Ɔsom Mu Biakoyɛ Wɔ Yɛn Bere Yi Mu—Dɛn na Ɛkyerɛ?
Ti Biako
Ɔsom Mu Biakoyɛ Wɔ Yɛn Bere Yi Mu—Dɛn na Ɛkyerɛ?
1, 2. (a) Dwumadi a ɛyɛ anigye bɛn na ɛrekɔ so wɔ yɛn bere yi mu? (b) Anidaso a ɛyɛ anigye bɛn na nnipa komapafo wɔ?
WƆ WIASE nyinaa no, dwumadi bi a ɛyɛ anigye rekɔ so a ɛde ɔsom mu biakoyɛ bɛba. Ɛreka nnipa ɔpepem pii a wofi aman, mmusua, ne kasa horow nyinaa mu abom. Wɔreboaboa pii ano afe biara. Wɔada eyinom adi wɔ Bible mu sɛ Yehowa “adansefo,” na wɔfrɛ wɔn “nnipakuw kɛse.” Wɔsom Onyankopɔn “awia ne anadwo.” (Yesaia 43:10-12; Adiyisɛm 7:9-15) Dɛn nti na wɔyɛ eyi? Efisɛ wɔabehu sɛ Yehowa ne nokware Nyankopɔn koro no. Eyi kanyan wɔn ma wɔbɔ wɔn bra ma ɛne ne trenee akwan hyia. Afei nso, wɔahu sɛ yɛte nnɛ wiase bɔne yi a ɛrenkyɛ na Onyankopɔn asɛe no, na ɔde ne wiase foforo paradise no asi ananmu no “nna a edi akyiri” mu.—2 Timoteo 3:1-5, 13; 2 Petro 3:10-13.
2 Onyankopɔn Asɛm hyɛ bɔ sɛ: “Aka kakraa sɛ na ɔbɔnefo nni hɔ . . . Na ahobrɛasefo benya asase no adi, na wɔagye wɔn ani asomdwoe bebree mu.” (Dwom 37:10, 11) “Treneefo benya asase no adi, na wɔatra so daapem.” (Dwom 37:29) “[Onyankopɔn bɛpopa] wɔn aniwam nusu nyinaa. Na owu nni hɔ bio, na awerɛhow ne osu ne ɛyaw bi nni hɔ bio, efisɛ kan nneɛma no atwam.”—Adiyisɛm 21:4.
3. Ɔkwan bɛn so na wɔrenya nokware som mu biakoyɛ nnɛ?
3 Wɔn a wɔreka wɔn abom nnɛ wɔ nokware som mu no na wobedi kan atra saa wiase foforo no mu. Wɔahu nea Onyankopɔn apɛde kyerɛ, na wɔrebɔ mmɔden ayɛ sɛnea wobetumi. Bere a Yesu rekyerɛ sɛnea eyi ho hia no, ɔkae sɛ: “Na eyi ne daa nkwa, sɛ wobehu wo, nokware Nyankopɔn koro no, ne nea wosomaa no, Yesu Kristo no.” (Yohane 17:3) Ɔsomafo Yohane kyerɛwee sɛ: “Wiase ne n’akɔnnɔ retwam, na nea ɔyɛ ade a Onyankopɔn pɛ no tra hɔ daa.”—1 Yohane 2:17.
Nea Ɛkyerɛ Ankasa
4. (a) Dɛn na nnipa pii a wɔreboaboa wɔn ano wɔ ɔsom mu wɔ yɛn bere yi mu no kyerɛ ankasa? (b) Ɔkwan bɛn so na Bible ka anoboaboa yi ho asɛm?
4 Dɛn na nnipa pii saa a wɔreboaboa wɔn ano ma wɔde biakoyɛ asom no kyerɛ ankasa wɔ yɛn bere yi mu? Ɛyɛ adanse a ɛkyerɛ pefee sɛ yɛabɛn wiase bɔne yi awiei pɛɛ, na Onyankopɔn wiase foforo no bɛba wɔ ɛno akyi pɛɛ. Yɛde yɛn ani ahu Bible nkɔmhyɛ ahorow a ɛkaa saa anoboaboa yi ho asɛm siei no mmamu. Saa nkɔmhyɛ no mu biako ka sɛ: “Nna a edi akyiri no mu no, [Yehowa, NW] fi bepɔw [nokware som a wɔama so] no betim hɔ ataa mmepɔw atifi [asen ɔsom foforo biara], . . . na aman asen yuu aba so. Na amanaman pii bɛkɔ akɔka sɛ: Mommra mma yɛnkɔ [Yehowa, NW] bepɔw so nkɔ Yakob Nyankopɔn fi, na ɔnkyerɛ yɛn n’akwan, na yɛnnantew n’atempɔn so.”—Mika 4:1, 2; Dwom 37:34.
5, 6. (a) Ɔkwan bɛn so na ɛyɛ nokware sɛ amanaman redan aba Yehowa nkyɛn? (b) Nsɛm bɛn na ɛsɛ sɛ yebisa yɛn ho?
5 Ɛwom sɛ aman mũ nyinaa mma Yehowa honhom fam fie a yɛsom wom no mu de, nanso amanaman nyinaa mu nnipa ɔpepem pii reyɛ saa. Sɛ wosua Yehowa Nyankopɔn atirimpɔw a ɔdɔ wom ne ne nipasu a ɛyɛ anigye no ho ade a, ɛka wɔn koma yiye. Wɔde ahobrɛase hwehwɛ nea Onyankopɔn pɛ sɛ wɔyɛ. Wɔbɔ mpae te sɛ odwontofo a ɔkaa eyi no: “Kyerɛkyerɛ me ma menyɛ w’apɛde, efisɛ wone me Nyankopɔn.”—Dwom 143:10, NW.
6 So wuhu sɛ woka nnipakuw kɛse a Yehowa reka wɔn abom nnɛ ma wɔde biakoyɛ asom no no ho? So nea woyɛ wɔ nkyerɛkyerɛ a woanya afi N’asɛm mu no kyerɛ sɛ wunim ampa sɛ Yehowa ne ne Fibea? ‘Wobɛnantew n’atempɔn so’ akodu he?
Sɛnea Wotumi Nya
7. (a) Yebenya ɔsom mu biakoyɛ akodu he? (b) Dɛn nti na egye ntɛmpɛ sɛ wobɛyɛ Yehowa somfo nnɛ, na ɔkwan bɛn so na yebetumi aboa afoforo ma wɔayɛ saa?
7 Yehowa atirimpɔw ne sɛ abɔde a wɔwɔ nyansa nyinaa bɛyɛ biako wɔ nokware som mu. Hwɛ sɛnea yɛde anigyina hwɛ da a wɔn a wɔte ase nyinaa bɛsom nokware Nyankopɔn koro no kwan! (Dwom 103:19-22) Nanso ansa na ɛno betumi aba no, ɛsɛ sɛ Yehowa sɛe wɔn a wɔmpɛ sɛ wɔyɛ n’apɛde a ɛteɛ no nyinaa. Ofi mmɔborohunu mu di kan ka nea ɔbɛyɛ no ho asɛm, na ama nnipa a wɔwɔ mmaa nyinaa atumi anya hokwan asakra wɔn akwan. (Yesaia 55:6, 7) Enti, wɔde asɛm a egye ntɛmpɛ yi reto “nnipa a wofi aman, mmusua ne kasa horow nyinaa mu” anim sɛ: “Munsuro Onyankopɔn na monhyɛ no anuonyam, efisɛ n’atemmu dɔn adu. Na monkotow nea ɔyɛɛ soro ne asase ne ɛpo ne asuti no.” (Adiyisɛm 14:6, 7) So woagye ɔfrɛ no so? Sɛ saa a, ɛnde wowɔ hokwan sɛ woto nsa frɛ afoforo ma wobehu nokware Nyankopɔn no na wɔsom no.
8. Sɛ yesua Bible mfitiase nkyerɛkyerɛ no wie a, nkɔso foforo bɛn na ɛsɛ sɛ yɛbɔ mmɔden sɛ yebenya?
8 Ɛnyɛ Yehowa atirimpɔw ne sɛ nnipa a wɔka sɛ wogye no di nanso wɔkɔ so yɛ nea wɔn ankasa pɛ no bɛsom no. Onyankopɔn pɛ sɛ nkurɔfo nya “n’apɛde ho nokware nimdeɛ” na wɔda no adi wɔ wɔn asetra mu. (Kolosefo 1:9, 10, NW) Enti, nnipa a wɔwɔ anisɔ a wosua Bible no mfitiase nkyerɛkyerɛ no pɛ sɛ wɔpere du Kristofo nyin ho. Nea wɔpɛ ne sɛ wobehu Yehowa yiye, wɔma N’asɛm mu ntease a wɔwɔ no kɔ anim na emu dɔ, na wɔde di dwuma koraa wɔ wɔn asetra mu. Wɔpɛ sɛ wɔda yɛn soro Agya no su horow adi na wonya n’adwene wɔ sɛnea wosusuw nsɛm ho no ho. Eyi ka wɔn ma wɔhwehwɛ akwan a wɔbɛfa so ayɛ nkwagye adwuma a ɔrema wɔayɛ wɔ asase so wɔ yɛn bere yi mu no bi. So saa na wo nso wopɛ sɛ woyɛ?—Marko 13:10; Hebrifo 5:12–6:3.
9. Akwan bɛn so na yebetumi anya nokware biakoyɛ nnɛ?
9 Bible kyerɛ sɛ ɛsɛ sɛ wɔn a wɔsom Yehowa no yɛ nnipa a wɔyɛ biako. (Efesofo 4:1-3) Ɛsɛ sɛ biakoyɛ yi tra hɔ nnɛ, ɛwom mpo sɛ yɛte wiase a emu apaapae mu na yɛda so ara rebɔ mmɔden sɛ yebedi yɛn ankasa sintɔ ahorow ho dwuma de. Yesu fi komam bɔɔ mpae sɛ n’asuafo nyinaa nyɛ biako, na wɔnyɛ biako nokware mu. Dɛn na na eyi bɛkyerɛ? Nea edi kan no, sɛ wɔne Yehowa ne ne Ba no benya abusuabɔ pa. Nea ɛto so abien no, sɛ wɔne wɔn ho wɔn ho bɛyɛ biako. (Yohane 17:20, 21) Ne saa nti, Kristofo asafo no di dwuma sɛ ahyehyɛde a Yehowa nam so kyerɛkyerɛ ne nkurɔfo.
Nneɛma Bɛn na Ɛde Biakoyɛ Ba?
10. (a) Dɛn na yenya bere a yɛn ankasa de Bible no bua nsɛmmisa a ɛka yɛn no? (b) Hwehwɛ nneɛma a ɛde Kristofo biakoyɛ ba no mu denam nkyekyɛm yi mu nsɛmmisa a wubebua no so.
10 Wɔabobɔ nneɛma ason a ɛde ɔsom mu biakoyɛ ba din wɔ ase ha. Bere a wubua nsɛmmisa a ɛka ho no, susuw sɛnea emu biara ka abusuabɔ a wo ne Yehowa ne wo mfɛfo Kristofo wɔ no ho. Nsɛm yi a wubesusuw ho abue kyerɛw nsɛm a wɔatwe adwene asi so a wɔnkaa emu nsɛm no ahwɛ no bɛboa wo ma woanya Onyankopɔn nyansa, ntease ne nhumu—su horow a yɛn nyinaa hia. (Mmebusɛm 5:1, 2; Filipifo 1:9-11) Susuw nneɛma yi ho mmiako mmiako.
(1) Yegye hokwan a Yehowa wɔ sɛ ɔkyerɛ nea ɛyɛ papa ne bɔne no tom. “Fa wo koma nyinaa bata [Yehowa, NW] ho, na mfa wo ho ntweri wo nhumu. Hu no w’akwan nyinaa mu, na ɔno na ɔbɛteɛ w’akwan.”—Mmebusɛm 3:5, 6.
Sɛ yɛresi gyinae ahorow a, dɛn nti na ɛsɛ sɛ yɛhwehwɛ Yehowa afotu ne akwankyerɛ? (Dwom 146:3-5; Yesaia 48:17)
(2) Yɛwɔ Onyankopɔn Asɛm a ɛkyerɛ yɛn kwan. “Munyaa Onyankopɔn kaseɛ asɛm no yɛn nkyɛn no, mugyei, ɛnyɛ sɛ nnipa asɛm, na mmom sɛ Onyankopɔn asɛm, sɛnea ɛte ampa, ɔno nso na ɔyɛ mo a mugye di no mu adwuma.”—1 Tesalonikafo 2:13.
Asiane bɛn na ɛwɔ yɛ a yɛbɛyɛ nea “yɛte nka” sɛ ɛteɛ no mu? (Mmebusɛm 14:12; Yeremia 10:23, 24; 17:9)
Sɛ yennim afotu a Bible no de ma wɔ asɛm bi ho a, dɛn na ɛsɛ sɛ yɛyɛ? (Mmebusɛm 2:3-5; 2 Timoteo 3:16, 17)
(3) Yɛn nyinaa nya honhom fam aduanma nhyehyɛe koro no ara so mfaso. “Wo mma nyinaa bɛyɛ [Yehowa, NW] asuafo.” (Yesaia 54:13) “Momma yɛnhwehwɛ yɛn ho ntwetwe yɛn ho yɛn ho nkɔ ɔdɔ ne nnwuma pa mu. Na mommma yennnyae yɛn ho yɛn ho nhyiam, sɛnea ebinom anya nyɛe, na mmom momma yentutu yɛn ho yɛn ho fo, dodow a muhu sɛ ɛda no rebɛn no.”—Hebrifo 10:24, 25.
Mfaso horow bɛn na wɔn a wɔde Yehowa honhom fam aduanma ho nhyehyɛe di dwuma kosi ase no nya? (Yesaia 65:13, 14)
(4) Yesu Kristo ne yɛn Kannifo na ɛnyɛ onipa biara. “Wɔmmfrɛ mo Rabi, efisɛ mo kyerɛkyerɛfo yɛ biako, na mo nyinaa yɛ anuanom. Afei nso, mommfrɛ obiara mo agya wɔ asase so, na mo Agya yɛ biako, ɔne Ɔsorosoroni no. Wɔmmfrɛ mo ‘akannifo’ nso, efisɛ mo Kannifo yɛ biako, ɔne Kristo no.”—Mateo 23:8-10, NW.
So ɛsɛ sɛ yɛn mu bi gye di sɛ yɛkorɔn sen afoforo? (Romafo 3:23, 24; 12:3)
(5) Yɛhwɛ Onyankopɔn Ahenni no kwan sɛ adesamma anidaso koro pɛ. “Enti mommɔ mpae sɛ: Yɛn Agya a wowɔ soro, wo din ho ntew, w’ahenni mmra, nea wopɛ nyɛ asase so, sɛnea ɛyɛ ɔsoro. Na monhwehwɛ Onyankopɔn ahenni ne ne trenee kan.”—Mateo 6:9, 10, 33.
Ɔkwan bɛn so na ‘ahenni no a yɛhwehwɛ kan no’ bɔ yɛn biakoyɛ no ho ban? (Mika 4:3; 1 Yohane 3:10-12)
(6) Honhom kronkron ma wɔn a wɔsom Yehowa nya su horow a ɛho hia ma Kristofo biakoyɛ. “Honhom aba ne ɔdɔ, anigye, asomdwoe, abodwokyɛre, ayamye, papayɛ, gyidi, odwo, anidahɔ.”—Galatifo 5:22, 23.
Dɛn na ɛsɛ sɛ yɛyɛ na ama Onyankopɔn honhom no asow n’aba wɔ yɛn mu? (Asomafo no Nnwuma 5:32)
Ɔkwan bɛn so na Onyankopɔn honhom no a yebenya no nya yɛne yɛn mfɛfo Kristofo ntam abusuabɔ so nkɛntɛnso? (Yohane 13:35; 1 Yohane 4:8, 20, 21)
(7) Onyankopɔn nokware asomfo nyinaa ka N’ahenni ho asɛmpa no bi. “Wɔbɛka ahenni ho asɛmpa yi wiase nyinaa de adi amanaman nyinaa adanse; ɛno ansa na awiei no bɛba.”—Mateo 24:14.
Dɛn na ɛsɛ sɛ ɛkanyan yɛn ma yenya asɛnka adwuma yi mu kyɛfa kɛse? (Mateo 22:37-39; Romafo 10:10)
11. Sɛ yɛde Bible mu nokware ahorow di dwuma wɔ yɛn asetram a, dɛn na efi mu ba?
11 Biakoyɛ a yɛde som Yehowa no twe yɛn bɛn no, na ɛma yetumi ne yɛn mfɛfo gyidifo nya fekubɔ a ɛyɛ anigye. Dwom 133:1 ka sɛ: “Hwɛ oye a eye ne fɛ a ɛyɛ sɛ anuanom bom tra faako.” Hwɛ anigye a ɛyɛ sɛ wobɛtwe wo ho afi wiase no ne ne pɛsɛmenkominya, ɔbrasɛe, ne basabasayɛ ho na wo ne wɔn a wɔdɔ Yehowa ankasa na wodi ne mmara so no behyiam!
Kwati Nneɛma a Ɛde Mpaapaemu Ba
12. Dɛn nti na ɛho hia sɛ yɛkwati ahofadi honhom?
12 Sɛnea ɛbɛyɛ na yɛrensɛe yɛn biakoyɛ a ɛsom bo no, ɛsɛ sɛ yɛkwati nneɛma a ɛde mpaapaemu ba. Eyi mu biako ne yɛn ho a yɛbɛtwe afi Onyankopɔn ne ne mmara ho. Yehowa boa yɛn ma yɛkwati eyi denam nea ɔde ba a ɔne Satan Ɔbonsam a ɔma yehu no no so. (2 Korintofo 4:4; Adiyisɛm 12:9) Satan na ɔdaadaa Adam ne Hawa ma wobuu wɔn ani guu nea na Onyankopɔn aka so, na wosii gyinae a ɛne Onyankopɔn apɛde bɔ abira. Nea efii mu bae no de amanehunu brɛɛ wɔne yɛn. (Genesis 3:1-6, 17-19) Ahofadi honhom a ɛma nnipa twe wɔn ho fi Onyankopɔn ne ne mmara ho ahyɛ wiase yi mu ma. Enti ɛho hia sɛ yɛko tia saa honhom no wɔ yɛn mu.
13. Dɛn na ɛbɛkyerɛ sɛ ebia yɛresiesie yɛn ho ankasa ama Onyankopɔn wiase foforo a trenee te mu no mu asetra?
13 Sɛ nhwɛso no, susuw Yehowa bɔhyɛ a ɛyɛ anigye a ɛne sɛ ɔde ɔsoro foforo ne asase foforo a “trenee te mu” besi mprempren wiase bɔne yi ananmu no ho hwɛ. (2 Petro 3:13) So ɛnsɛ sɛ ɛka yɛn ma yefi ase siesie yɛn ho sɛ yɛbɛtra ase wɔ saa bere a trenee te mu no mu? Eyi kyerɛ sɛ yebetie Bible afotu a emu da hɔ yi: “Monnnɔ wiase anaa nneɛma a ɛwɔ wiase. Sɛ obi dɔ wiase a, agya no dɔ no nni ne mu.” (1 Yohane 2:15) Enti yɛkwati wiase yi honhom—n’ahofadi su, n’ahopɛ ntraso, ne brasɛe ne basabasayɛ. Yɛde yɛ yɛn su sɛ yebetie Yehowa na yɛafi komam ayɛ osetie ama no, a nea yɛn honam a ɛtɔ sin no tɔ kɔ so biara mfa ho. Yɛn asetra nyinaa di adanse sɛ yɛde yɛn adwene ne yɛn botae nyinaa asi Onyankopɔn apɛde a yɛbɛyɛ so.—Dwom 40:8.
14. (a) Dɛn nti na ɛho hia sɛ yebeso hokwan no mu nnɛ de asua Yehowa akwan na yɛafa so wɔ yɛn asetram? (b) Dɛn na kyerɛw nsɛm a wɔatwe adwene asi so wɔ nkyekyɛm no mu no kyerɛ ma yɛn ankasa?
14 Sɛ Yehowa bere a wahyɛ sɛ ɔbɛsɛe nneɛma nhyehyɛe bɔne yi ne wɔn a wɔpɛ wiase yi akwan nyinaa no du a, ɔrentwentwɛn ne nan ase. Ɔrentu saa bere no nhyɛ da, na ɔrensakra ne gyinapɛn ahorow nso na ama wagye wɔn a wɔda so ara rebɔ mmɔden sɛ wɔde wɔn ho bɛfam wiase no ho na bere koro no ara wɔde koma ntanta sua Onyankopɔn apɛde na wɔde wɔn koma fã di so no. Ɛnnɛ ne bere a ɛsɛ sɛ yɛyɛ ho biribi! (Luka 13:23, 24; 17:32; 21:34-36) Enti, hwɛ anigye ara a ɛyɛ sɛ yehu “nnipakuw kɛse” no sɛ wɔregye hokwan a ɛsom bo yi atom, na wofi wɔn pɛ mu rehwehwɛ nkyerɛkyerɛ a Yehowa nam N’asɛm ne n’ahyehyɛde so de ma, na wɔde biakoyɛ renantew n’atempɔn so akɔ wiase foforo no mu no! Na dodow a yesua Yehowa ho ade no, dodow no ara na yɛbɛdɔ no na yɛanya ɔpɛ sɛ yɛbɛsom no.
Asɛm no mu Ntĩmu
• Dɛn ne Yehowa atirimpɔw wɔ ɔsom ho?
• Bere a yɛasua Bible mfitiasesɛm awie no, nkɔso bɛn bio na ɛsɛ sɛ yɛyere yɛn ho sɛ yebenya?
• Dɛn na yebetumi ayɛ sɛ ankorankoro na ama yɛne Yehowa asomfo afoforo ayɛ biako?
[Adesua no ho Nsɛmmisa]
[Kratafa 4 mfonini]
‘Ahobrɛasefo benya asase no adi na wɔagye wɔn ani asomdwoe bebree mu’
