Ti Dubiako

‘Monkɔ So Nhwehwɛ Ahenni No Kan’

1. (a) Dɛn nti na Yesu hyɛɛ n’atiefo nkuran sɛ wɔnhwehwɛ Ahenni no kan? (b) Asɛm bɛn na ɛsɛ sɛ yebisa yɛn ho?

BƐBORO mfirihyia 1,900 ni, Yesu hyɛɛ n’atiefo nkuran wɔ ɔkasa bi a ɔmae wɔ Galilea mu no sɛ: “Monhwehwɛ Onyankopɔn ahenni ne ne trenee kan.” Na dɛn nti na na ɛsɛ sɛ wɔyɛ ade ntɛm so saa? So na bere a wɔde Ahenni tumi bɛma Kristo no nni akyiri mfehaha pii? Ɛte saa, nanso na Mesia Ahenni no ne nea Yehowa nam so bɛsan ne tumidi ho na wama n’atirimpɔw kɛse a ɛfa asase ho no abam. Obiara a ɔte hia a saa nneɛma no ho hia ase no de Ahenni no bedi kan wɔ n’asetra mu. Sɛ na ɛte saa wɔ afeha a edi kan no mu a, ɛnde hwɛ sɛnea ɛho hia kɛse koraa nnɛ, saa bere yi a wɔde Kristo asi agua so sɛ Ɔhene no! Enti asɛmmisa no ne sɛ, So m’asetra kwan kyerɛ sɛ merehwehwɛ Onyankopɔn Ahenni no kan?​—Mateo 6:​33.

2. Nneɛma bɛn na nnipa nyinaa di akyi kɛse?

² Nokwarem no, ɛnnɛ, nnipa ɔpepem pii a wɔwɔ wiase nyinaa rehwehwɛ Ahenni no kan. Wɔregyina Ahenni nniso no akyi denam Yehowa apɛdeyɛ a wɔde ayɛ wɔn asetram ade titiriw, bere a wɔahyira wɔn ho so ama no no so. Ɔkwan foforo so no, adesamma mu fã kɛse no ara ani gye wiase nneɛma akyidi ho. Nkurɔfo de anibere di sika, ahonyade, ne anigyede a wotumi de sika tɔ akyi. Anaasɛ wɔde wɔn ahoɔden nyinaa hyɛ nkɔso  a wobenya wɔ wɔn nnwuma mu no mu. Wɔn asetra kwan da no adi sɛ wɔn ankasa, honam fam nneɛma, ne anigyede na agye wɔn adwene. Sɛ wogye Onyankopɔn di koraa a, wɔma ɔto so abien wɔ wɔn asetra mu.—Mateo 6:31, 32.

3. (a) Ademude bɛn na Yesu hyɛɛ n’asuafo nkuran sɛ wɔnhwehwɛ, na dɛn ntia? (b) Dɛn nti na ɛho nhia sɛ yɛhaw yɛn ho pii wɔ honam fam nneɛma ho?

³ Nanso, Yesu de afotu yi maa n’asuafo no sɛ: “Monnhyehyɛ ademude asase so,” efisɛ ahonyade a ɛtete saa no ntra hɔ daa. Ɔkae sɛ: “Monhyehyɛ ademude ɔsoro,” denam Yehowa a mobɛsom no so. Yesu hyɛɛ n’akyidifo nkuran sɛ wɔmma wɔn aniwa ‘nhwɛ tẽẽ’ denam wɔn adwene ne wɔn ahoɔden a wɔde besi Onyankopɔn apɛdeyɛ so no so. Ɔka kyerɛɛ wɔn sɛ: “Morentumi nsom Onyankopɔn ne ahonyade.” Na honam fam ahiade​—aduan, ntama, ne dabere​— nso ɛ? Yesu tuu wɔn fo sɛ: “Munnnwinnwen.” Ɔtwee wɔn adwene sii nnomaa so—Onyankopɔn yɛn wɔn. Yesu hyɛɛ n’akyidifo nkuran sɛ wɔnhwɛ nhwiren​—Onyankopɔn fura wɔn ntama. So Yehowa asomfo a wɔyɛ nnipa a wonim nyansa no nsen eyinom mu biara anaa? Yesu kae sɛ: “Monhwehwɛ Onyankopɔn ahenni ne ne trenee kan; na wɔde eyinom [nneɛma a ɛho hia] nyinaa bɛka mo ho.” (Mateo 6:​19-34) So wo nneyɛe kyerɛ sɛ wugye di?

Mma Nneɛma Mmia Ahenni Nokware No

4. Sɛ obi de n’adwene si honam fam nneɛma so pii a, dɛn na ebetumi afi mu aba?

⁴ Eye sɛ obi bɛma sika a obenya de adi ɔno ne n’abusua honam fam ahiade ho dwuma ho asɛm ahia no. Nanso, sɛ obi ma honam fam nneɛma ho asɛm hia no dodo a, nea efi mu ba betumi ayɛ ɔhaw. Ɛwom sɛ ebia  ɔbɛkyerɛ sɛ ɔwɔ Ahenni no mu gyidi de, nanso wɔ ne komam no sɛ ɔde nneɛma foforo na edi kan a, ebemia Ahenni nokware no. (Mateo 13:​18-22) Sɛ nhwɛso no, bere bi aberante sodifo bi a ɔyɛ ɔdefo bisaa Yesu sɛ: “Dɛn na menyɛ na manya daa nkwa?” Na ɔbɔ bra pa yɛ afoforo yiye, nanso na ɔde ne ho ato ne honam fam nneɛma a ɔwɔ no so dodo. Ná ɔrentumi nnyaw saa nneɛma no na ɔmmɛyɛ Kristo kyidifo. Enti ɔpoo hokwan a anka ebetumi ama ɔne Kristo abɛyɛ sodifo wɔ ɔsoro Ahenni mu no. Yesu kae saa bere no sɛ: ‘Sɛ moahu den a ɛyɛ ma wɔn a wɔwɔ ahonyade sɛ wɔbɛkɔ Onyankopɔn ahenni mu!’—Marko 10:​17-23.

5. (a) Nneɛma bɛn na Paulo hyɛɛ Timoteo nkuran sɛ ɔmma ɛnnɔɔ ne so, na dɛn ntia? (b) Ɔkwan bɛn so na Satan de “sikanibere” di dwuma sɛ afiri a ɛsɛe ade?

⁵ Mfe bi akyi no, ɔsomafo Paulo kyerɛw krataa kɔmaa Timoteo a saa bere no na ɔwɔ Efeso a ɛyɛ aguadi kurow a ahonyade pii wom no. Paulo kaee no sɛ: “Yɛamfa hwee amma wiase, nanso yentumi mfa hwee mfi mu nkɔ. Na sɛ yɛwɔ nnuan ne nea yɛde kata yɛn ho a, momma ɛno ara nnɔɔ yɛn so.” Adwuma a obi yɛ sɛnea ɛbɛyɛ a ɔne n’abusua benya ‘nnuan ne nea wɔde bɛkata wɔn ho’ no fata. Nanso Paulo bɔɔ kɔkɔ sɛ: “Wɔn a wɔpɛ wɔn ho anya no hwe sɔhwɛ ne afiri ne nkwasea akɔnnɔ a enye mma nnipa na ɛtwe wɔn kogu ɔsɛe ne ɔyera mu mu.” Satan yɛ anifere. Mfiase no ebia ɔde nneɛma nketenkete bi na ɛbɛdaadaa obi. Nhyɛso a emu yɛ den betumi adi eyi akyi aba, ebia hokwan a ɛbɛma wɔabɔ obi aba so wɔ adwumam anaa adwuma pa a akatua wom kɛse nanso egye bere a kan no na ɔde yɛ honhom fam nneɛma no. Sɛ yɛamma yɛn ani anna yɛn ho so a, “sikanibere” bemia Ahenni nneɛma a ehia sen biara no.  Paulo kaa no saa kwan yi so sɛ: “Sikanibere a ebinom dii akyiri yeraa gyidi kwan na wɔde yaw pii wowɔɔ wɔn ho.”​—1 Timoteo 6:​7-10, NW.

6. (a) Dɛn na ɛsɛ sɛ yɛyɛ na ade dodowpɛ ansum yɛn afiri? (b) Wɔ nnɛ wiase sikasɛm tebea yi mu mpo no, ahotoso bɛn na yebetumi anya?

⁶ Paulo fi nokware dɔ a ɔwɔ ma ne nua Kristoni no mu hyɛɛ Timoteo nkuran sɛ: “Guan eyinom,” na “Ko gyidi ko pa no!” (1 Timoteo 6:​11, 12) Sɛ yebetumi akwati sɛ yɛbɛma wiase a atwa yɛn ho ahyia no asetra kwan a egyina honam fam nneɛma so atwe yɛn akɔ a, ehia sɛ yɛyere yɛn ho. Nanso sɛ yɛyere yɛn ho sɛnea ɛne yɛn gyidi hyia a, Yehowa rempa yɛn da. Ɛmfa ho sɛ nneɛma bo ayɛ den na nnipa pii nnya adwuma nyɛ wɔ mmaa nyinaa no, ɔbɛhwɛ ma yɛanya nea yehia ankasa. Paulo kyerɛwee sɛ: “Mommma sikanibere mmma mo abrabɔ mu, na mompene nea mowɔ; efisɛ [Onyankopɔn] ankasa aka sɛ: Merennyaw wo, nanso merempa wo da. Na ɛma yɛde nnam ka sɛ: [Yehowa, NW] ne me boafo, merensuro; onipa betumi ayɛ me dɛn?” (Hebrifo 13:5, 6) Na Ɔhene Dawid kyerɛwee sɛ: “Mayɛ abofra, na afei mabɔ akora, nanso minhuu onipa trenee a wɔapa no anaasɛ n’asefo srɛ aduan.”—Dwom 37:25.

Tete Asuafo Yɛ Nhwɛso

7. Asɛnka ho akwankyerɛ ahorow bɛn na Yesu de maa n’asuafo no, na dɛn nti na na eyinom fata?

⁷ Bere a Yesu maa n’asuafo no ntetee a ɛfata wiei no, ɔsomaa wɔn kɔɔ Israel sɛ wɔnkɔka asɛmpa no, na ɔkae sɛ: “Ɔsoro Ahenni no abɛn.” Nkrasɛm a na ɛyɛ anigye bɛn ara ni! Ná Yesu Kristo a ɔne Ɔhene Mesia no wɔ wɔn mfinimfini. Esiane sɛ na asomafo no de wɔn ho rema Onyankopɔn som nti, Yesu hyɛɛ wɔn nkuran  sɛ wonnya ahotoso sɛ Onyankopɔn bɛhwɛ wɔn. Enti, ɔkae sɛ: “Mommfa biribiara nntu kwan, mommfa poma anaa bɔtɔwa anaa aduan anaa sika anaa ntade abien abien. Na ofi biara a mobɛkɔ mu no, ɛhɔ ara na montra, na moafi hɔ akɔ.” (Mateo 10:​5-10; Luka 9:​1-6) Na Yehowa bɛhwɛ ma wɔn mfɛfo Israelfo a na ahɔhoyɛ yɛ wɔn amanne no ama wɔn nea wohia.

8. (a) Aka bere tiaa bi ma Yesu awu no, dɛn nti na ɔde asɛnka adwuma no ho akwankyerɛ foforo mae? (b) Nanso, ne nyinaa akyi no, dɛn na na ɛsɛ sɛ Yesu akyidifo no de di kan wɔ wɔn asetra mu?

⁸ Ɛno akyi bere tiaa bi ansa na Yesu rewu no, ɔmaa n’asomafo no ani baa wɔn ho so wɔ nokwasɛm a ɛyɛ sɛ wɔbɛyɛ adwuma no wɔ tebea horow a ɛyɛ soronko mu daakye no ho. Esiane sɛ na ɔman no mpanyimfo bɛsɔre atia wɔn adwuma no nti, na ebetumi aba sɛ ɛnyɛ ade a wɔbɛda ahɔhoyɛ adi ntɛm ara akyerɛ wɔn wɔ Israel. Afei nso na ɛrenkyɛ na wɔde Ahenni nkrasɛm no akɔ Amanaman mufo nsase so. Afei de na wɔbɛfa “sika kotoku” ne “akwantu bɔtɔwa” akura. Nanso, na ɛsɛ sɛ wɔkɔ so hwehwɛ Yehowa Ahenni ne ne trenee kan, na wonya ahotoso sɛ Onyankopɔn behyira mmɔden ahorow a wɔbɔ sɛ wobenya aduan ne nkataho a wohia no so.​—Luka 22:​35-37.

9. Ɔkwan bɛn so na Paulo de Ahenni no dii kan wɔ n’asetram bere a na ɔredi ne honam fam ahiade ho dwuma no, na afotu bɛn na ɔde maa afoforo wɔ saa asɛm yi ho?

⁹ Ɔsomafo Paulo yɛɛ sɛnea wɔde Yesu afotu no di dwuma ho nhwɛso fɛfɛ. Paulo de n’asetra gyinaa ɔsom adwuma no so. (Asomafo no Nnwuma 20:​24, 25) Sɛ ɔkɔ baabi kɔka asɛm no a, na odi n’ankasa honam fam nneɛma ho dwuma, na ɔnwene ntamadan mpo.  Wanhwɛ kwan sɛ afoforo bɛhwɛ no. (Asomafo no Nnwuma 18:​1-4; 1 Tesalonikafo 2:9) Nanso, sɛ afoforo pɛ sɛ wɔde ahɔhoyɛ ne akyɛde ahorow kyerɛ wɔn dɔ ne anisɔ a wɔwɔ a, na ɔde aseda gye. (Asomafo no Nnwuma 16:​15, 34; Filipifo 4:​15-17) Paulo anhyɛ Kristofo mmarima ne mmea nkuran sɛ wommu wɔn ani ngu wɔn abusua asɛyɛde ahorow so sɛnea ɛbɛyɛ a wɔbɛkɔ akɔka asɛm no, na mmom sɛ wonni wɔn asɛyɛde ahorow ho dwuma wɔ ɔkwan a ɛkari pɛ so. Otuu wɔn fo sɛ wɔnyɛ adwuma, nnɔ wɔn mmusua, na wɔnkyɛ afoforo ade. (Efesofo 4:28; 2 Tesalonikafo 3:​7-12) Ɔhyɛɛ wɔn nkuran sɛ ɛnsɛ sɛ wɔde wɔn ho to honam fam nneɛma so, na mmom wɔmfa wɔn ho nto Onyankopɔn so, na wɔntra ase wɔ ɔkwan a ɛbɛkyerɛ sɛ wɔte nea nneɛma a ɛho hia sen biara no kyerɛ ankasa ase. Nea ɛne Yesu nkyerɛkyerɛ hyia no, na ɛno kyerɛ sɛ wɔhwehwɛ Onyankopɔn Ahenni ne ne trenee kan.​—Filipifo 1:​9-11.

Ma Ahenni no Nni Kan Wɔ W’asetra Mu

10. Sɛ́ yɛbɛhwehwɛ Ahenni no kan kyerɛ dɛn?

¹⁰ Yɛn ankasa ka Ahenni ho asɛmpa no kyerɛ afoforo kodu he? Ne fã bi gyina yɛn asetra mu nsɛm tebea ne sɛnea anisɔ a yɛwɔ no mu dɔ so. Kae sɛ Yesu anka sɛ, ‘Monhwehwɛ Ahenni no bere a munni biribi foforo biara yɛ no.’ Esiane sɛ na onim sɛnea Ahenni no ho hia nti, ɔkaa N’agya apɛde ho asɛm sɛ: ‘Monkɔ so nhwehwɛ n’ahenni no.’ (Luka 12:31) Ɛwom sɛ ehia sɛ yɛn mu dodow no ara yɛ adwuma de hwɛ yɛn ho ne yɛn mmusua de, nanso sɛ yɛwɔ gyidi a, yɛn asetra nyinaa begyina Ahenni adwuma a Onyankopɔn de ama yɛn no so. Bere koro no ara no, yɛbɛhwɛ adi yɛn abusua mu asɛyɛde ahorow ho dwuma.​—1 Timoteo 5:8.

11. (a) Ɔkwan bɛn so na Yesu kyerɛkyerɛɛ mu sɛ yɛn nyinaa ntumi ntrɛw Ahenni nkrasɛm no mu pɛ? (b) Nneɛma bɛn na etumi ka dodow a yebetumi ayɛ no?

 ¹¹ Yɛn mu binom tumi de bere pii ka Ahenni ho asɛmpa no sen afoforo. Nanso wɔ Yesu bɛ a ɛfa dɔte ahorow ho no mu no, ɔkyerɛe sɛ wɔn a wɔn koma te sɛ asase pa no nyinaa bɛsow aba. Akodu he? Ɛsono ankorankoro biara asetra mu nsɛm. Onyin, akwahosan, ne abusua mu asɛyɛde ahorow nyinaa yɛ nsɛm no bi. Nanso sɛ yɛwɔ anisɔ a edi mũ a, yebetumi ayɛ pii.​—Mateo 13:23.

12. Honhom fam botae pa bɛn na wɔhyɛ mmabun titiriw nkuran sɛ wonsusuw ho?

¹² Eye sɛ yebenya botae ahorow a ɛbɛboa yɛn ma yɛatrɛw kyɛfa a yenya wɔ Ahenni som adwuma no mu no. Ɛsɛ sɛ mmabun susuw nhwɛso pa a Kristoni aberantewaa Timoteo yɛe no ho anibere so. (Filipifo 2:​19-22) Dɛn na ebetumi ayɛ fɛ sen sɛ bere a wɔawie sukuu no wɔde wɔn ho bɛhyɛ bere nyinaa som adwuma no mu? Mpanyimfo nso betumi anya mfaso denam honhom fam botae pa a wɔde besisi wɔn ani so no so.

13. (a) Hena na osi nea yɛn ankasa betumi ayɛ wɔ Ahenni som adwuma no mu no ho gyinae? (b) Sɛ yɛhwehwɛ Ahenni no kan ampa a, dɛn na yɛda no adi?

 ¹³ Sɛ anka yɛbɛkasa atia wɔn a ebia yesusuw sɛ wobetumi ayɛ pii no, ɛsɛ sɛ gyidi ka yɛn ma yɛyɛ nea ɛbɛma yɛn ankasa anya nkɔso sɛnea ɛbɛyɛ a yɛbɛsom Onyankopɔn yiye akodu baabi a yɛn ankasa nsɛm tebea bɛma kwan. (Romafo 14:​10-12; Galatifo 6:4 5) Sɛnea wɔkyerɛe wɔ Hiob asɛm no mu no, Satan kyerɛ sɛ yɛn honam fam nneɛma a yɛwɔ, yɛn ankasa ahotɔ ne yɛn yiyedi na yɛn ani gye ho titiriw, ne sɛ, pɛsɛmenkominya adwene na yɛde som Onyankopɔn. Nanso sɛ yɛrehwehwɛ Ahenni no kan ampa a, na yɛrenya kyɛfa wɔ da a wɔda no adi sɛ Ɔbonsam yɛ ɔtorofo kɛse no mu. Yɛde adanse rema sɛ nea yɛde di kan wɔ yɛn asetram ne Onyankopɔn som adwuma. Yɛnam asɛm a yɛka ne yɛn nneyɛe so da no adi sɛ yɛdɔ Yehowa yiye, yegyina ne tumidi akyi pintinn, na yɛdɔ yɛn mfɛfo nnipa nso.​—Hiob 1:​9-11; 2:​4, 5; Mmebusɛm 27:11.

14. (a) Dɛn nti na mfaso wɔ asɛnka adwuma ho nhyehyɛe a yɛbɛyɛ so? (b) Ɛhe na Adansefo pii renya asɛnka adwuma no mu kyɛfa akodu?

¹⁴ Bere nhyehyɛe a yɛbɛyɛ betumi aboa yɛn ma yɛayɛ pii sen biribi foforo biara a yebetumi ayɛ no. Yehowa ankasa wɔ ‘mmere a wahyɛ ato hɔ’ a ɔde di n’atirimpɔw ho dwuma. (Exodus 9:5; Marko 1:15) Sɛ ɛbɛyɛ yiye a, eye sɛ wobɛyɛ asɛnka adwuma no bi pɛnkoro anaa nea ɛboro saa dapɛn biara wɔ mmere a woahyehyɛ ato hɔ mu. Yehowa Adansefo ɔpehaha pii a wɔwɔ wiase nyinaa som sɛ akwampaefo aboafo a wɔde bɛyɛ nnɔnhwerew abien ka asɛmpa no da biara. Afoforo ɔpehaha pii som sɛ daa akwampaefo a wɔde bɛyɛ nnɔnhwerew  abien ne fã ka Ahenni no ho asɛm no da biara. Akwampaefo atitiriw ne asɛmpatrɛwfo de bere pii yɛ Ahenni som adwuma no. Yebetumi ahwehwɛ hokwan ahorow de aka Ahenni anidaso no ho asɛm no nso wɔ bɔnnɔ so akyerɛ obiara a obetie. (Yohane 4:​7-15) Ɛsɛ sɛ yɛn nyinaa nya ɔpɛ sɛ yebenya saa adwuma no yɛ mu kyɛfa kɛse sɛnea yɛn bere bɛma yɛn kwan, efisɛ Yesu ka siei sɛ: “Wɔbɛka ahenni ho asɛmpa yi wiase nyinaa de adi amanaman nyinaa adanse; ɛno ansa na awiei no bɛba.”​—Mateo 24:14; Efesofo 5:​15-17.

15. Ɛdefa yɛn som adwuma no ho no, dɛn nti na wote nka sɛ afotu a ɛwɔ 1 Korintofo 15:58 no yɛ ne bere mu de?

¹⁵ Wɔ asase so baabiara, ɛmfa ho ɔman ko a Yehowa Adansefo wɔ mu no, wɔde biakoyɛ ne nsi renya ɔsom hokwan kɛse yi mu kyɛfa. Wɔma Bible mu afotu a efi honhom mu yi fa wɔn ho: “Muntintim, munnhim, monkɔ so Awurade adwuma no mu daa, efisɛ munim sɛ mo brɛ nyɛ ɔkwa, Awurade mu.”​—1 Korintofo 15:58.

Asɛm no mu Ntĩmu

• Bere a Yesu kae sɛ ‘yɛnhwehwɛ Ahenni no kan no,’ na dɛn na ɔrekyerɛ sɛ ɛsɛ sɛ yɛma ɛto so abien?

• Adwene bɛn na ɛsɛ sɛ yenya wɔ yɛn ankasa ne yɛn mmusua honam fam ahiade ho dwuma a yebedi no ho? Mmoa bɛn na Onyankopɔn de bɛma yɛn?

• Ahenni som adwuma no afã bɛn na yebetumi anya mu kyɛfa?

[Adesua no ho Nsɛmmisa]

[Kratafa 107 mfonini]

Yehowa Adansefo reka asɛmpa no nnɛ wɔ asase so baabiara ansa na awiei no aba