Ti 21

Wɔ Yesu Kurom Hyiadan Mu

AKYINNYE biara nni ho sɛ bere a Yesu san kɔ fie wɔ Nasaret no, anigye kɛse ba hɔ. Ansa na Yesu refi hɔ akɔ ma Yohane abɔ no asu bɛyɛ afe ne kakra a atwam ni no, ná wonim no sɛ duadwumfo. Nanso mprempren de nea wonim no titiriw ne sɛ obi a ɔyɛ anwonwade. Ɛhɔfo no pɛ sɛ ɔyɛ anwonwade yi bi wɔ wɔn mu.

Wɔn akwanhwɛ no mu yɛ den bere a, sɛnea Yesu taa yɛ no ɔkɔ hɔ hyiadan mu no. Bere a ɔsom no rekɔ so no, ɔsɔre sɛ ɔrekenkan, na wɔde Yesaia nhoma mmobɔwee no ma no. Obue beae a ɛka obi a wɔde Yehowa honhom asra no a ɛwɔ yɛn nnɛyi Bible mu wɔ ti 61 no ho asɛm no.

Bere a Yesu akenkan sɛnea Onii yi bɛka ogye akyerɛ nnommum, adehu akyerɛ anifuraefo ne Yehowa anisɔ afe ho asɛm awie no, ɔde nhoma mmobɔwee no hyɛ ɔsomfo no nsa na ɔtra ase. Obiara hwɛ no dinn. Afei ɔkasa, ebia ɛkyɛe kakra na ɔkyerɛkyerɛ mu sɛ: “Ɛnnɛ na kyerɛw nsɛm yi aba mu mo asom.”

Nkurɔfo no ho dwiriw wɔn wɔ ne “nyansa” no ho na wɔka kyerɛ wɔn ho wɔn ho sɛ: “Ɛnyɛ Yosef ba no ni anaa?” Nanso esiane sɛ na Yesu nim sɛ wɔpɛ sɛ wohu no sɛ ɔyɛ anwonwade ahorow nti, ɔtoa so sɛ: “Ampa ara, mode ɛbɛ yi bebu me sɛ: Ɔsafo, sa wo ho yare! Nneɛma a yɛate sɛ woyɛe Kapernaum no, yɛ no w’agya kurom.” Ɛda adi sɛ Yesu kan afipamfo yi te nka sɛ ɛsɛ sɛ ofi ase sa yare fi fie ma n’ankasa nkurɔfo ho di kan san wɔn. Enti wɔte nka sɛ Yesu ammu wɔn.

Yesu hu wɔn adwene no na ɔka abakɔsɛm bi a wɔn nyinaa nim. Ɔka sɛ wɔ Elia bere so no, na mmea akunafo pii wɔ Israel, nanso wɔansoma Elia ankɔ wɔn mu biara nkyɛn. Mmom no, ɔkɔɔ okunafo bi a ɔnyɛ Israelni nkyɛn wɔ Sidon na ɔkɔyɛɛ anwonwade wɔ hɔ de gyee nkwa. Na wɔ Elisa bere so no, na akwatafo pii wɔ hɔ, nanso Naaman a ofi Siria no nkutoo na Elisa maa ne ho fii.

Hyiadan no mufo a abakɔsɛm mu mfatoho a ɛma wɔn pɛsɛmenkominya ne gyidi a wonni da adi ahyɛ wɔn abufuw no sɔre na wɔpam Yesu fi kurow no mu. Wɔbɔ mmɔden sɛ wobesum no afi bepɔw a Nasaret kurow no gu so no so. Nanso Yesu gye ne ho fi wɔn nsam na ɔkɔ a hwee anyɛ no. Luka 4:16–30; 1 Ahene 17:8–16; 2 Ahene 5:8–14.

▪ Dɛn nti na anigye ba Nasaret?

▪ Dɛn na nnipa no ka wɔ Yesu kasa no ho, nanso dɛn na ɛhyɛ wɔn abufuw?

▪ Dɛn na nnipa no bɔ mmɔden sɛ wɔbɛyɛ Yesu?