Ti Dunan

Ɔkwan Bɛn So na Yehowa Kyerɛ N’ahyehyɛde no Kwan?

1. Yehowa ahyehyɛde no ho asɛm bɛn na Bible no da no adi, na dɛn nti na ɛho hia yɛn?

SO Onyankopɔn wɔ ahyehyɛde? Kyerɛwnsɛm a efi honhom mu no ka kyerɛ yɛn sɛ ɔwɔ bi. Ɔnam N’asɛm no so ma yehu saa ahyehyɛde no fã a ɛwɔ soro a ɛyɛ nwonwa no ho biribi kakra. (Hesekiel 1:​1, 4-14; Daniel 7:​9, 10, 13, 14) Ɛwom sɛ yentumi nhu ɔfã a aniwa ntumi nhu yi de, nanso enya nokware asomfo so nkɛntɛnso kɛse nnɛ. (2 Ahene 6:​15-17) Yehowa ahyehyɛde no wɔ ɔfã a aniwa hu nso wɔ asase so. Bible boa yɛn ma yehu dekode a ɛyɛ ne sɛnea Yehowa kyerɛ no kwan no.

Ɔfã a Aniwa Hu no a Yebehu

2. Asafo foforo bɛn na Onyankopɔn hyehyɛe?

² Israel man no yɛɛ Onyankopɔn asafo mfirihyia 1,545. (Asomafo no Nnwuma 7:​38) Nanso Israel anni Onyankopɔn mmara so na wɔpoo n’ankasa Ba no. Ne saa nti, Yehowa poo saa asafo no, na ogyaee wɔn akyi di. Yesu ka kyerɛɛ Yudafo no sɛ: “Hwɛ, wobegyaw mo fi afituw ama mo.” (Mateo 23:​38) Afei Onyankopɔn hyehyɛɛ asafo foforo, na ɔne wɔn yɛɛ apam foforo. Ná nnipa 144,000 a Onyankopɔn apaw wɔn sɛ wɔmmɛka ne Ba no ho wɔ ɔsoro no na wɔbɛyɛ asafo yi mufo.​—Adiyisɛm 14:​1-4.

3. Dɛn na ɛkɔɔ so wɔ Pentekoste 33 Y.B. mu a ɛma ɛdaa adi pefee sɛ na Onyankopɔn de asafo foforo na ɛredi dwuma afei?

³ Wɔde Yehowa honhom kronkron sraa asafo foforo  no mufo a wodi kan no wɔ Pentekoste 33 Y.B. mu. Ɛdefa saa anwonwasɛm no ho no, yɛkenkan sɛ: ‘Na Pentekoste da no tɔe no, na wɔn nyinaa ahyia faako. Na mpofirim no, ahum bi a ɛte sɛ mframa a emu yɛ den a ɛrebɔ fi soro bae, na ɛbɛhyɛɛ ofi a wɔte mu no ma. Na tɛkrɛma a wɔapaapae mu a ɛte sɛ ogya yiyi kyerɛɛ wɔn, na ebesisii wɔn atifi mmiako mmiako. Na honhon kronkron yɛɛ wɔn nyinaa mama.’ (Asomafo no Nnwuma 2:​1-4) Enti Onyankopɔn honhom no de adanse a emu da hɔ fann mae sɛ afei de na asafo yi na Onyankopɔn de bedi dwuma de adi n’atirimpɔw ho dwuma wɔ Yesu Kristo akwankyerɛ ase wɔ soro.

4. Henanom na wɔyɛ Yehowa ahyehyɛde a aniwa hu no mufo nnɛ?

⁴ Ɛnnɛ 144,000 no mu nkaefo kakraa bi pɛ na wɔwɔ asase so. Nanso, wɔama “nnipakuw kɛse” a wɔyɛ “nguan foforo” no mufo a wɔyɛ ɔpepem pii no ne nkaefo a wɔasra wɔn no anya abusuabɔ de ama Bible nkɔmhyɛ anya mmamu. Yesu, Oguanhwɛfo Pa no, aka nguan foforo yi ne nkaefo no abom ma wɔayɛ kuw biako wɔ n’ase sɛ wɔn Hwɛfo biako. (Adiyisɛm 7:​9; Yohane 10:​11, 16) Eyinom nyinaa ka bom yɛ asafo biako a ɛne Yehowa ahyehyɛde a aniwa hu no.

Wɔahyehyɛ no Teokrase Kwan So

5. Hena na ɔkyerɛ Onyankopɔn ahyehyɛde no kwan, na ɔkwan bɛn so?

⁵ Kyerɛwnsɛm no mu asɛm a ɛne “Nyankopɔn teasefo asafo” no ma yehu onii a ɔkyerɛ no kwan no. Ahyehyɛde no yɛ teokrase kwan so de, anaasɛ nea Onyankopɔn di so tumi. Yehowa nam Yesu, nea Wapaw no sɛ ɔnyɛ asafo a aniwa hu no Ti no ne n’ankasa Asɛm a efi honhom  mu a ɛne Bible no so na ɛkyerɛ ne nkurɔfo kwan.​—1 Timoteo 3:​14, 15; Efesofo 1:​22, 23; 2 Timoteo 3:​16, 17.

6. (a) Ɔkwan bɛn so na ɔsoro a wofi kyerɛɛ asafo no kwan no daa adi wɔ afeha a edi kan no mu? (b) Dɛn na ɛkyerɛ sɛ Yesu da so ara yɛ asafo no Ti?

⁶ Wohuu akwankyerɛ a ɛte saa no yiye wɔ Pentekoste. (Asomafo no Nnwuma 2:​14-18, 32, 33) Ɛdaa adi bere a Yehowa bɔfo kyerɛɛ kwan maa asɛmpa no trɛw duu Afrika, bere a Yesu kasae de akwankyerɛ mae bere a Saulo a ofi Tarso sakrae no, ɛne bere a Petro fii asɛnka adwuma no ase wɔ Amanaman mufo no mu no. (Asomafo no Nnwuma 8:​26, 27; 9:​3-7; 10:​9-16, 19-22) Nanso, bere bi akyi no, wɔante nne ahorow amfi soro bio, abɔfo anyi wɔn ho adi ankyerɛ nnipa bio, na wɔamfa honhom akyɛde ahorow amma nkurɔfo wɔ anwonwakwan so bio. Nanso, na Yesu ahyɛ bɔ sɛ: “Hwɛ! Me ne mo wɔ hɔ nna nyinaa de bɛkɔ akosi nneɛma nhyehyɛe no awiei.” (Mateo 28:​20, NW; 1 Korintofo 13:8) Ɛnnɛ, Yehowa Adansefo gye Yesu akwankyerɛ tom. Sɛ ɛnte saa a, anka yentumi nka Ahenni asɛm no wɔ ɔsɔretia a emu yɛ den mu.

7. (a) Henanom na wɔbom yɛ “akoa nokwafo ne ɔbadwemma” no, na dɛn ntia? (b) Adwuma bɛn na wɔde hyɛɛ “akoa” no nsa?

⁷ Aka bere tiaa bi ma Yesu awu no, ɔkaa “akoa nokwafo ne ɔbadwemma” no ho asɛm kyerɛɛ n’asuafo no sɛ, sɛ́ Owura no, ɔde asɛyɛde titiriw bi bɛhyɛ ne nsa. Na saa “akoa” no bɛwɔ hɔ bere a Awurade kɔɔ soro no, na ɔbɛkɔ so ayɛ adwumaden wɔ bere a Kristo san ba Ahenni tumi mu a aniwa nhu no no. Na nkyerɛkyerɛmu a ɛte saa no ntumi mfa onipa biako pɛ bi ho, na mmom na ɛfa Kristo asafo a wɔasra no no ho. Bere a na Yesu de ne mogya atɔ asafo no, ɔfrɛɛ no ‘n’akoa.’ Ɔmaa emufo no  adwuma sɛ wɔnyɛ asuafo na wɔmma wɔn aduan nkakrankakra, a ɛyɛ “[honhom fam] aduan bere a ɛsɛ mu.”​—Mateo 24:​45-47; 28:​19; Yesaia 43:​10; Luka 12:​42; 1 Petro 4:10.

8. (a) Asɛyɛde ahorow bɛn na akoa kuw no wɔ nnɛ? (b) Dɛn nti na sɛnea yɛyɛ yɛn ade wɔ akwankyerɛ a wɔnam Onyankopɔn kwan so de ma no ho hia?

⁸ Esiane sɛ na akoa kuw no de nokwaredi reyɛ Owura no adwuma wɔ bere a ɔsan bae wɔ afe 1914 mu nti, adanse wɔ hɔ a ɛkyerɛ sɛ ɔde asɛyɛde ahorow pii hyɛɛ ne nsa wɔ afe 1919 mu. Wɔadi Ahenni no ho adanse wɔ wiase nyinaa wɔ mfe a atwam fi saa bere no, na wɔreboaboa Yehowa asomfo ano sɛnea ɛbɛyɛ a wɔbɛkora wɔn so wɔ ahohiahia kɛse no mu. (Mateo 24:​14, 21, 22; Adiyisɛm 7:​9, 10) Eyinom nso hia honhom fam aduan, na akoa kuw no de ma wɔn. Enti, sɛ yɛbɛsɔ Yehowa ani a, ehia sɛ yegye akwankyerɛ a ɔnam kuw yi so de ma no tom na yɛyɛ yɛn ade ma ɛne no hyia.

9, 10. (a) Wɔ afeha a edi kan no mu no, na nhyehyɛe bɛn na ɛwɔ hɔ a wɔde di nkyerɛkyerɛ ho nsɛmmisa ne akwankyerɛ a wɔde ma wɔ asɛmpaka adwuma ho no ho dwuma? (b) Nhyehyɛe bɛn na ɛwɔ hɔ a wɔnam so rehwɛ Yehowa nkurɔfo dwumadi so nnɛ?

⁹ Ɛtɔ mmere bi a, nsɛmmisa a ɛfa nkyerɛkyerɛ ne ɔkwan a wɔfa so yɛ ade ho sɔre. Ɛba saa a yɛbɛyɛ yɛn ade dɛn? Asomafo no Nnwuma ti 15 ka sɛnea wodii asɛm bi a na ɛfa Amanaman mufo a na wɔasakra no ho dwuma ho asɛm kyerɛ yɛn. Wɔde asɛm no kɔdan asomafo no ne mpanyimfo a wɔwɔ Yerusalem a na wɔsom sɛ sodikuw no mufo no. Na saa mpanyimfo no nyɛ nnipa a wontumi nni mfomso, nanso Onyankopɔn de wɔn dii dwuma. Wosusuw kyerɛw nsɛm a ɛfa ɔsɛmpɔw no ne adanse a ɛkyerɛ sɛnea Onyankopɔn honhom  no rebue kwan ama Amanaman mufo no nso ho. Afei wosii gyinae. Onyankopɔn hyiraa saa nhyehyɛe no so. (Asomafo no Nnwuma 15:​1-29; 16:​4, 5) Saa sodikuw yi somaa ankorankoro bi ma wɔkɔtrɛw Ahenni ho asɛnka no mu.

¹⁰ Wɔ yɛn bere yi mu no, anuanom a wɔde honhom asra wɔn a wofi nsase ahorow so na wɔka bom yɛ Yehowa ahyehyɛde a aniwa hu no Sodikuw no, na wɔwɔ Yehowa Adansefo wiase nyinaa adwumayɛbea ti hɔ. Wɔ Yesu Kristo tiyɛ ase no, Sodikuw no trɛw ɔsom kronn mu wɔ aman nyinaa mu, na wɔhwɛ Yehowa Adansefo asɛnka adwuma no so wɔ asafo ahorow ɔpedudu pii no mu. Sodikuw no mufo kura ɔsomafo Paulo a ɔkyerɛw ne mfɛfo Kristofo krataa no adwene no bi: “Ɛnyɛ sɛ yɛhyɛ mo gyidi so, na mmom yɛyɛ mo anigye ho yɔnko adwumayɛfo; efisɛ gyidi na mode gyina hɔ.”​—2 Korintofo 1:24.

11. (a) Ɔkwan bɛn so na wɔpaw mpanyimfo ne asafo mu asomfo? (b) Dɛn nti na ɛsɛ sɛ yɛne wɔn a wɔapaw wɔn no yɛ biako paa?

¹¹ Yehowa Adansefo a wɔwɔ wiase nyinaa hwɛ kwan sɛ Sodikuw no mufo bɛpaw anuanom mmarima a wɔfata, na wɔama wɔn nso tumi ma wɔapaw mpanyimfo ne asafo mu asomfo ma wɔahwɛ asafo ahorow no so. Wɔaka ahwehwɛde ahorow a wogyina so paw wɔn no ho asɛm wɔ Bible no mu, na ɛda no adi sɛ saa mmarima no nyɛ pɛ na wodi mfomso. Mpanyimfo a wɔkamfo afoforo kyerɛ ne wɔn a wɔpaw afoforo no nyinaa wɔ asɛyɛde a anibere wom wɔ Onyankopɔn anim. (1 Timoteo 3:​1-10, 12, 13; Tito 1:​5-9) Enti, wɔbɔ mpae srɛ Onyankopɔn honhom no mmoa na wɔhwehwɛ akwankyerɛ fi N’asɛm a efi honhom mu no mu. (Asomafo no Nnwuma 6:​2-4, 6; 14:​23) Momma yɛnkyerɛ saa ‘nnipa  mu akyɛde’ yi a wɔboa yɛn nyinaa ma yedu “gyidi . . . biakoyɛ mu” no ho anisɔ.​—Efesofo 4:​8, 11-16, NW.

12. Ɔkwan bɛn so na Yehowa de mmea di dwuma wɔ teokrase nhyehyɛe no mu?

¹² Kyerɛwnsɛm no kyerɛ sɛ mmarima na wɔnyɛ ahwɛfo adwuma wɔ asafo no mu. Eyi mmrɛ mmea ase ɔkwan biara so, efisɛ wɔn mu binom yɛ ɔsoro Ahenni no adedifo, na wɔyɛ asɛnka adwuma no mu fã kɛse no ara. (Dwom 68:​11) Afei nso mmea nam wɔn mmusua mu asɛyɛde ahorow ho dwuma a wodi bere nyinaa no so boa ma asafo no nya din pa. (Tito 2:​3-5) Nanso asafo  no mu nkyerɛkyerɛ de, mmarima a wɔpaw wɔn na wodi ho dwuma.​—1 Timoteo 2:​12, 13.

13. (a) Adwene bɛn na Bible no hyɛ mpanyimfo nkuran sɛ wonnya wɔ wɔn dibea no ho? (b) Hokwan bɛn na yɛn nyinaa betumi anya mu kyɛfa?

¹³ Wɔ wiase no mu no, wobu nipa a okura dibea titiriw sɛ nea ne ho hia, nanso wɔ Onyankopɔn ahyehyɛde mu de asɛm no ne sɛ: “Nea ɔyɛ mo nyinaa mu akumaa no, ɔno ara na ɔbɛyɛ ɔkɛse.” (Luka 9:​46-48; 22:​24-26) Kyerɛwnsɛm no tu mpanyimfo fo sɛ wɔnhwɛ yiye na wɔanni wɔn a wɔyɛ Onyankopɔn agyapade no so bakoma, na mmom, ɛsɛ sɛ wɔyɛ nhwɛso ma nguan no. (1 Petro 5:​2, 3) Ɛnyɛ nnipa kakraa bi a wɔapaw wɔn no nko, na mmom Yehowa Adansefo nyinaa, mmarima ne mmea, wɔ hokwan sɛ wobegyina amansan Hene no ananmu de ahobrɛase akasa wɔ ne din mu na wɔaka N’ahenni ho asɛm akyerɛ nnipa a wɔwɔ mmaa nyinaa.

14. Bere a wode kyerɛw nsɛm ahorow a wɔabobɔ din no redi dwuma no, susuw nsɛmmisa a ɛwɔ nkyekyɛm yi awiei no ho.

¹⁴ Eye sɛ yebebisa yɛn ho sɛ: ‘So m’ani sɔ sɛnea Yehowa rekyerɛ n’ahyehyɛde a aniwa hu no kwan no ampa? So me suban, me kasa ne me nneyɛe kyerɛ saa?’ Nsɛm a edidi so yi ho a yebesusuw no betumi aboa yɛn mu biara ma wayɛ nhwehwɛmu a ɛte saa.

Sɛ mebrɛ me ho ase hyɛ Kristo ase sɛ asafo no Ti ampa a, ɛnde sɛnea kyerɛw nsɛm a edidi so yi kyerɛ no, dɛn na mɛyɛ? (Mateo 24:​14; 28:​19, 20; Yohane 13:​34, 35)

Sɛ mede anisɔ gye honhom fam nsiesiei a akoa kuw no ne ne Sodikuw no de ma no a, na hena na merekyerɛ obu ama no? (Luka 10:16)

 Ɔkwan bɛn so na ɛsɛ sɛ asafo no muni biara, titiriw mpanyimfo no, ne wɔn ho wɔn ho di? (Romafo 12:10)

15. (a) Dɛn na yɛda no adi denam su a yɛwɔ wɔ Yehowa ahyehyɛde a aniwa hu no so? (b) Hokwan ahorow bɛn na ɛwɔ hɔ ma yɛn a yebetumi de akyerɛ sɛ Ɔbonsam yɛ ɔtorofo na ama Yehowa koma ani agye?

¹⁵ Yehowa nam n’ahyehyɛde a aniwa hu a ɛhyɛ Kristo ase no so na ɛkyerɛ yɛn kwan nnɛ. Su a yeyi no adi wɔ ahyehyɛde yi ho no kyerɛ sɛnea yɛte nka wɔ tumidi ho ɔsɛmpɔw no ho. (Hebrifo 13:​17) Satan kyerɛ sɛ yɛn ankasa yiyedi ho na yesusuw titiriw. Nanso sɛ yɛsom wɔ ɔkwan biara a wɔhwehwɛ sɛ yɛfa so som so na yɛkwati nneɛma a ɛbɛtwetwe adwene aba yɛn so sɛnea ɛmfata a, yɛda no adi sɛ Ɔbonsam yɛ ɔtorofo. Sɛ yɛdɔ wɔn a wodi anim wɔ yɛn mu no na yebu wɔn na yɛanyɛ nkurɔfo a ‘wɔn ankasa mfaso nti na wɔdɛfɛdɛfɛ nnipa’ a, yɛma Yehowa ani gye. (Yuda 16; Hebrifo 13:7) Sɛ yedi Yehowa ahyehyɛde no nokware a, yɛda no adi sɛ Yehowa ne yɛn Nyankopɔn ampa, ɛne sɛ yɛayɛ biako wɔ ne som mu.​—1 Korintofo 15:58.

Asɛm no mu Ntĩmu

• Dɛn ne Yehowa ahyehyɛde a aniwa hu no nnɛ? N’atirimpɔw ne dɛn?

• Hena ne asafo no Ti a wɔapaw no, na nhyehyɛe ahorow a aniwa hu bɛn so na ɔnam fi ɔdɔ mu kyerɛ yɛn kwan?

• Su pa bɛn na ɛsɛ sɛ yenya wɔ wɔn a wɔwɔ Yehowa ahyehyɛde no mu no ho?

[Adesua no ho Nsɛmmisa]

[Kratafa 133 mfonini ahorow]

Yehowa nam n’ahyehyɛde a aniwa hu a ɛhyɛ Kristo ase no so na ɛkyerɛ yɛn kwan