TI 48

Ofi Yairo Fi na Ɔsan Kɔ Nasaret

NA YESU ayɛ adwuma pii saa da no—po so akwantu a ɔde fi Dekapolis, ɔbea a mogya tu no a ɔsaa no yare ne Yairo babea no a onyan no no. Nanso ade nsae ɛ. Akyinnye biara nni ho sɛ bere a Yesu fi Yairo fi no anifuraefo baanu di n’akyi teɛteɛm sɛ: “Dawid ba, hu yɛn mmɔbɔ!”

Mmarima yi nam Yesu a wɔfrɛ no “Dawid ba” no so kyerɛ gyidi a wɔwɔ sɛ Yesu ne Dawid ahengua no difo ma enti ɔne Mesia a wɔahyɛ ne ho bɔ no. Nanso Yesu yɛ te sɛ nea wabu n’ani agu wɔn nteɛteɛm no so, ebia ɔde hwɛ sɛ wɔbɛkɔ so ara anaa. Nanso mmarima no nnyae. Wodi Yesu akyi kɔ baabi a ɔte, na bere a ɔhyɛn fie no mu no, wodi n’akyi kɔ mu.

Ɛhɔ no Yesu bisa sɛ: “Mugye di sɛ metumi mayɛ eyi?”

Wɔde ahotoso bua sɛ: “Yiw owura.”

Enti Yesu de ne nsa ka wɔn aniwa ka sɛ: “Sɛnea mo gyidi te no ɛnyɛ saa mma mo!” Wotumi hu ade amonom hɔ ara! Afei Yesu hyɛ wɔn ketee sɛ: “Monhwɛ na obiara anhu!” Nanso esiane sɛ anigye ahyɛ wɔn mma nti wobu wɔn ani gu Yesu ahyɛde no so na wɔka ne ho asɛm wɔ ɔman no mu nyinaa.

Bere a mmarima yi fi hɔ ara pɛ, nkurɔfo de ɔbarima bi a honhommɔne wɔ ne so na honhommɔne no ama watɔ mum ba. Yesu tu honhommɔne no na ɛhɔ ara ɔbarima no fi ase kasa. Nkurɔfo kuw no ho dwiriw wɔn wɔ anwonwade ahorow yi ho na wɔka sɛ: “Wonhuu saa bi da wɔ Israel.”

Farisifo nso wɔ hɔ. Wontumi nnye anwonwade ahorow no ho akyinnye, nanso wofi wɔn gye a wonnye nni no mu kasa tia Yesu ahoɔdenne no fibea sɛ: “Ɔnam ahonhommɔne panyin so na otu ahonhommɔne.”

Eyinom akyi bere tiaa bi no, Yesu san kɔ ne kurom Nasaret, saa bere yi de na n’asuafo no ka ne ho. Bɛyɛ afe ni a ɔkɔɔ ɛhɔ hyiadan mu kɔkyerɛkyerɛe. Ɛwom sɛ mfiase no nkurɔfo no ho dwiriw wɔn wɔ ne nsɛm a ɛyɛ nwonwa no ho de nanso akyiri yi wɔn bo fuw no wɔ ne nkyerɛkyerɛ no ho na wɔbɔɔ mmɔden sɛ wobekum no. Afei, Yesu fi ayamye mu rebɔ mmɔden bio sɛ ɔbɛboa ne kan ayɔnkofo yi.

Bere a wɔ mmeae bi no nkurɔfo pii hyia Yesu ho no, ɛda adi sɛ ɛha de wɔnyɛ saa. Enti wɔ homeda no, ɔkɔ hyiadan no mu kɔkyerɛkyerɛ. Wɔn a wotie no no pii ho dwiriw wɔn. Wobisa sɛ: “Ɛhe na oyi de nyansa ne ahoɔdenne yi fi? Ɛnyɛ duadwumfo no ba no ni? Wɔmfrɛ ne nã Maria, ne ne nuanom Yakobo ne Yosef ne Simon ne Yuda? Na ɛnyɛ ne nuabeanom nyinaa na wɔne yɛn wɔ ha yi anaa? Na afei ɛhe na oyi konyaa eyinom nyinaa?”

Wɔkae sɛ ‘Yesu yɛ ɔmanni te sɛ yɛn ara. Yehuu ne mmofrase, na yenim n’abusuafo. Ɔkwan bɛn so na ɔno ne Mesia no?’ Enti, wɔ adanse ahorow—ne nyansa pii ne anwonwade ahorow—nyinaa akyi no, wɔannye no anni. Esiane sɛ wonim no yiye nti, n’ankasa abusuafo mpo ɔyɛ wɔn hintidua na ɛma Yesu ka sɛ: “Nidi mmɔ odiyifo, gye ne kurom ne ne fi.”

Nokwarem no, wɔn gyidi a wonni no ma Yesu ho dwiriw no. Enti ɔnyɛ anwonwade biara wɔ hɔ sɛ ne nsa a ɔde gu nnipa kakraa bi so sa wɔn yare no nkutoo. Mateo 9:27–34; 13:54–58; Marko 6:1–6; Yesaia 9:7.

▪ Anifuraefo no de Yesu a wɔfrɛ no “Dawid ba” no kyerɛ sɛ wogye dɛn di?

▪ Yesu anwonwade ahorow no ho nkyerɛkyerɛmu bɛn na Farisifo no kura mu?

▪ Dɛn nti na ɛyɛ ayamye sɛ Yesu san kɔboa Nasaretfo no?

▪ Ɔkwan bɛn so na nkurɔfo tie Yesu wɔ Nasaret, na dɛn ntia?