Kɔ So Ka Onyankopɔn Asɛm no Akokoduru So
Ti Dunkron
Kɔ So Ka Onyankopɔn Asɛm no Akokoduru So
1. (a) Asɛmpa bɛn na Yesu asuafo no bɔɔ no dawuru, nanso Yudafo no bi yɛɛ wɔn ade dɛn wɔ ho? (b) Nsɛm bɛn na yebetumi abisa?
BƐYƐ mfirihyia 2,000 a atwam ni no, wɔsraa Onyankopɔn Ba, Yesu Kristo, sɛ Ɔhene a obedi asase nyinaa so daakye. Nyamesom mu atamfo yɛ maa wokum Yesu, nanso Yehowa nyanee no fii awufo mu. Ɛdenam Yesu so no, yebetumi anya daa nkwa . Nanso, bere a Yesu asuafo kaa asɛmpa yi wɔ baguam no, wohyiaa ɔtaa. Wɔde wɔn mu bi guu afiase, hwee wɔn baraa wɔn mpo sɛ wɔnnka Yesu ho asɛm. (Asomafo no Nnwuma 4:1-3, 17; 5:17, 18, 40) Dɛn na na wɔbɛyɛ? Dɛn na anka wobɛyɛ? So anka wobɛkɔ so adi adanse akokoduru so?
2. (a) Asɛm a ɛyɛ anigye bɛn na ɛsɛ sɛ yɛbɔ no dawuru nnɛ? (b) Henanom na ɛyɛ wɔn asɛyɛde sɛ wɔka asɛmpa no?
2 Wɔ afe 1914 mu no, wɔde Onyankopɔn Ahenni so Hene, Yesu Kristo sii agua so wɔ soro sɛ ‘onni hene wɔ n’atamfo mfinimfini.’ (Dwom 110:2) Afei, wɔtoo Satan ne n’adaemone guu asase so. (Adiyisɛm 12:1-5, 7-12) Mprempren nhyehyɛe bɔne yi awiei afi ase. Sɛ saa bere yi ba awiei a, Onyankopɔn bebubu Satan nneɛma nhyehyɛe no nyinaa afi hɔ. (Daniel 2:44; Mateo 24:21) Wɔn a wobenya wɔn ti adidi mu no benya anidaso sɛ wobetumi atra ase daa wɔ asase a ɛbɛdan paradise so. Sɛ woagye saa asɛmpa yi atom a, wobɛpɛ sɛ woka ho asɛm kyerɛ afoforo. (Mateo 24:14) Nanso dɛn na wubetumi ahwɛ kwan sɛ nkurɔfo bɛyɛ wɔn ade wɔ ho?
3. (a) Nkurɔfo yɛ wɔn ade dɛn wɔ Ahenni ho asɛm no ho? (b) Asɛmmisa bɛn na ɛsɛ sɛ yesusuw ho?
3 Sɛ woka Ahenni ho asɛmpa no a, nnipa bi begye atom, nanso dodow no ara bɛyɛ anibiannaso. (Mateo 24:37-39) Ebinom betumi adi wo ho fɛw anaasɛ wɔbɛsɔre atia wo. Yesu bɔɔ kɔkɔ sɛ ɔsɔretia no betumi afi w’ankasa abusuafo hɔ. (Luka 21:16-19) Wubetumi ahyia wɔ w’adwumam anaa sukuu mu nso. Wɔ wiase afã bi no, nniso ahorow abara Yehowa Adansefo. Sɛ wuhyia tebea horow a ɛtete saa a, so wobɛkɔ so aka Onyankopɔn asɛm no akokoduru so, na ‘woagyina gyidi mu pintinn’?—1 Korintofo 16:13.
Yɛmmfa Yɛn Ho Nnto Yɛn Ankasa Ahoɔden So
4. (a) Sɛ yɛbɛda yɛn ho adi sɛ yɛyɛ Onyankopɔn asomfo anokwafo a, dɛn titiriw na wɔhwehwɛ fi yɛn hɔ? (b) Dɛn nti na Kristofo nhyiam ahorow ho hia kɛse?
4 Ade a ɛbɛma woayɛ Yehowa somfo nokwafo titiriw ne ne nsiesiei so a wode wo ho bɛto. Eyinom mu biako ne asafo nhyiam ahorow. Kyerɛwnsɛm no hyɛ yɛn nkuran sɛ yemmmu yɛn ani nngu so. (Hebrifo 10:23-25) Wɔn a wɔakɔ so ayɛ Yehowa Adansefo anokwafo no ayere wɔn ho ne wɔn mfɛfo asomfo akɔ asafo nhyiam horow daa. Kyerɛwnsɛm no mu nimdeɛ a yɛwɔ no nya nkɔanim wɔ asafo nhyiam horow yi ase. Afei nso, ɛma yɛte nokware ahorow a yenim dedaw no ase kɛse, na yehu akwan a yɛbɛfa so de adi dwuma no yiye. Ɛtwe yɛn bɛn yɛn nuanom Kristofo kɛse wɔ ɔsom mu biakoyɛ mu na ɛhyɛ yɛn den ma yɛyɛ Onyankopɔn apɛde. Yehowa honhom nam asafo no so de akwankyerɛ ma, na ɛnam saa honhom no so na Yesu wɔ yɛn mfinimfini.—Mateo 18:20; Adiyisɛm 3:6.
5. Sɛ wɔbara Yehowa Adansefo a, wɔyɛ dɛn wɔ asafo nhyiam ahorow ho?
5 So wokɔ asafo nhyiam horow no nyinaa daa, na w’ankasa wode nea wote wɔ hɔ no di dwuma? Sɛ wɔbara Yehowa Adansefo a, ɛtɔ mmere bi a ɛho behia sɛ wɔyɛ asafo nhyiam ahorow wɔ akuw nketewa mu wɔ afie mu. Mmeae ne mmere horow no bɛsakra na ebia ɛnyɛ mmere nyinaa na ɛbɛyɛ mmerɛw esiane sɛ wɔbɛyɛ asafo nhyiam ahorow bi ɔdasum nti. Nanso wɔ mmerɛw a ɛnyɛ mma wɔn anaa asiane a ɛwom nyinaa akyi no, anuanom mmarima ne mmea anokwafo bɔ mmɔden kɛse sɛ wɔbɛkɔ nhyiam no mu biara bi.
6. Ɔkwan bɛn so na yɛda no adi sɛ yɛde yɛn ho to Yehowa so, na ɔkwan bɛn so na eyi betumi aboa yɛn ma yɛakasa akokoduru so?
6 Yɛnam Yehowa nkyɛn a yɛdan kɔ daa wɔ mpaebɔ mu no so tumi de yɛn ho to no so, na yehu sɛ yehia Onyankopɔn mmoa. So woyɛ saa? Yesu bɔɔ mpae mpɛn pii wɔ n’asase so som adwuma no mu. (Luka 3:21; 6:12, 13; 22:39-44) Na anadwo ansa na wɔrebɔ no asɛndua mu no, ɔhyɛɛ n’asuafo no nkuran sɛ: “Monwɛn na mommɔ mpae, na moankɔ sɔhwɛ mu.” (Marko 14:38) Sɛ yehyia Ahenni nkrasɛm no ho anibiannaso pii a, ebia ebetumi aka yɛn ma yɛagow yɛn som adwuma no mu. Sɛ nkurɔfo di yɛn ho fɛw anaasɛ wɔtaa yɛn a, ebia yɛbɛte nka sɛ ɛsɛ sɛ yemmua yɛn ano na wɔanhaw yɛn. Nanso sɛ yefi komam bɔ mpae srɛ Onyankopɔn honhom sɛ ɛmmoa yɛn mma yɛmfa akokoduru nkasa a, ɛbɛbɔ yɛn ho ban afi gyae a yebegyae mu ama saa sɔhwɛ ahorow no ho.—Luka 11:13; Efesofo 6:18-20.
Adanse a Wodi no Akokoduru So Ho Kyerɛwtohɔ
7. (a) Dɛn nti na yɛn ani gye kyerɛwtohɔ a ɛwɔ Asomafo no Nnwuma no mu no ho titiriw? (b) Bua nsɛmmisa a ɛwɔ nkyekyɛm yi awiei no, na si sɛnea nsɛm no ho betumi aba yɛn mfaso no so dua.
7 Yɛn nyinaa ani gye kyerɛwtohɔ a ɛwɔ Asomafo no Nnwuma no mu no ho titiriw. Ɛka sɛnea asomafo no ne tete asuafo afoforo—nnipa a wɔwɔ nkate te sɛ yɛn ara—no dii akwanside ahorow so na wɔdaa wɔn ho adi sɛ wɔyɛ Yehowa adansefo anokwafo a wɔwɔ akokoduru ho asɛm. Momma yɛmfa nsɛmmisa ne kyerɛw nsɛm a wɔabobɔ din a edidi so no mpɛɛpɛe saa kyerɛwtohɔ no fã bi mu. Bere a yɛyɛ saa no, susuw sɛnea w’ankasa wubetumi anya mfaso afi nea worekenkan no mu no ho.
So na asomafo no yɛ nhomanimfo akɛse? So na wɔyɛ nnipa a wɔyɛ akokodurufo fi awo mu a nea na ɛbɛba wɔn so biara mfa ho? (Yohane 18:17, 25-27; 20:19; Asomafo no Nnwuma 4:13)
Dɛn na ɛmaa Petro tumi kasae akokoduru so wɔ Yudafo asɛnnibea a na abu Onyankopɔn ankasa Ba no fɔ no anim? (Mateo 10:19, 20; Asomafo no Nnwuma 4:8)
Ná dɛn na Asomafo no reyɛ wɔ adapɛn a na edi bere a wɔde wɔn baa Sanhedrin no anim no mu? (Asomafo no Nnwuma 1:14; 2:1, 42)
Bere a sodifo no baraa wɔn sɛ wɔnnka asɛm wɔ Yesu din mu no, mmuae bɛn na Petro ne Yohane mae? (Asomafo no Nnwuma 4:19, 20)
Wogyaee asomafo no akyi no, hena nkyɛn na wɔhwehwɛɛ mmoa bio? So wɔbɔɔ mpae sɛ ɔtaa no nnyae, anaasɛ dɛn? (Asomafo no Nnwuma 4:24-31)
Bere a ataafo bɔɔ mmɔden sɛ wɔbɛma wɔagyae asɛnka adwuma no, ɔkwan bɛn so na Yehowa de mmoa mae? (Asomafo no Nnwuma 5:17-20)
Ɔkwan bɛn so na asomafo no kyerɛe sɛ na wɔte nea enti a wɔagye wɔn no ase? (Asomafo no Nnwuma 5:21, 41, 42)
Bere a asuafo no bebree hwetee esiane ɔtaa no ano a na ayɛ den nti no, dɛn na wɔkɔɔ so yɛe? (Asomafo no Nnwuma 8:3, 4; 11:19-21)
8. Anigyesɛm bɛn na efii tete asuafo no som adwuma mu bae, na ɔkwan bɛn so na abɛfa yɛn ho?
8 Asɛmpaka adwuma a wɔyɛe no anyɛ ɔkwa. Wɔbɔɔ asuafo bɛyɛ 3,000 asu wɔ Pentekoste 33 Y.B. mu. “Na wɔde nnipa a wogye dii no, mmarima ne mmea bebree, toatoa so bɛkaa Awurade ho.” (Asomafo no Nnwuma 2:41; 4:4; 5:14) Bere bi akyi no, ɔtaafo a ɔyɛ den a ɔtaa Onyankopɔn nkurɔfo, Saulo, a ofi Tarso mpo bɛyɛɛ Kristoni, na ofii ase de akokoduru dii nokware no ho adanse. Wɔbɛfrɛɛ no ɔsomafo Paulo. (Galatifo 1:22-24) Adwuma a efii ase wɔ afeha a edi kan no mu no mmaa awiei. Emu ayɛ den wɔ nna a edi akyiri yi mu na adu asase so mmaa nyinaa. Yɛanya hokwan sɛ yebenya mu kyɛfa na bere a yɛyɛ saa no, yebetumi asua biribi afi nhwɛso a adansefo anokwafo a wodii kan somee no yɛe no mu.
9. (a) Hokwan ahorow bɛn na Paulo de dii adanse? (b) Akwan bɛn so na woka Ahenni ho asɛm no kyerɛ afoforo?
9 Bere a Paulo huu nokware a ɛfa Yesu Kristo ho no, dɛn na ɔyɛe? “Ntɛm ara na ɔkaa Yesu ho asɛm . . . sɛ ɔne Nyankopɔn ba.” (Asomafo no Nnwuma 9:20) N’ani sɔɔ Onyankopɔn dom a ɛnsɛ no no, na ohui sɛ asɛmpa a wate no hia obiara. Ná Paulo yɛ Yudani, na sɛnea na amanne te saa bere no, ɔkɔɔ hyia adan mu kodii adanse. Ɔkaa asɛm afie afie nso, na ɔne nkurɔfo susuw nsɛm ho wɔ gua so. Na na ɔwɔ ɔpɛ sɛ ɔbɛkɔ nsasesin foforo mu akɔka asɛmpa no.—Asomafo no Nnwuma 17:17; 20:20; Romafo 15:23, 24.
10. (a) Ɔkwan bɛn so na Paulo kyerɛe sɛ bere a ɔwɔ akokoduru no, na ɔwɔ nhumu nso wɔ ɔkwan a ɔfaa so dii adanse no mu? (b) Ɔkwan bɛn so na yebetumi ada Paulo su no bi adi bere a yedi abusuafo, mfɛfo adwumayɛfo, anaa sukuufo adanse no?
10 Ná Paulo wɔ akokoduru, na na ɔwɔ nhumu nso, na saa na ɛsɛ sɛ yɛyɛ. Ogyinaa bɔhyɛ ahorow a Onyankopɔn de maa Yudafo no agyanom no so kanyan wɔn nkate ahorow. Ogyinaa nneɛma a na Helafo nim so kasa kyerɛɛ wɔn. Ɛtɔ bere bi a ɔde n’ankasa suahu a ɔwɔ wɔ nokware no a ohui no mu no di dwuma sɛ biribi a ɔnam so di adanse. Ɔkae sɛ: “Eyi nyinaa asɛmpa no nti na meyɛ, na manya emu kyɛfa.”—1 Korintofo 9:20-23; Asomafo no Nnwuma 22:3-21.
11. (a) Dɛn na Paulo yɛe de kwatii sɛ ɔne asɔretiafo benya akasakasa mpɛn pii? (b) Bere bɛn na ɛbɛyɛ nea nyansa wom sɛ yesuasua Paulo nhwɛso no, na wɔ ɔkwan bɛn so? (d) Ɛhe na tumi a yɛde bɛkɔ so akasa akokoduru so no fi ba?
11 Bere a ɔsɔretia ma ɛbɛdaa adi sɛ ɛbɛyɛ papa sɛ Paulo kɔka asɛm no wɔ baabi foforo anaasɛ otu kɔ asasesin foforo mu wɔ bere bi mu no, ɔyɛɛ eyi mmom sen sɛ ɔne nokware no ho atamfo bɛkɔ so adi asi. (Asomafo no Nnwuma 14:5-7; 18:5-7; Romafo 12:18) Nanso n’ani anwu asɛmpa no ho da. (Romafo 1:16) Ɛwom sɛ Paulo ani annye asɔretiafo no anuɔdensɛm—basabasayɛ mpo—no ho de, nanso “ɔyɛɛ nnam yɛn Nyankopɔn mu” ma ɔkɔɔ so kaa asɛm no. Ɔkae sɛ: “Awurade gyinaa m’akyi na ɔhyɛɛ me den na wafa me so awie asɛnka no.” (1 Tesalonikafo 2:2; 2 Timoteo 4:17) Kristofo asafo no Ti, Yesu, kɔ so de ahoɔden a yehia na yɛde ayɛ adwuma a ɔkaa ho asɛm siei a ɛfa yɛn bere yi ho no ma.—Marko 13:10.
12. Dɛn na edi Kristofo akokoduru ho adanse, na dɛn so na egyina?
12 Yɛwɔ nea enti a ɛsɛ sɛ yɛkɔ so de akokoduru ka Onyankopɔn asɛm no sɛnea Yesu ne afeha a edi kan no mu Nyankopɔn asomfo anokwafo no yɛe no. Eyi nkyerɛ sɛ yɛbɛyɛ nnipa a yensusuw afoforo ho anaasɛ yɛbɔ mmɔden de asɛm no hyɛ wɔn a wɔn ani nnye ho no. Nanso, yɛmpa abaw esiane sɛ nkurɔfo ani nnye asɛm no ho nti; na saa ara na ɔsɔretia mma yemmua yɛn ano. Te sɛ Yesu no, yɛtwe adwene kɔ Onyankopɔn Ahenni so sɛ nniso a ɛfata sɛ edi asase nyinaa so. Yɛde ahotoso kasa efisɛ yegyina Yehowa, Amansan Hene no ananmu, na asɛm a yɛbɔ no dawuru no nyɛ yɛn de, na mmom efi ne hɔ. Na ade a ɛsɛ sɛ ɛhyɛ yɛn nkuran kɛse ma yeyi Yehowa ayɛ ne ɔdɔ a yɛwɔ ma no no.—Filipifo 1:27, 28; 1 Tesalonikafo 2:13.
Asɛm no mu Ntĩmu
• Dɛn nti na ɛho hia sɛ yɛka Ahenni ho asɛm no kyerɛ obiara a ebetumi ayɛ yiye, nanso dɛn na yebetumi ahwɛ kwan sɛ nkurɔfo bɛyɛ wɔn ade wɔ ho?
• Ɔkwan bɛn so na yebetumi akyerɛ sɛ yɛmmfa yɛn ho nnto yɛn ankasa ahoɔden so mmfa nsom Yehowa?
• Asuade a mfaso wɔ so bɛn na yenya fi Asomafo no Nnwuma nhoma no mu?
[Adesua no ho Nsɛmmisa]
[Kratafa 173 mfonini]
Te sɛ tete no, Yehowa asomfo de akokoduru ka Onyankopɔn asɛm nnɛ
