Ti 66

Wɔ Asese Afahyɛ no Ase

NA YESU agye din bɛyɛ mfe abiɛsa wɔ n’asubɔ akyi. Na nnipa mpempem pii ahu n’anwonwade ahorow na na ne dwumadi ahorow ho amanneɛbɔ atrɛw wɔ ɔman no mu nyinaa. Afei, bere a nnipa no hyiam sɛ wɔrebedi Asese afahyɛ no wɔ Yerusalem no, wɔhwehwɛ no wɔ hɔ. Wobisa sɛ, “Saa ɔbarima no wɔ he?”

Na Yesu abɛyɛ obi a wogye ne ho akyinnye. Ebinom ka sɛ: “Ɔyɛ onipa pa.” Afoforo nso ka sɛ “Dabi, na ɔdaadaa nkurɔfo mmom.” Kasa huhuhuhu a ɛte saa pii kɔ so wɔ afahyɛ no mfiase. Nanso na obiara nni akokoduru a ɛbɛma wakasa wɔ baguam ama Yesu. Efisɛ na nnipa no suro sɛ Yudafo akannifo no bɛyɛ wɔn biribi.

Bere a wɔadi afahyɛ no adu mfinimfini no Yesu bedu hɔ. Ɔkɔ asɔrefi hɔ, na ɔma nnipa no ho dwiriw wɔn wɔ anwonwa kwan a ɔnam so kyerɛkyerɛ no ho. Esiane sɛ Yesu ankɔ rabifo sukuu ahorow no bi nti, Yudafo no ho dwiriw wɔn: “Ɛyɛɛ dɛn na oyi nsuaa nhoma pɛn na onim yi?”

Yesu kyerɛkyerɛ mu sɛ: “Me kyerɛkyerɛ nyɛ me dea, na nea ɔsomaa me no dea. Sɛ obi pɛ sɛ ɔyɛ n’apɛde a, obehu sɛ kyerɛ no fi Nyankopɔn anaasɛ efi m’ankasa tirim na meka.” Yesu nkyerɛkyerɛ ne Onyankopɔn Mmara hyia yiye. Enti, ɛsɛ sɛ wohu sɛ ɔhwehwɛ Onyankopɔn anuonyam na ɛnyɛ n’ankasa de. Yesu bisa sɛ: “Ɛnyɛ Mose na ɔmaa mo mmara no?” Na wɔ animka kwan so no, ɔkɔ so ka sɛ: “Nanso mo mu biara nni Mmara no so.”

Afei Yesu bisa sɛ: “Adɛn na morehwehwɛ me akum me?”

Na nnipadɔm no a ebia wɔyɛ ahɔho a wɔaba afahyɛ no ase no nnim saa. Wosusuw sɛ entumi mma obi adwenem sɛ ɔbɛpɛ sɛ okum ɔkyerɛkyerɛfo a ne ho yɛ nwonwa a ɔte saa. Enti wogye di sɛ ɛbɛyɛ sɛ biribi atoto wɔ Yesu fam nti na osusuw saa. Wɔka sɛ: “Wowɔ honhommɔne; hena na ɔhwehwɛ wo akum wo?”

Yudafo akannifo no pɛ sɛ wokum Yesu ɛwom sɛ ebia na nnipadɔm no nnim de. Bere a Yesu saa ɔbarima bi yare Homeda wɔ afe ne fã a atwam no, akannifo no bɔɔ mmɔden sɛ wobekum no. Enti Yesu nam asemmisa yi so da wɔn adwene a ɛnteɛ no adi sɛ: “Sɛ onipa nya twetiatwa homeda na wanto Mose mmara no a dɛn nti na mo bo afuw me sɛ mama onipa mu ho ayɛ ne den homeda? Mummmu ntɛn sɛnea muhu kwa; na mummu ntɛn a ɛteɛ.”

Afei Yerusalemfo a wonim tebea no ka sɛ: “Ɛnyɛ oyi ne nea wɔrehwehwɛ no akum no no? Na hwɛ ɔkasa pefee, na wɔnka no hwee. Sesɛɛ mpanyimfo ahu ampa sɛ oyi ne Kristo no anaa?” Saa Yerusalemfo yi kyerɛkyerɛ nea enti a wonnye nni sɛ Yesu ne Kristo no mu: “Nanso oyi de, yenim nea ofi; na Kristo no de, sɛ ɔba a, obi renhu nea ofi.”

Yesu bua sɛ: “Munim me, nso munim nea mifi. Na ɛnyɛ me na mehyɛɛ me ho mebae; na nea ɔsomaa me no yɛ ɔnokwafo a munnim no. Na me de minim no; efisɛ mifi ne nkyɛn, na ɔno na ɔsomaa me.” Eyi nti wɔbɔɔ mmɔden sɛ wɔbɛkyere no na ebia wɔde no akɔto afiase anaasɛ wɔama wɔakum no. Nanso wɔantumi efisɛ na bere nnui sɛ Yesu wu.

Nanso nnipa pii kɔ so gye Yesu di, na nokwarem no, ɛsɛ sɛ wɔyɛ saa. Na wanantew nsu so, wama mframa ayɛ dinn, wama po so ahum ayɛ komm, ɔnam anwonwa kwan so de abodoo ne mpataa kakraa bi ama nnipa mpempem pii adi, wasa ayarefo yare, wabue anifuraefo aniwa, wasa akwatafo yare na wanyan awufo mpo. Enti wobisa sɛ: “Kristo no, sɛ ɔba a, ɔbɛyɛ sɛnkyerɛnne bebree asen eyinom a oyi ayɛ yi?”

Bere a Farisifo no te sɛ nnipadɔm no reka eyi no, wɔne asɔfo mpanyin no soma asraafo mpanyimfo sɛ wɔnkɔkyere Yesu. Yohane 7:11–32.

▪ Bere bɛn na Yesu du afahyɛ no ase, na asɛm bɛn na wɔka fa ne ho?

▪ Dɛn nti na ebia ebinom ka sɛ Yesu wɔ adaemone?

▪ Yesu ho adwene bɛn na Yerusalemfo wɔ?

▪ Dɛn nti na nnipa pii gye Yesu di?