Ɔsɛmpɔw a Ɛsɛ sɛ Yɛn Nyinaa Hyia
Ti Asia
Ɔsɛmpɔw a Ɛsɛ sɛ Yɛn Nyinaa Hyia
1, 2. (a) Ɔsɛmpɔw bɛn na Satan ma ɛsɔree wɔ Eden? (b) Ɔkwan bɛn so na nea ɔkae no da saa ɔsɛmpɔw no adi?
WO HO wɔ ɔsɛmpɔw bi a ɛho hia sen biara a adesamma ahyia pɛn no mu. Ɔfã a wugyina no na ɛbɛkyerɛ nea ɛbɛba wo so daakye. Ɔsɛmpɔw yi sɔree bere a wɔtew atua wɔ Eden no. Saa bere no Satan bisaa Hawa sɛ: “Ampa na Onyankopɔn aka sɛ: Munnni turom ha nnua nyinaa bi?” Obuae sɛ Onyankopɔn aka dua biako ho asɛm sɛ: “Munnni bi, nso mommfa mo nsa nnka, na moanwu.” Afei Satan bɔɔ Yehowa sobo sɛ ɔredi atoro, na ɔkae sɛ Hawa ne Adam nkwa nnyina osetie a wɔbɛyɛ ama Onyankopɔn no so. Satan kyerɛe sɛ na Onyankopɔn de biribi pa bi rekame n’abɔde—tumi a wɔde bɛhyehyɛ wɔn ankasa gyinapɛn wɔ asetra mu. Satan kae sɛ: “Onyankopɔn nim sɛ da a mubedi bi no, mo ani bebue, na moayɛ sɛ Onyankopɔn ahu papa ne bɔne.”—Genesis 3:1-5.
2 Nokwarem no, na Satan reka sɛ, sɛ nnipa si wɔn ankasa gyinae a, ebesi wɔn yiye sen sɛ wobedi Onyankopɔn mmara so. Ɔnam so kasa tiaa ɔkwan a Onyankopɔn fa so di tumi no. Eyi maa Onyankopɔn amansan tumidi, kyerɛ sɛ, fata a ɔfata sɛ odi tumi ho ɔsɛmpɔw a ɛsen biara no sɔree. Asɛmmisa no bae sɛ: Nea ɛwɔ he na eye ma nnipa, ɔkwan a Yehowa fa so di tumi anaasɛ nniso a ɛnhyɛ n’ase no? Afei, anka Yehowa betumi akum Adam ne Hawa ntɛm ara, nanso na ɛrenni amansan tumidi ho ɔsɛmpɔw ho dwuma sɛnea ɛsɛ. Onyankopɔn nam adesamma abusua a wama atra hɔ bere tenten no so betumi akyerɛ nea yɛn ho a yɛbɛtwe afi ɔno ne ne mmara ho de bɛba no.
3. Ɔsɛmpɔw a ɛto so abien bɛn na Satan ma ɛsɔree?
3 Nea esii wɔ Eden no amma kasa a Satan kasa tiaa fata a Yehowa fata sɛ odi tumi no amma awiei. Ɔmaa asɛm sɔree wɔ nokware a afoforo bedi ama Yehowa no ho. Eyi bɛyɛɛ ɛho ɔsɛmpɔw a ɛto so abien. Ne mpoatwa no kɔkaa Adam ne Hawa asefo ne Onyankopɔn mma a wɔyɛ ahonhom nyinaa a Yehowa Abakan a ɔdɔ no yiye no mpo ka ho no. Sɛ nhwɛso no, wɔ Hiob nna no mu no, Satan gyee akyinnye sɛ ɛnyɛ ɔdɔ ne ɔkwan a Yehowa fa so di tumi nti na wɔn a wɔsom no no som no, na mmom pɛsɛmenkominya nti. Ogyee akyinnye sɛ, sɛ wohyia amanehunu a, wɔn nyinaa bɛma pɛsɛmenkominya akɔnnɔ ahorow adi wɔn so.—Hiob 2:1-6; Adiyisɛm 12:10.
Dɛn na Abakɔsɛm Ada no Adi
4, 5. Dɛn na abakɔsɛm akyerɛ wɔ onipa anammɔn a n’ankasa kyerɛ no kwan no ho?
4 Amansan tumidi ho ɔsɛmpɔw no mu asɛntitiriw bi ni: Onyankopɔn ammɔ nnipa sɛ wɔnkwati ne nniso ntra ase na ama asi wɔn yiye. Ɔbɔɔ wɔn sɛ wonni ne mmara a ɛteɛ no so na ɛso aba wɔn mfaso. Odiyifo Yeremia gye toom sɛ: “[Yehowa, NW] mahu sɛ onipa kwan nni ne nsam, enni ɔbarima nsam, sɛnea ɔnam a obetutu n’anammɔn. [Yehowa, NW] teɛ me so.” (Yeremia 10:23, 24) Enti Onyankopɔn asɛm hyɛ yɛn nkuran sɛ: “Fa wo koma nyinaa bata [Yehowa, NW] ho, na mfa wo ho ntweri wo nhumu.” (Mmebusɛm 3:5) Sɛnea Onyankopɔn bɔɔ adesamma sɛ wonni n’adebɔ mu mmara so na ama wɔatra nkwa mu no, saa ara nso na ɔyɛɛ abrabɔ ho mmara a sɛ wodi so a, ɛbɛma wɔanya abusua a asomdwoe wom.
5 Ɛda adi pefee sɛ na Onyankopɔn nim sɛ adesamma abusua no ntumi nkwati ne nniso nhwɛ wɔn ho so mma ɛnyɛ yiye. Esiane sɛ adesamma abɔ mmɔden sɛ wɔbɛkwati Onyankopɔn nniso nti, wɔayɛ amammui, sikasɛm, ne nyamesom nhyehyɛe ahorow. Saa nsonsonoe yi ama nnipa ne wɔn ho wɔn ho adi akameakame bere nyinaa, na ɛde basabasayɛ, ɔko ne owu aba. ‘Onipa adi onipa so tumi ma adan no bɔne.’ (Ɔsɛnkafo 8:9) Eyi pɛpɛɛpɛ na akɔ so wɔ adesamma abakɔsɛm mu nyinaa. Sɛnea wɔka siei wɔ Onyankopɔn Asɛm mu no, nnipa abɔnefo ne nnaadaafo ‘kɔ wɔn anim wɔ bɔne mu.’ (2 Timoteo 3:13) Amanehunu a ɛsen biara a aba pɛn no sii wɔ afeha a ɛto so 20 a nnipa nyaa nkɔanim kɛse wɔ nyansahu ne mfiridwuma mu no mu. Nsɛm a ɛwɔ Yeremia 10:23 no abam kɛse—wɔammɔ nnipa sɛ wɔnkyerɛ wɔn ankasa anammɔn kwan.
6. Ɔkwan bɛn so na ɛrenkyɛ Onyankopɔn bedi twe a nnipa atwe wɔn ho afi ne ho no ho dwuma?
6 Awerɛhosɛm a yɛahyia bere tenten esiane yɛn ho a yɛatwe afi Onyankopɔn ho nti no ama ada adi koraa sɛ nnipa nniso ntumi nyɛ yiye da. Onyankopɔn nniso nkutoo na ɛde anigye, biakoyɛ, akwahosan, ne nkwa bɛba. Na Onyankopɔn Asɛm kyerɛ sɛ nnipa nniso a Yehowa ama ho kwan no rebɛn n’awiei. (Mateo 24:3-14; 2 Timoteo 3:1-5) Ɛrenkyɛ, ɔde ne ho begye nnipa nsɛm mu na ɔde ne nniso asi asase so. Bible nkɔmhyɛ ka sɛ: “Ahene no nna no mu no [nnipa nniso a ɛwɔ hɔ mprempren], ɔsoro Nyankopɔn bɛma ahenni [a ɛwɔ soro] a wɔrensɛe no da, na wɔrennyaw n’ahenni mma ɔman foforo bi so, na ebebubu ahenni horow no nyinaa ama asã, na ɛno de, ebegyina daa.”—Daniel 2:44.
Nkwa a Yebenya Akɔ Onyankopɔn Wiase Foforo Mu
7. Sɛ Onyankopɔn nniso de onipa nniso ba awiei a, henanom na wobenya nkwa?
7 Sɛ Onyankopɔn nniso de nnipa nniso ba awiei a, henanom na wobenya nkwa? Bible bua sɛ: “Tẽefo [wɔn a wogye di sɛ Onyankopɔn fata sɛ odi tumi] na ɛbɛtra asase no so, na wɔn a wɔyɛ pɛ no na ɛbɛtra mu; na wobegu abɔnefo [wɔn a wonnye ntom sɛ Onyankopɔn fata sɛ odi tumi] ase afi asase so na wɔatu nkontompofo afi so.” (Mmebusɛm 2:21, 22) Saa ara nso na odwontofo no kae sɛ: “Aka kakraa sɛ na ɔbɔnefo nni hɔ . . . Treneefo benya asase no adi, na wɔatra so daapem.”—Dwom 37:10, 29
8. Ɔkwan bɛn so na Onyankopɔn bɛsan ne tumidi ho koraa?
8 Sɛ wɔsɛe Satan nhyehyɛe no wie a, Onyankopɔn de ne wiase foforo a ebeyi basabasayɛ, ɔko, ohia, amanehunu, nyarewa, ne owu a ɛde adesamma ayɛ nkoa mfirihyia mpempem pii no afi hɔ koraa na ebesi hɔ. Bible no ka nhyira a adesamma asoɔmmerɛfo benya no ho asɛm fɛfɛɛfɛ sɛ: “[Onyankopɔn bɛpopa] wɔn aniwam nusu nyinaa. Na owu nni hɔ bio, na awerɛhow ne osu ne ɛyaw bi nni hɔ bio, efisɛ kan nneɛma no atwam.” (Adiyisɛm 21:3, 4) Onyankopɔn nam ne soro Ahenni nniso a ɛhyɛ Kristo ase no so bɛkyerɛ koraa sɛ Ɔfata sɛ ɔyɛ yɛn Amansan Hene, kyerɛ sɛ, yɛn Sodifo.—Romafo 16:20; 2 Petro 3:10-13; Adiyisɛm 20:1-6.
Sɛnea Wɔyɛɛ Wɔn Ade Wɔ Ɔsɛmpɔw no Ho
9. (a) Ɔkwan bɛn so na wɔn a wodii Yehowa nokware no buu n’asɛm? (b) Ɔkwan bɛn so na Noa daa ne nokwaredi adi, na ɔkwan bɛn so na yebetumi anya ne nhwɛso no so mfaso?
9 Yɛwɔ mmarima ne mmea gyidifo a wɔadi Yehowa nokware sɛ Amansan Hene wɔ abakɔsɛm mu. Ná wonim sɛ wɔn nkwa gyina osetie a wɔbɛyɛ ama no so. Ná Noa yɛ onipa a ɔte saa. Enti Onyankopɔn ka kyerɛɛ Noa sɛ: “Ɔhonam nyinaa awiei aba m’anim . . . Yɛ adaka.” Noa dii Yehowa akwankyerɛ akyi. Ɛwom sɛ wɔbɔɔ saa bere no mu nnipa a wɔaka no kɔkɔ de, nanso wɔbɔɔ wɔn bra te sɛ nea hwee rensi. Nanso Noa pam adaka kɛse bi na ɔkɔɔ so kaa Yehowa trenee akwan ho asɛm kyerɛɛ afoforo. Kyerɛwtohɔ no toa so ka sɛ: “Na Noa yɛɛ sa; sɛnea Onyankopɔn hyɛɛ no nyinaa, saa ara na ɔyɛe.”—Genesis 6:13-22; Hebrifo 11:7; 2 Petro 2:5.
10. (a) Ɔkwan bɛn so na Abraham ne Sara gyinaa Yehowa tumidi akyi? (b) Ɔkwan bɛn so na yebetumi anya Abraham ne Sara nhwɛso no so mfaso?
10 Ná Abraham ne Sara nso yɛ Yehowa amansan tumidi akyi a wogyina ho nhwɛso pa, wɔyɛɛ nea ɔhyɛɛ wɔn biara. Wɔtraa Ur, Kaldeafo kurow a wodi yiye wom no mu. Nanso, bere a Yehowa ka kyerɛɛ Abraham sɛ ɔnkɔ asase foforo, nea na onnim hɔ so no, Abraham ‘kɔe sɛnea Yehowa ka kyerɛɛ no no.’ Akyinnye biara nni ho sɛ na Sara anya asetra a ahotɔ wom pɛn—na ɔwɔ fie, nnamfo ne abusuafo. Nanso, ɔbrɛɛ ne ho ase hyɛɛ Yehowa ne ne kunu ase kɔɔ Kanaan asase so, ɛwom sɛ na onnim tebea horow a na ɛretwɛn no wɔ hɔ de.—Genesis 11:31–12:4; Asomafo no Nnwuma 7:2-4.
11. (a) Wɔ tebea horow bɛn mu na Mose gyinaa Yehowa tumidi akyi? (b) Ɔkwan bɛn so na yebetumi anya Mose nhwɛso no so mfaso?
11 Mose nso yɛ onipa foforo a ogyinaa Yehowa amansan tumidi akyi. Na ɔyɛɛ eyi wɔ tebea a na emu yɛ den sen biara mu—ɔne Misraim Farao hyiae ankasa. Na ɛnyɛ sɛ Mose gye ne ho di. Mmom no, na onnye nni sɛ obetumi akasa yiye. Nanso otiee Yehowa. Esiane sɛ Yehowa gyinaa Mose akyi na ne nua Aaron boaa no nti, otumi kaa Yehowa asɛm kyerɛɛ Farao a na wapirim ne koma no mpɛn pii. Israelfo no bi mpo kasa tiaa Mose denneennen. Nanso, Mose de nokwaredi yɛɛ biribiara a Yehowa hyɛɛ no, na wɔnam no so yii Israel fii nkoasom mu wɔ Misraim.—Exodus 7:6; 12:50, 51; Hebrifo 11:24-27.
12. (a) Dɛn na ɛkyerɛ sɛ nokware a yebedi ama Yehowa no kyerɛ pii sen nea Onyankopɔn ama wɔakyerɛw a yebedi so? (b) Ɔkwan bɛn so na nokwaredi yi a yɛbɛte ase no bɛboa yɛn ma yɛde 1 Yohane 2:15 adi dwuma?
12 Wɔn a wodii Yehowa nokware no nyinaa ansusuw sɛ nea na wɔhwehwɛ sɛ wɔyɛ nyinaa ne sɛ wobedi nea na Onyankopɔn akyerɛw no so. Bere a Potifar yere bɔɔ mmɔden sɛ ɔbɛdaadaa Yosef ma ɔne no asɛe aware no, na wonni mmara biara a wɔakyerɛw a efi Onyankopɔn hɔ a ɛkyerɛ sɛ wɔabara awaresɛe. Nanso, na Yosef nim aware nhyehyɛe a Yehowa yɛe wɔ Eden no. Na onim sɛ ɔbarima foforo yere a ɔne no bɛda no rensɔ Onyankopɔn ani. Na Yosef mpɛ sɛ obehu baabi a Onyankopɔn bɛma no kwan ma wayɛ n’ade akodu te sɛ Misrifo no. Ɔfaa Yehowa akwan so bere a na ɔresusuw sɛnea Onyankopɔn ne adesamma di ho no, na afei ɔbɔɔ mmɔden de nea ohui sɛ ɛyɛ Onyankopɔn apɛde dii dwuma.—Genesis 39:7-12; Dwom 77:11, 12.
13. Ɔkwan bɛn so na wɔkyerɛe sɛ Ɔbonsam yɛ ɔtorofo ɛdefa (a) Hiob ho? (b) Hebrifo baasa no ho?
13 Sɛ wɔsɔ wɔn hwɛ denneennen mpo a, wɔn a wonim Yehowa ankasa no ntwe wɔn ho mfi ne ho. Satan kae sɛ sɛ Hiob hwere n’ahode pii no anaasɛ n’akwahosan sɛe a, ɔno mpo—nea Yehowa kaa ne ho asɛmpa no—bɛtwe ne ho afi Onyankopɔn ho. Nanso, Hiob maa Ɔbonsam yɛɛ ɔtorofo, ɛwom mpo sɛ na Hiob ankasa nnim nea enti a ɔrehu amane pii no de. (Hiob 2:9, 10) Mfehaha pii akyi no, esiane sɛ na Satan da so ara pɛ sɛ ɔkyerɛ sɛ nea ɔkae no yɛ nokware nti, ɔmaa Babilon hene a na ne bo afuw no hunahunaa Hebrifo mmerante baasa sɛ sɛ wɔankotow ansom ohoni a ɔhene no de asi hɔ no a, obekum wɔn. Bere a wɔhyɛɛ wɔn sɛ wɔmpaw sɛ wobedi ɔhene no ahyɛde so anaasɛ wobedi Yehowa mmara a etia abosonsom so no, wogyinaa pintinn kae sɛ Yehowa na wɔsom no na ɔne wɔn Amansan Hene Pumpuni. Na nokware a wobedi ama Onyankopɔn no som bo kɛse ma wɔn koraa sen nkwa a na wɔwɔ saa bere no!—Daniel 3:14-18.
14. Ɔkwan bɛn so na yɛn a yɛyɛ nnipa a yɛnyɛ pɛ no betumi ada no adi sɛ yedi Yehowa nokware ampa?
14 So ɛsɛ sɛ nhwɛso ahorow a ɛte saa no ma yenya adwene sɛ, sɛ obi bedi nokware ama Yehowa a, ɛsɛ sɛ ɔyɛ pɛ, anaasɛ obi a odi mfomso no di nkogu koraa? Ɛnte saa koraa! Bible no ka kyerɛ yɛn sɛ Mose dii mfomso mmere bi. Ɛwom sɛ Yehowa ani annye ho de, nanso wampo Mose. Ná Yesu Kristo asomafo no nso wɔ wɔn mmerɛwyɛ ahorow. Sɛ Yehowa susuw yɛn sintɔ a yenya fii awo mu no ho a, n’ani gye sɛ yɛnhyɛ da mmu yɛn ani ngu n’apɛde so wɔ ɔkwan biara so. Sɛ mmerɛwyɛ nti yɛyɛ bɔne bi a, ɛho hia sɛ yenu yɛn ho wɔ komam na yɛankɔ so anyɛ saa bɔne no bio. Wɔ saa kwan yi so no, yɛda no adi sɛ yɛdɔ nea Yehowa ka sɛ ɛyɛ papa na yɛtan nea ɔkyerɛ sɛ ɛyɛ bɔne no. Yebetumi anya gyinabea pa wɔ Onyankopɔn anim denam gyidi a yenya wɔ Yesu afɔrebɔ a ɛsom bo a ɛpata bɔne no mu no so.—Amos 5:15; Asomafo no Nnwuma 3:19; Hebrifo 9:14.
15. (a) Adesamma nyinaa mu nnipa bɛn na wokuraa mudi a ɛyɛ pɛ mu maa Onyankopɔn, na dɛn na eyi kyerɛe? (b) Ɔkwan bɛn so na nea Yesu yɛe no boa yɛn?
15 Nanso, so ebetumi aba sɛ nnipa ntumi mfa osetie a ɛyɛ pɛ mma Yehowa koraa? Eyi ho mmuae yɛɛ te sɛ “ahintasɛm” wɔ bɛyɛ mfirihyia 4,000 mu. (1 Timoteo 3:16) Ɛwom sɛ wɔbɔɔ Adam pɛ de, nanso wanyɛ onyamesom pa ho nhwɛso a ɛyɛ pɛ. Ɛnde na hena na obetumi ayɛ saa? Ɛda adi sɛ n’asefo mu biara ntumi nyɛ saa. Onipa biako pɛ a otumi yɛɛ saa ne Yesu Kristo. (Hebrifo 4:15) Nea Yesu tumi yɛe no kyerɛe sɛ, sɛ Adam a na ɔwɔ tebea pa mu no pɛ a, anka obetumi akura ne mudi mu koraa. Mfomso no mfi Onyankopɔn adebɔ nnwuma. Enti, Yesu Kristo ne nhwɛso a yɛpɛ sɛ yesuasua de kyerɛ yɛn ahofama ma Amansan Hene Yehowa no na ɛnyɛ sɛ yebedi ne mmara so nkutoo.—Deuteronomium 32:4, 5.
Mmuae Bɛn na Yɛn Ankasa De Ma?
16. Dɛn nti na ɛsɛ sɛ yɛma yɛn ani da hɔ bere nyinaa wɔ su a yɛda no adi wɔ Yehowa tumidi ho no ho?
16 Ɛsɛ sɛ yɛn mu biara hyia amansan tumidi ho ɔsɛmpɔw no nnɛ. Sɛ yɛka pefee sɛ yɛwɔ Yehowa afã a, Satan tu n’ani si yɛn so. Ɔde nhyɛso ba yɛn so akwan nyinaa so, na ɔbɛkɔ so ayɛ saa akosi ne nneɛma nhyehyɛe bɔne yi awiei. Ɛsɛ sɛ yɛma yɛn ani da hɔ. (1 Petro 5:8) Yɛn abrabɔ kyerɛ baabi a yegyina wɔ Yehowa amansan tumidi ho ɔsɛmpɔw kɛse no ne yɛn mudi mu a yebekura ama Onyankopɔn wɔ sɔhwɛ mu ho ɔsɛmpɔw a ɛto so abien no mu. Yɛrentumi mmu nneyɛe a ɛnkyerɛ nokwaredi sɛ biribi a ɛho nhia esiane sɛ abu so wɔ wiase nti. Yɛn mudi mu a yebekura no hwehwɛ sɛ yɛbɔ mmɔden sɛ yɛde Yehowa trenee gyinapɛn bedi dwuma wɔ asetra mu biribiara mu.
17. Dɛn na yenim wɔ nea ɛyɛe a atorodi ne korɔnbɔ bae ho a ɛsɛ sɛ ɛma yɛkwati?
17 Sɛ nhwɛso no, yentumi nsuasua Satan a ɔyɛ “atoro agya” no. (Yohane 8:44) Ɛsɛ sɛ yedi nokware wɔ biribiara a yɛyɛ mu. Wɔ Satan nhyehyɛe mu no, mmofra ntaa nni wɔn awofo nokware. Nanso, Kristofo mmofra kwati eyi, ma enti wɔma ɛda adi sɛ sobo a Satan bɔ Onyankopɔn nkurɔfo sɛ wobegyae wɔn mudi mu wɔ sɔhwɛ mu no nyɛ nokware. (Hiob 1:9-11; Mmebusɛm 6:16-19) Afei nso nnwuma mu nneyɛe bi wɔ hɔ a ebetumi akyerɛ sɛ obi wɔ “atoro agya” no afã na ɛnyɛ nokware Nyankopɔn no afã. Yɛkwati eyinom. (Mika 6:11, 12) Afei nso, korɔnbɔ nyɛ nea ɛteɛ da, sɛ ahia obi anaasɛ nea owia ne nneɛma no yɛ ɔdefo mpo a. (Mmebusɛm 6:30, 31; 1 Petro 4:15) Sɛ ɛyɛ ade a wɔtaa yɛ wɔ baabi a yɛte no anaasɛ wobu nea obi fa no adewa mpo a, korɔnbɔ da so ara yɛ ade a etia Onyankopɔn mmara.—Luka 16:10; Romafo 12:2; Efesofo 4:28.
18. (a) Sɔhwɛ bɛn na adesamma nyinaa behyia wɔ Kristo Mfirihyia Apem Nniso no awiei? (b) Su bɛn na ɛsɛ sɛ yenya nnɛ?
18 Wɔ Kristo Mfirihyia Apem Nniso no mu no, wɔde Satan ne n’adaemone no bɛhyɛ bun mu, na wontumi nnya adesamma so nkɛntɛnso bio. Hwɛ ahotɔ ara a ɛbɛyɛ! Nanso wɔ mfirihyia apem no akyi no, wobegyae wɔn kakra. Satan ne wɔn a wodi n’akyi no de nhyɛso bɛba adesamma a wokura wɔn mudi mu ma Onyankopɔn no so. (Adiyisɛm 20:7-10) Sɛ yenya hokwan tra ase saa bere no a, yɛbɛyɛ yɛn ade dɛn wɔ amansan tumidi ho ɔsɛmpɔw no ho? Esiane sɛ adesamma nyinaa bɛyɛ pɛ saa bere no nti, ade biara a ɛnkyerɛ nokwaredi a obi bɛyɛ no bɛyɛ nea ɔhyɛ da yɛ, na wɔbɛsɛe no koraa. Hwɛ sɛnea ɛho hia sɛ yɛde bɛyɛ yɛn su sɛ yebedi akwankyerɛ biara a Yehowa de ma yɛn no akyi nnɛ, sɛ ebia ɛnam N’asɛm so anaa n’ahyehyɛde no so! Sɛ yɛyɛ saa a, na yɛreda ahofama a edi mũ adi ama no sɛ Amansan Hene.
Asɛm no mu Ntĩmu
• Dɛn ne ɔsɛmpɔw kɛse a ɛsɛ sɛ yɛn nyinaa hyia no? Ɛyɛɛ dɛn na yɛn ho baa mu?
• Dɛn na ɛda nsow wɔ akwan a mmarima ne mmea a wɔtraa ase tete no faa so kuraa wɔn mudi mu maa Yehowa no ho?
• Dɛn nti na ɛho hia sɛ yɛde yɛn abrabɔ hyɛ Yehowa anuonyam da biara?
[Adesua no ho Nsɛmmisa]
