Yɛ Ade Nyansam Bere a Ɔhaw Reba No
Ti 7
Yɛ Ade Nyansam Bere a Ɔhaw Reba No
1. Dɛn nti na nkurɔfo wuwui kwa (a) bere a Titanic no memee no? (b) bere a Bepɔw Pelée paee no?
SƐ OBI a wogye no di de kɔkɔbɔ ma sɛ ɔhaw bi reba a, anyansafo yɛ biribi de bɔ wɔn nkwa ho ban. (Mmebusɛm 22:3) Nanso nnipa mpempem pii ahwere wɔn nkwa kwa esiane sɛ wonyaa ahotoso a ɛmfata nti. Wɔ kɔkɔbɔ a wɔde mae sɛ wɔnkɔtra nhyɛmma a wɔde gye nkwa mu nyinaa akyi no, akwantufo ɔhaha pii ne po so hyɛn Titanic mem wɔ 1912 mu, esiane sɛ wogyee ka a wɔkae sɛ ɛrentumi mmem no dii nti. Bere a ogya bepɔw mu dontori a ɛyɛ hyew ne abo fii ase tu fii Bepɔw Pelée a ɛwɔ Martinique mu wɔ 1902 mu no, wɔn a wɔte Saint-Pierre a ɛbɛn hɔ no suroe, nanso esiane sɛ na ɔman no mu nnipa atitiriw susuw wɔn pɛsɛmenkominya nneɛma a ehia wɔn ho nti, ɛhɔnom amammuifo ne atesɛm nkrataa samufo bɔɔ mmɔden sɛ wobedwudwo nnipa no hu no ano, na wɔhyɛɛ wɔn nkuran sɛ wɔntra kurom hɔ. Bepɔw no paee mpofirim, na nnipa 30,000 hweree wɔn nkwa.
2. (a) Kɔkɔbɔ a ɛsɛ sɛ wodi ho dwuma ntɛm bɛn na wɔde rema wɔ yɛn bere yi mu? (b) Dɛn nti na tebea no yɛ aniberesɛm?
2 Wɔde kɔkɔbɔ bi a ɛsɛ sɛ wodi ho dwuma ntɛm koraa sen saa mpo rema wɔ yɛn bere yi mu—ɛmfa ɔhaw bi a ɛrebesi wɔ ɔman bi so ho na mmom ɛfa bɛn a Onyankopɔn amansan ko a ɛne Harmagedon abɛn no ho. (Yesaia 34:1, 2; Yeremia 25:32, 33) Yehowa Adansefo akɔ nnipa a wɔwɔ wiase nyinaa afie mpɛn pii akɔhyɛ wɔn nkuran sɛ wɔnyɛ ade nyansam na ama wɔakora wɔn nkwa so. So wodɔ nkwa sɛnea ɛsɛ a ɛbɛma woayɛ nea ehia no, na woayɛ no ntɛm ara, a wontwentwɛn wo nan ase anaa?
‘WIASE NO RETWAM’
3. Dɛn nti na su a yekura wɔ wiase no ho no bɛka nkwagye ho anidaso a yɛwɔ no?
3 Biribi a ɛho hia titiriw wɔ nkwa a wubenya ho anidaso no mu ne sɛnea woyɛ w’ade wɔ wiase no ho. Bere dodow a wowɔ nkwa mu sɛ ɔdesani no de, wowɔ wiase no mu. Nanso ɛnsɛ sɛ wunya n’akɔnnɔ bɔne no bi na wusuasua ne nneyɛe bɔne no. Ɛnsɛ sɛ woyɛ ne fã denam nnipa ne wɔn nhyehyɛe ahorow mu awerɛhyem a wubenya sen Onyankopɔn ne n’atirimpɔw no so. Nanso ɛsɛ sɛ wopaw nea wopɛ; wuntumi nnyina afanu no nyinaa. “Obiara a ɔpɛ sɛ ɔyɛ wiase adamfo no gyina hɔ sɛ Onyankopɔn tamfo.” Dɛn ntia? Efisɛ, sɛnea Onyankopɔn Asɛm kyerɛ yɛn no, “wiase nyinaa da ɔbɔne no mu.”—Yakobo 4:4; 1 Yohane 5:19; Dwom 146:3-5.
4. (a) Bere a wode Bible no redi dwuma no, kyerɛkyerɛ nneyɛe ne su horow a ɛremma nkurɔfo nnya nkwa wɔ Onyankopɔn Ahenni ase no mu. (b) Dɛn nti na ɛsɛ sɛ obiara a ɔde ne ho ahyɛ nneyɛe a ɛte saa mu no gyae ntɛm ara?
4 Ntease wom sɛ Yehowa rennye nnipa a wɔn asetra kwan di adanse sɛ wɔda so ara yɛ nneɛma a Onyankopɔn kasa tia no nkwa nkɔ ne trenee Nhyehyɛe Foforo no mu. Nneɛma yi bi ne dɛn? Emu pii yɛ nnwuma ne su horow a wiase no mmu no sɛ ɛnteɛ no. Nanso sɛ yɛpɛ sɛ yenya nkwa wɔ wiase bɔne yi awiei a, ɛnde, ɛmfa ho sɛ dɛn na nnipa foforo yɛ anaa wosusuw no, yebetie Bible no kɔkɔbɔ a ese nguaman, awaresɛefo, mmarima a wɔne wɔn ho wɔn ho da, ne wɔn a wɔde wɔn ho hyɛ abrabɔ mu afide ne ahohwibra mu renka wɔn a wobenya nkwa ho no. Ɛmfa ho sɛ mpɛn ahe na afoforo bedi atoro na wɔawia ade no, yɛbɛpow asetra kwan a ɛte saa. Ɛmfa ho sɛnea nnipa pii ani gye asumansɛm ho no, yɛbɛkwati. Ɛwom sɛ ebia afoforo bɛyɛ ahoɔyaw, akanyan ntɔkwaw, ada abufuw adi, abɔ mmɔden sɛ wɔnam nnuru ne asanom ntraso so bɛkwati abasamtu de, nanso yɛrensuasua wɔn. Na sɛ yɛde yɛn ho ahyɛ nneɛma yi mu a, yebegye atom sɛ ehia sɛ yɛyɛ nsakrae. Sɛ kan mpo na yebu nneɛma yi mu binom te sɛ nea “mfomso biara nni ho” a, yɛbɛtwe yɛn ho afi ho. Dɛn ntia? Efisɛ yɛdɔ Onyankopɔn nokwarem, yɛdɔ nkwa, na Onyankopɔn Asɛm bɔ kɔkɔ sɛ “wɔn a wɔyɛ saa nneɛma yi rennya Onyankopɔn ahenni.”—Galatifo 5:19-21; Efesofo 5:3-7; 1 Korintofo 6:9, 10; 2 Korintofo 7:1; Adiyisɛm 22:15.
5. (a) Sɛ nkwa som bo ma yɛn a, dɛn na ɛsɛ sɛ yesua sɛ yɛbɛyɛ? (b) Su pa bɛn na wɔabobɔ din wɔ kyerɛw nsɛm a ɛwɔ nkyekyem yi awiei no mu? Ɛho hia dɛn? Yɛbɛyɛ dɛn atumi anya saa su no bi?
5 Sɛ hokwan a yebenya de atra ase daa no som bo ma yɛn a, ehia sɛ yesua sɛnea yɛbɛsɔ Nkwamafo, Yehowa Nyankopɔn, ani. (Asomafo no Nnwuma 17:24-28; Adiyisɛm 4:11) Ɛsɛ sɛ yɛkɔ so de n’Asɛm no di dwuma wɔ yɛn asetra afã horow nyinaa mu. Bere a yɛyɛ saa no, ɛrenkyɛ na yɛahwɛ su a yekura wɔ yɛn ankasa ne afoforo, yɛn ankasa ahonyade ne nneɛma a yɛatumi ayɛ no ho yiye, na yɛasusuw sɛnea eyi ka yɛn gyinabea wɔ Onyankopɔn anim no ho. Ebia nnipa a wɔatwa yɛn ho ahyia no bu wɔn ankasa ho, wɔn mmusua anaa ɔman a wofi mu no sɛ ɛkorɔn yiye, nanso yebesusuw kyerɛwsɛm a ɛka nea edi so yi ho anibere so: “Onyankopɔn siw ahantanfo kwan, na ɔdom ahobrɛasefo.”—Yakobo 4:6; Sefania 2:2, 3; Dwom 149:4.
6, 7. Dɛn nti na ɛsɛ sɛ yɛde 1 Yohane 2:15-17 hwehwɛ yɛn ankasa asetra mu?
6 Ɛwom sɛ afoforo ma kwan ma akɔnnɔ a honam fam ade dodowpɛfo kanyan no de wɔn yɛ nkoa, anaa wɔma din a wɔpɛ sɛ wogye kanyan wɔn de, nanso yebegyina 1 Yohane 2:15-17, so ahwehwɛ yɛn ankasa asetra mu, nea ɛka sɛ: “Monnnɔ wiase anaa nneɛma a ɛwɔ wiase. Sɛ obi dɔ wiase a, agya no dɔ no nni ne mu. Na nea ɛwɔ wiase nyinaa, honam akɔnnɔ ne aniwa akɔnnɔ ne asetra yi mu ahohoahoa, emfi agya no, na mmom efi wiase. Na wiase ne n’akɔnnɔ retwam, na nea ɔyɛ ade a Onyankopɔn pɛ no tra hɔ daa” no. Sɛ ehia sɛ yɛyɛ nsakrae ahorow a, bere a ɛsɛ sɛ yɛyɛ saa ni.
7 Wiase yi ne n’asetra kwan rentra hɔ daa. Ɛnyɛ nea “ɛrentumi mmem.” Ebia wiasefo bɛbɔ mmɔden sɛ wɔbɛma wɔn akyidifo akɔ so adi wɔn akyi, na wɔama wɔate nka sɛ wɔn mmɔdenbɔ betumi ama wiase no ayɛ yiye. Nanso ɔkwan koro pɛ a wobetumi afa so anya nkwa wɔ ɔsɛe a ɛreba no mu ne sɛ wobetie Onyankopɔn kɔkɔbɔ nsɛm no. Wɔ eyi mu no, Niniwefo a wɔtraa ase wɔ odiyifo Yona bere so no yɛɛ nhwɛso bi a ɛyɛ papa sɛ yesua.
“WƆSAKRAA WƆN ADWENE YONA ASƐNKA MU”
8. Ɔkwan bɛn so na Niniwefo daa nyansa adi bere a Yona de Onyankopɔn kɔkɔbɔ kɔmaa wɔn no, na dɛn na efii mu bae?
8 Wɔ afeha a ɛto so akron A.Y.B. mu no, Yehowa hyɛɛ Yona sɛ ɔnkɔ Niniwe, Asiria ahenkurow no mufo nkyɛn nkɔpae mu nka nkyerɛ wɔn sɛ wɔn nnebɔne nti, Niniwe bɛbɔ. Bere a Yona de kɔkɔbɔ mae sɛ wɔbɛsɛe wɔn nnafua 40 pɛ ntam no, wɔyɛɛ wɔn ade dɛn? Sɛ́ anka wobedi fɛw no, ‘wogyee Onyankopɔn dii, na wɔpaee mmuadadi, na wofurafuraa ntweaatam.’ Ɔhene no ankasa yɛɛ saa na ɔhyɛɛ nnipa no nyinaa sɛ wonsu mfrɛ Onyankopɔn denneennen na wɔnnan mfi wɔn akwammɔne ne wɔn basabasayɛ ho. Ɔkae sɛ: ‘Obi nnim sɛ ebia Onyankopɔn . . . bɛdan ne ho afi n’abufuhyew no ho, na yɛanyera.’ Esiane sɛ wofii wɔn kwammɔne no so nti, Yehowa daa mmɔborɔhunu adi kyerɛɛ wɔn. Wɔansɛe wɔn.—Yona 3:2-10.
9, 10. (a) Ɔkwan bɛn so na Yesu kae sɛ Niniwefo no yɛɛ nhwɛso a ɛsɛ sɛ yesuasua? (b) Henanom na wɔte sɛ saa Niniwefo no nnɛ?
9 Yesu twee adwene sii saa abakɔsɛm mu asɛm no so de kaa afeha a edi kan Y.B. Yudafo a wɔannye no anni no anim sɛ: “Niniwe mmarima ne nnɛ mma yi bɛsɔre atemmu no mu na wɔabu wɔn fɔ, efisɛ wɔsakraa wɔn adwene Yona asɛnka mu; na hwɛ, nea ɔsen Yona wɔ ha.”—Mateo 12:41.
10 Na yɛn bere yi so nso ɛ? So nnipa bi rekyerɛ ahonu a ɛte saa? Yiw; nnipa mpempem pii wɔ wiase nyinaa a, te sɛ Niniwefo no, ebia anka wɔnka sɛ wɔbɛsom Bible mu Nyankopɔn no da, nanso mprempren wɔreyɛ aso ama Yehowa kɔkɔbɔ nsɛm no. Sɛ wɔte nea enti a ɔsɛe reba wiase yi so no a, wɔhwehwɛ Onyankopɔn mmɔborɔhunu. Nokwarem no, wɔsakra wɔn adwene ne wɔn koma wɔ wɔn kan asetra kwan no ho, na afei wɔyere wɔn ho sɛ wɔbɛyɛ “nnwuma a ɛsɛ adwensakra.” (Asomafo no Nnwuma 26:20; hwɛ Romafo 2:4 nso.) So wopɛ sɛ woyɛ wɔn mu biako? Sɛ saa a, ntwentwɛn wo nan ase.
YƐ NTƐM HWEHWƐ ASOMDWOE
11. (a) Ná Gibeonfo no yɛ nnipa bɛn? (b) Dɛn nti na wɔpɛe sɛ wɔbɛma asomdwoe aba wɔne Israelfo no ntam?
11 Gibeonfo a wɔtraa ase wɔ Yosua bere so no nso yɛɛ ade nyansam sɛnea ɛbɛyɛ na wɔakora wɔn nkwa so. Ná wɔyɛ Kanaanfo a ɔbrasɛe, honam fam ade dodowpɛ, abosonsom ne adaemonesɛm yɛ wɔn asetra kwan. Ná Yehowa ahyɛ sɛ wɔnsɛe wɔn. Ná wonim sɛnea Yehowa gyee Israelfo fii Misraim mfe 40 a atwam no, na Amorifo ahemfo a wɔyɛ den a wɔwɔ Yordan Asubɔnten apuei fam no antumi annyina wɔn anim. Ná obiara nim sɛ Yeriko afasu akɛse no bubu gui wɔ wɔn anim a wɔamfa afiri a wɔde bubu ɔfasu anka, ne sɛ wɔsɛee Ai kurow no pasaa ma ɛdan siw bi kɛkɛ. (Yosua 9:3, 9, 10) Ná wɔn a wɔte Gibeon kurow no mu pɛ sɛ wɔtra nkwa mu, nanso wohui sɛ wɔrentumi nni nkonim wɔ wɔne Israel Nyankopɔn no ntam akodi mu. Ná ehia sɛ wɔyɛ biribi ntɛm ara. Dɛn ade? Na wɔrentumi nhyɛ Israefo sɛ wɔne wɔn nyɛ apam, nanso wosusuwii sɛ, anyɛ yiye koraa no, ɛsɛ sɛ wɔbɔ mmɔden sɛ wɔne wɔn bɛyɛ bi. Ɔkwan bɛn so?
12. (a) Dɛn nti na wɔankum Gibeonfo no wɔ ɔkwan a wɔfaa so yɛɛ ade no nyinaa akyi? (b) Ná ɛsɛ sɛ wɔyɛ nsakrae ahorow bɛn, na adwuma bɛn na wɔde maa wɔn sɛ wɔnyɛ?
12 Wɔyɛɛ ade anifere so, na wɔsomaa mmarima a wɔn ho ayɛ sɛ nnipa a wɔatwa kwan tenten bi kɔɔ Yosua nkyɛn. Wɔkɔɔ Yosua anim kɔkae sɛ wofi akyirikyiri asase bi so, na wɔate nneɛma akɛse a Yehowa ayɛ no ho asɛm, na sɛ wɔn nkurɔfo ananmusifo no, wɔde wɔn ho rebɛma sɛ nkoa na wɔasrɛ sɛ wɔne wɔn nyɛ apam. Yosua ne Israel mpanyimfo penee so. Akyiri yi, bere a wɔn nnaadaa no daa adi no, Gibeonfo no de ahobrɛase kaa nokware sɛ na wosuro sɛ wɔbɛhwere wɔn nkwa, na wɔdaa ɔpɛ a wɔwɔ sɛ wɔbɛyɛ biribiara a wɔhwehwɛ afi wɔn hɔ no adi. (Yosua 9:4-25) Yehowa huu nea ɛkɔɔ so nyinaa. Wɔannaadaa no. Otumi hui sɛ ɛnyɛ nea na wɔrebɔ mmɔden asɛe ne nkurɔfo abrabɔ, sɛnea Moabfo no yɛe bere bi a atwam no, na n’ani sɔɔ ɔpɛ a emu yɛ den a na wɔwɔ sɛ wɔbɛtra nkwa mu no. Enti ɔmaa kwan ma wɔne Lewifo no yɛɛ adwuma wɔ ahyiae ntamadan kronkron no mu yɛɛ nnuatwafo ne nsusawfo, na wɔnam saa kwan no so boaa Yehowa som. Nanso ansa na wɔbɛfata ama ɔsom a ɛte saa no, na ɛsɛ sɛ wogyaw wɔn kan nneyɛe a ɛho ntew no.—Yosua 9:27; Leviticus 18:26-30.
13. (a) Ɔkwan bɛn so na yebetumi anya saa nkɔmhyɛ kwan so asɛm a ɛfa Gibeonfo ho no mu mfaso? (b) Sɛ Yosua Ɔkɛseɛ no bɛkora nnipa a wɔwɔ hɔ nnɛ no nkwa so a, dɛn na wɔhwehwɛ sɛ wɔyɛ?
13 Esiane nokwasɛm a ɛyɛ sɛ yɛabɛn “nna a edi akyiri” no awiei nti, ɛho hia sɛ nnipa a wɔpɛ sɛ wonya nkwa nyinaa yɛ wɔn ade ntɛm ara, na wɔde koma a edi mũ yɛ saa. Wɔrentumi nnaadaa Yesu Kristo a ɔne Yehowa brafo nnɛ no te sɛ nea wɔyɛɛ Yosua no. Ɔkwan koro pɛ a nnipa a wɔte saa no betumi afa so ne no ayɛ nhyehyɛe na wansɛe wɔn ne sɛ wɔbɛpae mu aka gyidi a wɔwɔ wɔ Yehowa mu sɛ nokware Nyankopɔn no ho asɛm. (Fa toto Asomafo no Nnwuma 2:17-21 ho.) Ɛsɛ sɛ wogye Yesu Kristo nso tom wɔ dibea a Onyankopɔn de ama no no mu, na ɛno akyi no, wɔtra ase sɛ nnipa a wɔmpɛ wiase a wɔabu no kumfɔ yi akyi kwan. Afei ɛsɛ sɛ wɔyɛ Onyankopɔn asomfo ahobrɛasefo, na wɔne ne nkurɔfo asafo no bom de ɔsom kronn ma no.—Yohane 17:16; Adiyisɛm 7:14, 15.
14. Dɛn nti na Gibeonfo a Yehowa gyee wɔn fii atamfo dɔm nsam no kyerɛ biribi titiriw ma yɛn?
14 Gibeonfo kogyinaa Yehowa nkurɔfo afã akyi bere tiaa bi no, wɔbaa nhyɛso bi a emu yɛ den ase. Amorifo ahemfo baanum kɔkaa Gibeon hyɛɛ mu, na wɔnam so ahyɛ emufo no ma wɔasan aba wɔn afã abɛko atia Israel. Gibeonfo no de adesrɛ a ɛsɛ sɛ wodi ho dwuma ntɛm kɔtoo Yosua anim sɛ ɔmmɛboa wɔn, na wonyaa ogye a ɛyɛ nwonwa sen biara wɔ abakɔsɛm mu no mu biako. Yehowa maa atamfo no yɛɛ basaa, ɔtotow amparuwbo fii soro guguu wɔn so, na ɔnam anwonwakwan so amma ade ansa kosii sɛ Israelfo no tɔree atamfo no ase koraa. (Yosua 10:1-14) Saa ogye a Gibeonfo no nyae no yɛ ogye bi a ɛyɛ nwonwa sen saa a nokware Nyankopɔn asomfo nnipakuw kɛse bi benya wɔ amansan nyinaa mu ɔko a ɛne Harmagedon mu no ho nkɔmhyɛ. Hokwan a ɛbɛma wɔanya saa ogye no mu mfaso no abue ama ɔman biara mu nnipa, sɛ wɔyɛ wɔn ade nyansam mprempren a. So wode saa hokwan no redi dwuma?—Adiyisɛm 7:9, 10.
[Adesua no ho Nsɛmmisa]
