Nnipa Mu a Wɔpaapae Wɔ Ahenni Ɔsɛmpɔw no Ho
Ti 15
Nnipa Mu a Wɔpaapae Wɔ Ahenni Ɔsɛmpɔw no Ho
1. Dɛn nti na mpaapaemu a wɔyɛ wɔ Ahenni ho ɔsɛmpɔw no ho no yɛ aniberesɛm ma yɛn mu biara?
GYINAESI bi a anibere wom da yɛn mu biara anim. Ɔsɛmpɔw no ne su a ɛsɛ sɛ yenya wɔ Yehowa Mesia Ahenni a ɛhyɛ Yesu Kristo nsa no ho. Wɔrepaapae amanaman nyinaa mu nnipa mu wɔ ɔsɛmpɔw yi ho. Onipa biara nneyɛe so na wogyina de no ka akuw abien no mu biako ho. Akuw yi mu biako pɛ na wobenya nkwa wɔ wiase sɛe a ɛbɛba no mu.—Mateo 24:40, 41.
2. (a) Ɔkwan bɛn so na Mesia Ahenni yi fa Yehowa tumidi ho? (b) Dɛn na ɛrenkyɛ Ahenni no bɛyɛ, na enti dɛn na ɛsɛ sɛ yesusuw ho anibere so?
2 Yehowa de ne Ba a wasra no, ne Mesia no, asi ahengua so wɔ ɔsoro dedaw. Bere a ‘amanaman no mmere a wɔahyɛ’ baa awiei wɔ 1914 mu no, Onyankopɔn de amanaman no maa Yesu Kristo sɛ n’agyapade—asase nyinaa sɛ n’ahode. (Dwom 2:6, 8) Mesia nniso a Yehowa Hene a wasra no na ɔte ahengua so wom no na Onyankopɔn nam so bɛma n’ankasa atirimpɔw a nyansa ne ɔdɔ wom a ɛfa asase no ho no ayɛ hɔ. Enti, su a wuyi no adi wɔ Ahenni no ho kyerɛ sɛnea wote nka wɔ Yehowa amansan tumidi ho. Ɛrenkyɛ Mesia Ahenni no ‘bebubu’ amammui nhyehyɛe a ɛwɔ nnipa nsɛm so nkɛntɛnso mprempren no nyinaa ‘ma asã,’ na abɛyɛ asase nyinaa so nniso biako pɛ. (Daniel 2:44; Adiyisɛm 19:11-21) Sɛ efi ase sɛ ɛredan asase no Paradise a, ɛhe na wobɛwɔ? So wobɛyɛ wɔn a ɛbɛkyerɛ wɔn kwan na wɔanya asetra a ɛyɛ pɛ no mu biako? Yesu kaa nea nnipa a wɔte ase mprempren no betumi agyina so anya saa anidaso no bi ho asɛm.
ƆHENE NO NE NE “NUANOM”
3. Dɛn na Yesu ka ho asɛm wɔ Mateo 25:31-33?
3 Bere a Yesu reka “nneɛma nyhehyɛe no awiei” ho asɛm akyerɛ n’asomafo no, ɔde mmebu anaa mfatoho pii dii dwuma. Ɔkae wɔ nea etwa to no mu sɛ: “Na onipa ba no bɛba n’anuonyam mu a n’abɔfo nyinaa ka ne ho no, ɔbɛtra n’anuonyam ahengua so. Na wɔbɛboaboa amanaman nyinaa ano n’anim. Na ɔbɛpaapae wɔn mu, sɛnea oguanhwɛfo paapae nguanten ne mpapo mu. Na ɔde nguanten no begyina ne nifa, na ɔde mpapo no agyina ne benkum.”—Mateo 24:3, NW; 25:31-33.
4. (a) Ɔkwan bɛn so na ɛbɛ yi fa nea wɔka wɔ Daniel 7:13, 14 no ho? (b) Nsɛm bɛn na mfaso wɔ so sɛ yebebisa yɛn ho?
4 Hyɛ no nsow sɛ Yesu ka n’ankasa ho asɛm wɔ ha sɛ “onipa ba,” sɛnea na wadi kan ayɛ mpɛn pii dedaw wɔ nkɔmhyɛ yi mu no. (Mateo 24:27, 30, 37, 39, 44) Asɛm yi a ɔde dii dwuma no ma wɔkaee nkɔmhyɛ mu anisoadehu a na wɔadi kan de ama Daniel wɔ bɛyɛ mfeha asia a atwam no, nea odiyifo no kyerɛw ho asɛm sɛ: “Mede hwɛ, anadwo adehu no mu ara, na hwɛ, obi a ɔte sɛ onipa ba [Yesu Kristo] nam ɔsoro amununkum mu reba, na oduu nea ne nna akyɛ no [Yehowa Nyankopɔn] nkyɛn, na wɔma ɔbɛn n’anim. Na ɔno na wɔde tumi ne anuonyam ne ahenni maa no maa aman, nkurɔfo, ne ɔkasa horow nyinaa som no; ne tumi yɛ daa tumi a ɛrentwam da, na n’ahenni yɛ nea ɛrensɛe da.” (Daniel 7:13, 14; Hebrifo 2:5-8) Wɔde saa nniso tumi no ama Yesu Kristo dedaw. Ofi ne soro ahengua so redi tumi fi 1914. Dɛn na w’ankasa woayɛ wɔ ne tumidi no ho? W’abrabɔ di adanse sɛ wode obu a ɛfata ma Onipa yi a Onyankopɔn ankasa ayɛ no asase nyinaa Sodifo no?
5. Ɔkwan bɛn so na Kristo hu sɛ ka a obi ka sɛ ɔde ne ho ama no sɛ Ɔhene no yɛ nokware?
5 Nsɛm ara kwa nnɔɔso. Ɛnyɛ den sɛ obi bɛka sɛ ogye Onyankopɔn Ahenni no di, na ɔdɔ Yesu Kristo. Nanso Yesu kyerɛe wɔ nguanten ne mpapo ho bɛ a obui no mu sɛ, esiane sɛ wɔremfa wɔn aniwa nhu no wɔ ɔsoro nti, ade titiriw a obegyina so de ahu sɛ nea obi ka no yɛ nokware ne sɛnea ɔbɛyɛ Kristo asase so ananmusifo, ne “nuanom” no.—Mateo 25:40, 45.
6. Henanom ne Kristo “nuanom” yi?
6 Wɔne henanom? Wɔn a Onyankopɔn apaw wɔn afi adesamma mu sɛ wɔne Kristo nyɛ adedifo wɔ ɔsoro Ahenni no mu no. Eyinom ano si 144,000, na wɔn mu nkaefo bi pɛ na wɔda so ara wɔ asase so. (Adiyisɛm 14:1, 4) Esiane sɛ wɔnam Onyankopɔn honhom dwumadi so ‘awo wɔn foforo’ nti, wɔyɛ Onyankopɔn mma, ma enti wɔka wɔn ho asɛm wɔ Kyerɛwnsɛm no mu sɛ Yesu Kristo “nuanom.” (Yohane 3:3; Hebrifo 2:10, 11) Yesu bu nea nnipa yɛ ma ‘anuanom’ yi, ‘wɔn mu ɔketewa’ mpo no, sɛ wɔyɛ ma ɔno ankasa.
7. Dɛn nti na Kristo “nuanom” no nyɛ Kristoman asɔre ahorow no mufo?
7 Saa Kristo “nuanom” yi wɔ he wɔ yɛn bere yi mu? Wobɛkɔ akɔhwehwɛ wɔn wɔ Kristoman mu asɔrekɔfo mu? Wiɛ, dɛn na Yesu ka faa ne nokware akyidifo ho? “Wɔnyɛ wiase no fã, sɛnea menyɛ wiase no fã no.” (Yohane 17:16, NW) Wobetumi aka Kristoman mu asɔre ahorow ne emufo ho asɛm saa? Ne titiriw no, wɔn su ne wɔn abrabɔ te sɛ nea nnipa taa da no adi wɔ wiase no beae a wɔwɔ no ara pɛ. Wonim no yiye sɛ asɔre ahorow no de wɔn ho hyehyɛ amammuisɛm mu. Bere a na wɔrehyehyɛ Amanaman Nkabom no Mmara wɔ 1945 mu no, ná Protestantfo, Katolekfo, ne Yudafo ananmusifo wɔ hɔ sɛ afotufo. Nnansa yi mfe mu no, Roma paapanom akamfo Amanaman Nkabom no sɛ “biakoyɛ ne asomdwoe ho anidaso a etwa to,” ne “asomdwoe ne atɛntrenee ho nhyiam a ɛkorɔn.” Wiase Asɔre Nkabom Bagua a emu nyamesom akuw bɛyɛ 300 no de sika ama mpo ma wɔde boa amammui mu ɔman anidan. Nanso Yesu Kristo ka kyerɛɛ Romafo amrado Pilato sɛ: “M’ahenni mfi ha.”—Yohane 18:36.
8. (a) Dɛn na aboa wo ma woahu Kristo “nuanom” no? (b) Ahenni ho asɛnka adwuma no hia wɔn dɛn?
8 Nokwasɛm ahorow kyerɛ sɛ kuw biako pɛ na agyina Ahenni no afã pintinn, na ɛbɔ mmɔden yiye sɛ ɛbɛbɔ no dawuru wɔ wiase nyinaa, na ɛkwati sɛ ɛde ne ho bɛhyehyɛ wiase no amammuisɛm biara mu koraa. Kuw yi ne Yehowa Adansefo. Wohu Kristo “nuanom” nkaefo no wɔ wɔn ntam. Wɔatu wɔn ho asi hɔ kɔ nkurow ne afie afie mu, kɔka Onyankopɔn Ahenni no ho asɛmpa kyerɛ nkurɔfo de suasua wɔn Awurade ne n’asomafo no. (Luka 8:1; Asomafo no Nnwuma 8:12; 19:8; 20:20, 25) Wɔ 1919 mu, wɔ Yehowa Adansefo (saa bere no na wɔfrɛ wɔn Amanaman Ntam Bible Asuafo) nhyiam bi a wɔyɛe wɔ Cedar Point, Ohio ase no, wɔkaee nhyiamfo no sɛ wɔn “adwuma ne sɛ wɔbɛbɔ Mesia anuonyam ahenni a ɛreba no dawuru.” Wɔsan sii eyi so dua wɔ nhyiam bi a ɛte sɛ eyi ara a wɔyɛe wɔ 1922 mu no ase, na wɔhyɛɛ wɔn sɛ: “Mommɔ, mommɔ, mommɔ Ɔhene no ne n’Ahenni dawuru.” Wɔafa ɔkwan biara a wobenya so akɔ so ayɛ saa wɔ wiase nyinaa de abedu nnɛ. (Mateo 24:14) Esiane wɔn dwumadi no nti, wɔada Ahenni ɔsɛmpɔw no adi akyerɛ wo. Dɛn na woreyɛ wɔ ho?
‘MOYƐ MAA ME NUANOM NO MU BIAKO’
9. (a) Ɔkwan bɛn so na tebea horow a wɔka ho asɛm wɔ Mateo 25:35-40 no fa Ahenni som adwuma no ho? (b) Enti sɔhwɛ bɛn na nnipa a wɔwɔ baabiara hyia?
9 Kristo “nuanom” a wɔde honhom asra wɔn no ahyia sɔhwɛ ahorow a emu yɛ den, esiane akokoduru a wɔde ka Onyankopɔn Ahenni no ho asɛm, na wɔtwe wɔn ho fi wiase no ho nti. (Yohane 15:19, 21) Ɔkɔm ne nsukɔm ade wɔn mu binom, na wɔada adagyaw. Wɔn mu pii afi wɔn man mu akɔsom wɔ mmeae a wɔyɛɛ ahɔho wɔ hɔ. Wɔayare na wɔde wɔn agu afiase, na wɔn ataafo akum wɔn mpo bere a wɔreyɛ wɔn som adwuma no. Kristo “nuanom” no suahu ahorow yi ama amanaman nyinaa mu nnipa hyia sɔhwɛ bi. So Onyankopɔn ne Kristo ho dɔ bɛma wɔaboa ɔsoro Ahenni no ahemmɔfo yi? (Mateo 25:35-40; fa toto 2 Korintofo 5:20 ho.) Ɛnyɛ ayamye a nnipa yɛ wɔn no ne ade titiriw, na mmom mmoa a wɔde ma wɔn no, efisɛ wɔyɛ Kristo dea, na Ɔhene no bu no sɛ wɔayɛ ama n’ankasa.—Marko 9:41; Mateo 10:42.
10. (a) Dɛn nti na anoyi a “mpapo” no de ma no mfata? (b) Nea ɛne no bɔ abira no, gyinabea bɛn na “nguanten” no apaw?
10 Yesu de wɔn a wɔde mmoa a ɛte saa ma no toto nguanten ho. Wɔka nnipa a wɔammoa Yesu “nuanom” no ho asɛm wɔ ne bɛ no mu sɛ mpapo. Ebia “mpapo” no de anoyi bɛma sɛ wɔanhu Yesu Kristo. Nanso wasoma ne nkoa akɔ wɔn nkyɛn, na eyinom ada nnipa ko a wɔyɛ adi akyerɛ wɔn pefee. Ɛnyɛ “mpapo” no nyinaa na ebia wɔbɛtaa Kristo “nuanom” no, nanso ɔsoro Hene no ho dɔ ankanyan wɔn sɛ wɔmmoa n’ananmusifo no. (Mateo 25:41-45) Wɔde wɔn ho fam wiase a Satan Ɔbonsam ne ne sodifo a aniwa nhu no no ho denneennen. “Nguanten” no ntumi mfa wɔn aniwa ankasa nhu Kristo saa ara. Nanso nea ɛne “mpapo” no nneyɛe bɔ abira no, eyinom daa no adi sɛ wonsuro sɛ wɔbɛkyerɛ sɛ wɔwɔ Kristo “nuanom” no afã, na wɔboa Onyankopɔn Ahenni adawurubɔfo yi. “Nguanten” no nim nea wɔreyɛ, na wɔpaw adepa a ɛne sɛ wobegyina Onyankopɔn Ahenni a ɛnam Yesu Kristo so no afã. Enti na wɔn nneyɛe sɔ Ɔhene no ani no.
11. (a) Esiane sɛ nnipa pii nhyiaa Kristo “nuanom” no bi da nti, wɔbɛyɛ dɛn atumi agyina nea wɔka wɔ ha no so abu wɔn ntɛn? (b) Dɛn na ɛma yenya awerɛhyem sɛ adwuma yi bɛyɛ yiye?
11 Ɛnde, ɔkwan bɛn so na wobetumi agyina eyi so abu amanaman nyinaa mu nnipa ntɛn? So Yesu anka sɛ ne “nuanom” a Agya no de ɔsoro Ahenni no bɛma wɔn no bɛyɛ “kuw ketewaa” bi pɛ? (Luka 12:32) Nnipa pii nhyiaa wɔn mu bi da. Ɛyɛ ampa, nanso Kristo “nuanom” no na wɔbom yɛ Yehowa Adansefo amanaman ntam ahyehyɛde no nnyinaso. Wɔnam nnipa a wɔaboaboa wɔn ano yi so reda Ahenni no ho ɔsɛmpɔw a ɛho hia no adi akyerɛ nnipa a wɔwɔ mmaa nyinaa. Kristo ankasa rekyerɛ eyi nyinaa kwan fi ne soro ahengua so denam abɔfo mmoa so. Mpaapaemu adwuma no renya nkɔanim a biribiara nsiw no kwan wɔ nsase ne nsupɔw bɛyɛ 200 so wɔ wiase nyinaa—mmeae a aban no abara Onyankopɔn Ahenni ho asɛnka no mpo no—na nnipakuw kɛse rebegyina Onyankopɔn Ahenni no afã.
12. (a) Ɔkwan bɛn so na “nguanten” no ma wohu gyinabea a wɔapaw no pefee? (b) Dɛn nti na wɔyɛ saa?
12 Ɔkwan bɛn so na wɔkyerɛ eyi? Wɔnam wɔn a wɔasra wɔn a wɔne wɔn bom yɛ adwuma no so na wɔyɛ saa, bere a wɔde nnamyɛ bɔ dawuru sɛ Ahenni no di tumi, na ɛrenkyɛ na ɛde wiase no nhyehyɛe aba n’awiei. Enti wɔda wɔn ho adi pefee sɛ wɔwɔ Yehowa Mesia Ahenni no afã, na wofi ɔdɔ mu hyɛ afoforo nkuran sɛ wɔnyɛ saa ara. Ɛnyɛ ɔpɛ a wɔwɔ sɛ wobenya nkwa no nkutoo na ɛkanyan nnipa komapafo yi. Wɔdɔ Yehowa ne n’akwan ankasa. N’ahenni a ɔde ama Kristo sɛ ɛso hene no ma aseda yɛ wɔn koma ma, na wɔpɛ sɛ afoforo nso nya mu mfaso. Enti wodi Ahenni no ho adanse kosi ase sɛnea wobetumi. Sɛnea Yesu kyerɛkyerɛɛ n’asuafo no, ‘wɔhwehwɛ ahenni no kan,’ na wɔmma honam fam ahiade ahorow ho dadwen mmɛyɛ ade a ɛho hia sen ɛno. Saa kwan yi so no, wɔfata sɛ wonya nhyira kɛse bi.—Mateo 6:31-33.
WUBENYA ‘AHENNI NO ADI’?
13. (a) Efi bere bɛn na atra Yehowa adwenem sɛ ɔbɛma wɔn a wɔte sɛ nguanten yi akatua? (b) Dɛn na ‘ahenni no a wobenya adi’ no kyerɛ ma wɔn?
13 Nea wɔde bɛma wɔn a wɔda wɔn ho adi sɛ wɔyɛ Yesu bɛ no mu “nguanten” no yɛ anigye yiye ampa. Ofi ne soro ahengua so ka kyerɛ wɔn sɛ: “Mo a m’agya ahyira mo, mommra mmɛfa ahenni a wɔasiesie ama mo fi wiase asefi mu no nni!” (Mateo 25:34) Efi “wiase asefi,” bere a Adam ne Hawa dii kan woo mma a wobetumi anya Onyankopɔn nsiesiei a ɔnam so begye adesamma no mu mfaso, na sɛnea Genesis 3:15, 16 kyerɛ no, atra Yehowa adwenem sɛ ɔbɛma “nguanten” yi akatua. (Fa toto Luka 11:50, 51 ho.) Wobenya hokwan a ɛbɛma wɔanya ɔdesani nkwa a ɛyɛ pɛ wɔ Paradise a efii Adam nsa a wɔasan de aba no mu. ‘Ahenni no a wobenya adi’ no nkyerɛ sɛ wɔbɛkɔ soro, efisɛ ɛbɛ no kyerɛ sɛ ɛsono “nguanten” no, na ɛsono Ɔhene no “nuanom” a wɔyɛ adedifo wɔ ɔsoro Ahenni no mu no. Enti, “nguanten” no bɛyɛ saa ɔsoro Ahenni no asase so nkoa. Liddell ne Scott Greek-English Lexicon no ka sɛ wobetumi ate Hela asɛmfua basileiʹa a wɔakyerɛ ase sɛ “Ahenni” wɔ ha no ase nso sɛ “di a ɔhene bi di obi so.” Ɛda adi pefee sɛ saa ntease yi na wɔde di dwuma wɔ ha.
14. Ɔkwan bɛn so na atɛn a wobu “mpapo” no ne “nguanten” no de bɔ abira?
14 Sɛ “mpapo” no kɔ ‘daa ntwafi hɔ’ mu, wɔsɛe wɔn pasaa te sɛ nea ogya sɛe ade no a, Mesia Hene no bɛbɔ “nguanten” no ho ban. (Mateo 25:41, 46; fa toto Adiyisɛm 21:8 ho.) Esiane sɛ ɛho renhia sɛ wowu nti, wɔbɛkora wɔn so atwa ahohiahia kɛse no akɔ anuonyam “asase foforo” a Satan nkɛntɛnso bɔne ne ne nneɛma nhyehyɛe bɔne no rentra hɔ no so. Saa nhyira no na wobenya efisɛ wɔresi gyinae a ɛteɛ wɔ Ahenni ho ɔsɛmpɔw no ho mprempren.
15. (a) Yɛyɛ dɛn hu sɛ ɛbɛ yi renya mmamu nnɛ? (b) Enti, adwuma bɛn na ɛho hia yiye?
15 Ɛbɛyɛ mfomso a anibere wom sɛ wubesusuw sɛ, esiane sɛ “mpapo” no sɛe bɛyɛ afebɔɔ nti, akyiri yi ansa na ɛbɛ no bɛbam, ebia wɔ Kristo Mfirihyia Apem Ahenni no mu. Nea ɛne eyi bɔ abira no, Yesu buu bɛ yi sɛ “nneɛma nhyehyɛe no awiei” ho sɛnkyerɛnne no fã bi. (Mateo 24:3, NW) Nea ɔka ho asɛm no si wɔ bere a wɔde no si ahengua so akyi, ne bere a ne “nuanom” da so ara wɔ ɔhonam mu na wohyia amanehunu a ɔka ho asɛm no. Yɛte saa bere no mu, na n’awiei rebɛn ntɛmntɛm. Enti, hwɛ sɛnea ɛho hia sɛ ɛnsɛ sɛ yɛn nkutoo nya Ahenni no mu ahotoso koraa, na mmom sɛ yɛboa afoforo nso ma wɔyɛ saa mprempren ara.
[Adesua no ho Nsɛmmisa]
