Nnipakuw Kɛse a Wɔwɔ Yehowa Ahengua Anim
Ti Dumiɛnsa
Nnipakuw Kɛse a Wɔwɔ Yehowa Ahengua Anim
1. (a) Ansa na Onyankopɔn asomfo a wɔtraa ase ansa na Kristofo reba anaa 144,000 no nsa bɛka wɔn akatua no, dɛn na ɛsɛ sɛ ɛba wɔn so? (b) Dɛn na ebetumi ayɛ yiye ama “nnipakuw kɛse” a wɔte ase saa bere yi mu no?
ONYANKOPƆN asomfo anokwafo a wofi Habel so besi Osuboni Yohane so no de Onyankopɔn apɛdeyɛ dii kan wɔ wɔn asetra mu. Nanso, wɔn nyinaa wuwui, na wɔretwɛn owusɔre a wobenya aba nkwa mu wɔ asase so wɔ Onyankopɔn wiase foforo no mu. Ɛsɛ sɛ 144,000 a wɔbɛka Kristo ho wɔ Onyankopɔn soro Ahenni no mu no nso wuwu ansa na wɔatumi anya wɔn akatua no. Nanso, Adiyisɛm 7:9 da no adi sɛ wɔ nna a edi akyiri yi mu no, “nnipakuw kɛse” a wofi aman nyinaa mu bɛwɔ hɔ a wɔrenwuwu na mmom wobenya anidaso sɛ wɔbɛtra ase daa wɔ asase so. So woka ho?
Nnipakuw Kɛse no a Wobehu Wɔn
2. Dɛn na ɛma wohuu nnipakuw kɛse a wɔka wɔn ho asɛm wɔ Adiyisɛm 7:9 no yiye?
2 Wɔ afe 1923 mu no, Yehowa asomfo hui sɛ “nguanten” a wɔwɔ Yesu bɛ a ɛwɔ Mateo 25:31-46 ne “nguan foforo” a ɔkaa wɔn ho asɛm a wɔayɛ ho kyerɛwtohɔ wɔ Yohane 10:16 no yɛ nkurɔfo a wobenya hokwan atra ase daa wɔ asase so no. Wohui wɔ afe 1931 mu sɛ wɔn a wɔaka wɔn ho asɛm wɔ Hesekiel 9:1-11 sɛ wɔrehyehyɛ wɔn moma so agyirae no nso ne wɔn a wɔwɔ anidaso sɛ wɔbɛtra asase so no. Afei wɔ afe 1935 mu no, wohui sɛ nnipakuw kɛse no yɛ nguan foforo a Yesu kaa wɔn ho asɛm no fã. Ɛnnɛ, nnipakuw kɛse a wɔadom wɔn yi dodow adu ɔpepem pii.
3. Dɛn nti na asɛm a ɛne “wogyinagyina ahengua no anim” no nkyerɛ sɛ wɔyɛ ɔsoro kuw bi?
3 Wɔ Adiyisɛm 7:9 no, wonhu nnipakuw kɛse no sɛ wɔwɔ soro. Onyankopɔn ‘ahengua anim a wogyinagyina’ no nhwehwɛ sɛ wɔkɔ soro. Wogyina Onyankopɔn anim ara kwa. (Dwom 11:4) Nokwasɛm a ɛyɛ sɛ “nnipakuw kɛse a obi ntumi nkan wɔn” no nyɛ ɔsoro kuw bi no yɛ nea wɔnam wɔn dodow pɔtee a wɔankyerɛ a wɔde toto nea wɔayɛ ho kyerɛwtohɔ wɔ Adiyisɛm 7:4-8 ne Adiyisɛm 14:1-4 no ho no so da no adi. Ɛhɔ no, wɔda nnipa dodow a wɔfa wɔn fi asase so kɔ soro no dodow adi sɛ wɔyɛ 144,000.
4. (a) Dɛn ne “ahohia kɛse” a nnipakuw kɛse no fi mu ka no? (b) Sɛnea wɔaka wɔ Adiyisɛm 7:11, 12 no, henanom na wohu nnipakuw kɛse no na wɔne wɔn nya ɔsom mu kyɛfa no?
4 Adiyisɛm 7:14 ka nnipakuw kɛse no ho asɛm sɛ: “Eyinom ne wɔn a wofi ahohia kɛse no mu.” Wonya nkwa wɔ adesamma abakɔsɛm mu ahohiahia a ɛsen biara mu. (Mateo 24:21) Bere a wɔde aseda ka sɛ wɔn nkwagye fi Onyankopɔn ne Kristo no, abɔde anokwafo a wɔwɔ soro nyinaa ne wɔn bɛbom aka sɛ: “Amen, nhyira ne anuonyam ne nyansa ne aseda ne nidi ne tumi ne ahoɔden yɛ yɛn Nyankopɔn dea daa daa. Amen.”—Adiyisɛm 7:11, 12.
Wɔada Wɔn Ho Adi sɛ Wɔfata
5. Yɛbɛyɛ dɛn atumi ahu nea wɔhwehwɛ na ama yɛabɛka nnipakuw kɛse no ho no?
5 Nnipakuw kɛse a wɔbɛkora wɔn so wɔ ahohiahia kɛse mu no ba ma ɛne Yehowa trenee gyinapɛn ahorow hyia. Wɔakyerɛkyerɛ su ahorow a ɛhyɛ wɔn a wobegye wɔn nkwa agyirae no mu pefee wɔ Bible mu. Enti ebetumi ayɛ yiye sɛ wɔn a wɔdɔ trenee no bɛyɛ ade mprempren sɛnea ɛbɛyɛ a wɔbɛda wɔn ho adi sɛ wɔfata ma nkwagye. Dɛn na ɛsɛ sɛ eyinom yɛ?
6. Dɛn nti na yebetumi de nnipakuw kɛse no atoto nguanten ho ma afata?
6 Nguan dwo na wɔbrɛ wɔn ho ase. Enti bere a Yesu kae sɛ ɔwɔ nguan foforo a wɔnyɛ ɔsoro kuw no mufo no, na ɔkyerɛ nnipa a ɛnyɛ asase so a wɔbɛtra daa nko na wɔpɛ na mmom sɛ wɔbɛbrɛ wɔn ho ase ama ne nkyerɛkyerɛ nso. Ɔkae sɛ: “Me nguan tie me nne, na me nso minim wɔn, na wodi m’akyi.” (Yohane 10:16, 27) Eyinom yɛ nnipa a wotie nea Yesu ka ankasa na wofi osetie mu bɛyɛ n’asuafo no.
7. Su ahorow bɛn na ɛsɛ sɛ Yesu akyidifo nya?
7 Su foforo bɛn na ɛsɛ sɛ Yesu akyidifo yi mu biara nya? Onyankopɔn Asɛm bua sɛ: “Munyi onipa dedaw a ɔresɛe wɔ nnaadaa akɔnnɔ mu no nkyene, na . . . monhyɛ onipa foforo a wɔbɔɔ no Nyankopɔn so, nokware trenee ne ahotew mu.” (Efesofo 4:22-24) Wonya su ahorow a ɛboa ma Onyankopɔn asomfo biakoyɛ nya nkɔanim—“ɔdɔ, anigye, asomdwoe, abodwokyɛre, ayamye, papayɛ, gyidi, odwo, [ahosodi, NW].”—Galatifo 5:22, 23.
8. Dɛn na nnipakuw kɛse no behyia bere a wɔboa nkaefo no?
8 Nnipakuw kɛse no boa wɔn a wɔwɔ ɔsoro anidaso no mufo kakraa bi a wɔaka a wodi asɛnka adwuma no anim no. (Mateo 24:14; 25:40) Ɛwom sɛ nguan foforo no nim sɛ wobehyia ɔsɔretia wɔ nna a edi akyiri yi mu efisɛ Kristo Yesu ne n’abɔfo atow Satan ne n’adaemone fi soro agu asaase so de, nanso wɔde mmoa yi ma. Na eyi kyerɛ sɛ “asase . . . nnue, efisɛ ɔbonsam asian aba mo nkyɛn, na wafa abufuw kɛse, efisɛ onim sɛ ne bere a ɔwɔ yɛ tiaa.” (Adiyisɛm 12:7-12) Enti, Satan amia ɔsɔretia a ɔde ba Onyankopɔn asomfo so no mu bere a nhyehyɛe yi awiei abɛn no.
9. Ɔkwan bɛn so na Onyankopɔn asomfo adi yiye wɔ asɛmpa no a wɔka no mu, na dɛn ntia?
9 Ɛmfa ho ɔtaa a emu yɛ den no, asɛnka adwuma no kɔ so nya nkɔanim. Ahenni adawurubɔfo kakraa bi a na wɔwɔ hɔ wɔ Wiase Ko I no awiei no, ɛnnɛ wɔyɛ ɔpepem pii, efisɛ Yehowa hyɛɛ bɔ sɛ: “Akode biara a wɔbɔ hyɛ wo renyɛ yiye.” (Yesaia 54:17) Yudafo asɛnnibea kɛse no muni bi mpo gye toom sɛ wontumi nsɛe Onyankopɔn adwuma. Ɔkaa afeha a edi kan no mu asuafo no ho asɛm kyerɛɛ Farisifo no sɛ: “Munnyaa wɔn! Na sɛ ebia agyina yi anaa adwuma yi fi nnipa a, ɛbɛsɛe. Na sɛ nso efi Onyankopɔn a, muntumi nsɛe wɔn, na moammɛyɛ sɛ mo ne Onyankopɔn po na ɛreko.”—Asomafo no Nnwuma 5:38, 39.
10. (a) Dɛn na “agyirae” a wɔhyɛ nnipakuw kɛse no kyerɛ? (b) Ɔkwan bɛn so na Onyankopɔn asomfo tie ‘ɛnne a efi soro’ no?
10 Wohuu nnipakuw kɛse no sɛ wɔrehyɛ wɔn agyirae ama nkwagye. (Hesekiel 9:4-6) “Agyirae” no yɛ adanse a ɛkyerɛ sɛ wɔahyira wɔn ho so ama Yehowa, abɔ asu sɛ Yesu asuafo, na wɔrebɔ mmɔden sɛ wobenya Kristo nipasu. Wotie ‘ɛnne a efi soro’ a ɛka Satan atoro som ahemman a ɛwɔ wiase nyinaa ho asɛm a ese: “Me man, mumfi no mu, na moanyɛ ne nnebɔne no bi, na moannya ne haw no bi” no.—Adiyisɛm 18:1-5.
11. Ɔkwan a ɛho hia bɛn so na nnipakuw kɛse no da no adi sɛ wɔyɛ Yehowa asomfo?
11 Afei nso, Yesu ka kyerɛɛ n’akyidifo sɛ: “Sɛ mododɔ mo ho a, nnipa nyinaa behu sɛ moyɛ m’asuafo.” (Yohane 13:35) Nea ɛne no bɔ abira no, wiase yi nyamesom mufo kunkum wɔn ho wɔn ho wɔ ɔko mu, mpɛn pii, esiane sɛ ɛsono aman a wofi mu nti! Onyankopɔn Asɛm ka sɛ: “Eyi mu na Onyankopɔn mma ne ɔbonsam mma da adi. Obiara a ɔnyɛ nea ɛteɛ ne nea ɔnnɔ ne nua no mfi Nyankopɔn. . . . Yɛnnodɔ yɛn ho no, ɛnyɛ sɛ Kain a ofi ɔbɔne no mu na okum ne nua no.”—1 Yohane 3:10-12.
12. Wɔ ahohiahia kɛse no mu no, ɔkwan bɛn so na Yehowa ne nyamesom mu ‘nnua’ a wɔnsow aba pa no bedi?
12 Yesu kae sɛ: “Dua pa biara sow aba pa, na dua bɔne sow aba bɔne. Dua pa ntumi nsow aba bɔne, na dua bɔne nso ntumi nsow aba pa. Dua biara a ɛnsow aba pa no, wotwa na wɔde gu gya mu. Enti wɔn aba na mode behu wɔn.” (Mateo 7:17-20) Aba a wiase yi nyamesom asow no da wɔn adi sɛ ‘nnua’ a aporɔw, a ɛnkyɛ biara Yehowa bɛsɛe no wɔ ahohiahia kɛse no mu.—Adiyisɛm 17:16.
13. Ɔkwan bɛn so na nnipakuw kɛse no da no adi sɛ wɔde biakoyɛ “gyinagyina” Yehowa “ahengua no anim”?
13 Adiyisɛm 7:9-15 twe adwene si nneɛma bi a ɛma wɔkora nnipakuw kɛse no so no so. Wɔada wɔn adi sɛ wɔde biakoyɛ “gyinagyina” Yehowa “ahengua no anim,” na wogyina n’amansan tumidi no akyi. “Wɔahohoro wɔn ntade ma ahoa fitaa Oguammaa no mogya no mu,” de kyerɛ sɛ wogye Yesu bɔne ho mpata afɔre no tom. (Yohane 1:29) Wɔahyira wɔn ho so ama Onyankopɔn de nsu mu asubɔ ayɛ wɔn ahosohyira no ho sɛnkyerɛnne. Enti wɔwɔ gyinabea pa wɔ Onyankopɔn anim, sɛnea wɔde ntade fitaa yɛ ho mfonini no, na “wɔsom no awia ne anadwo.” So akwan bi wɔ hɔ a wubetumi afa so ama w’asetra ne nea wɔaka ho asɛm wɔ ha yi ahyia koraa?
Ɛso Mfaso Horow Nnɛ
14. Dɛn ne mfaso ahorow a ɛyɛ soronko a Yehowa asomfo nya no nnɛ mpo?
14 Ɛda adi sɛ woahu mfaso soronko a wɔn a wɔresom Yehowa no nya nnɛ no. Sɛ nhwɛso no, bere a wusuaa Yehowa atirimpɔw ahorow a ɛteɛ no ho ade no, wotee ase sɛ daakye ho anidaso a ɛyɛ anigye wɔ hɔ. Enti mprempren wowɔ atirimpɔw wɔ asetram ankasa—sɛ wobɛsom nokware Nyankopɔn no a wowɔ daa nkwa wɔ paradise asase so ho anidaso a ɛyɛ anigye. Yiw, Ɔhene Yesu Kristo “bɛyɛn [nnipakuw kɛse no], na ɔde wɔn akɔ nkwa asuti ho.”—Adiyisɛm 7:17.
15. Ɔkwan bɛn so na Yehowa Adansefo nam Bible nnyinasosɛm a ɛfa amammuisɛm ne abrabɔ pa ho mu a wokura no anya mfaso?
15 Mfaso a ɛyɛ anigye a nnipakuw kɛse no nya no nnɛ ne ɔdɔ, biakoyɛ, ne asomdwoe a ɛwɔ Yehowa asomfo mu wɔ wiase nyinaa no. Esiane sɛ yɛn nyinaa di honhom fam aduan koro nti, yɛn nyinaa di Onyankopɔn Asɛm mu mmara ne nnyinasosɛm ahorow biako so. Ɛno nti na amammui anaa ɔman a obi fi mu ho adwene mpaapaee yɛn mu no. Afei nso, yekura abrabɔ fam gyinapɛn a ɛkorɔn a Onyankopɔn hwehwɛ fi ne nkurɔfo hɔ no mu. (1 Korintofo 6:9-11) Enti, sɛ anka nitan, mpaapaemu, ne ɔbrasɛe a abu so wɔ wiase no mu bi bɛba Yehowa nkurɔfo mu no, wonya nea yebetumi afrɛ no honhom fam paradise mu anigye. Hyɛ sɛnea wɔaka eyi ho asɛm wɔ Yesaia 65:13, 14 no nsow.
16. Ɛmfa ho ɔhaw ahorow a nnipa nyinaa hyia no, anidaso bɛn na nnipakuw kɛse no mufo no wɔ?
16 Ɛwom, Yehowa asomfo a wɔyɛ nnipa no nyɛ pɛ. Na wiase yi mu haw ahorow no nyinaa bi ka wɔn, ebi te sɛ asetram ahokyere anaa nnipa a wɔn ho nni asɛm a wohu amane wɔ amanaman no akodi mu. Wɔn nso hyia yare, amanehunu, ne owu. Nanso, wɔwɔ gyidi sɛ wɔ wiase foforo no mu no, Onyankopɔn ‘bɛpopa wɔn aniwam nusu nyinaa. Na owu nni hɔ bio, na awerɛhow ne osu ne ɛyaw bi nni hɔ bio.’—Adiyisɛm 21:4.
17. Ɛmfa ho nea ɛbɛto yɛn mprempren biara no, anidaso a ɛyɛ anigye bɛn na ɛwɔ hɔ ma wɔn a wɔsom nokware Nyankopɔn no?
17 Sɛ onyin, yare, asiane, anaa ɔtaa ma wohwere wo nkwa mprempren mpo a, Yehowa benyan wo aba nkwa mu wɔ Paradise. (Asomafo no Nnwuma 24:15) Afei wobɛkɔ so anya honhom fam apontow mu kyɛfa wɔ Kristo Mfirihyia Apem Nniso no mu. Ɔdɔ a wowɔ ma Onyankopɔn no mu bɛyɛ den kɛse bere a wuhu sɛ n’atirimpɔw ahorow renya mmamu wɔ anuonyam mu no. Honam fam nhyira horow a Yehowa de bɛma saa bere no mu no bɛkɔ so ama ɔdɔ a wowɔ ma no no mu ayɛ den yiye. (Yesaia 25:6-9) Daakye a ɛyɛ anigye bɛn ara na ɛwɔ hɔ ma Onyankopɔn nkurɔfo sɛɛ yi!
Asɛm no mu Ntĩmu
• Asɛm soronko a esi bɛn na Bible no de nnipakuw kɛse no bata ho?
• Sɛ yɛpɛ sɛ wɔde yɛn ka saa nnipakuw kɛse a wɔanya ɔsoro dom no ho ampa a, dɛn na ɛsɛ sɛ yɛyɛ mprempren?
• Nhyira a nnipakuw kɛse no nya mprempren ne nea wobenya wɔ Onyankopɔn wiase foforo no mu no ho hia wo dɛn?
[Adesua no ho Nsɛmmisa]
[Kratafa 123 mfonini]
Nnipakuw kɛse no mu ɔpepem pii de biakoyɛ resom nokware Nyankopɔn no
