Ti Dunson

Fa Onyamesom Pa Di Dwuma Wɔ Fie

1. Ɔkwan bɛn so na Onyankopɔn Asɛm mu akwankyerɛ a wɔde di dwuma aka aware ahorow?

YEHOWA ne aware Hyehyɛfo, na N’asɛm no de mmusua ho akwankyerɛ a eye sen biara ma. Esiane sɛ nnipa pii de saa akwankyerɛ yi di dwuma nti wɔahyehyɛ aware a ɛyɛ anigye. Nea ɛhyɛ nkuran no, akanyan ebinom a na wɔte hɔ kɛkɛ a wɔnwaree no ma wɔde wɔn aware akɔhyɛ mmara ase. Afoforo nso agyae wɔn ahokafo akyi a na wofi no. Mmarima a na wɔyɛ basabasa a na wɔyɛ wɔn yerenom ne wɔn mma ayayade no asua sɛ wɔbɛda ayamye adi na wɔayɛ wɔn brɛbrɛ.

2. Dɛn na ɛwɔ Kristofo abusua asetra mu?

² Nneɛma pii wɔ Kristofo abusua asetra mu, ebi ne sɛnea yebu aware a ɛbɛtra hɔ daa, nea yɛyɛ de di yɛn abusua mu asɛyɛde ahorow ho dwuma, ne sɛnea yɛne yɛn abusua mufo di nsɛm. (Efesofo 5:​33–6:4) Bere a ebia yenim nea Bible ka fa abusua asetra ho no, Bible afotu a yɛde bedi dwuma no yɛ ade foforo koraa. Yɛn mu biara nni hɔ a ɔpɛ sɛ ɔyɛ sɛ wɔn a Yesu kasa tiaa wɔn sɛ wobu Onyankopɔn mmara so no. Wodii mfomso susuwii sɛ nyamesom mu ahofama ara dɔɔso. (Mateo 15:​4-9) Yɛmpɛ sɛ yɛbɛyɛ sɛ nnipa a wɔwɔ nyamesom mu ahofama bi nanso wɔmfa nni dwuma wɔ wɔn ankasa fie no. Mmom no, yɛpɛ sɛ yɛda nokware nyamesom pa a ɛyɛ “ahonya kɛse” no adi.​—1 Timoteo 5:​4; 6:6; 2 Timoteo 3:5.

 Aware no Bɛtra Hɔ Bere Tenten Bɛn?

3. (a) Dɛn na ɛreba aware pii mu, nanso dɛn na ɛsɛ sɛ yesi yɛn bo sɛ yɛbɛyɛ? (b) Fa wo Bible bua nsɛmmisa a wɔahyehyɛ wɔ nkyekyɛm yi ase no.

³ Ɛreda adi sɛ aware nhyehyɛe no resɛe ntɛmntɛm bere nyinaa. Awarefo binom a wɔabom atra ase mfirihyia pii no si gyinae gyae aware na wɔkɔware obi foforo. Afei nso, ɛnyɛ nea yɛntaa nte sɛ awarefo a wɔyɛ mmabun atetew wɔn aware mu wɔ wɔn aware no akyi bere tiaa bi. Ɛmfa ho nea afoforo yɛ no, ɛsɛ sɛ yenya ɔpɛ sɛ yɛbɛsɔ Yehowa ani. Enti ma yensusuw nsɛmmisa ne kyerɛw nsɛm a edidi so yi ho nhwɛ nea Onyankopɔn Asɛm ka wɔ aware a ɛsɛ sɛ ɛtra hɔ daa no ho.

Bere a ɔbarima ne ɔbea bi aware no, ɛsɛ sɛ wɔhwɛ kwan sɛ wɔbɛbom atra ase bere tenten bɛn? (Marko 10:​6-9; Romafo 7:​2, 3)

Dɛn so nkutoo na wogyina gu aware tumi ware bio ma ɛfata wɔ Onyankopɔn anim? (Mateo 5:​31, 32; 19:​3-9)

Yehowa te nka dɛn wɔ awaregu ahorow a N’asɛm mma ho kwan no ho? (Malaki 2:​13-16)

So Bible no kamfo ntetewmu kyerɛ sɛ ɔkwan a ɛsɛ sɛ wɔfa so di aware mu haw ho dwuma? (1 Korintofo 7:​10-13)

Tebea horow bɛn mu na ntetewmu betumi ayɛ nea ɛho hia? (Dwom 11:5; Luka 4:8; 1 Timoteo 5:8)

4. Dɛn nti na aware ahorow bi tumi gyina?

⁴ Aware ahorow bi gyina na ɛtra hɔ daa. Dɛn ntia? Twɛn a nnipa baanu no nyinaa bɛtwɛn akosi sɛ wobenyin ansa na wɔaware no yɛ ade a ɛho hia, nanso obi  hokafo a ɔne no ani begye ade koro ho na obetumi ne no asusuw nsɛm ho pefee a obenya nso ho hia. Nanso nea ɛho hia kɛse koraa ne ɔhokafo a ɔdɔ Yehowa na ɔwɔ obu ma N’asɛm sɛ nea wogyina so siesie nsɛm a obi benya. (Dwom 119:​97, 104; 2 Timoteo 3:​16, 17) Obi a ɔte saa rennya su a ɛne sɛ sɛ aware no anyɛ yiye a obetumi atetew mu anaasɛ wagu no bere biara. Ɔremfa ne hokafo no sintɔ ahorow nyi ne ho ano sɛnea ɛbɛyɛ a ɔrenni n’ankasa asɛyɛde ahorow ho dwuma. Mmom no, obesua sɛnea wogyina ɔhaw ahorow ano na wahwehwɛ ano aduru a eye.

5. (a) Ɔkwan bɛn so na nokware a wodi ma Yehowa ho asɛm wɔ aware mu? (b) Sɛ wohyia ɔsɔretia mpo a, mfaso bɛn na wobetumi anya afi Yehowa gyinapɛn ahorow a wobekura mu no mu?

⁵ Satan kyerɛ sɛ sɛ yehu amane a yebegyae Yehowa akwan so nantew. (Hiob 2:​4, 5; Mmebusɛm 27:​11) Nanso Yehowa Adansefo a wɔahyia ɔtaa afi wɔn ahokafo a wonnye nni hɔ no mu fã kɛse no ara nguu wɔn aware no. Wɔkɔ so di nokware ma Yehowa ne ne mmara ahorow. (Mateo 5:​37) Ebinom a wɔamia wɔn ani agyina mu no anya anigye a ɛne sɛ wɔn ahokafo abɛka wɔn ho wɔ Yehowa som mu​—bere mpo a wɔasɔre atia wɔn mfirihyia pii akyi no! (1 Petro 3:​1, 2) Wɔ Kristofo a wɔn ahokafo nyɛ biribi a ɛkyerɛ sɛ wɔbɛsakra anaasɛ wɔn ahokafo agyaw wɔn hɔ esiane sɛ wɔsom Yehowa nti no fam no, wɔn nso nim sɛ wobehyira wɔn wɔ nyamesom pa a wɔakura mu wɔ fie no ho.​—Dwom 55:​22; 145:16.

Bere a Obiara Yɛ Ne Fam De

6. Sɛ aware bi bɛyɛ yiye a, nhyehyɛe bɛn na ɛsɛ sɛ wɔkyerɛ obu ma?

⁶ Nokwarem no, anigye a aware bɛyɛ no hwehwɛ pii  sen tra a wɔbɛkɔ so atra ara kwa. Ade a ɛho hia titiriw wɔ awarefo no mu biara fam ne obu a wobenya ama Yehowa nhyehyɛe a ɛfa tiyɛ ho no. Eyi boa ma nneɛma kɔ so pɛpɛɛpɛ na wonya abotɔyam wɔ fie hɔ. Yɛkenkan wɔ 1 Korintofo 11:3 sɛ: “Ɔbarima biara ti ne Kristo, na ɔbea ti ne ɔbarima, na Kristo ti ne Nyankopɔn.”

7. Ɛsɛ sɛ wodi abusua mu tiyɛ ho dwuma dɛn?

⁷ Wohyɛɛ nea wodii kan bɔɔ din wɔ saa nkyekyɛm no mu no nsow? Yiw, ɔbarima biara wɔ Ti, Kristo, a ɛsɛ sɛ ɔbrɛ ne ho ase hyɛ n’ase. Eyi kyerɛ sɛ ɛsɛ sɛ okunu di tiyɛ no wɔ ɔkwan bi so a ɛbɛda Yesu su ahorow adi. Yesu brɛ ne ho ase ma Yehowa, ɔdɔ asafo no yiye, na ɔhwɛ so. (1 Timoteo 3:​15) Ɔde “ne ho mae maa no” mpo. Yesu nyɛ obi a ɔyɛ ahantan na onsusuw afoforo ho, na mmom ‘odwo na ɔbrɛ ne ho ase koma mu.’ Wɔn a wɔba ne tiyɛ ase no ‘nya ɔhome ma wɔn kra.’ Sɛ okunu ne n’abusuafo di wɔ saa kwan yi so a, ɔda no adi sɛ ɔrebrɛ ne ho ase ahyɛ Kristo ase. Sɛ ɛba saa a ɛsɛ sɛ ɔyere Kristoni tumi nya mfaso ne abotɔyam, na ɔne ne kunu yɛ biako na ɔbrɛ ne ho ase hyɛ ne tiyɛ ase.​—Efesofo 5:​25-33; Mateo 11:​28, 29; Mmebusɛm 31:​10, 28.

8. (a) Dɛn nti na ebetumi ayɛ sɛ nea nneɛma pa mfi akwan a Kristofo fa so di nneɛma ho dwuma mu mma wɔ afie bi mu? (b) Sɛ yehyia tebea a ɛte saa a, dɛn na ɛsɛ sɛ yɛyɛ?

⁸ Nanso nsɛnnennen bɛsɔre. Ebia na akwankyerɛ a wɔde ma ho abufuw kɛse ase atim wɔ ebinom mu yiye dedaw ansa na obi a ɔwɔ abusua no mu fii ase de Bible nnyinasosɛm ahorow dii dwuma. Ebia ɛte sɛ nea nneɛma pa mfi ayamye mu a wofi bisa ade ne ɔdɔ a wɔda no adi no mu mma. Yenim sɛ Bible no ka sɛ yenyi “bo bɔne ne abufuw ne ano kurokuro ne abususɛm” mfi yɛn mu.  (Efesofo 4:​31) Nanso sɛ ɛte sɛ nea ebinom nte biribi foforo biara ase a, dɛn na ɛsɛ sɛ yɛyɛ? Wiɛ, Yesu ansuasua wɔn a na wɔyɛ ahunahuna na wɔyeyaw afoforo no, na mmom ɔde ne ho too N’agya so. (1 Petro 2:​22, 23) Saa ara nso na sɛ nsɛm tebea horow a emu yɛ den sɔre wɔ fie hɔ a, ɛsɛ sɛ yɛda no adi sɛ yɛwɔ nyamesom pa denam Yehowa mpae a yɛbɛbɔ ahwehwɛ ne mmoa so sen sɛ yɛbɛfa wiase no akwan so.​—Mmebusɛm 3:​5-7.

9. Sɛ́ anka okununom a wɔyɛ Kristofo pii bɛhwehwɛ mfomso mmom no, dɛn na wɔasua sɛ wɔbɛyɛ?

⁹ Nsakrae ntaa mma ntɛmntɛm bere nyinaa, nanso sɛ wɔde Bible afotu di dwuma wɔ boasetɔ ne nsiyɛ mu a, ɛyɛ adwuma ankasa. Okununom pii ahu sɛ wɔn aware fii ase yɛɛ yiye bere a wobehuu sɛnea Kristo ne asafo no di no. Nnipa a wɔnyɛ pɛ na wɔwɔ asafo no mu. Nanso Yesu dɔ asafo no, na ɔyɛ nhwɛso pa ma no, na ɔde Kyerɛwnsɛm no di dwuma de boa ma enya nkɔso. Ɔde ne nkwa mae maa asafo no. (1 Petro 2:​21) Ne nhwɛso no ahyɛ  okununom a wɔyɛ Kristofo pii nkuran ma wɔayɛ nhwɛso pa na wɔn ankasa fi ɔdɔ mu de mmoa ama ma nkɔso aba. Nneɛma pa fi ɔkwan a ɛte saa a wɔfa so no mu ba sen afoforo ho mfomso a wɔhwehwɛ ne pɛ a wɔmpɛ sɛ wɔkasa no.

10. (a) Akwan bɛn so na okunu anaa ɔyere​—nea ɔkyerɛ sɛ ɔyɛ Kristoni mpo​—betumi ama asetra ayɛ den ama afoforo wɔ fie? (b) Dɛn na wobetumi ayɛ ma tebea no ayɛ yiye?

¹⁰ Na sɛ okunu mma n’abusua no nkate mu ahiade ho asɛm nhia no anaasɛ onni anim wɔ nneɛma mu nyɛ nhyehyɛe mma abusua no Bible mu nkɔmmɔbɔ ne dwumadi afoforo nso ɛ? Anaasɛ sɛ ɔyere no mmoa na omfi nyamesuro mu mmrɛ ne ho ase nso ɛ? Ebinom nam obu mu a wofi susuw abusua mu nsɛnnennen ho so nya nneɛma pa. (Genesis 21:​10-12; Mmebusɛm 15:​22) Nanso sɛ nea efi mu ba no nyɛ nea na wɔhwɛ kwan mpo a, yɛn mu biara betumi aboa ma tebea a ɛwɔ fie hɔ no ayɛ yiye denam Onyankopɔn honhom aba a yɛbɛsow wɔ asetram, na yɛafi ɔdɔ mu asusuw abusua no mufo a aka no ho so. (Galatifo 5:​22, 23) Ɛnyɛ twɛn a yɛbɛtwɛn ma ɔfoforo no ayɛ biribi so na nkɔso nam bɛba, na mmom yɛn ankasa fam de a yɛbɛyɛ, na yɛnam saayɛ so akyerɛ sɛ yɛn ankasa de onyamesom pa di dwuma no so.​—Kolosefo 3:​18-21.

Faako a Yebenya Mmuae Ahorow

11, 12. Dɛn na Yehowa ayɛ na aboa yɛn ma yɛn abusua asetra ayɛ yiye?

¹¹ Mmeae ahorow pii wɔ hɔ a nkurɔfo dan kɔ kɔhwehwɛ wɔn abusua mu nsɛm ho afotu. Nanso yenim sɛ Onyankopɔn Asɛm kura afotu a eye sen biara, na yɛda Onyankopɔn ase sɛ ɔnam n’ahyehyɛde a aniwa hu no so boa yɛn ma yɛde di dwuma. So worenya saa  mmoa no so mfaso akosi ase?​—Dwom 119:​129, 130; Mika 4:2.

¹² Nea ɛka asafo nhyiam ahorow a mokɔ ho no, so mowɔ bere a moayi asi hɔ ama abusua Bible adesua? Mmusua a wɔyɛ eyi no betumi ayɛ biako wɔ wɔn som mu. Wɔn abusua asetra nya nkɔso bere a wɔde Onyankopɔn Asɛm di dwuma wɔ wɔn ankasa nsɛm tebea mu no.​—Deuteronomium 11:​18-21.

13. (a) Sɛ yɛwɔ nsɛmmisa bi a ɛfa abusua mu nsɛm ho a, ɛhe na yebetumi anya mmoa a ɛho hia no? (b) Dɛn na ɛsɛ sɛ ɛda adi wɔ gyinae ahorow a yesi no nyinaa mu?

 ¹³ Ebia wowɔ nsɛmmisa a ɛfa abusua asetra ho. Sɛ nhwɛso no, awo ano a wobesiw nso ɛ? So nyinsɛn a wɔsɛe no yɛ nea asɛm biara nni ho ɔkwan bi so? Sɛ abofra bi nkyerɛ honhom fam nneɛma ho anigye kɛse a, ɛsɛ sɛ ɔne abusua no nya ɔsom mu kyɛfa kodu he? Wɔasusuw nsɛmmisa a ɛte saa pii ho wɔ nhoma ahorow a Yehowa Adansefo atintim mu. Sua sɛnea wode nhoma ahorow a wɔde sua Bible, a index ahorow ka ho, bedi dwuma de ahu mmuae no. Sɛ wunni nhoma a index bi twe adwene kɔ so no bi a, kɔ Ahenni Asa so nhomakorabea hɔ. Anaasɛ wubetumi anya saa nhoma ahorow yi wɔ wo kɔmputa so. Wubetumi nso ne Kristofo mmarima ne mmea a wɔn ho akokwaw asusuw wo nsɛmmisa ho. Nanso nhwɛ kwan sɛ wubenya nsɛmmisa biara ho mmuae a ɛyɛ yiw anaa dabi bere nyinaa. Mpɛn pii na ɛsɛ sɛ musi gyinae sɛ ankorankoro anaasɛ awarefo. Afei si gyinae ahorow a ɛda adi sɛ ɛnyɛ baguam nko na wode onyamesom pa di dwuma na mmom wɔ fie nso.​—Romafo 14:19; Efesofo 5:10.

Asɛm no mu Ntĩmu

• Ɔkwan bɛn so na nokware a yebedi ama Yehowa ho asɛm wɔ nokware a obi bedi ama n’aware mu hokafo mu?

• Sɛ abusua mu haw ahorow hyɛ yɛn so a, dɛn na ɛbɛboa yɛn ma yɛayɛ nea ɛsɔ Onyankopɔn ani?

• Sɛ abusua no mufo afoforo tɔ sin mpo a, dɛn na yebetumi ayɛ na ama tebea no ayɛ yiye?

[Adesua no ho Nsɛmmisa]

[Kratafa 155 mfonini]

Ɛsɛ sɛ okunu tiyɛ da Yesu su ahorow adi

[Kratafa 157 mfonini]

Abusua Bible adesua a wɔyɛ no daa boa ma wɔyɛ biako