Ti Anum

Ahofadi a Yehowa Asomfo Wɔ

1, 2. (a) Ahofadi bɛn na Onyankopɔn de maa nnipa baanu a wodi kan no? (b) Bobɔ mmara horow a ɛkyerɛ sɛnea na ɛsɛ sɛ Adam ne Hawa yɛ wɔn ade no bi din.

BERE a Yehowa bɔɔ ɔbarima ne ɔbea a wodi kan no, na wɔwɔ ahofadi a ɛsen nea nnipa wɔ nnɛ no koraa. Ná wɔn fie yɛ Paradise, Eden Turo fɛfɛ no. Ɔyare biara ansɛe wɔn asetra mu anigye, esiane adwene ne nipadua a ɛyɛ pɛ a na wɔwɔ no nti. Na wɔnhwɛ kwan sɛ wobewu te sɛ nea obiara ahwɛ kwan fi saa bere no. Afei nso, na wɔnyɛ nnipa a wodi ahyɛde so kɛkɛ, na mmom na wotumi fi wɔn pɛ mu si wɔn ankasa gyinae. Nanso, na ɛsɛ sɛ wɔkyerɛ obu ma Onyankopɔn mmara na ama wɔakɔ so anya ahofadi a ɛte saa.

² Sɛ nhwɛso no, susuw adebɔ ho mmara a Onyankopɔn ahyɛ no ho hwɛ. Ɛwom sɛ ɛnyɛ nea na wɔakyerɛw saa mmara yi de, nanso wɔyɛɛ Adam ne Hawa wɔ ɔkwan bi so a na ɛbɛma wɔafi wɔn awosu mu adi so. Ɔkɔm a na ɛde wɔn ma wohui sɛ ehia sɛ wodidi; sukɔm a ɛdee wɔn ma wohui sɛ ehia sɛ wɔnom nsu; owia a ɛkɔtɔe ma wohui sɛ ɛsɛ sɛ wɔda. Yehowa maa wɔn adwuma nso a wɔbɛyɛ. Nokwarem no, na saa adwuma no yɛ mmara, efisɛ na ɛbɛkyerɛ wɔn sɛnea ɛsɛ sɛ wɔbɔ wɔn bra. Na ɛsɛ sɛ wɔwo mma, di asase so abɔde pii a nkwa wom no so na wɔtrɛw Paradise no ahye mu kosi sɛ ebedu asase so nyinaa. (Genesis 1:28; 2:15) Mmara a  mfaso wɔ so bɛn ara ni! Ɛma wonyaa adwuma a abotɔyam wom koraa, na ɛma wotumi de wɔn dom akyɛde dii dwuma paa wɔ akwan pa a ɛsen biara so. Afei nso, na wɔwɔ ahofadi kɛse a wɔde besi sɛnea wɔbɛyɛ adwuma a wɔde ahyɛ wɔn nsa no ho gyinae. Dɛn bio na na wobetumi abisa?

3. Ɔkwan bɛn so na na Adam ne Hawa betumi asua sɛnea wɔde wɔn ahofadi besi gyinae nyansam?

³ Ɛwom sɛ wɔmaa Adam ne Hawa hokwan a na wɔde besisi gyinae de, nanso na eyi nkyerɛ sɛ nneɛma pa befi gyinae biara a wobesi mu aba. Na ɛsɛ sɛ wɔde wɔn ahofadi no si gyinae ma ɛne Onyankopɔn mmara ne nnyinasosɛm ahorow hyia. Ná wɔbɛyɛ dɛn asua eyinom? Ɛdenam wɔn Bɔfo no a wobetie no ahwɛ ne nnwuma so no so. Onyankopɔn maa Adam ne Hawa nyansa a na ebehia na ama wɔatumi de nea wɔasua no adi dwuma. Esiane sɛ wɔbɔɔ wɔn a na wɔyɛ pɛ nti, na ɛbɛyɛ wɔn su sɛ wɔbɛda Onyankopɔn su ahorow adi bere a wɔresisi gyinae no. Nokwarem no, sɛ na wɔn ani sɔ nea Onyankopɔn ayɛ ama wɔn no na wɔpɛ sɛ wɔsɔ n’ani a, na wɔde ahwɛyiye bɛyɛ saa.​—Genesis 1:​26, 27; Yohane 8:29.

4. (a) So ahyɛde a wɔde maa Adam ne Hawa sɛ ɛnsɛ sɛ wodi dua biako aba no ma wɔhweree wɔn ahofadi anaa? (b) Dɛn nti na na eyi yɛ ahwehwɛde a ɛfata?

⁴ Enti, Onyankopɔn pawee sɛ ɔbɛsɔ nokware a wodi ma no sɛ wɔn Nkwa-Mafo ne wɔn pɛ mu a wofi sɛ wobedi nea wahyɛ wɔn no so ahwɛ. Yehowa de ahyɛde yi maa Adam sɛ: “Turom ha nnua nyinaa di bi. Na papa ne bɔne hu dua no de, nni, efisɛ da a wubedi bi no, owu na wubewu.” (Genesis 2:​16, 17) Bere a  wɔbɔɔ Hawa no, wɔkaa mmara yi ho asɛm kyerɛɛ ɔno nso. (Genesis 3:2, 3) So mmara yi ma wɔhweree wɔn ahofadi? Dabida. Na wɔwɔ nnuan a ɛyɛ dɛ ahorow pii a wobedi a na wɔrenni saa dua biako no aba. (Genesis 2:8, 9) Enti na ɛfata koraa sɛ wohu sɛ asase no yɛ Onyankopɔn dea, na ɔno na ɔbɔe. Enti na ɔwɔ hokwan sɛ ɔyɛ mmara a ɛne n’atirimpɔw hyia a adesamma benya so mfaso.​—Dwom 24:​1, 10.

5. (a) Ɔkwan bɛn so na Adam ne Hawa hweree ahofadi a ɛyɛ anigye a na wɔwɔ no? (b) Dɛn na ebesii ahofadi a na Adam ne Hawa wɔ no ananmu, na ɔkwan bɛn so na aka yɛn?

⁵ Nanso dɛn na esii? Esiane sɛ anuonyamhunu kanyan ɔbɔfo bi nti, ɔde hokwan a ɔwɔ sɛ ɔpaw nea ɔpɛ no dii dwuma wɔ ɔkwammɔne so bɛyɛɛ Satan, a ɛkyerɛ sɛ “Ɔsɔretiafo.” Ɔnam biribi a ɛne Onyankopɔn apɛde bɔ abira a ɔmaa Hawa awerɛhyem sɛ obenya no so daadaa no. (Genesis 3:4, 5) Adam kɔkaa Hawa ho ma wobuu Onyankopɔn mmara so. Esiane sɛ wɔfaa biribi a ɛnyɛ wɔn de nti, wɔn ahofadi a ɛyɛ anigye no fii wɔn nsa. Bɔne bɛyɛɛ wɔn wura, na sɛnea na Onyankopɔn abɔ wɔn kɔkɔ no, awiei koraa no, na owu bedi so aba. Agyapade a wɔde maa wɔn asefo ne bɔne—ɛda adi wɔ awosu mu a wofi tɔ kɔ bɔne so no mu. Bɔne de mmerɛwyɛ a ɛde yare, onyin, ne owu ba nso bae. Tɔ a yɛtɔ kɔ bɔneyɛ so a Satan nkɛntɛnso ma emu yɛ den no ma yenyaa adesamma abusua a nitan, nsɛmmɔnedi, nhyɛso, ne akodi ahyɛ yɛn asetra ho kyerɛwtohɔ mu ma. Hwɛ sɛnea eyi ne ahofadi a Onyankopɔn de maa adesamma mfiase no bɔ abira!​—Deuteronomium 32:4, 5; Hiob 14:1, 2; Romafo 5:12; Adiyisɛm 12:9.

 Faako a Yebetumi Anya Ahofadi

6. (a) Ɛhe na yebetumi anya ahofadi ankasa? (b) Ahofadi bɛn na Yesu kaa ho asɛm no?

⁶ Esiane tebea bɔne a ɛwɔ baabiara nnɛ nti, ɛnyɛ nwonwa sɛ nkurɔfo hwehwɛ ahofadi kɛse. Nanso ɛhe na yebetumi anya ahofadi a edi mũ ankasa? Yesu kae sɛ: ‘Sɛ motra m’asɛm mu a, moyɛ m’asuafo ampa; na mubehu nokware, na nokware no ama moanya ahofadi.’ (Yohane 8:​31, 32) Saa ahofadi yi nyɛ nea nnipa hwɛ kwan sɛ wobenya no bere a wɔpo amammui sodifo anaa aban bi de gye foforo tom no. Mmom no, ahofadi yi fa nea ɛde nnipa haw ahorow ba ankasa ho. Nea na Yesu reka ho asɛm no ne bɔne mu ahofadi. (Yohane 8:​24, 34-36) Enti, sɛ obi bɛyɛ Yesu Kristo nokware suani a, ohu nsakrae titiriw wɔ n’asetra mu, ahofadi bi!

7. (a) Ɔkwan bɛn so na yebetumi ade yɛn ho afi bɔne ho nnɛ? (b) Sɛ yebenya saa ahofadi no a, dɛn na ɛsɛ sɛ yɛyɛ?

⁷ Eyi nkyerɛ sɛ mprempren biribi mpia nokware Kristofo mma womfi awosu mu ntɔ nkɔ bɔne so bio. Esiane sɛ wɔanya bɔne fi awo mu nti, ɛno ma wɔkɔ so ara di apere. (Romafo 7:​21-25) Nanso, sɛ obi tra ase ankasa ma ɛne Yesu nkyerɛkyerɛ hyia a, ɔrenyɛ bɔne akoa bio. Bɔne remmɛyɛ sɛ sodifo katee bi a ɔma no ahyɛde horow a ɛsɛ sɛ odi so ɔkwan biara so bio. Asetra a enni atirimpɔw a ɛma onya ahonim bɔne no rensum no afiri bio. Obenya ahonim pa wɔ Onyankopɔn anim efisɛ wɔnam ne gyidi a wanya wɔ Kristo afɔrebɔ mu no so de ne kan bɔne ahorow afiri no. Ɛwom sɛ bɔne ho akɔnnɔ ahorow betumi asɔre de, nanso sɛ wanyɛ bɔne no esiane sɛ ɔkae Kristo nkyerɛkyerɛ a ɛho  tew no nti a, ɔma ɛda adi sɛ ɔnyɛ bɔne akoa bio.​—Romafo 6:​12-17.

8. (a) Ahofadi ahorow bɛn na nokware Kristosom ma yenya? (b) Su bɛn na ɛsɛ sɛ yɛda no adi wɔ wiase atumfoɔ ho?

⁸ Susuw ahofadi a yɛwɔ sɛ Kristofo no ho hwɛ. Wɔagye yɛn afi nea atoro nkyerɛkyerɛ de ba, gyidihunu ne bɔne nkoasom mu. Nokware a ɛyɛ anigye a ɛfa awufo tebea ne owusɔre ho no ama yɛade yɛn ho afi owu ho suro a ntease nnim ho. Nim a yenim sɛ ɛrenkyɛ na wɔde Onyankopɔn trenee Ahenni abesi adesamma nniso horow a ɛnyɛ pɛ ananmu no ma yɛde yɛn ho fi abasamtu mu. (Daniel 2:44; Mateo 6:10) Nanso ahofadi a ɛte saa nyɛ nea ɛma ɛteɛ sɛ yebebu atumfoɔ ne wɔn mmara ahorow animtiaa.​—Tito 3:​1, 2; 1 Petro 2:​16, 17.

9. (a) Ɔkwan bɛn so na Yehowa fi ɔdɔ mu boa yɛn ma yenya ahofadi a ɛsen biara a adesamma betumi anya nnɛ? (b) Yɛbɛyɛ dɛn atumi asisi gyinae a nyansa wom?

⁹ Yehowa mma yɛnsɔ nneɛma nhwɛ ansa na yɛahu asetra kwan a eye sen biara no. Onim sɛnea wɔyɛɛ yɛn, nea ɛma yenya abotɔyam ankasa, ne nea ɛbɛma yɛanya mfaso daa. Onim nsusuwii ne nneyɛe a ebetumi asɛe obi ne Ɔno ne ne mfɛfo nnipa ntam abusuabɔ, na ebia ama saa nipa no ahwere wiase foforo no. Yehowa fi ɔdɔ mu nam Bible no ne n’ahyehyɛde a aniwa hu no so ka eyinom nyinaa ho asɛm kyerɛ yɛn. (Marko 13:10; Galatifo 5:​19-23; 1 Timoteo 1:​12, 13) Afei ɛyɛ yɛn asɛyɛde sɛ yɛde hokwan a Onyankopɔn de ama yɛn sɛ yemfi yɛn pɛ mu mpaw nea yɛpɛ no bedi dwuma de asi sɛnea yɛbɛyɛ yɛn ade wɔ ho no ho gyinae. Sɛ yɛanyɛ yɛn ade te sɛ Adam na yetie nea Bible ka kyerɛ yɛn no a, yebesi  gyinae ahorow a nyansa wom. Yɛbɛkyerɛ sɛ abusuabɔ pa a yɛne Yehowa benya no ne ade a ɛho hia yɛn titiriw wɔ yɛn asetra mu.

Ebinom Hwehwɛ Ahofadi Foforo

10. Ahofadi bɛn na ebinom a wɔyɛ Yehowa Adansefo abɔ mmɔden sɛ wobenya?

¹⁰ Ɛtɔ mmere bi a mmofra binom a wɔyɛ Yehowa Adansefo—ne afoforo a wɔanyin ankasa—betumi ate nka sɛ wɔpɛ ahofadi foforo bi. Ebia wɔn ani begye wiase no ho, na dodow a wosusuw ho no, dodow no ara na wonya ɔpɛ a emu yɛ den sɛ wɔbɛyɛ nneɛma a ɛne Kristosom nhyia a agye din wɔ wiase no. Ebia saafo no renyɛ wɔn adwene sɛ wɔbɛnom nnubɔne, anom nsa pii anaasɛ wɔbɛbɔ aguaman. Nanso wofi ase ne ebinom a wɔnyɛ nokware Kristofo bɔ fekuw, na wɔpɛ sɛ eyinom  gye wɔn tom. Ebia wobefi ase asuasua wɔn kasa ne wɔn nneyɛe mpo.​—3 Yohane 11.

11. Ɛhe na ɛtɔ mmere bi a nnaadaa a ɛbɛma yɛatumi ayɛ bɔne no fi?

¹¹ Ɛtɔ mmere bi a nnaadaa a ɛbɛma yɛde yɛn ho ahyɛ wiase abrabɔ mu no fi obi a ɔkyerɛ sɛ ɔsom Yehowa hɔ. Ɛtoo tete Kristofo binom saa, na ade koro no ara betumi asi wɔ yɛn bere yi mu. Mpɛn pii no nnipa a wɔte saa no pɛ sɛ wɔyɛ nneɛma a wɔte nka sɛ ɛbɛma wɔn ani agye, nanso saa nneɛma yi bu Onyankopɔn mmara so. Wɔhyɛ afoforo nkuran sɛ “wonnye wɔn ani.” Wɔhyɛ ‘ahofadi ho bɔ, bere a wɔn ankasa yɛ ɔporɔw nkoa.’​—2 Petro 2:​19.

12. Awerɛhosɛm bɛn na efi abrabɔ a ɛne Onyankopɔn mmara ne ne nnyinasosɛm bɔ abira no mu ba?

¹² Ahofadi a ɛte saa no sow aba bɔne bere nyinaa, efisɛ ɛma wobu Onyankopɔn mmara so. Sɛ nhwɛso no, aguamammɔ betumi de nkate mu ɔhaw, ɔyare, nyinsɛn a wɔmpɛ ne awaregu nso aba. (1 Korintofo 6:18; 1 Tesalonikafo 4:​3-8) Nnubɔne nom betumi ama obi ayɛ obufufafo, ne kasa mu nna hɔ, n’ani so ayɛ no wusiwusi, n’ani so abiriw no, ne home rensi so, wahu nneɛma wɔ n’ani so, na wawu. Ebetumi aka obi hɔ, na ebia obedi nsɛmmɔne na ama wanya sika a ɔde bɛtɔ anom. Ade koro no ara na efi asanom bebrebe mu ba. (Mmebusɛm 23:29-35) Wɔn a wɔbɔ wɔn bra saa no besusuw sɛ wɔwɔ ahofadi, nanso wobehu sɛ wɔyɛ nkoa ma bɔne no na aka akyi dodo. Na hwɛ owura otirimɔdenfo a bɔne yɛ! Asɛm no ho a yebesusuw mprempren no betumi aboa yɛn ma yɛabɔ yɛn ho ban wɔ ade a ɛte saa ho.​—Galatifo 6:​7, 8.

 Faako a Ɔhaw Ahorow no Fi Ase

13. (a) Ɔkwan bɛn so na wɔtaa kanyan akɔnnɔ a ɛde ɔhaw ahorow ba no? (b) Sɛ yɛbɛte nea “fekubɔne” yɛ ase a, hena adwene na yehia? (d) Bere a worebua nsɛmmisa a ɛwɔ nkyekyɛm 13 no, si Yehowa adwene so dua.

¹³ Susuw faako a ɔhaw ahorow taa fi ase no ho. Bible kyerɛkyerɛ mu sɛ: “Wɔsɔ obiara hwɛ a, na ɛyɛ n’ankasa akɔnnɔ a egyigye na ɛdaadaa no na ɛsɔ no hwɛ: ansa na akɔnnɔ no nyinsɛn a, ɛwo bɔne, na bɔne no wie nyin a, ɛwo owu.” (Yakobo 1:​14, 15) Ɔkwan bɛn so na akɔnnɔ no kanyan ne ho? Ɛnam nea ɛkɔ adwene no mu no so. Mpɛn pii no nkurɔfo a wɔmfa Bible nnyinasosɛm nni dwuma a yɛne wɔn bɔ na ɛde ba. Nokwarem no, yɛn nyinaa nim sɛ ɛsɛ sɛ yɛkwati “fekubɔne.” (1 Korintofo 15:33, NW) Nanso fekubɔ bɛn na ɛyɛ bɔne? Yehowa bu asɛm no dɛn? Ɛsɛ sɛ nsɛmmisa ne kyerɛw nsɛm a edidi so yi ho a yebesusuw no boa yɛn ma yesi gyinae a ɛteɛ.

So nokwasɛm a ɛyɛ sɛ ɛte sɛ nea nnipa bi yɛ nnipa anuonyamfo no kyerɛ sɛ wɔyɛ ayɔnkofo pa? (Genesis 34:​1, 2, 18, 19)

So wɔn nkɔmmɔbɔ, ebia aseresɛm a woyi no betumi akyerɛ sɛ ɛsɛ sɛ yɛfa wɔn yɔnko? (Efesofo 5:​3, 4)

Sɛ yɛne nkurɔfo a wɔnnɔ Yehowa bɔ denneennen a, ɔte nka dɛn? (2 Beresosɛm 19:​1, 2)

Ɛwom sɛ ebia yɛne nnipa a wonkura yɛn gyidi bɛyɛ adwuma anaa yɛne wɔn bɛkɔ sukuu de, nanso dɛn nti na ehia sɛ yɛyɛ ahwɛyiye? (1 Petro 4:3, 4)

Television ne sini a yɛhwɛ, Intanɛt a yɛde di dwuma, nhoma, nsɛmma nhoma ne atesɛm nkrataa akenkan nso yɛ akwan a yɛfa so ne afoforo bɔ fekuw. Eyi mu nneɛma bɛn na ehia sɛ yɛhwɛ yiye wɔ ho? (Mmebusɛm 3:31; Yesaia 8:19; Efesofo 4:​17-19)

 Dɛn na ayɔnkofo a yɛpaw wɔn no ka kyerɛ Yehowa wɔ nnipa ko a yɛyɛ ho? (Dwom 26:​1, 4, 5; 97:10)

14. Ahofadi kɛse bɛn na ɛretwɛn wɔn a wofi nokwaredi mu de Onyankopɔn Asɛm mu afotu di dwuma nnɛ no?

¹⁴ Nea ɛda yɛn anim pɛɛ ne Onyankopɔn wiase foforo no. Ɛdenam Onyankopɔn soro Ahenni nniso no so no, adesamma bɛde wɔn ho afi Satan ne ne nneɛma nhyehyɛe bɔne no nkɛntɛnso nyinaa ase. Wobeyi nea bɔne de ba nyinaa afi adesamma so nkakrankakra na ama yɛayɛ pɛ wɔ adwene ne nipadua mu na yɛatumi anya daa nkwa wɔ Paradise. Awiei koraa no abɔde nyinaa benya ahofadi a ɛne ‘Yehowa honhom’ hyia koraa. (2 Korintofo 3:17) So ɛbɛyɛ nea nyansa wom sɛ yebebu Onyankopɔn Asɛm mu afotu so mprempren na yɛahwere eyinom nyinaa? Bere a yɛde yɛn Kristofo ahofadi di dwuma nnɛ no, momma yɛn nyinaa nna no adi pefee sɛ nea yɛpɛ ankasa ne “Onyankopɔn mma anuonyam ahofadi.”​—Romafo 8:21.

Asɛm no mu Ntĩmu

• Ahofadi bɛn na adesamma baanu a wodi kan no nyae? Sɛ wɔde toto nea adesamma wɔ nnɛ no ho a, ɛte dɛn?

• Ahofadi bɛn na nokware Kristofo wɔ? Ɔkwan bɛn so na ɛne nea wiase no bu no sɛ ahofadi no bɔ abira?

• Dɛn nti na ɛho hia kɛse sɛ yɛkwati fekubɔne? Esiane sɛ yɛnte sɛ Adam nti, hena gyinaesi a ɛfa bɔne ho na ɛsɛ sɛ yegye tom?

[Adesua no ho Nsɛmmisa]

[Kratafa 46 mfonini]

Onyankopɔn Asɛm bɔ kɔkɔ sɛ: “Mommma wɔnnnaadaa mo. Fekubɔne sɛe ɔbra pa”