Ti 24

Nea Enti a Yesu Baa Asase So

NA YESU ne n’asuafo baanan no ayɛ nneɛma pii wɔ Kapernaum saa da no, a nea ɛka ho ne Kapernaumfo a wɔde wɔn ayarefo nyinaa brɛɛ no ma ɔsaa wɔn yare anwummere no. Wɔannya bere anhome.

Ɛyɛ ahemadakye. Bere a anim ntetew nwiei no, Yesu sɔre na ne nkutoo fi adi. Ne nkutoo kɔhyɛ baabi a obetumi abɔ n’Agya mpae wɔ kokoam. Nanso ɛno ankyɛ efisɛ bere a Petro ne afoforo no hui sɛ onni hɔ no, wofi adi kɔhwehwɛ no.

Bere a wohu Yesu no, Petro ka sɛ: “Nnipa nyinaa hwehwɛ wo.” Kapernaumfo hwehwɛ sɛ Yesu tra wɔn nkyɛn. Na wɔn ani sɔ nea wayɛ ama wɔn no ampa! Nanso so Yesu baa asase so sɛ ɔbɛsa nyarewa wɔ anwonwa kwan so ara kwa? Dɛn na ɔka wɔ eyi ho?

Sɛnea Bible kyerɛwtohɔ bi kyerɛ no, Yesu bua n’asuafo no sɛ: “Momma yɛnkɔ nkurow a ɛdeda hɔ no mu, na menkɔka asɛmpa no ɛhɔ nso; na eyi nti na mebae.” Ɛwom sɛ nnipa no hyɛ Yesu sɛ ɔntra wɔn nkyɛn de, nanso ɔka kyerɛ wɔn sɛ: “Ɛsɛ sɛ meka Onyankopɔn ahenni ho asɛmpa no mekyerɛ nkurow afoforo nso; efisɛ eyi na wɔbɔɔ din somaa me.”

Yiw, Yesu baa asase so bɛkaa Onyankopɔn Ahenni a ɛbɛtew n’Agya din ho na asa adesamma nyarewa nyinaa koraa no ho asɛm titiriw. Nanso, Yesu saa nyarewa anwonwa kwan so de kyerɛe sɛ Onyankopɔn na ɔsomaa no. Saa ara nso na wɔ mfehaha bi a atwam mu no, Mose yɛɛ anwonwade ahorow de dii ne ho adanse sɛ ɔyɛ Onyankopɔn akoa.

Afei, bere a Yesu fi Kapernaum kɔ asɛnka wɔ nkurow afoforo mu no, n’asuafo baanan no ne no kɔ. Baanan yi ne Petro ne ne nua Andrea, ne Yohane ne ne nua Yakobo. Kae sɛ dapɛn a atwam no mu nkutoo na wɔtoo nsa frɛɛ wɔn sɛ Yesu mfɛfo akwantufo adwumayɛfo.

Galilea a Yesu ne n’asuafo no kyinkyini ka asɛm no di yiye kɛse! Nokwarem no, ne dwumadi ahorow no ho amanneɛbɔ trɛwee wɔ Syria nyinaa mpo. Nnipakuw kɛse a wofi Galilea, Yudea ne Yordan Asubɔnten no agya nyinaa dii Yesu ne n’asuafo no akyi. Marko 1:35–39; Luka 4:42, 43; Mateo 4:23–25; Exodus 4:1–9, 30, 31.

▪ Dɛn na esi wɔ da a Yesu yɛ adwuma pii wɔ Kapernaum no anɔpa?

▪ Dɛn nti na wɔsomaa Yesu asase so, na dɛn nti na ɔyɛɛ n’anwonwade ahorow no?

▪ Henanom na wɔka Yesu ho kɔ asɛnka wɔ Galilea, na nkurɔfo yɛ wɔn ade dɛn wɔ Yesu dwumadi ahorow no ho?