Nea Adiyifo no Nyinaa Dii Ne Ho Adanse No
Ti Anan
Nea Adiyifo no Nyinaa Dii Ne Ho Adanse No
1. Dɛn na nokwasɛm a ɛfa Yesu asetra ansa na ɔrebɛyɛ ɔdesani ho no kyerɛ wɔ ɔne Yehowa abusuabɔ ho?
“AGYA no dɔ ɔba no, na ɔkyerɛ no nea n’ankasa yɛ nyinaa.” (Yohane 5:20) Abusuabɔ a emu yɛ den a Ɔba no ne N’agya Yehowa nyae bɛn ara ni! Saa abusuabɔ a emu yɛ den no fii ase wɔ bere a wɔbɔɔ no, mfe mpempem pii ansa na wɔrewo no sɛ onipa no. Ná ɔne Onyankopɔn Ba a ɔwoo no koro, a ɔno nkutoo na Yehowa ankasa bɔɔ no tẽẽ. Ɔnam saa Abakan a ɔdɔ no paa no so na ɛbɔɔ biribi foforo biara a ɛwɔ soro ne asase so no. (Kolosefo 1:15, 16) Ɔsomee nso sɛ Onyankopɔn Asɛm anaa Kasamafo, Nea ɔnam no so daa ɔsoro apɛde adi kyerɛɛ afoforo. Oyi, Ɔba a Onyankopɔn ani gye ne ho yiye no bɛyɛɛ onipa Yesu Kristo.—Mmebusɛm 8:22-30; Yohane 1:14, 18; 12:49, 50.
2. Bible nkɔmhyɛ ahorow aka Yesu ho asɛm akodu he?
2 Ansa na wɔrenyinsɛn Onyankopɔn Abakan no anwonwakwan so sɛ ɔdesani no, na wɔakyerɛw nkɔmhyɛ pii a ɛfa ne ho ato hɔ. Ɔsomafo Petro dii ho adanse kyerɛɛ Kornelio sɛ: “Ɔno na adiyifo nyinaa dii ne ho adanse.” (Asomafo no Nnwuma 10:43) Wɔkaa dwuma a Yesu di ho asɛm wɔ Bible no mu araa ma ɔbɔfo bi ka kyerɛɛ ɔsomafo Yohane sɛ: “Yesu adanse ne adiyi honhom.” (Adiyisɛm 19:10) Saa nkɔmhyɛ ahorow no kyerɛe pefee sɛ ɔne Mesia no. Ɛtwee adwene sii nneɛma ahorow a ɔbɛyɛ ma Onyankopɔn atirimpɔw anya mmamu no so. Ɛsɛ sɛ eyinom nyinaa ho hia yɛn kɛse nnɛ.
Nea Nkɔmhyɛ Ahorow no Daa no Adi
3. (a) Wɔ nkɔmhyɛ a ɛwɔ Genesis 3:15 no mu no, hena na ɔwɔ no, “ɔbea no” ne ‘ɔwɔ no asefo’ no gyina hɔ ma? (b) Dɛn nti na Yehowa asomfo bɛkyerɛ ‘ɔwɔ no ti a wɔbɛbɔ’ no ho anigye?
3 Wɔhyɛɛ nkɔm ahorow a ɛtete saa no mu nea edi kan wɔ Eden atuatew no akyi. Yehowa ka kyerɛɛ ɔwɔ no sɛ: “Mede ɔtan mɛto wo ne ɔbea no ntam, ɛne w’asefo ne n’asefo ntam. Ɔno na ɔbɛbɔ wo ti, na wo nso woaka ne nantin.” (Genesis 3:15) Wɔkaa saa nkɔmhyɛ no kyerɛɛ Satan, nea ɔwɔ no gyina hɔ ma no no. “Ɔbea no” yɛ Yehowa ankasa ɔsoro ahyehyɛde a edi nokware a ɛte sɛ ɔyere nokwafo ma no no. Abɔfo ne nnipa a wɔda Satan honhom adi sɔre tia Yehowa ne Ne nkurɔfo nyinaa ka ‘ɔwɔ no asefo ho.’ ‘Ɔwɔ no ti a wɔbɛbɔ’ no kyerɛ sɛ awiei koraa no wɔbɛsɛe otuatewfo Satan a otwirii Yehowa na ɔde awerɛhow kɛse baa adesamma so no. Nanso hena ne ‘aseni’ no fã titiriw a ɔbɛbɔ ɔwɔ no ti no? Eyi yɛɛ “ahintasɛm” mfehaha pii.—Romafo 16:20, 25, 26.
4. Ɔkwan bɛn so na Yesu anato boa ma yehuu no sɛ Aseni a wɔhyɛɛ ne ho bɔ no?
4 Bere a adesamma abakɔsɛm nyaa bɛyɛ mfirihyia 2,000 akyi no, Yehowa de ho nkyerɛkyerɛmu foforo mae. Ɔkyerɛe sɛ Aseni no bepue wɔ Abraham abusua mu. (Genesis 22:15-18) Nanso na anato a ɛbɛkyerɛ nea ɔbɛwo Aseni no rennyina honam fam asefo so na mmom nea Onyankopɔn bɛpaw no so. Ɛwom sɛ na Abraham dɔ ne ba Ismael a Hagar woo no no de, nanso Yehowa kae sɛ: “M’apam de, me ne Isak a Sara bɛwo no ama wo . . . no na ɛbɛpam.” (Genesis 17:18-21) Akyiri yi wosii saa apam no so dua kyerɛɛ Yakob a ne mu na Israel mmusuakuw 12 no fi bae no na ɛnyɛ Isak abakan Esau. (Genesis 28:10-14) Bere bi akyi no, wɔkyerɛe sɛ wɔbɛwo Aseni no wɔ Yuda abusua a wɔyɛ Dawid asefo no mu.—Genesis 49:10; 1 Beresosɛm 17:3, 4, 11-14.
5. Bere a Yesu fii n’asase so som adwuma ase no, dɛn na ɛma ɛdaa adi sɛ ɔne Mesia no?
5 Nneɛma foforo bɛn na wɔde mae a ɛbɛma wɔahu Aseni no? Bible no dii kan bɔɔ Betlehem din sɛ baabi a wɔbɛwo Aseni a na wahyɛ no ho bɔ no mfirihyia 700 ansa na ɛresi. Ɛdaa no adi nso sɛ na Aseni no wɔ hɔ dedaw “fi daa a enni ase nna mu,” fi bere a wɔbɔɔ no wɔ soro no. (Mika 5:2) Wɔnam odiyifo Daniel so hyɛɛ bere pɔtee a obepue wɔ asase so sɛ Mesia no ho nkɔm. (Daniel 9:24-26) Na bere a wɔde honhom kronkron sraa Yesu ma ɔbɛyɛɛ Nea Yehowa Asra no ankasa no, Onyankopɔn ankasa fi soro kaa ne ho asɛm pefee sɛ ɔyɛ Ne Ba. (Mateo 3:16, 17) Wɔdaa Aseni no adi! Enti, Filipo tumi de ahotoso kae sɛ: “Nea Mose, wɔ mmara no mu, ne adiyifo no kyerɛw ne ho asɛm no, yɛahu no, Yesu.”—Yohane 1:45.
6. (a) Sɛnea Luka 24:27 kyerɛ no, dɛn na Yesu akyidifo no behui? (b) Hena ne ‘ɔbea no aseni’ titiriw no, na dɛn na ɔwɔ no ti a ɔbɛbɔ no kyerɛ?
6 Ɛno akyi no, Yesu akyidifo behui sɛ na wɔahyɛ ne ho nkɔm pii wɔ Kyerɛwnsɛm a efi honhom mu no mu. (Luka 24:27) Ɛbɛdaa adi pefee mpo sɛ Yesu ne ‘ɔbea no aseni’ titiriw no, nea ɔbɛbɔ ɔwɔ no ti, asɛe Satan afi hɔ koraa no. Ɛdenam Yesu so no, Onyankopɔn bɔ ahorow a wahyɛ adesamma no nyinaa, nneɛma ahorow a yɛde ahopere hwɛ kwan no nyinaa, bɛbam.—2 Korintofo 1:20.
7. Dɛn bio na mfaso wɔ so sɛ yehu de ka Onii ko a nea wɔka ne ho asɛm wɔ nkɔmhyɛ ahorow yi mu yɛ no ho?
7 Ɛsɛ sɛ eyi a yenim no ka yɛn dɛn? Bible no ka Etiopiani piani bi a na wakenkan Agyenkwa ne Mesia a ɔreba no ho nkɔmhyɛ ahorow no bi ho asɛm. Ɔde ahodwiriw bisaa ɔsɛmpakafo Filipo sɛ: “Hena ho asɛm na odiyifo no ka yi?” Nanso bere a opiani no nyaa mmuae no, wamma asɛm no anso hɔ ara. Bere a ɔbarima no tiee nkyerɛkyerɛmu a Filipo de mae yiye akyi no, ohui sɛ nkɔmhyɛ a anya mmamu yi ho anisɔ hwehwɛ sɛ ɔyɛ ho biribi. Ohui sɛ ɛsɛ sɛ wɔbɔ no asu. (Asomafo no Nnwuma 8:32-38; Yesaia 53:3-9) So yɛyɛ saa ara?
8. (a) Dɛn na mmɔden a Abraham bɔe sɛ ɔde Isak bɛbɔ afɔre no yɛ ho mfonini? (b) Dɛn nti na Yehowa ka kyerɛɛ Abraham sɛ amanaman nyinaa nam Aseni no so benya nhyira, na ɔkwan bɛn so na eyi fa yɛn ho nnɛ?
8 Susuw mmɔden a Abraham bɔe sɛ ɔde Isak, ɔne Sara ba biako pɛ no bɛbɔ afɔre ho kyerɛwtohɔ a ɛka koma no nso ho hwɛ. (Genesis 22:1-18) Na ɛno yɛ nea Yehowa bɛyɛ ho mfonini—ɔde ne Ba a ɔwoo no koro bɛbɔ afɔre: “Sɛnea Onyankopɔn dɔ wiase ni, sɛ ɔde ne ba a ɔwoo no koro no mae, na obiara a ogye no di no anyera, na wanya daa nkwa.” (Yohane 3:16) Eyi ma yenya ahotoso sɛ sɛnea Yehowa de ne Ba a ɔwoo no koro no mae de maa N’atirimpɔw nyaa mmamu no, saa ara nso na ɔde ‘nneɛma foforo nyinaa nso bɛma yɛn.’ (Romafo 8:32) Dɛn na ɛhwehwɛ sɛ yɛyɛ? Sɛnea wɔakyerɛw wɔ Genesis 22:18 no, Yehowa ka kyerɛɛ Abraham sɛ amanaman nyinaa nam Aseni no so behyira wɔn ho ‘efisɛ Abraham atie Onyankopɔn nne.’ Ɛsɛ sɛ yɛn nso yetie Yehowa ne ne Ba no: “Nea ogye ɔba no di no wɔ daa nkwa; na nea ontie ɔba no renhu nkwa, na Onyankopɔn abufuw da no so.”—Yohane 3:36.
9. Sɛ yɛn ani sɔ daa nkwa ho anidaso a Yesu afɔrebɔ no ama yɛanya no a, dɛn na yɛbɛyɛ?
9 Sɛ yɛn ani sɔ daa nkwa anidaso a Yesu afɔrebɔ no ama yɛanya no a, yɛbɛpɛ sɛ yɛyɛ nneɛma a Yehowa nam Yesu so aka akyerɛ yɛn no. Eyi fa ɔdɔ a yɛwɔ ma Onyankopɔn ne yɛn yɔnkonom no ho. (Mateo 22:37-39) Yesu kyerɛe sɛ ɔdɔ a yɛwɔ ma Yehowa no bɛkanyan yɛn ma yɛakyerɛkyerɛ afoforo ma wɔadi ‘nea Yesu ahyɛ yɛn nyinaa no so.’ (Mateo 28:19, 20) Na yɛpɛ sɛ yeyi saa ɔdɔ no adi kyerɛ yɛn mfɛfo Yehowa asomfo denam “yɛn ho yɛn ho nhyiam” a yɛbɛyɛ so. (Hebrifo 10:25; Galatifo 6:10) Saa ara nso na bere a yetie Onyankopɔn ne ne Ba no, ɛnsɛ sɛ yesusuw sɛ wɔhwehwɛ pɛyɛ fi yɛn hɔ. Hebrifo 4:15 ka sɛ Yesu, sɛ yɛn Sɔfopanyin no betumi ‘ate yɛn mmerɛwyɛ ase.’ Hwɛ awerɛkyekye a ɛyɛ, ne titiriw bere a yɛnam Kristo so kɔ Onyankopɔn anim wɔ mpaebɔ mu srɛ mmoa a ɛbɛma yɛadi yɛn mmerɛwyɛ so no!—Mateo 6:12.
Kyerɛ Kristo Mu Gyidi
10. Dɛn nti na wɔ Yesu Kristo akyi no, nkwagye biara nni hɔ bio?
10 Bere a ɔsomafo Petro daa no adi kyerɛɛ Yudafo asɛnnibea kɛse no wɔ Yerusalem sɛ Yesu ama saa Bible nkɔmhyɛ no anya mmamu no, ɔde tumi kae sɛ: “Nkwagye nni obiara mu, na nso din foforo nni ɔsoro ase a wɔde ama wɔ nnipa mu a ɛsɛ sɛ wogye yɛn nkwa wɔ mu.” (Asomafo no Nnwuma 4:12) Esiane sɛ Adam asefo nyinaa yɛ abɔnefo nti, wɔn wu nsom bo a wobetumi de ayɛ agyede ama obiara. Nanso, na Yesu yɛ pɛ, na ne nkwa som bo sɛ afɔrebɔde. (Dwom 49:6-9; Hebrifo 2:9) Ɔde agyede a ne bo ne nkwa a na Adam ahwere no yɛ pɛ maa Onyankopɔn. (1 Timoteo 2:5, 6) Eyi ma yenyaa hokwan a ɛbɛma yɛanya daa nkwa wɔ Onyankopɔn wiase foforo no mu.
11. Kyerɛkyerɛ sɛnea yebetumi anya Yesu afɔrebɔ no so mfaso kɛse no mu.
11 Agyede no nso buee kwan a ɛbɛma yɛanya mfaso afoforo nnɛ mpo maa yɛn. Sɛ nhwɛso no, ɛwom sɛ yɛyɛ abɔnefo de, nanso Yesu afɔrebɔ no ma yetumi nya ahonim pa esiane bɔne fafiri nti. Eyi sen nea mmoa afɔre a Mose Mmara no hwehwɛe sɛ wɔbɔ no maa Israelfo nyae no koraa. (Asomafo no Nnwuma 13:38, 39; Hebrifo 9:13, 14; 10:22) Nanso, saa fafiri no hwehwɛ sɛ yɛde nokwaredi gye sɛnea yehia Kristo afɔrebɔ no tom: “Sɛ yɛka sɛ yenni bɔne a, na yɛdaadaa yɛn ho, na nokware no nni yɛn mu. Sɛ yɛka yɛn bɔne kyerɛ a, ɔyɛ ɔnokwafo ne ɔtreneeni sɛ ɔde yɛn bɔne befiri yɛn, na watew yɛn ho afi nea ɛnteɛ nyinaa mu.”—1 Yohane 1:8, 9.
12. Dɛn nti na nsu mu asubɔ yɛ ade a ɛho hia na ama yɛanya ahonim pa wɔ Onyankopɔn anim?
12 Ɔkwan bɛn so na abɔnefo betumi akyerɛ Kristo ne n’afɔrebɔ no mu gyidi? Bere a nnipa a wɔtraa ase wɔ afeha a edi kan no mu no bɛyɛɛ gyidifo no, wɔyɛɛ saa wɔ baguam. Ɔkwan bɛn so? Wɔbɔɔ asu. Dɛn ntia? Efisɛ Yesu de ahyɛde mae sɛ wɔmmɔ n’asuafo nyinaa asu. (Mateo 28:19, 20; Asomafo no Nnwuma 8:12; 18:8) Obi rentwentwɛn ne nan ase bere a ɔdɔ nsiesiei a Yehowa nam Yesu so ayɛ kanyan ne koma no. Ɔbɛyɛ nsakrae a ehia no wɔ n’asetram, ahyira ne ho so ama Onyankopɔn wɔ mpaebɔ mu, na ɔde nsu mu asubɔ ayɛ n’ahosohyira no ho sɛnkyerɛnne. Ɔnam gyidi a ɔda no adi wɔ saa kwan yi so no so na ‘ɛsrɛ Onyankopɔn sɛ ɔmma no ahonim pa.’—1 Petro 3:21.
13. Sɛ yehu sɛ yɛayɛ bɔne bi a, dɛn na ɛsɛ sɛ yɛyɛ wɔ ho, na dɛn ntia?
13 Nokwasɛm ne sɛ wɔ eyi nyinaa akyi no, bɔne su horow bɛda adi. Dɛn bio? Ɔsomafo Yohane kae sɛ: “Me mma nkumaa, merekyerɛw eyinom mabrɛ mo, na moanyɛ bɔne. Na sɛ obi yɛ bɔne a, yɛwɔ okyigyinafo bi, agya no nkyɛn, ɔne ɔtreneeni Yesu Kristo. Na ɔno ne yɛn bɔne ho mpata.” (1 Yohane 2:1, 2) So eyi kyerɛ sɛ wɔ bɔne biara a yɛbɛyɛ nyinaa akyi no, sɛ yɛbɔ Onyankopɔn mpae de bisa bɔne fafiri a, ɔde befiri yɛn? Ɛnkyerɛ saa ankasa. Ade a ɛma yenya bɔne fafiri ne nokware ahonu. Yebehia mpanyimfo no, wɔn a wɔn ho akokwaw kɛse wɔ Kristofo asafo no mu no nso mmoa. Ɛsɛ sɛ yegye tom sɛ nea yɛayɛ no nteɛ na yenu yɛn ho wɔ ho, na ama yɛabɔ mmɔden sɛ yɛrenyɛ bio. (Asomafo no Nnwuma 3:19; Yakobo 5:13-16) Sɛ yɛyɛ eyi a, yebetumi anya awerɛhyem sɛ yebenya Yesu mmoa na yɛbɛsan anya Yehowa anim dom.
14. (a) Kyerɛkyerɛ ɔkwan titiriw bi a yɛnam so anya Yesu afɔrebɔ no so mfaso no mu. (b) Sɛ yɛwɔ gyidi ankasa a, dɛn na yɛbɛyɛ?
14 Yesu afɔrebɔ no abue daa nkwa ho kwan wɔ soro ama “kuw ketewa,” aseni a wɔka ne ho asɛm wɔ Genesis 3:15 no fã. (Luka 12:32; Galatifo 3:26-29) Abue daa nkwa wɔ paradise asase so ho kwan nso ama adesamma ɔpepepem pii foforo. (Dwom 37:29; Adiyisɛm 20:11, 12; 21:3, 4) Daa nkwa yɛ “Onyankopɔn dom akyɛde . . . Awurade Kristo Yesu mu.” (Romafo 6:23; Efesofo 2:8-10) Sɛ yɛwɔ saa akyɛde no mu gyidi na yɛn ani sɔ ɔkwan a wɔnam so ma etumi yɛɛ yiye no a, yɛbɛda eyi adi. Sɛ yehu sɛnea Yehowa de Yesu adi dwuma anwonwakwan so ma N’apɛde ayɛ hɔ ne sɛnea ehia sɛ yɛn nyinaa di Yesu anammɔn akyi pɛpɛɛpɛ no a, yɛbɛma Kristofo som adwuma no ayɛ yɛn asetra mu dwumadi a ɛho hia sen biara no mu biako. Yɛn gyidi bɛda adi denam ahotoso a yɛde ka akyɛde kɛse a efi Onyankopɔn hɔ yi ho asɛm kyerɛ afoforo no so.—Asomafo no Nnwuma 20:24.
15. Ɔkwan bɛn so na Yesu Kristo mu gyidi wɔ tumi a ɛde biakoyɛ ba?
15 Hwɛ biakoyɛ a gyidi a ɛte saa tumi de ba! Yɛnam ɛno so bɛn Yehowa, ne Ba no, ne yɛn ho yɛn ho kɛse wɔ Kristofo asafo no mu. (1 Yohane 3:23, 24) Ɛma yɛn ani gye sɛ Yehowa fi ayamye mu ama ne Ba no “din a edi din nyinaa so [gye Onyankopɔn din nkutoo], sɛ Yesu din mu na ɔsorofo ne asase sofo ne asase asefo nkotodwe nyinaa nkotow, na tɛkrɛma nyinaa mpaem nka sɛ Yesu Kristo ne Awurade mma agya Nyankopɔn anuonyam.”—Filipifo 2:9-11.
Asɛm no mu Ntĩmu
• Bere a Mesia no puei no, dɛn nti na wɔn a na wogye Onyankopɔn Asɛm di no huu onipa ko a ɔyɛ no pefee?
• Nneɛma a ɛsɛ sɛ yɛyɛ de kyerɛ anisɔ a yɛwɔ ma Yesu afɔrebɔ no bi ne dɛn?
• Akwan bɛn so na yɛanya Yesu afɔrebɔ no so mfaso dedaw? Ɔkwan bɛn so na eyi boa yɛn bere a yɛbɔ Yehowa mpae de bisa bɔne fafiri no?
[Adesua no ho Nsɛmmisa]
[Kratafa 36 mfonini]
Yesu ka kyerɛɛ n’akyidifo sɛ ɛsɛ sɛ wɔkyerɛkyerɛ afoforo ma wodi Onyankopɔn mmara nsɛm so
