Wudi Nokware Ma Asase So Hene Foforo No?
Ti 18
Wudi Nokware Ma Asase So Hene Foforo No?
1. Bere a wɔde Yesu kyerɛe sɛ Ɔhene wɔ 33 Y.B. mu no, dɛn na nnipadɔm no yɛe wɔ ho?
NISAN 9 33 Y.B. no, Yesu Kristo de ne ho kyerɛɛ Yudafo no sɛ wɔn Hene, Mesia a wɔahyɛ ne ho nkɔm no. Bere a osian fii Ngo Bepɔw no so rekɔ Yerusalem no, asuafo bebree no dii ahurusi, na woyii Onyankopɔn ayɛ esiane ahoɔdenne a na Yesu ayɛ no nti. (Luka 19:37, 38; Sakaria 9:9) Nanso na wobedi nokware ama Onii a wɔkamfoo no sɛ Ɔhene no? Ankyɛ na wɔsɔɔ wɔn nokwaredi hwɛe.
2. (a) Nnipa pii a wɔwɔ hɔ nnɛ no reyɛ wɔn ade dɛn wɔ dawurubɔ a ɛne sɛ Kristo ne asase so Hene foforo no ho? (b) Nsɛmmisa bɛn na ɛfata sɛ yesusuw ho anibere so?
2 Efi 1914 no, wɔada Yesu Kristo a wɔahyɛ no anuonyam a ofi soro redi tumi ankasa no adi akyerɛ adesamma nyinaa sɛ asase so Hene foforo. Anidaso a nnipa a wofi aman nyinaa mu wɔ sɛ wɔbɛtra ase wɔ aban a ɛhyɛ Kristo nsa ase na wɔanya adesamma haw ahorow ano aduru ankasa no ama wodi ahurusi. Nanso wobedi nokware? Na yɛn ankorankoro nso ɛ?
ƆHENE NO ANKASA NOKWAREDI HO KYERƐWTOHƆ
3. (a) Dɛn nti na wɔka Yesu ankasa ho asɛm sɛ Yehowa “nokwafo” no? (b) Dɛn ne nokwaredi?
3 Yesu Kristo de adanse pii ama sɛ onhinhim wɔ nokware a n’ankasa di ma Yehowa, Amansan Hene no mu. Wɔka ne ho asɛm wɔ ɔkwan a ɛfata so wɔ Kyerɛwnsɛm no mu sɛ Yehowa “nokwafo.” (Dwom 16:10, NW; Asomafo no Nnwuma 2:24-27) Hebri asɛmfua a wɔde gyinaa hɔ maa “nokwaredi” wɔ ha no kura adwene a ɛne sɛ obi yɛ adɔe. Ɛnyɛ biribi a enni tema, a egyina mmara anaa atɛntrenee so kɛkɛ, na mmom ɔdɔ ne anisɔ nso kanyan no.—Fa toto Dwom 40:8; Yohane 14:31 ho.
4, 5. (a) Ɔkwan bɛn so na Yesu nokwaredi daa adi wɔ soro wɔ Satan atuatew no akyi? (b) Ɔkwan bɛn so na saa nokwaredi no daa adi nso wɔ asase so?
4 Bere a Satan fii ase hwehwɛɛ nidi a Onyankopɔn nkutoo na wɔde ma no no maa ne ho wɔ soro, ne bere a abɔfo gyaw wɔn ankasa trabea wɔ Yehowa soro ahyehyɛde no mu no, Onyankopɔn Abakan no ansua wɔn su no. Na onni adwene bi sɛ ɔbɛyɛ saa! Saa na na Ɔba nokwafo yi ahofama a egyina ne ho a ɔde bɔ afɔre so no te, ma enti bere a ɔyɛ n’Agya apɛde no, ogyaw ne soro anuonyam hɔ, bɛyɛɛ ɔdesani na ɔmaa kwan mpo ma wokum no wɔ asɛndua so. Ofi ɔdɔ mu hwɛ hui sɛ, wɔ ne fam no, nea Kyerɛwnsɛm no ka wɔ ne ho biara bɛbam.—Filipifo 2:5-8; Luka 24:44-48.
5 Bere a Yesu wɔ asase so no, Satan de nhyɛso kɛse baa no so na ama wagyae adwuma a Onyankopɔn de ama no sɛ ɔnyɛ no—sɛ ɛbɛyɛ yiye a, wadaadaa no ma wayɛ biribi a ɛbɛma Onyankopɔn ankasa apow ne Ba no. Ɔhyɛɛ Yesu nkuran sɛ ɔnyɛ nneɛma a ebetumi ama wanya din ne tumi—nanso na ɔbɛyɛ wiase a Satan yɛ ne sodifo no fã. Yesu ampene, na ɔfaa Kyerɛw Kronkron no mu nsɛm de kyerɛe sɛ ɛne ade a ɛkyerɛ ne kwan. (Mateo 4:1-10) Na Yesu wɔ ɔdom akyɛde soronko na ɔde dii dwuma yiye, nanso ɛne n’Agya apɛde hyiae bere nyinaa. Ɔde ne bere nyinaa yɛɛ adwuma a na Onyankopɔn asoma no sɛ ɔmmɛyɛ no kosii ase. (Yohane 7:16-18; 8:28, 29; 14:10) Nokwaredi ho nhwɛso pa bɛn ara ni!
6. Ɔkwan bɛn so na akatua a wɔde maa Yesu no hwehwɛ nokwaredi fi yɛn hɔ?
6 Esiane Yesu nokwaredi nti, Yehowa nyanee no fii awufo mu, ‘maa no dibea a ɛkorɔn na wadom ama no din a edi din nyinaa so, sɛ Yesu din mu na nkotodwe nyinaa nkotow, na tɛkrɛma nyinaa mpaem nka sɛ Yesu Kristo ne Awurade mma agya Onyankopɔn anuonyam.’ (Filipifo 2:9-11) Saa “din a edi din nyinaa so” no yɛ tumi ne dibea a wɔde maa Yesu na watumi ayɛ Yehowa apɛde no ho sɛnkyerɛnne. ‘Yɛn nkotodwe a yɛde kotow no’ no kyerɛ sɛ yegye ne dibea tom, na yɛbrɛ yɛn ho ase hyɛ ne tumi ase. Nokwaredi a yɛde bɛbrɛ yɛn ho ase ama no sɛ Ɔhene no ka eyi ho.
NOKWARE DƆ MA WƆN A YEHOWA ASRA WƆN
7. Nneɛma bɛn ho na wɔsɔ Yesu akyidifo nokwaredi hwɛ?
7 Nokwasɛm a ɛne sɛ wɔ Yesu sorokɔ akyi no, wontumi mfa nnipa aniwa nhu no bio no bɛma n’akyidifo ahwehwɛ wɔn komam wɔ nokwaredi ho sɔhwɛ a wohyia no mu. Wɔde nnyinasosɛm a wakyerɛkyerɛ wɔn no bɛbɔ wɔn bra? Wɔbɛtwe wɔn ho afi wiase no ho? Wɔbɛkyerɛ obu ama wɔn a honhom kronkron de asɛyɛde ahyɛ wɔn nsa sɛ wɔnhwɛ wɔn so no? Wobefi wɔn kra nyinaa mu ayɛ adwuma a ɔde ama wɔn no?
8. Dɛn na Yonatan ne Dawid ntam nokware dɔ no yɛɛ ho mfonini?
8 Na wɔbɛboaboa “nguan foforo” no ano abɛka ɔsoro Ahenni no adedifo “kuw ketewa” no ho wɔ bere a ɛsɛ mu. Wɔbɛkyerɛ dibea a wɔde ama wɔn wɔ wɔne Kristo sɛ Ɔhene ne wɔn ho wɔn ho ntam abusuabɔ mu no ho anisɔ ankasa? Nokwasɛm ahorow no kyerɛ sɛ ɔdɔ ankasa wɔ “kuw ketewa” no mufo a wɔhyɛ Yesu Kristo ase no nyinaa ntam. Na ɔdɔ a wontumi nsɛe no, na ɛto ntwa da a Yonatan, Ɔhene Saul ba, no wɔ ma Dawid no yɛ eyi ho mfonini. Bere a ohuu ahofama a edi mu a na Dawid wɔ ma Yehowa, ne ne ho a ɔde too Onyankopɔn so kum ɔbran Goliat no, ɛkaa Yonatan koma yiye na ne ‘kra kyekyeree Dawid kra ho, na Yonatan fii ase dɔɔ no sɛ n’ankasa kra.’ Ne dɔ no ano ammrɛ ase bere a ɛbɛdaa adi sɛ Yehowa de ahenni no bɛma Dawid na ɛnyɛ Yonatan no. Yonatan de ne nkwa too asiane mu mpɛn pii maa Dawid mpo.—1 Samuel 17:45-47; 18:1; 23:16, 17.
9. Ɔkwan bɛn so na nnipa a na wɔnyɛ Israelfo a wɔka Dawid asraafo ho daa nokwaredi a ɛte saa adi?
9 Yonatan akyi no, na nnipa a wɔnyɛ Israelfo a wɔde wɔn ho bataa Dawid ho wɔ hɔ. Na wɔnyɛ asraafo a wɔabɔ wɔn paa na mmom mmarima akokodurufo a ahofama a na wɔwɔ ma Dawid sɛ nea Yehowa asra no nti, wɔde wɔn ho bɔɔ no. Na Keretifo, Peletifo ne nnipa a na kan wɔte Filistifo kurow Gat mu ka eyinom ho. Wofi nokwaredi mu de wɔn ho bataa Dawid ho bere a ne ba Absalom de nnaadaa pɛe sɛ owia Israelfo koma no. Edin a Absalom nyae ne n’anitew no nyinaa akyi no, n’adɔkɔdɔkɔsɛm no amma wɔannan afatwafo.—2 Samuel 15:6, 10, 18-22.
10. (a) Ɔkwan bɛn so na wɔda Kristo, nkaefo a wɔasra wɔn no, ne “nguan foforo” no ntam abusuabɔ a emu yɛ den no adi wɔ Dwom 45? (b) Ɔkwan bɛn so na ‘mfɛfo mmaabun no hyɛn ɔhene no aban mu’?
10 Yehu Kristo, nkaefo a wɔasra wɔn no, ne “nguan foforo” no ntam abusuabɔ ho nkyerɛkyerɛmu foforo a ɛyɛ anigye wɔ Dwom 45. Eyi nyɛ anwensɛm bi a ɛyɛ dɛ kɛkɛ na mmom ɛyɛ Mesia Ahenni no ho nkɔmhyɛ—Onyankopɔn ankasa ne “ahengua,” kyerɛ sɛ, ɔyɛ Yesu Ahenni no fapem ne nnyinaso. (Dwom 45:1-7; Hebrifo 1:8, 9) Odwontofo no ka Kristo ayeforo no, “ɔhene babea,” no ho asɛm sɛ wɔde no rebrɛ Ɔhene no wɔ n’ayeforohyia da no. Wɔn a wɔka ne ho ne “mmabun . . . ne mfɛfo.” Eyinom yɛ henanom? Wɔne wɔn a wɔhwɛ kwan sɛ wɔbɛyɛ Onyankopɔn Ahenni asase so nkoa. Wɔne “ayeforo” kuw no bɔ wɔ “anigye ne ahosan” mu kosi sɛ wɔn mu nea otwa to bɛkɔ akɔka Kristo ho wɔ soro. Wɔne wɔn ‘kɔhyɛn ɔhene aban mu,’ ɛnyɛ sɛ wɔforo kɔ soro na mmom wotu wɔn ho si hɔ yɛ Ɔhene no adwuma. Woabɛka aperententu a ɛyɛ anigye yi ho?—Dwom 45:13-15.
DƐN NA NOKWAREDI HWEHWƐ FI YƐN HƆ?
11. Tebea horow bɛn na ɛsɔ yɛn hwɛ wɔ yɛ a yɛnyɛ “wiase no fã” no ho?
11 Asetra mu tebea pii kyerɛ nnipa ko a yɛyɛ. Yɛwɔ Yehowa Mesia Ahenni no mu gyidi ankasa? Ɛyɛ paara ma yɛn? Yesu kae sɛ ne nokware akyidifo renyɛ “wiase no fã.” Ɛte saa wɔ wo fam?—Yohane 17:15, 16, NW.
12. Ɛwom sɛ yɛnyɛ pɛ de, nanso akwan foforo bɛn so na yebetumi de nokwaredi ho adanse ama?
12 Wɔ yɛn nnipa a yɛnyɛ pɛ fam no, nokwaredi nhwehwɛ pɛyɛ. Nanso ɛhwehwɛ sɛ yɛkwati sɛ yɛbɛhyɛ da abu Bible ahyɛde horow so, sɛ nnipa foforo hu yɛn anaa wonhu yɛn no. Ɛbɛka yɛn ma yɛabɔ mmɔden de Bible nnyinasosɛm ahorow adi dwuma akosi ase, sen sɛ yɛbɛhwɛ sɛnea yebetumi abɛn wiase no akwan pɛɛ no. Ɛno bɛma yɛakyi bɔne wɔ nokware mu.—Dwom 97:10.
13. Ɔkwan bɛn so na nokwaredi bɛbɔ yɛn ho ban wɔ awaefo adɔkɔdɔkɔsɛm ho?
13 Sɛ yekyi bɔne ankasa a, yɛremma asɛmpɛ nnaadaa yɛn ma yɛmmɛn ho. Nguaman asetra a obi bɛpɛ sɛ ohu mu betumi ama wasɛe. (Mmebusɛm 7:6-23) Saa ara nso na wɔn a asɛmpɛ nti wɔtɔ nhoma a awaefo, nnipa a wɔapow Yehowa ne n’ahyehyɛde, na afei wɔde wɔn ano “boro” wɔn kan ayɔnkofo ayɛ kenkan no betumi asɛe wɔ honhom mu. (Mateo 24:48-51) Mmebusɛm 11:9 bɔ kɔkɔ sɛ: “Nyaatwomni [ɔwaefo, NW] de n’ano sɛe ne yɔnko.” Nanso nokwaredi bɛbɔ yɛn ho ban ma wɔamfa wɔn adɔkɔdɔkɔsɛm no annaadaa yɛn.—2 Yohane 8-11.
14. (a) Akwan titiriw a yebetumi afa so ada yɛn nokwaredi adi ama Kristo sɛ Ɔhene no biako ne nea ɛwɔ he? (b) Dɛn nti na adwuma yi ho hia saa?
14 Akwan titiriw a yebetumi afa so ada nokwaredi adi no mu biako ne sɛ yebefi yɛn kra nyinaa mu ayɛ adwuma a Yesu kyerɛkyerɛɛ n’asuafo sɛ wɔnyɛ no. N’ankasa yɛɛ nhwɛso denam Onyankopɔn Ahenni no ho asɛmpa a ɔkɔkae wɔ nkurow ne nkuraa ase no so. (Luka 8:1) Yesu hyɛɛ nea nokware Kristofo bɛyɛ nnɛ no ho nkɔm bere a ɔkae sɛ: “Wɔbɛka ahenni no ho asɛmpa yi wiase nyinaa de adi amanaman nyinaa adanse; ɛno ansa na awiei no bɛba” no. (Mateo 24:14) Asɛmpa yi ka so na wɔnam de Ahenni ho ɔsɛmpɔw no reto nnipa a wɔwɔ mmaa nyinaa anim na ama wɔn ankasa asi gyinae. Wɔ nnipakuw kɛse bi fam no, saa gyinaesi no bɛma wɔakora wɔn so atwa ahohiahia kɛse no. (Adiyisɛm 7:9, 10) Wode nokwaredi reyɛ adwuma a egye ntɛmpɛ yi bi?
15. (a) Dɛn na Dwom 145:10-13 ka sɛ Yehowa anokwafo bɛka ho asɛm? (b) Ɔkwan bɛn so na ɛno fa yɛn ho?
15 Bere tenten a atwam no, odwontofo Dawid kyerɛwee sɛ: “Awurade, wo nnwuma nyinaa da wo ase, na w’ahotefo hyira wo. Wɔka w’ahenni anuonyam, na wɔbɔ wo mmaninyɛ din, sɛ wɔbɛma nnipa mma ahu ne mmaninne ne n’ahenni anuonyam a ɛharan no. W’ahenni yɛ daa ahenni, na wo tumidi fa awo ntoatoaso nyinaa mu.” (Dwom 145:10-13) Wɔnam Mesia Ahenni a ɛhyɛ Yesu Kristo nokwaredi nsa no so reda saa ahenni no adi nnɛ, na yɛda yɛn nokwaredi adi ma Onyankopɔn ne Kristo nyinaa denam ɛho asɛm a yefi yɛn pɛ mu de anigye ka no so.
16. Ɛsɛ sɛ nokwaredi nya sɛnea yenya Ahenni asɛnka no mu kyɛfa ne atirimpɔw nti a yɛyɛ no so nkɛntɛnso kodu he?
16 Ɔkwan bɛn so na woama Ahenni adansedi adwuma yi ayɛ ade titiriw wɔ w’asetra mu? Wode di nneɛma foforo anim kan ankasa? Ebetumi aba sɛ nea w’ankasa woyɛ no dɔɔso sen nea afoforo yɛ anaa esua sen saa. Ɛsono ankorankoro biara nsɛm tebea. Nanso, yɛn nyinaa betumi anya so mfaso denam saa nsɛm yi a yebebisa yɛn ho no so: ‘Nea meyɛ no kyerɛ sɛ ɛyɛ adwuma, ade bi a ɛsɛ sɛ meyɛ bi kɛkɛ? Mibu no sɛ ahwehwɛde kɛkɛ a ɛbɛma manya nkwa? Anaa ɔdɔ a mewɔ ma Yehowa, ahofama a mewɔ ma ne Mesia Hene no ne me yɔnko nipa ho a midwen ankasa no ka me ma mede di kan na ama mede m’asetram nneɛma foforo agyina ɛno so?’ Nokwaredi bɛma yɛahwehwɛ akwan a yɛbɛfa so ada no adi sɛ adwuma yi ho hia ma yɛn sɛnea ehia ma yɛn Hene no ara pɛ.
17. Henanom na Yesu “bɛka ɔmannwoesɛm” akyerɛ wɔn bere a ɔsɛe abɔnefo no?
17 Ɛrenkyɛ na Onii a n’asuafo de anigye kamfoo no sɛ Ɔhene bere a ɔrehyɛn Yerusalem wɔ 33 Y.B. mu no abɛsɛe wɔn a wɔpow Yehowa tumidi a ɔnam ne Mesia Hene no so da no adi no. Nanso “ɔbɛka ɔmannwoesɛm” akyerɛ “nnipakuw kɛse” a wofi aman nyinaa mu a wɔasuasua n’ankasa ne nokwaredi ho nhwɛso no. Wobɛyɛ wɔn mu biako?—Sakaria 9:10; Efesofo 4:20-24.
[Adesua no ho Nsɛmmisa]
