Ti 60

Wodi Kan Hu Kristo Ahenni Anuonyam

YESU aba Kaesarea Filipi, na ɔkyerɛkyerɛ nnipa kuw a n’asomafo no nso ka ho. Ɔbɔ wɔn amanneɛ a ɛyɛ nwonwa yi: “Nokware mise mo sɛ: Nnipa bi gyina ha a wɔrenka owu nhwɛ kosi sɛ wobehu onipa ba no sɛ ɔreba n’ahenni mu.”

Ebia asuafo no bebisa sɛ, ‘dɛn na Yesu kyerɛ?’ Bɛyɛ sɛ ɛno akyi dapɛn biako no, Yesu fa Petro, Yakobo ne Yohane ka ne ho foro bepɔw tenten bi. Akyinnye biara nni ho sɛ ɛyɛ anadwo, efisɛ asuafo no ani kum. Bere a Yesu rebɔ mpae no, ɔsakra wɔ wɔn ani so. N’anim fi ase haran te sɛ owia, na ne ntade hyerɛn sɛ kanea.

Afei, nnipa baanu a wɔte sɛ “Mose ne Elia” yi wɔn ho adi na wofi ase ka Yesu ‘kɔ a ebesi wɔ Yerusalem’ ho asɛm kyerɛ no. Akyinnye biara nni ho sɛ ɔkɔ no yɛ Yesu wu ne ne wusɔre a ebedi akyi no. Enti, nkɔmmɔbɔ yi da no adi sɛ n’animguase wu no nyɛ nea obetumi akwati sɛnea Petro hwehwɛe no.

Asuafo a afei de wɔn ani so atetew wɔn koraa no hwɛ na wɔde ahodwiriw tie. Ɛwom sɛ eyi yɛ anisoadehu de, nanso ɛda adi ara ma Petro fi ase de ne ho hyɛ adehwɛ no mu na ɔka sɛ: “Awurade eye sɛ yɛtra ha; sɛ wopɛ a, mɛbɔ asese abiɛsa wɔ ha, wode biako, Mose de biako, na Elia de biako.”

Bere a Petro rekasa no, omununkum a ɛharan kata wɔn so, na ɛnne bi fi omununkum no mu ka sɛ: “Oyi ne me dɔba a ɔsɔ m’ani. Muntie no!” Asuafo no te eyi no, wobutubutuw fam. Nanso Yesu ka sɛ: “Monsɔre, na munnsuro!” Bere a wɔyɛ saa no, wonhu obiara bio sɛ Yesu nkutoo.

Bere a wɔresian bepɔw no ɛda a edi hɔ no, Yesu hyɛ sɛ: “Monnka ade a moahu yi nnkyerɛ obiara kosi sɛ onipa ba no bɛsɔre afi awufo mu.” Elia a ɔwɔ anisoadehu no mu no ma asemmisa ba asuafo no adwenem. Wobisa sɛ, “Adɛn nti na kyerɛwfo no ka sɛ ɛsɛ sɛ Elia ba ansa?”

Yesu ka sɛ, “Elia aba dedaw, na wɔanhu no.” Nanso, Yesu ka Osuboni Yohane a ɔyɛɛ Elia adwuma no ho asɛm. Yohane siesiee ɔkwan maa Kristo te sɛ nea Elia yɛ maa Elisa no.

Hwɛ sɛnea anisoadehu yi hyɛ Yesu ne asuafo no nyinaa den! Anisoadehu no yɛ Kristo Ahenni mu anuonyam a wodi kan hu. Sɛnea yɛbɛka no no, asuafo no hu sɛ “onipa ba no sɛ ɔreba n’ahenni mu” sɛnea ná Yesu ahyɛ bɔ dapɛn biako a atwam no. Wɔ Yesu wu akyi no, Petro kyerɛw ‘anuonyam a ɛbaa Kristo so bere a wɔne no wɔ bepɔw kronkron no so’ no ho asɛm.

Ná Farisifo no abisa Yesu sɛ ɔmma wɔn sɛnkyerɛnne a ɛkyerɛ sɛ ɔno na wɔahyɛ ne ho bɔ wɔ Kyerɛwnsɛm no mu sɛ ɔhene a Onyankopɔn apaw no no. Wɔamma wɔn sɛnkyerɛnne biara. Nea ɛne eyi bɔ abira no, wɔmaa Yesu asuafo a ɔne wɔn nam no huu Yesu ahosakra no sɛ nea esi Ahenni ho nkɔmhyɛ ahorow no so dua. Enti, akyiri yi Petro kyerɛwee sɛ: “Yɛwɔ adiyifo asɛm a egyina hɔ pintinn.” Mateo 16:13, Mt 16:28–17:13; Marko 9:1–13; Luka 9:27–37; 2 Petro 1:16–19.

▪ Ɔkwan bɛn so na ebinom hu Kristo no sɛ ɔba n’ahenni mu ansa na owu?

▪ Wɔ anisoadehu no mu no, dɛn na Mose ne Elia ka ho asɛm kyerɛ Yesu?

▪ Dɛn nti na anisoadehu yi yɛ nkuranhyɛ ma asuafo no?