Ti 89

Mmɔborohunu Akwantu a Ɔde Kɔɔ Yudea

ADAPƐN bi a na abɛsen mu, wɔ Yerusalem Asɔrefidwira Afahyɛ no ase no, Yudafo no bɔɔ mmɔden sɛ wobekum Yesu. Enti ɔkɔɔ kusuu fam hɔ baabi a ɛda adi sɛ ɛbɛn Galilea Po no.

Bere tiaa bi no, ɔde n’ani kyerɛ kesee fam bio kɔ Yerusalem, na na ɔreka asɛm ɔkwan no mu wɔ Perea a ɛyɛ ɔmantam bi a ɛwɔ Yordan Asubɔnten no apuei fam nkuraase. Bere a wabu ɔdefo no ne Lasaro ho bɛ no awie no, ɔkɔ so kyerɛkyerɛ n’asuafo no nneɛma a na wadi kan akyerɛkyerɛ wɔn bere a na wɔwɔ Galilea no.

Sɛ nhwɛso no, ose sɛ obi to Onyankopɔn “nketewa” no mu bi hintidua a, “eye ma no sɛ wɔde owiyammo kyekyere ne kɔn mu kɔtow no kyene po mu.” Afei nso osi hia a fafiri ho hia no so dua, na ɔkyerɛkyerɛ mu sɛ: “Na sɛ [onua bi] fom wo mpɛn ason da koro, na ɔsan ba wo nkyɛn mpɛn ason ka sɛ: Masakra m’adwene a, fa firi no!”

Bere a asuafo no bisa sɛ, “Ka yɛn gyidi ho” no, Yesu bua sɛ: “Sɛ mowɔ gyidi sɛ sinapi fua a, anka mobɛka akyerɛ ankye yi sɛ: Wo ntini ntutu na kɔtɛw ɛpo mu! Na ebetie mo.” Enti gyidi ketewa mpo betumi ayɛ nneɛma akɛse.

Afei, Yesu ka tebea bi a ɛne asetra mu nokwasɛm a ɛyɛ ade nyinaa so tumfoɔ Nyankopɔn no nkoa su a ɛfata ho nhwɛso ho asɛm. Yesu se: “Mo mu hena na ɔwɔ akoa a ɔfɛtɛw asase anaasɛ ɔhwɛ mmoa, na ofi afum ba ofie a, obese no sɛ: Bɛsen ntɛm kɔtra adidii? na ɔrense no sɛ: Siesie nea medi, na bɔ wo ho so bɛsom me, na minnidi na mennom ansa, na akyiri no, wo nso woakodidi na woanom? Ɔbɛda akoa no ase sɛ wayɛ nea wɔahyɛ no no? Saa ara na mo nso sɛ moayɛ nea wɔahyɛ mo nyinaa a, monka sɛ: Yɛyɛ nkoa a mfaso nni yɛn ho; yɛayɛ nea ɛsɛ sɛ yɛyɛ.” Enti, ɛnsɛ sɛ Onyankopɔn nkoa te nka da sɛ wɔreboa no denam som a wɔsom no no so. Mmom no, ɛsɛ sɛ wɔkae hokwan a wɔwɔ sɛ wɔsom no sɛ ne fifo a wɔwɔ wɔn mu ahotoso no bere nyinaa.

Ɛda adi sɛ ɛyɛ bere a Yesu buu saa ɛbɛ yi akyi bere tiaa bi na ɔbɔfo bi bae. Maria ne Marta a wɔte Betania a ɛwɔ Yudea no na wɔsomaa no. Ɔbɔfo no ka sɛ: “Awurade, hwɛ, nea wodɔ no no yare.”

Yesu bua sɛ: “Ɔyare yi nyɛ owuyare, na Onyankopɔn anuonyam ntia, sɛ wɔbɛfa so ahyɛ Onyankopɔn anuonyam.” Bere a wɔatwɛn faako a wɔwɔ no nnanu akyi no, Yesu ka kyerɛ n’asuafo no sɛ: “Momma yɛnkɔ Yudea bio!” Nanso wɔkae no sɛ: “Rabi, nnansa yi ara na Yudafo hwehwɛe sɛ wosiw wo abo, na worekɔ hɔ bio yi?”

Yesu bisa wɔ mmuaema mu sɛ: “Ɛnyɛ nnɔnhwerew dumien na ɛwɔ da biako mu? Sɛ obi nam awia a, onhintiw, efisɛ ohu wi yi ase hann; na sɛ obi nam anadwo a, ohintiw, efisɛ hann nni no mu.”

Ɛda adi sɛ nea na Yesu kyerɛ ne sɛ “awia” anaasɛ n’asase so som adwuma no bere a Onyankopɔn ahyɛ no mmaa awiei ɛ, na enkosi sɛ ɛbɛba awiei no, obiara rentumi nyɛ no hwee. Ehia sɛ ɔde “awia” bere tiaa a aka no di dwuma wie koraa esiane sɛ ɛno akyi no “anadwo” a n’atamfo bekum no no bɛba nti.

Yesu de ka ho sɛ: “Yɛn adamfo Lasaro ada; na merekɔ makonyan no.”

Ɛda adi sɛ asuafo no susuw sɛ Lasaro ada rehome, ne sɛ eyi yɛ sɛnkyerɛnne pa a ɛkyerɛ sɛ ɔbɛte apɔw nti, wobua sɛ: “Awurade, sɛ wada de a, ɔbɛsɔre.”

Afei Yesu ka kyerɛ wɔn pen sɛ: “Lasaro awu; na mo nti ɛyɛ me anigye sɛ minni hɔ, na moagye adi. Nanso momma yɛnkɔ ne nkyɛn!”

Bere a Toma hu sɛ ɛyɛ nea wobetumi akum Yesu wɔ Yudea, nanso ɔpɛ sɛ ɔboa no nti, ɔhyɛ ne mfɛfo asuafo no nkuran sɛ: “Yɛn nso, momma yɛnkɔ na yɛne no nkowu!” Enti asuafo no de wɔn nkwa to asiane mu na wɔka Yesu ho wɔ ne mmɔborohunu akwantu a ɔde kɔ Yudea no mu. Luka 13:22; 17:1–10; Yohane 10:22, 31, 40–42; 11:1–16.

▪ Ɛhe na na Yesu aka asɛm a na ɛnkyɛe?

▪ Nkyerɛkyerɛ bɛn na Yesu ti̇̃ mu, na tebea a ɛne asetra mu nokwasɛm sɛ bɛn na ɔkyerɛkyerɛ mu de yɛ ɔsɛmpɔw bɛn ho nhwɛso?

▪ Nkra bɛn na wɔde brɛ Yesu, na dɛn na ɔde “awia” ne “anadwo” no kyerɛ?

▪ Dɛn na Toma kyerɛ bere a ɔka sɛ ‘Momma yɛnkɔ na yɛne no nkowu’ no?