Osetie Ho Adwene Foforo
Ti 17
Osetie Ho Adwene Foforo
1. Dɛn nti na Yehowa maa kwan ma Babilonfo no sɛee Yerusalem?
MFE pii ansa na Babilonfo no resɛe Yerusalem no, Yehowa bɔɔ Yudafo no kɔkɔ wɔ nea na ɛreba, ne nea enti a na ɛreba no ho. Ná wɔredi nea wɔn ankasa koma a apirim no hwehwɛ akyi sen sɛ wɔbɛyɛ osetie ama Onyankopɔn.—Yeremia 25:8, 9; 7:24-28.
2. (a) Sɛnea ntease wom no, mfaso horow bɛn na egyina osetie ma Onyankopɔn so? (b) Ɛyɛɛ dɛn na Israel ne Yehowa hyehyɛɛ apam abusuabɔ?
2 Yehowa nhyɛ obiara sɛ ɔnsom no, nanso ɔhwehwɛ osetie fi wɔn a wɔpɛ sɛ wonya n’anim dom ne asetra mu nhyira ahorow a ɛka ho no nyinaa hɔ wɔ ɔkwan a ntease wom so. Yehowa gyee Israel fii Misraim akyi no, ɔka kyerɛɛ wɔn sɛ: “Sɛ mubetie me nne na moadi m’apam so a, ɛnde mobɛyɛ me ahode afi aman nyinaa mu, na me na asase nyinaa wɔ me. Na mo de, mobɛyɛ me asɔfo ahemman ne ɔman kronkron.” (Exodus 19:5, 6) Bere a Onyankopɔn kaa n’ahwehwɛde kyerɛɛ wɔn akyi na wɔtee “apam nhoma no” akenkan wiei no, wofi wɔn ankasa pɛ mu gyee asɛyɛde a ɛka saa abusuabɔ a wɔne Onyankopɔn benya ho no toom.—Exodus 24:7.
3. (a) Akwan bɛn so na Israel daa atuatew honhom adi kyerɛɛ Yehowa wɔ ɛno akyi? (b) Dɛn nti na wɔakyerɛw saa nsɛm no wɔ Bible mu?
3 Nanso, ankyɛ koraa na atuatew honhom fii ase daa adi. Israel mma no ampow Yehowa mu gyidi pefee; nanso wɔn mu pii bɔɔ mmɔden sɛ wɔde Misraim nneyɛe bɛfrafra Yehowa som mu de abu ne mmara so. (Exodus 32:1-8) Akyiri yi ebinom nyaa mmarima a na Yehowa de wɔn di dwuma sɛ n’ananmusifo a aniwa hu wɔn no ho asɛm. (Numeri 12:1-10; 16:1-3, 31-35) Sɛ́ ɔman no, Israel kyerɛe sɛ wonni gyidi a ɛbɛma wɔadi Onyankopɔn asɛm so, esiane sɛ onipa ho suro kaa wɔn nti. (Numeri 13:2, 31-33; 14:1-4; Hebrifo 3:17-19) Bere a wɔadi mfomso a wɔanhyɛ da no, na wɔn a wofi ahobrɛase mu nu wɔn ho no betumi anya fafiri. Nanso wɔ mfe ahankron akyi no, ɔman no hyɛɛ da fii ase buu Onyankopɔn ahwehwɛde so mmiako mmiako, na afei wobuu bebree so mpɛn pii. Wɔakyerɛw nneɛma a wɔyɛe ne nea efi mu bae no wɔ Bible mu sɛ sɛnnahɔ a ɛbɔ yɛn kɔkɔ.—2 Beresosɛm 36:15-17; 1 Korintofo 10:6-11.
4. (a) Na henanom ne Rekabfo no? (b) Ná asɛyɛde bɛn na Yehonadab de ato wɔn so?
4 Wɔ Yeremia nna no mu, bere a na Yehowa de aniberesɛm a ebefi wɔn nneyɛe mu aba ho kɔkɔbɔ ama mpɛn pii akyi no, ɔde nhwɛsode bi sii Yudafo no anim—Rekabfo no. Ná eyinom nyɛ Israelfo, na na wɔyɛ Yehonadab a na wada no adi sɛ ɔne Yehu yɛ adwene koraa sɛ ɔtwe ninkunu ma Yehowa no asefo. Ná Yehonadab (anaa Yonadab) a na ɔyɛ Rekabfo abusua no tete agya no ahyɛ wɔn sɛ wontua wɔn ho bobesa koraa bere nyinaa, afei nso wɔnntra afie mu anaasɛ wɔnnyɛ kuadwuma, na mmom wɔntratra ntamadan mu sɛ atutrafo. Na wɔnam saayɛ so bɛma wɔn ani ada fam, akwati akesesɛm, ahohwisɛm ne kurow kɛse mu nnebɔne, bere a na wɔne Israelfo a wɔte wɔn mu no som Yehowa no.
5. Ɔkwan bɛn so na Rekabfo no yɛɛ osetie a ɛfata nkamfo?
5 Esiane sɛ na Yudafo no ntie Yehowa, Amansan Hene, no nti, na wobetumi ahwɛ kwan sɛ Rekabfo no betie wɔn nana a ɔyɛ onipa no? Wɔyɛɛ saa, na wɔyɛɛ saa wɔ ɔkwan a ɛfata nkamfo so. Ɛwom sɛ Rekabfo no kɔhwehwɛɛ guankɔbea wɔ Yerusalem bere a Babilon ne Siria asraafo dɔm tuu Yuda so sa no de, nanso wɔkɔɔ so traa ntamadan mu. Ɛwom sɛ na wɔama nnipa a wɔte wɔn mu no kwan sɛ wɔnnom de, nanso na si a wɔasi nketekrakye sɛ wɔmfa bobesa nka wɔn ano no mu den te dɛn? Yehowa maa Yeremia de Rekabfo no baa asɔrefie hɔ adididan bi mu, de nkuruwa a bobesa wom sisii hɔ too nsa frɛɛ wɔn sɛ wɔmmɛnom. Wɔannom. Dɛn ntia? Ɛda adi sɛ wɔn ani sɔɔ ahofama a wɔn nana no nya maa Yehowa no, na wohuu sɛnea na ofi ɔdɔ mu dwen wɔn yiyedi ho no, ma enti wodii n’ahyɛde so. Yehowa ani gyee saa osetie ho nhwɛso pa yi a ɛdaa osetie a na Yudafo no nyɛ mma Yehowa adi no ho.—Yeremia 35:1-11.
6. (a) Henanom na wɔte sɛ Rekabfo no nnɛ? (b) Henanom na wɔada wɔn ho adi sɛ Israel asoɔdenfo no nsusuwso?
6 Nnipa bi wɔ hɔ nnɛ a wɔte sɛ Rekabfo no. Eyinom ne Awurade “nguan foforo” no. Ɛnyɛ sɛ ebia wɔbɛnom bobesa ne asɛm no nnɛ. (Fa toto 1 Timoteo 5:23 ho.) Eyi yɛ obiara ankasa asɛm, mpɛn dodow a wɔnnan asadweam anaa asabofo no. (Mmebusɛm 23:20; 1 Korintofo 6:9, 10) Nanso osetie a wɔyɛ ma Onyankopɔn ho hia yiye. Esiane sɛ wɔnte sɛ Kristoman a ɛyɛ ɔwaefo Israel nsusuwso no nti, nnɛyi Rekabfo kuw no de wɔn nneyɛe kyerɛ sɛ wonim sɛnea osetie a wɔyɛ ma Onyankopɔn som bo. Ɔkwan bɛn so na eyi ho bɛba wɔn mfaso?
7. (a) Bɔhyɛ a ɛhyɛ nkuran bɛn na Yehowa de maa Rekabfo no? (b) Anidaso bɛn na ɛno ma nnɛyi Rekab kuw no nya?
7 Esiane Rekabfo no ahofama nti, Yehowa hyɛɛ wɔn bɔ a ɛkyerɛ biribi a tumi wom wɔ nkɔmhyɛ mu ma yɛn bere yi sɛ: “Esiane sɛ moatie mo agya Yonadab ahyɛde, na moadi ne mmara nsɛm nyinaa so ayɛ sɛ ɔhyɛɛ mo no nyinaa nti, sɛ asafo Awurade, Israel Nyankopɔn, se ni: Onipa a ogyina m’anim remmɔ Rekab ba Yonadab da biara da.” (Yeremia 35:18, 19) Ná wɔka wɔn a wonyaa wɔn ti didii mu wɔ Yerusalem sɛee mu wɔ 607 A.Y.B. no ho. Na kuw a na wɔyɛ wɔn ho mfonini no benya wɔn ti adidi mu wɔ ɔsɛe a ɛreba Kristoman ne wiase nkae a ɛyɛ nea n’ankasa pɛ, na ɛpow sɛ ebegye Yehowa tumidi atom no nyinaa so no mu.
NEA ENTI A EBIA OSETIE RENYƐ MMERƐW
8. Dɛn nti na osetie yɛ nnipa pii den?
8 Ɛyɛ den ma nnipa pii sɛ wobesua osetie. Wɔanyinyin wɔ wiase a obiara reyɛ ‘nea ɔpɛ’ mu. Ebia wɔpɛ nea wosua fa asetra wɔ Onyankopɔn Ahenni mu ho no. Nanso sɛ ahantan gye wɔn adwene nyinaa a, wobetumi abu wɔn ani agu Onyankopɔn ahwehwɛde ahorow no bi so anaa wobenya ɔkwan a wɔfa so de eyinom ma no ho asɛm. (Mmebusɛm 8:13; 16:18) Naaman, Siria sahene wɔ odiyifo Elisa nna no mu, hyiaa saa ɔhaw no.
9. (a) Ɛyɛɛ dɛn na Naaman kohuu Elisa? (b) Dɛn na ɔhwɛɛ kwan, nanso dɛn na esii ankasa?
9 Ná Naaman yare kwata. Nanso esiane sɛ Israelni abofra bi de akokoduru daa ne gyidi adi sɛ sɛ Naaman bɛkɔ Yehowa diyifo Elisa nkyɛn nkutoo a, anka ɔbɛsa no yare nti, Naaman tuu kwan kɔɔ Israel. Ɔde apɔnkɔ ne ɔko nteaseɛnam kɔɔ Elisa fie. Ná Naaman yɛ onipa titiriw, na ɔhwɛɛ kwan sɛ Elisa befi adi abehyia no na wayɛ guasodeyɛ bi afrɛ Yehowa na wahinhim ne nsa wɔ ne honam a ɔyare aka no no so kosi sɛ ɔbɛsa yare no. Nanso, Elisa somaa ɔbɔfo kɛkɛ ma ɔkɔka kyerɛɛ no sɛ ɔnkɔ Yordan Asubɔnten mu nkoguare mpɛn ason.—2 Ahene 5:1-12.
10. (a) Dɛn na Naaman yɛe? (b) Dɛn na awiei koraa no ɛma ɔyɛɛ osetie? (d) Dɛn na efi mu bae?
10 Naaman tee nka sɛ wabu no animtiaa. Ɔde abufuw fii hɔ kɔe. Nanso bere a n’asomfo ne ne susuw nsɛm ho no, ɔde gyidi brɛɛ ne ho ase. “Ɛnna osianee de ne ho kɔbɔɔ Yordan mu mpɛn ason, sɛ Onyankopɔn nipa no kae no; na ne ho san baa mu sɛ abofra ketewa honam, na ne ho fii.” Naaman gye dii sɛ Yehowa ne nokware Nyankopɔn koro pɛ no, na ɛmfa ho nea ɔyɛe mfiase no, ohui sɛ akwankyerɛ ahorow a Elisa de mae no fi Onyankopɔn hɔ ampa.—2 Ahene 5:13-15.
11. (a) Akwan bɛn so na Naaman yɛɛ “nguan foforo” no ho mfonini? (b) Nneɛma atitiriw bɛn na ɛsɛ sɛ yɛn nyinaa sua?
11 So ebia wuhu Naaman su horow yi bi wɔ wo mu? Sɛnea ɛte wɔ nnipa foforo a wɔnyɛ Israelfo a wɔdaa gyidi adi ho no, wɔde Naaman di dwuma wɔ Kyerɛwnsɛm no mu de yɛ “nguan foforo” a wonya nokware som mu kyɛfa no ho mfonini. Bere bi na eyinom nyinaa a wɔwoo wɔn wɔ bɔne mu no yare wɔ honhom fam. Na ɛsɛ sɛ wɔn nyinaa hwehwɛ Yehowa asomfo a wɔasra wɔn kuw no mmoa na afei wɔde osetie yɛ nea “akoa” yi fi Onyankopɔn Asɛm mu akyerɛ wɔn no. (Mateo 24:45) Bere bi na ebinom ntie Kyerɛwnsɛm mu afotu a wɔde ma wɔn no nyinaa—te sɛ hia a ɛho hia sɛ wɔkɔ asafo nhyiam horow daa, sɛnea ɛho hia sɛ wɔtwe wɔn ho fi wiase no ho, anaasɛ wonya Kristofo asubɔ wɔ nsu mu. Ebia wɔtwentwɛn wɔn nan ase sɛ wobehyira wɔn ho so agye asubɔ efisɛ wɔannye antom wɔ wɔn komam sɛ ɛho hia sɛ ‘wɔpa wɔn ho akyi’ na ama wɔayɛ Kristo akyidifo. Wɔ nsɛm bi mu no, wɔkasa tiaa ɔkwan a wɔn a asɛyɛde hyɛ wɔn nsa wɔ asafo no mu no faa so de afotu maa wɔn no. Nanso bere rekɔ so no, na ɛho hia wɔn a wɔbɛyɛ Awurade “nguan foforo” ankasa nyinaa sɛ wosua sɛnea ahobrɛase ne osetie a efi ɔdɔ mu ho hia.—Yakobo 4:6; Mateo 16:24.
AHYƐDE AHOROW A ƐHO BA YƐN MFASO
12, 13. (a) Dɛn nti na Yehowa ahyɛde ahorow sodi ho ba yɛn mfaso? (b) Ɔkwan bɛn so na wobetumi akyerɛkyerɛ eyi mu?
12 Bere a yehu Yehowa ne n’akwan no, yehu sɛnea nsɛm a ɔka kyerɛɛ ne nkoa wɔ mmere a atwam mu no yɛ nokware: “Me Awurade, wo Nyankopɔn, mene nea ɔkyerɛ wo nea eye ma wo, na ogya wo kɔ ɔkwan a fa so no so. Sɛ wowɛn w’asõ ma me mmara nsɛm ɛ.” (Yesaia 48:17, 18) Nea Yehowa hwehwɛ ankasa ne sɛ ne nkurɔfo bɛkwati amanehunu na wɔanya asetra mu anigye denam n’ahyɛde ahorow a wobetie so. Onim sɛnea wɔyɛɛ yɛn ne nea ɛde anigye ankasa bɛbrɛ yɛn. Ɔbɔ yɛn kɔkɔ wɔ abrabɔ a ebetumi abrɛ yɛn ase anaa asɛe yɛne afoforo ntam abusuabɔ ho.
13 Wɔn a wɔatie ne kɔkɔbɔ a ɛfa aguamammɔ ne awaresɛe ho no akwati nkate mu haw, ɔyare ne mpena mma a ɛde ba no. (1 Korintofo 6:18; Hebrifo 13:4) Ɛdenam afotu te sɛ nea ɛwɔ 2 Korintofo 7:1 a wɔde di dwuma so no, wɔatwe wɔn ho afi tawa ne nnubɔne foforo a ne nom ka obi hɔ na ɛsɛe n’akwahosan a ebetumi ama wawu ntɛm no ho. N’ahyɛde a ese n’asomfo ‘ntwe wɔn ho mfi mogya ho’ no aboa wɔn ma wɔahyɛ ne mu ahotoso a wɔwɔ sɛ Nea wɔn daakye nkwa ho anidaso nyinaa gyina ne so no mu den, na bere koro no ara abɔ wɔn ho ban wɔ nyarewa a ɛyɛ hu a mogya a wɔde ma tumi ma ɛtrɛw no ho.—Asomafo no Nnwuma 15:28, 29.
14. Ɔkwan bɛn so na Ahenni no a yɛhwehwɛ no kan sen sɛ yɛde yɛn ho bɛhyehyɛ wiase no mu wɔ ɔkwan a enhia so de mfaso horow brɛ yɛn?
14 Bere tenten a yɛwɔ wiase no mu no, ɛho behia sɛ yɛne wiase no di nkitaho wɔ akwan bi so. Nanso Yehowa bɔ yɛn kɔkɔ sɛ yɛmmfa yɛn anidaso nnto so, yɛnnyɛ ne fã. Onim nea ɛbɛba wiase no so daakye. Hwɛ nyansa a ennim sɛ obi de ne nkwa nna nyinaa bɛhyehyɛ nea Onyankopɔn reba abedwiriw agu! Nea enye koraa no, wɔn a wɔyɛ saa no behu sɛ nea ɛbɛto wiase a wɔde wɔn ho nyinaa maa no no bi bɛto wɔn. Enti, hwɛ mfaso a ɛwɔ afotu a Onyankopɔn Ba no de mae no so: Hwehwɛ Onyankopɔn Ahenni! Fa di kan wɔ w’asetra mu!—1 Yohane 2:17; Mateo 6:33.
15. (a) Sɛ yɛbɛka wɔn a wɔbɛsan anya nea Adam yeraa no no ho a, dɛn na ɛsɛ sɛ yesua sɛ yɛbɛyɛ? (b) Ɔkwan bɛn na Yehowa bɛfa so akasa akyerɛ yɛn wɔ Mfirihyia Apem no mu?
15 Esiane sɛ Yehowa nim nea yehia nyinaa nti, ɔresiesie ne nkurɔfo ama asetra wɔ ne trenee nneɛma nhyehyɛe foforo no mu. Asoɔden a Adam yɛe no de ɔdesani sintɔ bae, daa nkwa bɔɔ no na wɔpam no fii Paradise. Nokwarem no, sɛ yɛbɛka wɔn a wɔma wonya nea Adam yeraa no no ho a, ɛnde ɛsɛ sɛ yɛde adanse ma sɛ sɛ Onyankopɔn kasa a, yetie. Na ɔkwan bɛn na ɔbɛfa so akasa akyerɛ yɛn wɔ Mfirihyia Apem a ɛreba no mu, bere a wɔrema adesamma ayɛ pɛ no? Ɛnam Mesia Ahenni no so. Saa aban no benya asase so ananmusifo a aniwa hu wɔn nso? Yiw. Ɔhene no benya “asase nyinaa so ahene” wɔ ne som mu. (Dwom 45:16; fa toto Yesaia 32:1, 2 ho.) Ɛdenam ɔdɔ mu a adesamma befi ayɛ osetie ama saa ahene yi so no, wɔbɛda no adi sɛ wɔbrɛ wɔn ho ase ma wɔn soro Hene no.
16. Dɛn nti na osetie a wɔyɛ ma mpanyimfo no yɛ ahobammɔ nnɛ, na ɔkwan bɛn so na ɛyɛ ahosiesie pa ma asetra wɔ Onyankopɔn Nhyehyɛe Foforo no mu?
16 Seesei Yehowa nam ne teokrase ahyehyɛde a aniwa hu no so de ntetee ma de yɛ ahosiesie ma saa bere no. Wɔ asafo ahorow no mu no, wapaw wɔn a wɔanyinyin wɔ honhom fam, anaa mpanyimfo. Wɔde ɔhwɛ a ɛho hia no ma wɔ asafo nhyiam ahorow ase na wodi Ahenni ho asɛm a wɔka no anim. Wɔboa wɔn a wɔpɛ sɛ wɔsom Yehowa nyinaa ma wosua sɛnea wɔde Bible mu nnyinasosɛm ahorow bedi dwuma wɔ wɔn asetra mu, na wofi ɔdɔ mu de asiane ahorow a ɛbɛsɛe obi ne Onyankopɔn ntam abusuabɔ ho kɔkɔbɔ ma. Yehowa Adansefo a wɔwɔ wiase nyinaa ahu nso sɛ akwankyerɛ ahorow a mpanyimfo de ma a wotie no taa ma wonya nkwa wɔ ahum, asasewosow ne akodi mu. Asafo no nyɛ mpanyimfo no de; ɛyɛ Onyankopɔn de. Mpanyimfo no nka sɛ wɔde honhom aka wɔn. Nanso, sɛnea Kyerɛwnsɛm no kyerɛ no, Onyankopɔn de wɔn di dwuma ma wodi anim na osetie a wɔyɛ ma wɔn no kyerɛ sɛ wobu nhyehyɛe a Yehowa de resiesie n’asomfo ama wɔanya wɔn ti adidi mu wɔ ne Nhyehyɛe Foforo no mu no.—Asomafo no Nnwuma 20:28; Hebrifo 13:17.
17. Dɛn na ɛsɛ sɛ ɛkanyan yɛn ma yɛyɛ osetie?
17 Nanso ɛnyɛ pɛ a wɔpɛ sɛ wɔka wɔn a wobenya nkwa wɔ wiase sɛe a ɛreba no mu ho kɛkɛ na ɛma wɔyɛ osetie a ɛte saa. Nneɛma pii wɔ hɔ. Dɛn? Anisɔ a wɔwɔ ma nkwa, ne nsiesiei ahorow a Onyankopɔn ayɛ na ama akɔ so atra hɔ no nyinaa. Aseda a wɔwɔ ma n’akyɛde ahorow a ɛma yɛn asetra yɛ papa—tumi a yetumi dwen, kyerɛ sɛnea biribi yɛ fɛ ne honhom fam gyinapɛn ahorow ho anisɔ, na yehu yɛn Bɔfo no som no. Afei nso, yenim Onyankopɔn ankasa dɔ kɛse a ɛma ɔde n’ankasa Ba mae sɛ ɔmfa ne nkwa nto hɔ sɛ afɔrebɔ na ama yɛatumi anya hokwan atra ase daa.
18. Sɛ yebehu Onyankopɔn yiye a, ɔkwan bɛn so na yebu osetie a yɛbɛyɛ ama ɔno ne n’ahyehyɛde no?
18 Wɔn a wɔabehu Onyankopɔn yiye fam no, osetie nyɛ asɛde a wɔn ani nnye ho. N’atirimpɔw ne ahwehwɛde ahorow ho nokware nimdeɛ, ne nnepa a efi eyinom a wɔde di dwuma mu ba no ma wohu pefee sɛ nneɛma a wɔyɛ no Onyankopɔn akwan so no ne ade biako pɛ a ntease ne nyansa wom sɛ wɔyɛ. Wohu sɛ ɛyɛ ahobammɔ. Afei nso ɛyɛ ɔkwan a wɔfa so kyerɛ sɛ wɔdɔ Onyankopɔn. Wonya anigye kɛse wɔ osetie a wɔyɛ ma no no mu.—1 Yohane 5:3; Dwom 119:129.
[Adesua no ho Nsɛmmisa]
[Kratafa 135 mfonini ahorow]
Ɛho hia sɛ ebinom di ahantan so, sɛnea ɔkwatani Naaman yɛe no
