Ti Dunwɔtwe

‘Wɔnyɛ Wiase no Fã’

1. (a) Dɛn ho mpae na Yesu bɔ maa n’asuafo no ansa na ɔrewu? (b) Dɛn nti na ‘wiase no fã a wɔnyɛ’ no ho hia yiye?

ANADWO ansa na wɔrekum Yesu no, ɔbɔɔ mpae maa n’asuafo no. Esiane sɛ na Yesu nim sɛ Satan de nhyɛso bɛba wɔn so denneennen nti, ɔka kyerɛɛ N’agya sɛ: “Mensrɛ sɛ yi wɔn fi wiase, na mmom sɛ hwɛ wɔn so esiane ɔbɔnefo no nti. Wɔnyɛ wiase no fã, sɛnea me nso menyɛ wiase no fã no.” (Yohane 17:15, 16, NW) Dɛn nti na wɔn ho a wɔbɛtwe afi wiase no ho no hia kɛse saa? Efisɛ Satan ne wiase yi sodifo. Kristofo mpɛ sɛ wɔbɛyɛ wiase a ɛhyɛ ne tumi ase no fã.—Luka 4:5-8; Yohane 14:30; 1 Yohane 5:19.

2. Akwan bɛn so na na Yesu ‘nyɛ wiase no fã’?

² Wiase no fã a Yesu anyɛ no nkyerɛ sɛ na ɔnnɔ afoforo. Mmom no, ɔsaa ayarefo yare, nyanee awufo, na ɔkyerɛkyerɛɛ nkurɔfo Onyankopɔn Ahenni ho ade. Ɔde ne nkwa mpo too hɔ maa adesamma. Nanso wannɔ nkurɔfo a wɔdaa Satan wiase no honhom adi no amumɔyɛ ne wɔn nneyɛe bɔne no. Enti, ɔbɔɔ kɔkɔ wɔ nneɛma te sɛ akɔnnɔ bɔne, ade dodowpɛ akyidi, ne anuonyampɛ ho. (Mateo 5:​27, 28; 6:​19-21; Luka 20:​46, 47) Enti ɛnyɛ nwonwa sɛ Yesu kwatii amammuisɛm. Ɛwom sɛ na ɔyɛ Yudani de, nanso wannyina ɔfã bi wɔ amammuisɛm mu ntawntawdi a na ɛwɔ Romafo ne Yudafo ntam no mu.

 “M’ahenni Mfi Wi Yi Ase”

3. (a) Anototo bɛn na Yudafo nyamesom akannifo de baa Yesu so wɔ Pilato anim, na dɛn ntia? (b) Dɛn na ɛkyerɛ sɛ na Yesu ani nnye ho sɛ ɔbɛyɛ ɔhene sɛ ɔdesani?

³ Susuw nea esii bere a Yudafo nyamesom akannifo no ma wɔkyeree Yesu de no kɔmaa Pontio Pilato, Roma amrado no ho hwɛ. Nokwarem no, na saa akannifo no ahaw efisɛ na Yesu apa wɔn nyaatwomyɛ ho ntama. Nea ɛbɛyɛ na wɔanya amrado no ma wayɛ ade atia Yesu nti, wɔtotoo n’ano sɛ: “Yɛahu sɛ onipa yi resɛe yɛn man, na wabara sɛ wonnyi Kaesare tow, na ɔka sɛ ɔno ankasa ne ɔhene Kristo no.” (Luka 23:2) Ɛda adi pefee sɛ na eyi yɛ atoro efisɛ bere a nkurɔfo no pɛe sɛ wɔde Yesu si hene wɔ afe a na atwam no mu no, wampene. (Yohane 6:15) Ná onim sɛ ɔbɛyɛ ɔsoro Hene daakye. (Luka 19:11, 12) Afei nso, na ɛnyɛ nnipa na wɔde no besi hene, na mmom Yehowa.

4. Ná Yesu su wɔ towtua ho ne dɛn?

⁴ Aka nnansa ma wɔakyere Yesu no, Farisifo no bɔɔ mmɔden sɛ wɔbɛma Yesu aka biribi a ɛbɛkyekyere no afa towtua ho. Nanso ɔkae sɛ: “Momfa denare [a ɛyɛ Romafo sika] mmɛkyerɛ me! Hena mfonini ne nkyerɛwee na ɛwɔ so yi?” Bere a wɔkae sɛ, “Kaesare de” no, obuae sɛ: “Ɛnde momfa Kaesare de mma Kaesare ne Nyankopɔn de mma Onyankopɔn.”​—Luka 20:​20-25.

5. (a) Asuade bɛn na Yesu de maa n’asuafo no bere a wɔkyeree no no? (b) Ɔkwan bɛn so na Yesu kyerɛkyerɛɛ nea ɔyɛe no mu? (d) Dɛn na efii saa asɛnni no mu bae?

⁵ Yesu ankyerɛkyerɛ sɛ wɔntew atua ntia wiase tumidi da. Bere a asraafo ne nnipa foforo bae sɛ wɔrebɛkyere Yesu no, Petro twee nkrante twaa mmarima  no biako aso. Nanso Yesu kae sɛ: “Fa wo nkrante san hyɛ nea ɛhyɛ, na wɔn a wɔtwe nkrante nyinaa, nkrante ano na wobewu.” (Mateo 26:​51, 52) Ade kyee no, Yesu kyerɛkyerɛɛ nea enti a ɔyɛɛ saa no mu kyerɛɛ Pilato sɛ: “M’ahenni mfi wi yi ase. Sɛ m’ahenni fi wi yi ase a, anka m’asomfo bɛko na wɔamfa me anhyɛ Yudafo no nsa.” (Yohane 18:36) Pilato gye toom sɛ na “afobusɛm biara” nni hɔ a etia Yesu. Nanso basabasayɛfo no nhyɛso maa Pilato gyaee mu maa wɔn, na ɔma wɔbɔɔ Yesu asɛndua mu.​—Luka 23:​13-15; Yohane 19:​12-16.

Asuafo Di Yesu Akanni Akyi

6. Ɔkwan bɛn so na tete Kristofo no kyerɛe sɛ wɔpoo wiase honhom no nanso na wɔdɔ nnipa?

⁶ Enti Yesu asuafo no tee nea na wiase no fã a wɔnyɛ no hwehwɛ no ase. Na ɛhwehwɛ sɛ wɔkwati wiase no subammɔne ne wɔn nneyɛe bɔne a nea na ɛka ho bi ne Romafo mmoa agoru ne agodibea anigyede a basabasayɛ ne ɔbrasɛe wom no. Ɛno nti wɔfrɛɛ asuafo no adesamma atamfo. Nanso sɛ anka wɔbɛtan wɔn yɔnko nnipa mmom no, wɔyeree wɔn ho boaa afoforo ma wonyaa Onyankopɔn nkwagye nsiesiei so mfaso.

7. (a) Esiane sɛ na tete asuafo no nyɛ wiase no fã nti, dɛn na ɛbaa wɔn so? (b) Wobuu amammui sodifo no ne towtua dɛn, na dɛn ntia?

⁷ Mpɛn pii na aban mpanyimfo a wɔaka Yesu akyidifo no ho atosɛm akyerɛ wɔn no taa wɔn sɛnea na wɔyɛ Yesu no. Nanso, ɔsomafo Paulo kyerɛw Kristofo a wɔwɔ Roma no wɔ bɛyɛ afe 56 Y.B. mu hyɛɛ wɔn nkuran sɛ ‘wɔmmrɛbrɛ wɔn ho ase nhyɛ tumi a ɛwɔ anuonyam [amammui sodifo] no ase, na tumi biara nni  hɔ sɛ nea efi Nyankopɔn.’ Ɛnkyerɛ sɛ Yehowa na ɔhyehyɛ wiase nniso horow no, na mmom ɔma wɔn kwan sɛ wɔntra hɔ nkosi sɛ N’ahenni no nkutoo bedi asase nyinaa so tumi. Sɛnea ɛfata no, Paulo tuu Kristofo fo sɛ wonni aban mpanyimfo nni na wontua tow.​—Romafo 13:​1-7; Tito 3:​1, 2.

8. (a) Ɛhe na ɛsɛ sɛ Kristofo brɛ wɔn ho ase hyɛ tumi a ɛwɔ anuonyam no ase kodu? (b) Ɔkwan bɛn so na tete Kristofo no dii Yesu nhwɛso akyi?

⁸ Nanso, wɔn ho ase a na wɔbɛbrɛ ama amammui sodifo no wɔ baabi a ekosi, na ɛnyɛ nea enni anohyeto. Sɛ ɛba sɛ Yehowa mmara ne nnipa mmara nhyia a, ɛsɛ sɛ wɔn a wɔsom Yehowa no di Ne mmara so. Hyɛ nea On the Road to Civilization​—A World History nhoma no ka fa tete Kristofo ho no nsow: “Kristofo anyɛ Roma ɔmamma nnwuma bi. Kristofo no . . . tee nka sɛ ɛne wɔn gyidi nhyia sɛ wɔbɛyɛ asraafo adwuma. Na wonnye amammui dibea. Na wɔnsom ɔhempɔn no.” Bere a Yudafo asɛnnibea kɛse no ‘baraa’ asuafo no sɛ wonnyae asɛnka no, wobuae sɛ: “Ɛsɛ sɛ yetie Onyankopɔn mmom sen nnipa.”—Asomafo no Nnwuma 5:27-29.

9. (a) Dɛn nti na Kristofo a na wɔwɔ Yerusalem no yɛɛ nea wɔyɛe wɔ afe 66 Y.B. mu no? (b) Ɔkwan bɛn so na ɛno yɛ nhwɛso pa?

⁹ Ɛdefa amammuisɛm ne sraadi ho ntawntawdi ho no, asuafo no kuraa afã biara a na wonni no mu denneennen. Wɔ afe 66 Y.B. mu no, Yudafo a na wɔwɔ Yudea no tew atua tiaa Kaesare. Ntɛm ara na Roma asraafo twaa Yerusalem ho hyiae. Dɛn na Kristofo a wɔwɔ kurow no mu yɛe? Wɔkaee Yesu afotu a ɛne sɛ womfi kurow no mu no. Bere a Romafo no san wɔn  akyi kɔe bere tiaa bi no, Kristofo no guan twaa Yordan Asubɔnten no kɔɔ Pella mmepɔw no so. (Luka 21:​20-24) Ɔfã biara a wɔannyina no yɛ nhwɛso ma nokware Kristofo a na wɔbɛba akyiri yi no.

Kristofo a Wonni Afã Biara Wɔ Awiei Bere Yi Mu

10. (a) Adwuma bɛn na Yehowa Adansefo yɛ a wonni adagyew, na dɛn ntia? (b) Dɛn mu na wonni afã biara?

¹⁰ So abakɔsɛm kyerɛwtohɔ kyerɛ sɛ kuw bi a wɔwɔ awiei bere yi mu afa afã biara a wonni so de asuasua tete Kristofo no? Yiw, Yehowa Adansefo ayɛ saa. Wɔakɔ so aka saa bere yi mu nyinaa sɛ Onyankopɔn Ahenni no ne ɔkwan biako pɛ a wɔbɛfa so ama asomdwoe, yiyedi, ne anigye a ɛtra hɔ daa aba ama wɔn a wɔdɔ trenee no. (Mateo 24:14) Na wɔakura afã biara a wonni no mu denneennen wɔ amanaman ntam ntawntawdi no ho.

11. (a) Ɔkwan bɛn so na afã biara a Adansefo no nni no bɔ asɔfo no nneyɛe ahorow abira? (b) Adwene bɛn na Yehowa Adansefo kura wɔ nea afoforo yɛ wɔ amammuisɛm mu no ho?

¹¹ Nea ɛne eyi bɔ abira koraa no, wiase yi nyamesom mu asɔfo de wɔn ho ahyehyɛ wiase amammuisɛm mu yiye. Wɔ nsase bi so no, wɔde nnamyɛ akamfo wɔn a wɔrehwehwɛ dibea, na wɔakasa atia ebinom. Asɔfo no mu binom ankasa kura amammui dibea. Afoforo ahyɛ amammui sodifo ma wɔapene dwumadi ahorow a asɔfo no ani gye ho so. Nanso, Yehowa Adansefo mfa wɔn ho nhyehyɛ amammuisɛm mu. Saa ara na wɔmmfa wɔn ano ntoto nea afoforo yɛ sɛ ebia wɔbɛdɔm amammui kuw bi, ahwehwɛ dibea anaasɛ wɔbɛtow aba de apaw afoforo no mu. Yesu kae sɛ n’asuafo  renyɛ wiase no fã nti ɛnsɛ sɛ Yehowa Adansefo de wɔn ho hyɛ amammuisɛm mu.

12. Esiane sɛ wiase yi mu nyamesom ahorow no gyina afã bi akyi nti, dɛn na aba?

¹² Sɛnea Yesu ka siei no, amanaman no adi ako mpɛn pii. Na mpo aman ahorow mu akuw horow ako atia wɔn ho wɔn ho. (Mateo 24:​3, 6, 7) Ɛkame ayɛ sɛ nyamesom akannifo agyina ɔman biako anaa kuw bi akyi atia foforo bere nyinaa, na wɔahyɛ wɔn akyidifo nkuran ma wɔayɛ saa. Dɛn na afi mu aba? Ɔsom biako mufo akunkum wɔn ho wɔ akodi mu esiane ɔman anaa abusuakuw foforo mu a wofi nti. Eyi ne Onyankopɔn apɛde nhyia.—1 Yohane 3:10-12; 4:8, 20.

13. Afã biara a Yehowa Adansefo nni no ho adanse bɛn na ɛwɔ hɔ?

¹³ Nanso, Yehowa Adansefo akura afã biara a wonni wɔ ntawntawdi biara mu no mu denneennen. November 1, 1939, Engiresi Ɔwɛn-Aban no kae sɛ: “Wɔn a wɔwɔ Awurade afã nyinaa rennyina amanaman a wɔredi ako no mu biara afã.” Yehowa Adansefo a wɔwɔ amanaman nyinaa mu kɔ so kura saa gyinabea yi mu wɔ tebea horow nyinaa mu. Wɔmma wiase yi amammuisɛm ne akodi a ɛde mpaapaemu ba no nsɛe wɔn amanaman ntam onuayɛ no. Wɔde “wɔn nkrante abobɔ nsɔw, ne wɔn mpeaw ayeyɛ nnare.” Esiane sɛ wonni afã biara nti, wonsua akodi bio.—Yesaia 2:3, 4; 2 Korintofo 10:​3, 4.

14. Esiane sɛ Yehowa Adansefo akɔ so atwe wɔn ho afi wiase no ho nti, dɛn na aba wɔn so?

¹⁴ Nea afi afã biara a wonni mu aba no bi ne dɛn? Yesu kae sɛ: ‘Esiane sɛ monyɛ wiase no fã nti na wiase  no tan mo.’ (Yohane 15:19) Esiane Onyankopɔn asomfo a Yehowa Adansefo yɛ nti wɔde wɔn mu pii agu afiase. Wɔayɛ ebinom ayayade, akunkum ebinom mpo, te sɛ nea ɛtoo afeha a edi kan no mu Kristofo no. Nea ama eyi aba saa ne sɛ, Satan, “wi yi ase nyame” no sɔre tia Yehowa asomfo a wɔnyɛ ne fã no.—2 Korintofo 4:4; Adiyisɛm 12:12.

15. (a) Ɛhe na amanaman nyinaa retu aperenten akɔ, na dɛn na Yehowa Adansefo hwɛ yiye sɛ wɔbɛkwati? (b) Dɛn nti na yɛn ho a yɛbɛtwe afi wiase no ho no yɛ aniberesɛm saa?

¹⁵ Yehowa asomfo ani gye sɛ wɔnyɛ wiase no fã, efisɛ amanaman nyinaa retu aperenten akohyia wɔn awiei wɔ Harmagedon. (Daniel 2:44; Adiyisɛm 16:14, 16; 19:11-21) Saa asiane no rento yɛn, efisɛ yɛatwe yɛn ho afi wiase no ho. Sɛ́ nnipa a yɛayɛ biako wɔ wiase nyinaa no, yegyina Onyankopɔn soro Ahenni no afã pintinn. Nokwarem no, wiase no fã a yɛnyɛ no ma wodi yɛn ho fɛw, na wɔtaa yɛn. Nanso, ɛrenkyɛ, ɛno begyae, efisɛ wɔbɛsɛe mprempren wiase bɔne yi a ɛhyɛ Satan ase no korakora. Nanso, wɔn a wɔsom Yehowa no bɛtra ase daa wɔ ne trenee wiase foforo no mu wɔ Onyankopɔn Ahenni mu.—2 Petro 3:10-13; 1 Yohane 2:15-17.

Asɛm no mu Ntĩmu

• Ɔkwan bɛn so na Yesu daa nea ‘wiase no fã a wɔnyɛ’ no kyerɛ no adi?

• Ná tete Kristofo no su wɔ (a) wiase honhom (b) amammui sodifo ne (d) towtua ho te dɛn?

• Akwan bɛn so na Yehowa Adansefo a wɔwɔ hɔ nnɛ ada afã biara a wonni sɛ Kristofo no adi?

[Adesua no ho Nsɛmmisa]

 [Kratafa 165 mfonini]

Yesu kyerɛkyerɛɛ mu sɛ ɔno ne n’akyidifo no nyɛ ‘wiase no fã’