Ti 108

Wɔn Nsa Anka Yesu

ESIANE sɛ Yesu kyerɛkyerɛ wɔ asɔrefi hɔ na wabu ne nyamesom mu atamfo no mmɛ abiɛsa de apa wɔn amumɔyɛ ho ntama nti, Farisifo no bo fuw na wotu agyina sɛ wobesum no afiri na waka biribi a wobegyina so akyere no. Wɔbɔ pɔ na wɔsoma wɔn asuafo ne Herode akyidifo sɛ wɔnkɔsɔ no nhwɛ.

Mmarima yi ka sɛ: “Kyerɛkyerɛfo, yenim sɛ woyɛ ɔnokwafo, na wokyerɛ Onyankopɔn kwan nokware mu, nanso obiara asɛm mfa wo ho; na wonhwɛ nnipa anim. Enti kyerɛ yɛn nea wudwen. Ɛwɔ hokwan sɛ woyi tow ma Kaesare anaasɛ wonnyi?”

Adɛfɛdɛfɛ no annaadaa Yesu. Ohu sɛ ɔka sɛ ‘Dabi, ɛnsɛ sɛ woyi tow yi’ a, wobebu no sɛ ɔsɔre tia Roma. Nanso, sɛ ɔka sɛ ‘Yiw, muntua tow yi’ a, Yudafo a wɔmpɛ sɛ wɔhyɛ Roma ase no bɛtan no. Enti obua sɛ: “Mo nyaatwomfo, adɛn na mosɔ me hwɛ? Momfa ɔtow sika no bi mmɛkyerɛ me!”

Bere a wɔde biako brɛ no no, obisa sɛ: “Hena mfonini ne nkyerɛwee ni?”

Wobua sɛ: “Kaesare dea.”

“Ɛnde momfa Kaesare de mma Kaesare ne Nyankopɔn de mma Onyankopɔn!” Bere a nnipa no te Yesu mmuae a nyansa wom no, ɛyɛ wɔn nwonwa. Na wogyaw no hɔ kɔ.

Bere a Sadukifo a wɔka sɛ owusɔre nni hɔ no hu sɛ Farisifo annya biribiara antia Yesu no, wɔkɔ ne nkyɛn kobisa sɛ: “Kyerɛkyerɛfo, Mose kae sɛ: Sɛ obi wu na onni mma a, ne nua nware ne yere no, na ɔnwo mma ne nua no. Na anuanom baason traa yɛn nkyɛn ha. Nea odi kan no waree, na owui; wannya mma, na ogyaw ne yere maa ne nua. Saa ara nso na nea ɔto so abien ne abiɛsa no yɛe de beduu ason no so. Na wɔn nyinaa akyi no, ɔbea no nso wui. Enti ɔsɔre mu no, baason yi mu hena na ɔbɛyɛ ne yere? Efisɛ wɔn nyinaa aware no.”

Yesu bua sɛ: “Ɛnyɛ onim a munnim kyerɛw nsɛm ne Nyankopɔn ahoɔden nti na mofom so yi? Na ɔsɔre mu no, wɔnware na wɔmma aware, na wɔte sɛ abɔfo wɔ ɔsoro. Na ɛfa awufo nyan ho de, monkanee Mose nhoma mu, wɔ wura no ho, sɛnea Onyankopɔn see no sɛ: Mene Abraham Nyankopɔn ne Isak Nyankopɔn ne Yakob Nyankopɔn? Ɔnyɛ awufo Nyankopɔn, na mmom ateasefo [Nyankopɔn]. Na mo de mofom so pii.”

Nkurɔfokuw no ho dwiriw wɔn bio wɔ Yesu mmuae no ho. Kyerɛwfo no mu binom mpo ka sɛ: “Kyerɛkyerɛfo, woaka no yiye.”

Bere a Farisifo no hu sɛ Yesu atua Sadukifo no ano no, wɔboa wɔn ho ano ba ne nkyɛn bɛsɔ no hwɛ bio. Wɔn mu biako bisa sɛ: “Kyerɛkyerɛfo, mmara no mu kɛse ne nea ɛwɔ he?”

Yesu bua sɛ: “Nea edi mmara nsɛm no nyinaa kan ne: Israel, tie, [Yehowa] yɛn Nyankopɔn yɛ [Yehowa koro]; na dɔ [Yehowa] wo Nyankopɔn fi wo koma nyinaa mu ne wo kra nyinaa mu ne w’adwene nyinaa mu ne w’ahoɔden nyinaa mu. Na nea ɛto so abien no ni: Dɔ wo yɔnko sɛ wo ho! Mmara nsɛm bi nni hɔ a ɛkyɛn eyinom.” Nokwarem no, Yesu de ka ho sɛ: “Mmara nsɛm abien yi so na mmara ne adiyifo nyinaa sɛn.”

Kyerɛwfo biako ka sɛ: “Kyerɛkyerɛfo, woaka no nokware sɛ Onyankopɔn yɛ biako, na obi nni hɔ sɛ ɔno nko; na sɛ wobɛdɔ no afi koma nyinaa ne adwene nyinaa ne ɔkra nyinaa ne ahoɔden nyinaa mu, na wobɛdɔ wo yɔnko sɛ wo ho, sen ɔhye afɔre ne mogya afɔre nyinaa.”

Yesu hu sɛ kyerɛwfo no abua yiye, enti ɔka kyerɛ no sɛ: “Wo ne Nyankopɔn ahenni ntam kwan nware.”

Nnansa ni—Kwasida, Dwoda ne Benada—a Yesu akyerɛkyerɛ wɔ asɔrefi hɔ. Nnipa no de anigye atie no, nanso nyamesom akannifo no pɛ sɛ wokum no, nanso de besi saa bere yi de wɔn mmɔdenbɔ no ayɛ ɔkwa. Mateo 22:15-40; Marko 12:13-34; Luka 20:20-40.

▪ Agyina bɛn na Farisifo no tu sɛ wɔde resum Yesu afiri, na sɛ ɔka sɛ yiw anaa dabi a dɛn na ɛbɛba?

▪ Ɔkwan bɛn so na Yesu sɛe Sadukifo mmɔden a wɔbɔe sɛ wɔn nsa bɛka no no?

▪ Mmɔden bɛn bio na Farisifo bɔ sɛ wɔde sɔ Yesu ahwɛ, na dɛn na efi mu ba?

▪ Wɔ Yesu ɔsom adwuma no fa a etwa to wɔ Yerusalem no mu no, nna ahe na ɔde kyerɛkyerɛ wɔ asɔrefi hɔ, na dɛn na efi mu ba?