59

Hena Ankasa Ne Yesu?

BERE a ɔkorow a Yesu ne n’asuafo no te mu no du Betsaida no, nkurɔfo de onifuraefo bi brɛ no na wɔsrɛ sɛ ɔmfa ne nsa nka ɔbarima no na ɔnsa no yare. Yesu so ɔbarima no nsa de no pue fi akuraa no ase na bere a wafe ntasu agu n’ani so akyi no, obisa sɛ: “Wuhu ade anaa?”

Ɔbarima no bua sɛ, “Mihu nnipa a ɛnennam hɔ, nanso mihu wɔn sɛ nnua.” Yesu de ne nsa gu ɔbarima no ani so na ɔma ohu ade yiye. Afei Yesu ma ɔbarima no kɔ ne fi na ɔhyɛ no sɛ ɔnnkɔ kurow no mu.

Afei Yesu ne n’asuafo no fi hɔ kɔ Kaesarea Filipi nkuraa a ɛwɔ Palestina kusuu fam. Ɛyɛ ɔkwan a ne tenten bɛyɛ akwansin 30 a ɛforo bɛyɛ anammɔn 1,150 kɔ Kaesarea Filipi a ɛda beae fɛfɛ no. Ɛda adi sɛ wɔde nna kakraa na etwa kwan yi.

Wɔ ɔkwan no so no, Yesu nkutoo man kɔbɔ mpae. Aka bɛyɛ asram akron anaa du pɛ na wawu, na ɔresusuw n’asuafo no ho. Wɔn mu pii asan afi n’akyi dedaw. Ɛda adi sɛ afoforo nso adwenem ayɛ wɔn nãã esiane sɛ ɔpow nkurɔfo no mmɔden a wɔbɔe sɛ wɔde no bɛyɛ ɔhene no na afei bere a n’atamfo kae sɛ ɔma wɔn sɛnkyerɛnne a efi soro a ɛkyerɛ sɛ ɔyɛ ɔhene a wanyɛ no nti. N’asomafo no gyedi sɛ ɔyɛ hena? Bere a wɔba beae a Yesu bɔ mpae no obisa sɛ: “Nnipa ka sɛ mene hena?”

Wobua sɛ, “Ebinom se: Yohane suboni no. Na ebinom se: Elia. Na ebinom se: Yeremia anaa adiyifo no mu biako.” Yiw, nnipa no susuw sɛ Yesu yɛ mmarima yi mu biako a wanyan no afi awufo mu!

Yesu bisa sɛ, “Na mo de, muse mene hena?”

Petro bua ntɛm ara: “Wone Kristo no, Onyankopɔn teasefo no ba!”

Bere a Yesu akyerɛ sɛ nea Petro ka no yɛ nokware akyi no, ɔka sɛ: “Me nso mise wo sɛ: Wone Petro, na ɔbotan yi so na mede m’asafo mesi, na asaman pon remmu mfa so.” Ɛha no Yesu di kan bɔ amanneɛ sɛ ɔbɛhyehyɛ asafo na owu mpo rentumi mfa emufo no nnomum wɔ wɔn asase so ɔsom adwuma a wɔde nokwaredi bɛyɛ no akyi. Afei ɔka kyerɛ Petro sɛ: “Mede ɔsoro ahenni ano nsafe mɛma wo.”

Enti Yesu ma ɛda adi sɛ Petro benya hokwan atitiriw bi. Dabi, ɛnyɛ sɛ wɔde Petro ayɛ ɔpanyin wɔ asomafo no mu, na wɔanyɛ no asafo no nnyinaso nso. Yesu ankasa ne Ɔbotan a wɔbɛhyehyɛ asafo no wɔ so no. Nanso na wɔde nsafe abiɛsa a sɛnea yɛbɛka no no, ɔde bebue hokwan ama nkurɔfo kuw ahorow akɔ ɔsoro Ahenni no mu bɛma no.

Na Petro de safe a edi kan no bedi dwuma wɔ Pentekoste 33 Y.B. na ama Yudafo a wɔanya adwensakra ahu nea ɛsɛ sɛ wɔyɛ na wɔanya nkwagye. Ɔde nea ɛto so abien no bedi dwuma ɛno akyi bere tiaa bi de abue hokwan ama Samariafo gyidifo akɔ Onyankopɔn Ahenni mu. Afei, wɔ 36, Y.B. mu no, ɔde safe a ɛto so abiɛsa no bedi dwuma de abue hokwan koro no ara ama Amanaman mufo momonotofo no, Kornelius ne ne nnamfo.

Yesu toa ɔne n’asomafo no nkɔmmɔbɔ no so. Ɔma wɔn werɛ how denam amanehunu ne owu a ɛrenkyɛ ɛbɛba no so wɔ Yerusalem a ɔka ho asɛm kyerɛ wɔn no so. Esiane sɛ Petro nte ase sɛ Yesu bɛsɔre afi awufo mu akɔ ɔsoro asetra mu nti, ɔde Yesu kɔ nkyɛn na ɔka sɛ, “Ɛmpare wo, Awurade! Eyi remma wo so.” Yesu dan ne ho, obua sɛ: “Fi me so, Satan! Woyɛ me hintidua, efisɛ wunnwen Onyankopɔn de, na mmom nnipa de na wudwen yi.”

Akyinnye biara nni ho sɛ ɛnyɛ asomafo no nkutoo na wɔne Yesu tu kwan no, enti afei ɔfrɛ wɔn ba ne nkyɛn na ɔkyerɛkyerɛ mu sɛ ɛrenyɛ mmerɛw sɛ wɔbɛyɛ n’akyidifo. Ɔka sɛ, “Obi pɛ sɛ odi m’akyi a, ɔmpa ne ho akyi, na ɔmfa n’asɛndua, na onni m’akyi. Na obiara a ɔpɛ sɛ ogye ne kra nkwa no, ebefi ne nsa; na nea ne kra befi ne nsa me ne asɛmpa no nti no, obegye no nkwa.”

Yiw, sɛ Yesu akyidifo no benya ne dom a, ɛsɛ sɛ wɔyɛ akokodurufo na wɔde wɔn ho bɔ afɔre. Ɔka sɛ: “Na obiara a n’ani bewu me ne me nsɛm ho, nnɛ mma awaresɛefo ne nnebɔneyɛfo yi mu no, ɔno nso ho bɛyɛ onipa ba no aniwu ɛda a ɔne abɔfo kronkron no bɛba wɔ n’anuonyam mu no.” Marko 8:22–38; Mateo 16:13–28; Luka 9:18–27.

▪ Dɛn nti na Yesu dwen n’asuafo no ho?

▪ Nkurɔfo ka sɛ Yesu yɛ hena?

▪ Nsafe bɛn na wɔde ma Petro, na ɔkwan bɛn so na ɔde bedi dwuma?

▪ Nteɛso bɛn na Petro nya, na dɛn ntia?