Kamfo Yehowa sɛ Nokware Nyankopɔn Koro No
Ti Abien
Kamfo Yehowa sɛ Nokware Nyankopɔn Koro No
1. Hena ne nokware Nyankopɔn koro no?
BIBLE no ka sɛ ɛwom sɛ wɔn a wobu wɔn sɛ wɔyɛ anyame no dɔɔso de, nanso “Onyankopɔn biako pɛ na yɛwɔ, Agya no.” (1 Korintofo 8:5, 6) Saa “Onyankopɔn biako” no ne Yehowa, nneɛma nyinaa Bɔfo no. (Deuteronomium 6:4; Adiyisɛm 4:11) Yesu frɛɛ no “me Nyankopɔn ne mo Nyankopɔn.” (Yohane 20:17) Ɔne Mose a na wadi kan aka nea edi so yi yɛɛ adwene: “[Yehowa, NW] ne Nyankopɔn a obi nni hɔ nka ne ho.” (Deuteronomium 4:35) Yehowa korɔn koraa sen ade biara a wɔsom, te sɛ ahoni, nnipa a wɔayɛ wɔn anyame, anaasɛ ne tamfo Satan Ɔbonsam, “wi yi ase nyame” no. (2 Korintofo 4:3, 4) Nea ɛne eyi nyinaa bɔ abira no, Yehowa ne ‘Nyankopɔn koro no,’ sɛnea Yesu frɛɛ no no.—Yohane 17:3.
2. Bere a yesua Onyankopɔn ho ade no, ɔkwan bɛn so na ɛsɛ sɛ ɛka yɛn asetra?
2 Nnipa a wɔn ani sɔ ade na wosua Onyankopɔn su horow a ɛka koma ne nea wayɛ ne nea ɔbɛyɛ ama yɛn ho ade no, bɛn no. Bere a ɔdɔ a wɔwɔ ma Yehowa no yɛ kɛse no, ɛkanyan wɔn ma wɔkamfo no. Ɔkwan bɛn so? Ɔkwan biako a wɔfa so yɛ saa ne sɛ wɔka ne ho asɛm kyerɛ afoforo. Romafo 10:10 ka sɛ: “Ano na wɔde pae mu ka kɔ nkwagye mu.” Ɔkwan foforo ne sɛ wosuasua ne kasa ne ne nneyɛe. Efesofo 5:1 ka sɛ: “Munsua Onyankopɔn sɛ mma adɔfo.” Nea ɛbɛyɛ na yɛatumi asuasua Yehowa yiye paa no, ɛsɛ sɛ yehu sɛnea ɔte ankasa.
3. Onyankopɔn su atitiriw no ne nea ɛwɔ he?
3 Nsɛm pii wɔ Bible mu a ɛma yehu Onyankopɔn su atitiriw no. Ne su atitiriw anan no ne nyansa, atɛntrenee, tumi, ne ɔdɔ. ‘Ɔno nkyɛn na nyansa wɔ.’ (Hiob 12:13) ‘N’akwan nyinaa yɛ trenee.’ (Deuteronomium 32:4) ‘Ɔyɛ den tumi mu.’ (Yesaia 40:26) ‘Onyankopɔn ne dɔ.’ (1 Yohane 4:8) Nanso, Onyankopɔn su atitiriw anan no mu nea ɛwɔ he na ɛyɛ titiriw paa, nea ɛma wohu Onyankopɔn kõ a ɔyɛ sen biara no?
“Onyankopɔn Ne Dɔ”
4. Onyankopɔn su ahorow no mu nea ɛwɔ he na ɛkanyan no ma ɔbɔɔ amansan no ne abɔde a ɛte ase nyinaa?
4 Susuw nea ɛkanyan Yehowa ma ɔbɔɔ amansan no ne ahonhom ne nnipa a wɔwɔ nyansa no ho hwɛ. So na ɛyɛ ne nyansa anaasɛ tumi? Dabi, ɛwom sɛ Onyankopɔn de eyinom dii dwuma de, nanso ɛnyɛ ɛno na ɛkanyan no. Na n’atɛntrenee anhwehwɛ sɛ ɔne afoforo kyɛ nkwa akyɛde no. Mmom no, Onyankopɔn dɔ kɛse no na ɛkanyan no ma ɔbɔɔ afoforo a wɔwɔ ne nyansa no bi. Ɔdɔ na ɛkanyan no ma ɔde yɛɛ n’atirimpɔw sɛ ɛsɛ sɛ adesamma asoɔmmerɛfo tra ase daa wɔ Paradise. (Genesis 1:28; 2:15) Ɔdɔ na ɛma ɔyɛɛ nhyehyɛe a ɔde beyi afobu a Adam mmarato ma ɛbaa adesamma so no afi hɔ.
5. Sɛnea Bible kyerɛ no, Yehowa yɛ su bɛn ho nhwɛso, na dɛn ntia?
5 Enti, wɔ Onyankopɔn su ahorow nyinaa mu no, nea ɛyɛ titiriw paa ne ne dɔ. Ɛyɛ ne su. Ɛwom sɛ ne nyansa, n’atɛntrenee, ne ne tumi ho hia de, nanso Bible no nka da sɛ Yehowa yɛ eyinom mu biara. Nanso ɛka sɛ ɔne dɔ. Yiw, Yehowa yɛ ɔdɔ ho nhwɛso. Nnyinasosɛm na ɛkyerɛ ɔdɔ yi kwan na ɛnyɛ nkate. Nokware ne trenee ho nnyinasosɛm na ɛkyerɛ Onyankopɔn dɔ kwan. Ɛne ɔdɔ a ɛkorɔn sen biara sɛnea Yehowa Nyankopɔn ankasa yɛ ho nhwɛso no. Ɔdɔ a ɛte saa no yɛ ayamye a edi mu a wɔda no adi na adanse a edi mu ka ho bere nyinaa.
6. Ɛwom sɛ Onyankopɔn korɔn sen yɛn de, nanso dɛn na ɛma yetumi suasua no?
6 Ɛyɛ su a ɛyɛ anigye yi na ɛma yetumi suasua Onyankopɔn a ɔte saa no. Sɛ́ nnipa a yɛba fam, yɛtɔ sin na yɛyɛ bɔne no, ebia yebesusuw sɛ yentumi nyɛ saa da. Nanso Yehowa dɔ kɛse no ho nhwɛso foforo da adi wɔ ha: Onim yɛn sintɔ na ɔnhwehwɛ pɛyɛ mfi yɛn hɔ. Onim sɛ mprempren de, yɛmmɛn pɛyɛ ho koraa. (Dwom 51:5) Ɛno nti na Dwom 130:3, 4 ka sɛ: “Yah, sɛ wudi amumɔyɛde akyi a, [Yehowa, NW], hena na anka obegyina? Na wo na fafiri wɔ wo fam.” Yiw, Yehowa yɛ “Onyankopɔn mmɔborohunufo ne ɔdomfoɔ, nea n’abodwo kyɛ na n’adɔeyɛ ne ne nokware dɔɔso pii.” (Exodus 34:6) “Wo, [Yehowa, NW] wuye, na wode firi.” (Dwom 86:5) Awerɛkyekyesɛm bɛn ara ni! Hwɛ abotɔyam a ɛyɛ sɛ yɛbɛsom Onyankopɔn nwonwafo yi na wafi ne dɔ ne mmɔborohunu mu ahwɛ yɛn!
7. Ɔkwan bɛn so na yebetumi ahu Yehowa dɔ wɔ n’adebɔ mu?
7 Yebetumi ahu Yehowa dɔ wɔ n’adebɔ mu nso. Susuw nneɛma pa pii a Yehowa de ama yɛn sɛnea ɛbɛma yɛn ani gye, te sɛ mmepɔw a ɛyɛ fɛ, kwae, atare, ne po ho hwɛ. Wama yɛn nnuan a egu ahorow pii a ɛyɛ yɛn dɛ na ɛwowaw yɛn. Afei Yehowa ayɛ nhwiren a ɛyɛ fɛ na ɛyɛ huam pii ne mmoa a wɔn ho yɛ anika nso. Ɔyɛɛ nneɛma a ɛbɛma nnipa anya anigye, ɛwom mpo sɛ na enhia sɛ ɔyɛ de. Nokwarem no, wiase bɔne yi mu tra wɔ yɛn mprempren tebea a ɛtɔ sin mu no mma yentumi nnya n’abɔde ho anigye nkosi ase. (Romafo 8:22) Nanso susuw nea Yehowa bɛyɛ ama yɛn wɔ Paradise no ho hwɛ! Odwontofo no ma yɛn awerɛhyem sɛ: “Wubue wo nsam, na woma ateasefo nyinaa nya nea [ɛfata a] wɔpɛ di mee.”—Dwom 145:16.
8. Ɔdɔ a Yehowa wɔ ma yɛn ho nhwɛso a ɛsen biara ne nea ɛwɔ he?
8 Dɛn ne Yehowa dɔ ma adesamma ho nhwɛso a ɛda nsow paa? Bible kyerɛkyerɛ mu sɛ: “Sɛnea Onyankopɔn dɔ wiase ni, sɛ ɔde ne ba a ɔwoo no koro no mae, na obiara a ogye no di no anyera, na wanya daa nkwa.” (Yohane 3:16) So na ɛyɛ onipa papayɛ nti na Yehowa yɛɛ eyi? Romafo 5:8 bua sɛ: “Onyankopɔn yi ne dɔ a ɔdɔ yɛn no kyerɛ, efisɛ yɛda so yɛ nnebɔneyɛfo no, Kristo wu maa yɛn.” Yiw, Onyankopɔn somaa ne Ba a ɔyɛ pɛ no baa asase so sɛ ɔmfa ne nkwa mmɛyɛ agyede afɔre mfa nnye yɛn mfi bɔne ne owu afobu mu. (Mateo 20:28) Eyi buee kwan maa nnipa a wɔdɔ Onyankopɔn sɛ wonnya daa nkwa. Enti, Onyankopɔn yi ne dɔ adi kyerɛ wɔn a wɔpɛ sɛ wɔyɛ n’apɛde nyinaa, efisɛ Bible no ka kyerɛ yɛn sɛ: “Onyankopɔn nhwɛ onipa anim, na mmom ɔman biara mu, nea osuro no na ɔyɛ ade trenee no, ɔpɛ no agye no.”—Asomafo no Nnwuma 10:34, 35.
9. Ɔkwan bɛn so na ɛsɛ sɛ nokwasɛm a ɛne sɛ Yehowa de ne Ba ama yɛn sɛ agyede no nya yɛn so nkɛntɛnso?
9 Ɔkwan bɛn so na ɛsɛ sɛ nokwasɛm a ɛyɛ sɛ Yehowa de ne Ba ama yɛn sɛ agyede ma abue daa nkwa ho kwan ama yɛn no ka sɛnea yɛde yɛn nkwa di dwuma nnɛ? Ɛsɛ sɛ ɛma ɔdɔ a yɛwɔ ma nokware Nyankopɔn Yehowa no yɛ kɛse. Bere koro no ara no, ɛsɛ sɛ ɛma yenya ɔpɛ sɛ yebetie Yesu a ogyina Onyankopɔn ananmu no. ‘Yesu wu maa wɔn nyinaa na wɔn a wɔte ase no antra ase amma wɔn ho bio, na mmom wɔatra ase ama nea owu maa wɔn no.’ (2 Korintofo 5:15) Hwɛ anigye ara a ɛyɛ sɛ yebedi Yesu anammɔn akyi, efisɛ ɔyɛɛ nhwɛso pa wɔ Yehowa dɔ ne n’ayamhyehye a osuasuae no mu! Eyi da adi wɔ nea Yesu ka kyerɛɛ ahobrɛasefo no mu sɛ: “Mo a moayɛ adwuma abrɛ na wɔasoa mo nnosoa nyinaa, mommra me nkyɛn, na mɛma moahome. Momfa me kɔndua nto mo ho so, na munsua me, sɛ midwo na mebrɛ me ho ase koma mu; na mubenya ɔhome ama mo kra. Na me kɔndua yɛ mmerɛw, na m’adesoa yɛ hare.”—Mateo 11:28-30.
Afoforo a Yɛbɛdɔ Wɔn
10. Akwan a yebetumi afa so adɔ yɛn mfɛfo Kristofo no bi ne nea ɛwɔ he?
10 Yɛbɛyɛ dɛn atumi akyerɛ sɛ yɛwɔ ɔdɔ a Yehowa ne Yesu wɔ ma yɛn no bi ma yɛn mfɛfo Kristofo? Hyɛ akwan pii a yebetumi afa so ayɛ eyi no nsow: “Ɔdɔ wɔ abodwokyɛre, ne yam ye; ɔdɔ nyɛ ahoɔyaw; ɔdɔ nyɛ ahoahoa, ɛnhoran, ɛnyɛ ne ho sɛnea ɛmfata, ɛnhwehwɛ nea ɛyɛ n’ankasa de, ne bo nhaw no, ɛmfa bɔne nhyɛ ne yam, n’ani nnye nea ɛnteɛ ho, na ɛne nokware ani gye. Etie ade nyinaa, egye ade nyinaa di, enya ade nyinaa mu anidaso, ɛtɔ ne bo ase ade nyinaa mu. Ɔdɔ to ntwa da.”—1 Korintofo 13:4-8; 1 Yohane 3:14-18; 4:7-12.
11. Henanom bio na ɛsɛ sɛ yɛdɔ wɔn, na ɔkwan bɛn so?
11 Henanom bio na ɛsɛ sɛ yɛdɔ wɔn, na ɔkwan bɛn so? Yesu kae sɛ: “Enti monkɔ nkɔyɛ amanaman nyinaa m’asuafo. Mommɔ wɔn asu nhyɛ Agya ne Ɔba ne Honhom Kronkron din mu, na monkyerɛkyerɛ wɔn sɛ wonni nea mahyɛ mo nyinaa so.” (Mateo 28:19, 20) Nea ɛka eyi ho ne Onyankopɔn paradise wiase foforo a ɛreba no ho asɛmpa a yɛbɛka akyerɛ wɔn a wonnya mmɛyɛɛ yɛn mfɛfo Kristofo no. Yesu kyerɛɛ pefee sɛ ɛnsɛ sɛ yɛdɔ wɔn a yɛne wɔn kura gyidi biako no nkutoo, efisɛ ɔkae sɛ: “Sɛ modɔ wɔn a wɔdɔ mo a, akatua bɛn na mowɔ? Towgyefo nso nyɛ saa ara? Na sɛ mukyia mo nuanom nko ara a, dɛn na moayɛ aboro so? Towgyefo nso nyɛ saa ara?”—Mateo 5:46, 47; 24:14; Galatifo 6:10.
‘Nantew Yehowa Din Mu’
12. Dɛn nti na Onyankopɔn nkutoo na yebetumi de ne din no afrɛ no?
12 Nokware Nyankopɔn no a yɛbɛkamfo no ho ade foforo a ɛho hia ne sɛ yebehu ne din soronko a ɛne Yehowa no, yɛde bedi dwuma, na yɛde akyerɛkyerɛ afoforo. Odwontofo no daa ɔpɛ a efi komam yi adi: “Na wonhu sɛ wo a wo din de [Yehowa, NW] no, wo nko ara ne ɔsorosoroni, asase nyinaa so.” (Dwom 83:18) Edin Yehowa no kyerɛ sɛ “Ɔma Ɛyɛ Hɔ.” Ɔne Atirimpɔw Wura a ɔma n’atirimpɔw ahorow nya mmamu. Na nokware Nyankopɔn no nkutoo na obetumi afa saa din no ma afata, efisɛ nnipa ntumi nhu ankasa sɛ wɔn mmɔdenbɔ renyɛ kwa. (Yakobo 4:13, 14) Yehowa nkutoo na obetumi aka sɛ n’asɛm “bɛyɛ” nea ɔkae no. (Yesaia 55:11) Nnipa pii ani gye bere a wohu Onyankopɔn din nea edi kan wɔ wɔn Bible mu ne nea ɛkyerɛ no. (Exodus 6:3) Nanso sɛ ‘wɔnantew Yehowa din mu de kosi daa’ nkutoo a, na wobenya nimdeɛ yi so mfaso.—Mika 4:5.
13. Dɛn na Yehowa din a yebehu ne ne din mu a yɛbɛnantew no kyerɛ?
13 Dwom 9:10 ka Onyankopɔn din ho asɛm sɛ: “Wɔn a wonim wo din de wɔn ho bɛto wo so.” Eyi kyerɛ pii sen edin Yehowa no a yebehu, a ɛno nkyerɛ sɛ yɛde yɛn ho bɛto no so kɛkɛ. Onyankopɔn din a yenim no kyerɛ sɛ yebehu Onyankopɔn ko a Yehowa yɛ, obu a yɛbɛkyerɛ ama ne tumi, ne mmara so a yebedi ne to a yɛde yɛn ho bɛto no so wɔ nneɛma nyinaa mu. (Mmebusɛm 3:5, 6) Saa ara nso na Yehowa din mu a yɛbɛnantew no kyerɛ sɛ yebehyira yɛn ho so ama no na yɛagyina n’ananmu sɛ n’asomfo no mu biako, na yɛde yɛn nkwa adi dwuma ankasa ma ɛne Onyankopɔn apɛde ahyia. (Luka 10:27) So woreyɛ saa?
14. Sɛ yɛbɛsom Yehowa daa a, dɛn na ɛho hia ka te a yɛbɛte nka sɛ asɛyɛde da yɛn so no ho?
14 Sɛ yɛbɛsom Yehowa daa a, ɛsɛ sɛ ɛyɛ biribi a ɛsen asɛyɛde a ɛda yɛn so na ɛkanyan yɛn. Ɔsomafo Paulo hyɛɛ Timoteo a na ɔde mfe pii asom Yehowa no nkuran sɛ: “Bɔ onyamesom pa ho mmɔden.” (1 Timoteo 4:7) Ɔsom fi koma a anisɔ a wɔwɔ ma obi a wɔresom no ayɛ no ma mu. “Onyamesom pa” da nidi kɛse a yɛwɔ ma Yehowa ankasa no adi. Yefi ɔdɔ mu de yɛn ho fam ne ho esiane obu a yɛwɔ ma ɔno ne n’akwan nti. Ɛma yenya ɔpɛ sɛ yɛbɛma obiara abu ne din kɛse. Sɛ yɛbɛnantew Yehowa, nokware Nyankopɔn no din mu daa a, ɛsɛ sɛ yɛda onyamesom pa adi wɔ yɛn asetra mu.—Dwom 37:4; 2 Petro 3:11.
15. Ɔkwan bɛn so na yebetumi de ɔsom a edi mu ama Onyankopɔn nkutoo?
15 Sɛ yɛbɛsom Onyankopɔn ma asɔ n’ani a, ɛsɛ sɛ yɛde ɔsom a edi mu ma no, efisɛ ɔyɛ “Onyankopɔn a ɔhwehwɛ ahofama a edi mu.” (Exodus 20:5, NW) Yɛrentumi nnɔ Onyankopɔn na bere koro no ara yɛnnɔ wiase bɔne a Satan ne ne nyame no. (Yakobo 4:4; 1 Yohane 2:15-17) Yehowa nim onipa ko a yɛn mu biara pɛ sɛ yɛyɛ. (Yeremia 17:10) Sɛ yɛdɔ trenee ampa a, ohu, na ɔbɛboa yɛn ma yɛagyina yɛn da biara da sɔhwɛ ahorow ano. Bere a ɔde ne honhom kronkron a ɛyɛ den no gyina yɛn akyi no, ɔbɛma yɛatumi adi bɔne a abu so wɔ wiase yi mu no so nkonim. (2 Korintofo 4:7) Ɔbɛboa yɛn nso ma yɛakura yɛn daa nkwa wɔ paradise asase so ho anidaso a ɛyɛ den no mu. Akwanhwɛ a ɛyɛ nwonwa bɛn ara ni! Ɛsɛ sɛ yɛkyerɛ ho anisɔ kɛse na yefi yɛn pɛ mu som nokware Nyankopɔn Yehowa a ɔma eyi tumi yɛ yiye no.
16. Dɛn na ɛsɛ sɛ wunya ɔpɛ sɛ wo ne nnipa foforo ɔpepem pii bɛyɛ?
16 Asase so nnipa ɔpepem pii de anigye agye nsa a odwontofo a ɔkyerɛw nea edi so yi to frɛ no atom: “Mo ne me nkamfo [Yehowa, NW] kɛseyɛ, na momma yɛmmom mma ne din so.” (Dwom 34:3) Yehowa to nsa frɛ wo sɛ bɛka nnipadɔm a wɔredɔɔso wɔ aman nyinaa mu a wɔreyɛ eyi no ho.
Asɛm no mu Ntĩmu
• Yehowa yɛ onipa bɛn? Ɔkwan bɛn so na yenya ne su horow a yɛte ase pefee no so mfaso?
• Ɔkwan bɛn so na yebetumi aboa nnipa foforo ma wɔasua nokware a ɛfa Onyankopɔn ho no?
• Dɛn na Yehowa a yenim no ne ne din mu a yɛnantew no kyerɛ?
[Adesua no ho Nsɛmmisa]
[Kratafa 14 mfonini ahorow]
Yehowa nam ne dɔ kɛse no so ‘bebue ne nsam na ama ateasefo nyinaa anya nea wɔpɛ’
