Ti 94

Hia a Mpaebɔ ne Ahobrɛase ho Hia

BERE a atwam a Yesu wɔ Yudea no, obuu sɛnea ɛho hia sɛ wɔkɔ so bɔ mpae ho bɛ bi. Afei, wɔ n’akwantu a etwa to a ɔde kɔ Yerusalem mu no, osi hia a ɛho hia sɛ wonnyae mpaebɔ no so dua bio. Ɛda adi sɛ na Yesu da so ara wɔ Samaria anaa Galilea bere a obu bɛ foforo yi kyerɛ n’asuafo no:

“Ɔtemmufo bi traa kurow bi mu a onsuro Onyankopɔn, nanso ɔmfɛre nnipa. Na okunafo bi nso traa kurow no mu, na ɔbaa ne nkyɛn sɛ: Bu ntɛn gye me me tamfo nsam! Na wampene ma ɛkyɛe kakra. Na akyiri yi ɔkae ne tirim sɛ: Minsuro Onyankopɔn na memfɛre nnipa de, nanso okunafo yi haw me nti, mebu ntɛn mama no, na wamfa ne ba a ɔba daa no amma me ho anyeraw me.”

Afei Yesu da nea n’asɛm no kyerɛ no adi bere a ɔka sɛ: “Muntie nea ɔtemmufo yi ka! Na Onyankopɔn, sɛ ɔtɔ ne bo ase kyɛ wɔn ho nso a, ɔremmu ntɛn nnye wɔn a wapaw wɔn a wosu frɛ no awia ne anadwo no anaa?”

Ná ɛnyɛ sɛ Yesu kyerɛ sɛ Yehowa Nyankopɔn te sɛ ɔtemmufo a ɔnteɛ no wɔ ɔkwan biara so. Mmom no, sɛ ɔtemmufo a ɔnteɛ mpo bedi biribi a wɔkɔ so srɛ no ho dwuma a, ɛnde akyinnye biara nni ho sɛ Onyankopɔn a ɔyɛ treneeni ne teefo no bebua ne nkurɔfo mpaebɔ, sɛ wɔkɔ so bɔ a. Enti Yesu toa so sɛ: “Mise mo sɛ [Onyankopɔn] bebu ntɛn agye wɔn ntɛm.”

Wɔtaa bu mmɔborɔfo ne ahiafo ntɛnkyea na wɔtaa di ma wɔn a wɔwɔ tumi ne adefo. Nanso ɛnyɛ sɛ Onyankopɔn bɛhwɛ ma wɔatwe abɔnefo aso wɔ ɔkwan a ɛteɛ so nko, na mmom ɔbɛhwɛ ma wɔne ne nkoa adi wɔ ɔkwan a ɛteɛ so denam daa nkwa a ɔbɛma wɔanya no so nso. Nanso nnipa baahe na wogye di yiye sɛ Onyankopɔn bɛma wɔabu atɛntrenee ntɛm?

Yesu reka gyidi a ɛfa tumi a mpaebɔ wɔ ho asɛm titiriw no, obisa sɛ: “Nanso onipa ba no ba a, so anka obehu gyidi asase so?” Ɛwom sɛ wammua asɛm no de, nanso ebia nea ɛkyerɛ ne sɛ nnipa kakraa bi na wobenya gyidi a ɛte saa bere a Kristo ba Ahenni tumi mu no.

Na ebinom a ná wɔwɔ ahotoso wɔ wɔn gyidi mu no mu binom ka wɔn a na wɔretie Yesu no ho. Na wɔwɔ wɔn ankasa ho mu ahotoso sɛ wɔyɛ atreneefo na ná wobu afoforo animtiaa. Ebia ná Yesu asuafo no mu binom mpo ka ho. Enti obuu saafo no bɛ a edi so yi:

“Nnipa baanu kɔɔ asɔrefi mpaebɔ; obiako yɛ Farisini, na obiako yɛ ɔtowgyeni. Farisini no gyinae, na ɔbɔɔ mpae ne tirim sɛ: Onyankopɔn, meda wo ase sɛ mente sɛ nnipa a aka no te: Amimfo, nkontompofo, ayerefafo anaa mpo towgyeni yi. Midi mmuada dapɛn mu mpɛn abien, mede nea minya nyinaa so ntotoso du du mema.”

Ná Farisifo taa da wɔn trenee adi baguam na ama wɔasɔ afoforo ani. Da a na wodi mmuada a wɔn ankasa de ato wɔn ho so no ne Dwoda ne Yawda, na wɔde afuw mu fan a esua mpo no mu ntotoso du du ma. Wɔ asram kakraa bi a atwam mu no, animtiaa a wobu nnipa mpapahwekwa no daa adi wɔ Asese Afahyɛ no ase bere a wɔkaa eyi no: “Nkurɔfokuw a wonnim mmara [kyerɛ sɛ, sɛnea Farisifo no kyerɛ ase] no, wɔadome wɔn!”

Bere a Yesu retoa ne bɛ no so no, ɔka obi a ɔte saa a “wɔadome” no ho asɛm: “Na towgyeni no gyinaa akyirikyiri, na wampɛ sɛ ɔma n’ani so kyerɛ ɔsoro po, na mmom ɔbɔɔ ne koko kae sɛ: Onyankopɔn, hu me mmɔbɔ!” Esiane sɛ towgyeni no de ahobrɛase gyee ne sintɔ toom nti, Yesu se: “Oyi de bem kɔɔ ne fi mmom sen obiako no; na obiara a ɔma ne ho so no, wɔbɛbrɛ no ase, na nea ɔbrɛ ne ho ase no, wɔbɛma no so.”

Enti Yesu si hia a ɛho hia sɛ obi yɛ ɔhobrɛasefo no so dua bio. Esiane sɛ wɔtetee Yesu asuafo no wɔ ɔman a ná Farisifo wɔ nkɛntɛnso na wosi dibea so dua bere nyinaa wom mu nti, ɛnyɛ nwonwa sɛ wɔn mpo ná anya wɔn so tumi. Nanso ahobrɛase ho asuade a Yesu kyerɛ bɛn ara ni! Luka 18:1–14; Yohane 7:49.

▪ Dɛn nti na ɔtemmufo a ɔnteɛ no pene okunafo no abisade no so, na asuade bɛn na Yesu kyerɛe wɔ abebu yi mu?

▪ Sɛ Yesu ba a, gyidi bɛn na ɔbɛhwehwɛ?

▪ Henanom na Yesu buu wɔn Farisini ne ɔtowgyeni no ho bɛ no?

▪ Farisifo su bɛn na ɛsɛ sɛ yɛkwati?