Ti 14

Yesu Asuafo a Wodi Kan

BERE a Yesu adi nnafua 40 wɔ sare so akyi no, ɔsan ba Yohane a ɔbɔɔ no asu no nkyɛn. Bere a ɔbɛn no no, ɛda adi sɛ Yohane de ne nsa kyerɛ no so na ɔteɛm kyerɛ wɔn a wɔwɔ hɔ no sɛ: “Hwɛ, Onyankopɔn guammaa a oyi wiase bɔne kɔ no ni. Oyi ne nea mekae wɔ ne ho sɛ: Ɔbarima bi di m’akyi reba a wadi me kan, na ɔwɔ hɔ ansa na mereba.” Ɛwom sɛ Yohane anyin asen ne nã nua ba Yesu de, nanso Yohane nim sɛ na Yesu wɔ hɔ sɛ honhom nipa wɔ soro ansa na ɔreba.

Nanso, adapɛn kakraa bi a atwam ni, bere a Yesu rebegye asubɔ no, ɛda adi sɛ na Yohane nnim sɛ Yesu na ɔbɛyɛ Mesia no. Yohane ka sɛ: “Na me de, anka minnim no; na sɛ wobeyi no akyerɛ Israel nti na meba mebɛbɔɔ no asu nsu mu.”

Yohane kɔ so kyerɛkyerɛ nea esii bere a ɔbɔɔ Yesu asu no mu kyerɛ n’atiefo no sɛ: “Mihuu honhom no sɛ efi soro resian sɛ aborɔnoma, na ɛbɛtraa no so. Na me de, anka minnim no, na nea ɔsomaa me sɛ memmɛbɔ asu nsu mu no, ɔno ara na osee me sɛ: Nea wubehu sɛ honhom kronkron resian abɛtra no so no, ɔno ne nea ɔbɔ asu honhom kronkron mu. Na mahu na madi adanse sɛ oyi ne Nyankopɔn ba no.”

Ɛda a edi hɔ no, Yohane ne n’asuafo no mu baanu gyina baabi. Bere a ohu sɛ Yesu reba no, ɔka bio sɛ: “Hwɛ, Onyankopɔn guammaa no ni.” Eyi nti, Osuboni Yohane asuafo baanu yi kodi Yesu akyi. Wɔn mu biako ne Andrea, na ɛda adi sɛ nea ɔka ho no ne onipa a ɔkyerɛw nsɛm yi a wɔfrɛ ɔno nso sɛ Yohane no. Ɛda adi sɛ saa Yohane yi nso yɛ Yesu na nua ba a ne na ne Maria nuabea Salome.

Bere a Yesu dan ne ho na ohu sɛ Andrea ne Yohane di n’akyi no, obisa wɔn sɛ: “Mohwehwɛ dɛn?”

Wobisa sɛ: “Rabi, ɛhe na wote?”

Yesu bua sɛ: “Mommra mmɛhwɛ!”

Ɛbɛyɛ anwummere nnɔnan, na Andrea ne Yohane tra Yesu nkyɛn bere a aka no nyinaa. Akyiri yi Andrea ani gye araa ma ɔde ahoɔhare kɔhwehwɛ ne nua a wɔfrɛ no Petro no. Ɔka kyerɛ no sɛ: “Yɛahu Mesia no.” Na ɔde Petro kɔ Yesu nkyɛn. Ebia saa bere yi ara na Yohane nso hu ne nua Yakobo na ɔde no ba Yesu nkyɛn; nanso sɛnea Yohane taa yɛ no, wanka nea ɛfa ne ho yi ho asɛm wɔ n’Asɛmpa no mu.

Ɛda a edi hɔ no, Yesu hu Filipo a ofi Betsaida a ɛyɛ Petro ne Andrea kurom ankasa no na ɔka kyerɛ no sɛ: “Di m’akyi.”

Afei Filipo hu Natanael a wɔsan frɛ no Bartolomeo no, na ose: “Nea Mose, wɔ ne mmara no mu, ne adiyifo no kyerɛw ne ho asɛm no, yɛahu no, Yesu, Yosef ba a ofi Nasaret.” Natanael nnye nni. Ose, “So biribi pa bi betumi afi Nasaret da?”

Filipo ka kyerɛ no sɛ, “Bra bɛhwɛ!” Bere a wɔba Yesu nkyɛn no, ɔka Natanael ho asɛm sɛ: “Hwɛ, nokware Israelni a nnaadaa nni ne mu ni!”

Natanael bisa sɛ: “Ɛdɛn na wode huu me?”

Yesu bua sɛ: “Filipo nnya mfrɛɛ wo na wowɔ borɔdɔma dua no ase no na mihuu wo.”

Natanael ho dwiriw no. Ɔka sɛ: “Rabi, wone Nyankopɔn ba, wone Israel hene.”

Yesu bisa sɛ: “Sɛ meka mekyerɛɛ wo sɛ mihuu wo borɔdɔma no ase nti na wugye di yi? Wubehu nneɛma akɛse a ɛsen eyinom.” Afei Yesu hyɛ bɔ sɛ: “Nokware, nokware, mise mo sɛ, mubehu ɔsoro sɛ abue, na Onyankopɔn abɔfo redi aforosian onipa ba no so.”

Eyi akyi bere tiaa bi no, Yesu ne n’asuafo a wanya wɔn foforo no fi Yordan Bon no mu na wɔkɔ Galilea. Yohane 1:29–51.

▪ Henanom ne Yesu asuafo a wodi kan?

▪ Ɔkwan bɛn so na wɔde Petro, ne ebia Yakobo, kyerɛ Yesu?

▪ Dɛn na ɛma Natanael gye di sɛ Yesu ne Onyankopɔn Ba no?