Tumi a Owusɔre Anidaso no Wɔ
Ti Akron
Tumi a Owusɔre Anidaso no Wɔ
1. Sɛ owusɔre ho anidaso nni hɔ a, anka akwanhwɛ bɛn na ɛwɔ hɔ ma awufo?
SO W’ADƆFO bi awu? Sɛ ɛnyɛ owusɔre a, anka anidaso biara nni hɔ sɛ wobɛsan ahu wɔn bio. Wɔbɛkɔ so atra tebea a Bible ka ho asɛm yi mu: “Na awufo de, wonnim biribiara, . . . na adwuma ne adwene ne nimdeɛ ne nyansa nni asaman [ɔdamoa] a worekɔ hɔ no.”—Ɔsɛnkafo 9:5, 10.
2. Akwanhwɛ a ɛyɛ anigye bɛn na owusɔre no ama yɛatumi anya?
2 Nanso Yehowa fi mmɔborohunu mu nam owusɔre so abue hokwan a ɛso nni a ɛbɛma nnipa pii a wɔawuwu a yennim wɔn dodow asɔre afi awufo mu abenya daa nkwa. Eyi kyerɛ sɛ wubetumi anya anidaso a awerɛkyekye wom sɛ da bi bɛba a wobɛsan ne w’adɔfo a wɔadeda wɔ owu mu no behyiam wɔ Onyankopɔn wiase foforo no mu.—Marko 5:35, 41, 42; Asomafo no Nnwuma 9:36-41.
3. (a) Akwan bɛn so na ada adi sɛ owusɔre no ho hia wɔ Yehowa atirimpɔw ho dwumadi mu? (b) Bere titiriw bɛn na owusɔre ho anidaso ma yenya ahoɔden?
3 Esiane owusɔre no nti, ɛnsɛ sɛ yɛma owu hunahuna yɛn. Yehowa betumi ama Satan ayɛ nea obetumi nyinaa de abɔ mmɔden akyerɛ sɛ sobo a ɔbɔe sɛ ‘nea onipa wɔ nyinaa ɔde bɛma de apere ne kra’ no yɛ nokware a ɛrempira ne nkoa anokwafo daa. (Hiob 2:4) Yesu dii Onyankopɔn nokware koduu owu mu mpo, na ɛno nti Onyankopɔn nyanee no ma ɔkɔtraa soro. Enti, Yesu tumi de bo a ne desani afɔre no som kɔmae wɔ N’agya soro ahengua no anim, na ayɛ nkwagye ama yɛn. Ɛdenam owusɔre so no, “kuw ketewa” no mufo a wɔyɛ Kristo yɔnko adedifo no wɔ anidaso sɛ wɔne no behyiam wɔ ɔsoro Ahenni no mu. (Luka 12:32) Afoforo fam no, anidaso wɔ hɔ sɛ wobenya owusɔre akɔ daa nkwa mu wɔ paradise asase so. (Dwom 37:11, 29) Kristofo nyinaa bu owusɔre anidaso no sɛ ade a ɛma wonya “tumi a ɛboro so” bere a wohyia sɔhwɛ ahorow a ebetumi ama wɔawu no.—2 Korintofo 4:7.
Nea Enti a Ɛyɛ Kristofo Gyidi Mfitiasede
4. (a) Ɔkwan bɛn so na owusɔre yɛ “mfiase asɛm”? (b) Dɛn na owusɔre kyerɛ ma wiase no nyinaa?
4 Sɛnea wɔaka owusɔre ho asɛm wɔ Hebrifo 6:1, 2 no, ɛyɛ “mfiase asɛm.” Ɛyɛ gyidi fapem no fã a sɛ ɛno nni hɔ a yentumi mmɛyɛ Kristofo a wɔn ho akokwaw da. (1 Korintofo 15:16-19) Nanso, Bible nkyerɛkyerɛ a ɛne owusɔre no yɛ ade foforo koraa ma wiase no. Esiane sɛ nnipa pii nni honhom fam nneɛma ho nimdeɛ nti, wohu asetra yi sɛ ɛno nkutoo ne nea ɛwɔ hɔ. Enti, wodi anigyede akyi. Afei nso wɔn a wodi tete som ahorow akyi—nea ɛwɔ Kristoman mu ne nea enni mu—a wosusuw sɛ wɔwɔ ɔkra bi a enwu da wɔ hɔ. Nanso, saa gyidi no ntumi ne Bible nkyerɛkyerɛ a ɛne owusɔre no nhyia, efisɛ sɛ nnipa wɔ ɔkra a enwu a, ɛnde na owusɔre bɛyɛ ade a ɛho nhia. Mmɔden a yɛbɛbɔ sɛ yɛbɛka nkyerɛkyerɛ abien yi abom ayɛ no biako no bɛma yɛn adwene atu afra mmom sen sɛ ɛbɛma yɛanya anidaso. Yɛbɛyɛ dɛn atumi aboa nnipa komapafo a wɔpɛ sɛ wohu nokware no?
5. (a) Ansa na obi betumi ate owusɔre no ase no, dɛn na ehia sɛ ohu? (b) Kyerɛw nsɛm bɛn na wode bɛkyerɛkyerɛ ɔkra, ne tebea a awufo wom no mu? (d) Sɛ obi de Bible nkyerɛase bi a ɛte sɛ nea ɛmma nokware no nna adi di dwuma a, dɛn na yebetumi ayɛ?
5 Ansa na wɔn a wɔte saa no betumi ate nsiesiei pa a owusɔre no yɛ ase no, ɛsɛ sɛ wonya dekode a wɔfrɛ no ɔkra ne tebea a awufo wom no ho ntease a edi mũ. Mpɛn pii no kyerɛw nsɛm kakraa bi na ehia na yɛama obi a Bible mu nokware ho kɔm de no no ate nsɛm yi ase pefee. (Genesis 2:7; Dwom 146:3, 4; Hesekiel 18:4) Nanso nnɛyi nkyerɛase ahorow bi ne Bible afoforo bi a nkyerɛasefo no de wɔn ankasa nsɛm akyerɛkyerɛ nneɛma mu wom no mma ɔkra ho nokwasɛm no nna adi. Enti ɛho behia sɛ yesusuw nsɛm a wɔde dii dwuma wɔ kasa ahorow a wodii kan de kyerɛw Bible no mu no ho.
6. Ɔkwan bɛn so na wubetumi aboa obi ma wate dekode a ɔkra no yɛ ase?
6 New World Translation no titiriw ho wɔ mfaso kɛse wɔ eyi a wobɛyɛ no mu efisɛ ɛkyerɛ Hebri asɛmfua neʹphesh ne Hela asɛmfua psy·kheʹ a ɛkyerɛ ade koro no ase bere nyinaa sɛ “ɔkra.” Wɔakyerɛw kyerɛw nsɛm pii a wubehu nsɛmfua yi wom no wɔ nkyerɛase yi nsɛm a wɔahyehyɛ no mu. Bible nkyerɛase foforo pii nkyerɛ saa nsɛmfua no ase sɛ “ɔkra” bere nyinaa, na mmom sɛ “abɔde,” “onipa” ne “nkwa”; ebia wɔbɛkyerɛ “me neʹphesh” ase sɛ “me,” ne “wo neʹphesh” ase sɛ “wo.” Bible nkyerɛase afoforo a osuani komapafo bi de bɛtoto New World Translation no ho no bɛboa no ma wahu sɛ mfitiase kasa no mu nsɛmfua a wɔakyerɛ ase “ɔkra” no gyina hɔ ma nnipa ne mmoa nyinaa. Nanso, nsɛm yi nkyerɛ da sɛ ɔkra yɛ ade a aniwa ntumi nhu, biribi a wontumi mfa nsa nka a efi nipadua no mu wɔ owu mu na ɛkɔ so tra ase wɔ baabi foforo.
7. Ɔkwan bɛn so na wubefi Bible no mu akyerɛkyerɛ tebea a wɔn a wɔwɔ Sheol, Hades, ne Gehenna wom no mu?
7 Saa ara nso na New World Translation de Hebri asɛmfua sheʼohlʹ a ɛkyerɛ ase “Sheol” ne Hela asɛmfua haiʹdes a ɛkyerɛ ase “Hades” ne geʹen·na a ɛkyerɛ ase “Gehenna” no di dwuma bere nyinaa. “Sheol” ne “Hades” kyerɛ ade koro. (Dwom 16:10; Asomafo no Nnwuma 2:27) Bible da no adi pefee sɛ Sheol ne Hades nyinaa kyerɛ adesamma ɔdamoa na wɔde bata owu ho, na ɛnyɛ nkwa. (Dwom 89:48; Adiyisɛm 20:13) Kyerɛwnsɛm no nso twe adwene si anidaso a ɛne sɛ wɔnam owusɔre so befi ɔdamoa mu aba no so. (Hiob 14:13; Asomafo no Nnwuma 2:31) Nea ɛne eyi bɔ abira no, daakye nkwa ho anidaso biara nni hɔ mma wɔn a wɔkɔ Gehenna no, na wɔnka ɔkra no ho asɛm da sɛ etumi tra nkwa mu wɔ hɔ.—Mateo 10:28.
8. Ɔkwan bɛn so na owusɔre no ase a obi bɛte no yiye no benya ne su ne ne nneyɛe so nkɛntɛnso?
8 Bere a yɛama saa nsɛm no mu ada hɔ no, afei yebetumi aboa obi ma wate nea owusɔre bɛkyerɛ ama no no ase. Obetumi afi ase anya Yehowa dɔ a ɛma ɔyɛɛ nsiesiei a ɛyɛ anigye saa no ho anisɔ. Awerɛhow a wɔn a wɔn adɔfo awuwu redi no ano betumi abrɛ ase denam anigye a wɔde bɛhwɛ kwan sɛ wɔbɛsan ne wɔn ahyiam bio wɔ Onyankopɔn wiase foforo mu no so. Saa nsɛm yi ase a yɛbɛte no nso hia na ama yɛate nea Kristo wu no kyerɛ ase. Afeha a edi kan no mu Kristofo no hui sɛ Yesu Kristo wusɔre no yɛ Kristofo gyidi no fapem, na ɛno na ebuee kwan maa owusɔre a afoforo benya no. Wɔde nsiyɛ kaa Yesu wusɔre ne anidaso a ɛde ma no ho asɛm kyerɛɛ afoforo. Saa ara nso na wɔn a wɔkyerɛ owusɔre ho anisɔ nnɛ no ho pere wɔn sɛ wɔbɛka nokware a ɛsom bo yi ho asɛm akyerɛ afoforo.—Asomafo no Nnwuma 5:30-32; 10:42, 43.
‘Hades Safe’ a Wɔde Di Dwuma
9. Ɔkwan bɛn so na Yesu dii kan de ‘owu ne Hades nsafe’ no dii dwuma?
9 Awiei koraa no, ɛsɛ sɛ wɔn a wɔbɛka Kristo ho wɔ ne soro Ahenni mu no nyinaa wuwu. Nanso wonim bɔ a ɔhyɛɛ wɔn bere a ɔkaa eyi no: “Miwui, na hwɛ, mete ase daadaa, na mikura owu ne asaman [Hades, NW] nsafe.” (Adiyisɛm 1:18) Na ɔkyerɛ dɛn? Na ɔretwe adwene asi n’ankasa suahu so. Na ɔno nso awu. Nanso, Onyankopɔn annyaw no wɔ Hades. Da a ɛto so abiɛsa no, Yehowa ankasa nyanee no kɔɔ honhom fam asetra mu na ɔmaa no nkwa a owu nnim. (Asomafo no Nnwuma 2:32, 33; 10:40) Afei nso, Onyankopɔn maa no ‘owu ne Hades nsafe’ a ɔde begye afoforo afi adesamma ɔdamoa ne nea efii Adam bɔne mu bae no mu. Esiane sɛ Yesu kura saa nsafe no nti, otumi nyan n’akyidifo anokwafo fi awufo mu. Odi kan nyan n’asafo mufo a wɔde honhom asra wɔn no, ma wɔn akyɛde a ɛsom bo a ɛne nkwa a owu nni mu wɔ soro, sɛnea N’agya yɛ maa no no ara pɛ.—Romafo 6:5; Filipifo 3:20, 21.
10. Bere bɛn na Kristofo anokwafo a wɔasra wɔn no wusɔre no ba?
10 Bere bɛn na Kristofo anokwafo a wɔasra wɔn no benya owusɔre a wɔde kɔ soro no? Bible da no adi sɛ afi ase dedaw. Ɔsomafo Paulo kyerɛkyerɛɛ mu sɛ wobenyan wɔn ‘bere a Kristo aba’ no, na ne ba yi fii ase wɔ afe 1914 mu. (1 Korintofo 15:23) Sɛ anokwafo a wɔde honhom asra wɔn no wie wɔn asase so asetra wɔ ne ba yi mu a, enhia sɛ wɔtwɛn wɔ owu mu kosi sɛ wɔn Wura no bɛsan aba. Sɛ wowu ara pɛ a, wonyan wɔn honhom mu na wɔsakra wɔn “afrɛ so, amonom.” Hwɛ anigye ara a wonya esiane sɛ wɔn nnwuma pa “di wɔn akyi” nti!—1 Korintofo 15:51, 52; Adiyisɛm 14:13.
11. Owusɔre bɛn na ɛbɛwɔ hɔ ama nnipa nyinaa, na bere bɛn na ebefi ase?
11 Nanso ɛnyɛ owusɔre a Ahenni adedifo nya de kɔ ɔsoro asetram no nkutoo ne owusɔre a ɛwɔ hɔ. Nokwasɛm a ɛyɛ sɛ wɔfrɛ no “ɔsɔre a edi kan” wɔ Adiyisɛm 20:6 no kyerɛ sɛ ɛsɛ sɛ foforo di akyi ba. Wɔn a wonya owusɔre a edi akyiri yi bi no benya anidaso a ɛyɛ anigye sɛ wobenya daa nkwa wɔ Paradise asase so. Bere bɛn na ɛbɛba? Adiyisɛm nhoma no kyerɛ sɛ ɛbɛba wɔ bere a wɔayi “asase ne ɔsoro”—mprempren nneɛma nhyehyɛe bɔne, ne emu atumfoɔ—afi hɔ no. Saa nhyehyɛe dedaw no awiei abɛn pɛɛ. Ɛno akyi no, asase so owusɔre no befi ase wɔ Onyankopɔn bere a wahyɛ mu.—Adiyisɛm 20:11, 12.
12. Henanom na wɔbɛka anokwafo a wobenyan wɔn ma wɔabɛtra asase so no ho, na dɛn nti na ɛyɛ akwanhwɛ a ɛyɛ anigye?
12 Henanom na wɔbɛka asase so owusɔre no ho? Wɔn a wɔbɛka ho no bi ne Yehowa tete asomfo anokwafo, mmarima ne mmea a esiane sɛ na wɔwɔ owusɔre mu gyidi a ɛyɛ den nti “wɔampɛ ogye” no. Kyerɛ sɛ, wɔannyae wɔn mudi mu a wokura maa Onyankopɔn no mu sɛnea ɛbɛyɛ a wɔbɛkwati owu yayaw, a ɛyɛ ɔpatuwu no. Hwɛ anigye ara a ɛbɛyɛ sɛ w’ankasa wubehu wɔn na woate nsɛm a esisii a wɔaka ho asɛm tiawa wɔ Bible mu no mu nkyerɛkyerɛmu afi wɔn ankasa anom! Wɔn a wobenyan wɔn aba asase so asetram nso ne Habel a na ɔyɛ Yehowa dansefo nokwafo a odi kan no; Henok ne Noa a na wɔyɛ Onyankopɔn nsɛm a ɔde bɔɔ kɔkɔ ansa na Nsuyiri no reba no ho adawurubɔfo akokodurufo no; Abraham ne Sara a wogyee abɔfo no; Mose a wɔnam no so de Mmara no mae wɔ Bepɔw Sinai so no; adiyifo akokodurufo te sɛ Yeremia a ohuu Yerusalem sɛe wɔ 607 A.Y.B. mu no; ne Osuboni Yohane a ɔtee sɛ Onyankopɔn ankasa di Yesu ho adanse sɛ Ne Ba ne no no. Afei nso, mmarima ne mmea anokwafo pii a wowuwui wɔ mprempren nneɛma nhyehyɛe bɔne yi nna a edi akyiri yi mu no nso bɛba.—Hebrifo 11:4-38; Mateo 11:11.
13, 14. (a) Dɛn na ɛbɛba Hades ne awufo a wɔwom no so? (b) Henanom na wɔbɛka wɔn a wobenyan wɔn no ho, na dɛn ntia?
13 Bere kɔ so no, wobenyan afoforo nso afi awufo mu aka Onyankopɔn asomfo anokwafo no ho a ɛrenka obiara wɔ adesamma ɔdamoa mu. Yebetumi ahu sɛnea wobenyan awufo nyinaa afi adamoa mu no wɔ sɛnea Yesu de ‘Hades safe’ no bedi dwuma ama adesamma no mu. Wɔda eyi adi wɔ anisoadehu bi a wɔde maa ɔsomafo Yohane a ohui sɛ wɔatow Hades ‘akyene ogya tare no mu’ wom no mu. (Adiyisɛm 20:14) Dɛn na ɛno kyerɛ? Ɛkyerɛ sɛ wɔasɛe Hades, adesamma damoa no koraa. Efi hɔ koraa, a wɔayi awufo nyinaa afi mu, efisɛ Yehowa asomfo anokwafo a wobenyan wɔn akyi no, Yesu fi mmɔborohunu mu nso de wɔn a wɔnteɛ mpo bɛsan aba nkwa mu. Onyankopɔn Asɛm ma yɛn awerɛhyem sɛ: “Owusɔre a wɔn a wɔteɛ ne wɔn a wɔnteɛ bɛsɔre no bɛba.”—Asomafo no Nnwuma 24:15.
14 Wɔn a wɔnteɛ yi mu biara nni hɔ a wobenyan no na wɔabu no atɛn kɛkɛ sɛ ɔfata sɛ owu bio. Wɔbɛboa wɔn ma wɔama wɔn asetra ne Yehowa akwan ahyia wɔ tebea a trenee wom a ɛbɛba Onyankopɔn Ahenni mu wɔ wiase nyinaa no mu. Anisoadehu no kyerɛe sɛ wobebue “nkwa nhoma” no mu. Enti, wobenya hokwan a ɛbɛma wɔakyerɛw wɔn din wom. Wobebu wɔn “atɛn sɛnea wɔn nnwuma” a wɔyɛe wɔ owusɔre no akyi no “te.” (Adiyisɛm 20:12, 13) Enti, sɛ wugyina nea awiei koraa no ebefi mu aba no so susuw ho a, wɔn owusɔre no betumi ada adi sɛ ɛyɛ “nkwa sɔre” na ɛrenyɛ “[afobu] atemmu sɔre” a wontumi nkwati.—Yohane 5:28, 29.
15. (a) Henanom na wɔrennyan wɔn? (b) Ɔkwan bɛn so na ɛsɛ sɛ owusɔre no ho nokware nimdeɛ no ka yɛn asetra?
15 Nanso, ɛnyɛ wɔn a wɔatra ase pɛn na wɔawuwu nyinaa na wobenyan wɔn. Ebinom yɛɛ bɔne ahorow a wɔrentumi mfa mfiri wɔn. Saafo no nni Hades, na mmom Gehenna, baabi a wobenya daa ɔsɛe. Wɔn a wɔka eyinom ho nso ne wɔn a wobekum wɔn wɔ “ahohiahia kɛse” a abɛn mprempren no mu no. (Mateo 12:31, 32; 23:33; 24:21, 22; 25:41, 46; 2 Tesalonikafo 1:6-9) Enti, bere a Yehowa yi mmɔborohunu soronko adi de nyan awufo fi Hades no, owusɔre ho anidaso no nyɛ biribi a ɛsɛ sɛ yegyina so yɛ anibiannaso wɔ sɛnea yɛbɔ yɛn bra nnɛ no ho. Wɔn a wɔhyɛ da tew atua tia Yehowa tumidi no ntumi nnya owusɔre biara. Ɛsɛ sɛ saa nimdeɛ yi kanyan yɛn ma yɛda no adi sɛ yɛwɔ anisɔ kɛse ma Onyankopɔn dom denam n’apɛde a yɛbɛyɛ wɔ yɛn asetram no so.
Owusɔre Ho Anidaso no Hyɛ Yɛn Den
16. Ɔkwan bɛn so na owusɔre ho anidaso no yɛ ade a ebetumi ama yɛanya ahoɔden kɛse?
16 Yɛn a yɛagye owusɔre ho anidaso no atom no tumi nya ahoɔden kɛse fi mu. Mprempren, sɛ yɛbɛn yɛn nkwa nna awiei a, yenim sɛ yentumi ntu owu nhyɛ da nkosi daa—ɛmfa ho aduruyɛ akwan biara a wɔbɛfa so asa yɛn yare no. (Ɔsɛnkafo 8:8) Sɛ yɛde nokwaredi asom Yehowa wɔ n’ahyehyɛde no mu a, yebetumi de ahotoso kɛse ahwɛ daakye kwan. Yenim sɛ yɛnam owusɔre so benya nkwa bio wɔ Onyankopɔn bere a ɛsɛ mu. Na nkwa bɛn ara na ɛbɛyɛ sɛɛ yi! Sɛnea ɔsomafo Paulo frɛɛ no no, ɛyɛ “nokware nkwa.”—1 Timoteo 6:19; Hebrifo 6:10-12.
17. Dɛn na ebetumi aboa yɛn ma yɛakura yɛn mudi mu ama Yehowa?
17 Nim a yenim sɛ owusɔre wɔ hɔ ne Onii a ɔbɛyɛ saa nsiesiei no ma yetumi yɛ den wɔ gyidi mu. Sɛ ɛba mpo sɛ ataafo atirimɔdenfo de owu hunahuna yɛn a, eyi hyɛ yɛn den ma yedi Onyankopɔn nokware. Satan fi tete de ɔpatuwu ho hu adi dwuma sɛ nea ɔnam so de nkurɔfo yɛ nkoa. Nanso na ehu a ɛte saa nni Yesu mu. Odii Yehowa nokware koduu owu mu tɔnn. Yesu nam n’agyede afɔre no so de nea wɔnam so begye afoforo afi ehu a ɛte saa mu no mae.—Hebrifo 2:14, 15.
18. Dɛn na aboa Yehowa asomfo ma wɔanya mudi mu kura ho kyerɛwtohɔ soronko a ɛte saa?
18 Esiane gyidi a Yehowa asomfo wɔ wɔ Kristo afɔrebɔ nsiesiei no ne owusɔre no mu nti, wɔanya kyerɛwtohɔ soronko sɛ mudi mu kurafo. Wɔada wɔn ho adi wɔ nhyɛso ase sɛ ‘wɔnnɔ wɔn ankasa kra’ nsen sɛnea wɔdɔ Yehowa no. (Adiyisɛm 12:11) Wɔ nyansam no, wɔmpo wɔn Kristofo nnyinasosɛm mfa mmɔ mmɔden sɛ wɔbɛkora wɔn nkwa a wɔwɔ mprempren no so. (Luka 9:24, 25) Wonim sɛ sɛ wɔhwere wɔn nkwa mprempren esiane Yehowa tumidi akyi a wogyina pintinn nti a, ɔnam owusɔre so betua wɔn ka. So wowɔ gyidi a ɛte saa? Sɛ wodɔ Yehowa ampa na wode nea owusɔre ho anidaso kyerɛ ma wo hyɛ wo komam a, wubenya bi.
Asɛm no mu Ntĩmu
• Dɛn nti na ɛho hia sɛ obi te nea ɔkra no yɛ ne tebea a awufo wom ase ansa na watumi akyerɛ owusɔre no ho anisɔ?
• Henanom na wɔbɛsan afi awufo mu aba, na ɔkwan bɛn so na ɛsɛ sɛ saa nimdeɛ yi ka yɛn?
• Ɔkwan bɛn so na owusɔre ho anidaso no hyɛ yɛn den?
[Adesua no ho Nsɛmmisa]
[Mfonini wɔ kratafa 84, 85]
Yehowa hyɛ bɔ sɛ owusɔre a wɔn a wɔteɛ ne wɔn a wɔnteɛ benya no bɛba
