Ti 2

Wɔhyɛɛ No Anuonyam Ansa Na Wɔrewo No

BERE a ɔbɔfo Gabriel ka kyerɛ ababaa Maria sɛ ɔbɛwo ɔbabarima a ɔbɛyɛ daa hene no, Maria bisa sɛ: “Eyi bɛyɛ dɛn na aba, efisɛ minnim ɔbarima biara?”

Gabriel kyerɛkyerɛ mu sɛ: “Honhom kronkron bɛba wo so, na nea ɔwɔ sorosoro no ahoɔden abɛkata wo so; enti na ade kronkron a wobɛwo no, wɔbɛfrɛ no Onyankopɔn ba.”

Sɛnea ɛbɛboa Maria ma wagye Gabriel nkrasɛm no adi no, ɔkɔ so ka sɛ: “Na hwɛ, wo busuani Elisabet nso anyinsɛn ne mmerewabere mu; na nea wɔfrɛ no obonin no, eyi ne ne ɔsram a ɛto so asia; efisɛ Onyankopɔn fam de, biribiara nni hɔ a ɛrentumi nyɛ.”

Maria gye Gabriel asɛm no di. Obua dɛn? Ɔka sɛ: “Hwɛ [Yehowa] afenaa ne me; ɛnyɛ mma me sɛnea w’asɛm se.”

Bere a Gabriel kɔ no, Maria siesie ne ho na ɔkɔsra Elisabet a ɔne ne kunu Sakaria te Yudea mmepɔw so kurow mu no. Efi Maria kurom wɔ Nasaret kɔ hɔ no yɛ ɔkwan tenten, ebia ɛbɛyɛ nnansa anaa nnannan kwan.

Bere a awiei koraa no Maria du Sakaria fie no, ɔhyɛn mu na okyia wɔn. Ɛbaa saa no, honhom kronkron hyɛ Elisabet ma na ɔka kyerɛ Maria sɛ: “Wɔahyira wo mmea mu, na wɔahyira wo yam ade! Na eyi fi he sɛ me wura ne na reba me nkyɛn yi? Na hwɛ, wo nkyia twaa m’asom ara pɛ, akokoaa no de ahosan huruwii me yam.”

Bere a Maria te eyi no ɔde anisɔ kɛse ka sɛ: “Me kra, kamfo [Yehowa], na m’agyenkwa Onyankopɔn ho na me honhom ho asan no; efisɛ wahwɛ n’afenaa ohia asetra. Na hwɛ, efi nnɛ awo ntoatoaso nyinaa bɛfrɛ me nhyira; efisɛ Otumfoɔ no ayɛ me ade kɛse.” Nanso, wɔ ɔdom a Maria anya nyinaa akyi no, ɔde anuonyam no ma Onyankopɔn. Ɔka sɛ: “Ne din ne kronkron, na ne mmɔborohunu wɔ wɔn a wosuro no so, awo ntoatoaso a edidi so nyinaa mu.”

Maria kɔ so de nkɔmhyɛ kwan so dwom a efi honhom mu kamfo Onyankopɔn sɛ: “Ɔde ne basa ayɛ ahoɔdenne; wapansam wɔn a wɔyɛ ahantan wɔn koma nsusuwii mu. Watu atumfo afi wɔn nhengua so, na wapagyaw ahiafo. Ɔde nnepa ahyɛ wɔn a ɔkɔm de wɔn ma, na wagya ahonyafo kwan yafumpan. Waso n’abofra Israel mu, sɛ ɔde bɛkae ne mmɔborohunu, sɛnea ɔka kyerɛɛ yɛn agyanom no, ama Abraham ne n’asefo daa.”

Maria ne Elisabet tra bɛyɛ asram abiɛsa na akyinnye biara nni ho sɛ ɔyɛ mmoa kɛse wɔ adapɛn a etwa to wɔ Elisabet nyinsɛn yi mu. Eye ampa ara sɛ mmea anokwafo baanu a wɔn nyinaa anyinsɛn denam Onyankopɔn mmoa so no bom tra ase wɔ wɔn asetra mu nhyira bere yi mu!

So wohyɛɛ anuonyam a wɔhyɛɛ Yesu ansa na wɔrewo no mpo no nsow? Elisabet frɛɛ no “me wura,” na ne ba a onnya nwoo no no de ahosan huruwii bere a Maria baa hɔ nea edi kan no. Nea ɛne eyi bɔ abira no, nnipa afoforo amfa obu kɛse amma Maria ne ne ba a afei na ɔrebɛwo no no, sɛnea yebehu no. Luka 1:26-56.

▪ Dɛn na Gabriel ka a ɛboa Maria ma ɔte sɛnea obenyinsɛn no ase?

▪ Ɔkwan bɛn so na wɔhyɛ Yesu anuonyam ansa na wɔrewo no?

▪ Dɛn na Maria ka wɔ nkɔmhyɛ kwan so dwom mu de kamfo Onyankopɔn?

▪ Maria ne Elisabet tra bere tenten bɛn, na dɛn nti na ɛfata sɛ Maria ne Elisabet tra saa bere yi mu?