Wɔakyerɛw asɛmpa a ɛne sɛ nnipa bɛtena ase daa wɔ asase so no wɔ Bible mu. (Dwom 37:29) Nhoma nketewa 66 na ɛka bom yɛ Bible. Mmarima anokwafo bɛyɛ 40 na Onyankopɔn ma wɔkyerɛwee. Bɛyɛ mfe 3,500 ni na Mose kyerɛw nhoma anum a edi kan no. Bɛboro mfe 1,900 ni na ɔsomafo Yohane kyerɛw nhoma a etwa to no. Hena tirim asɛm na Bible akyerɛwfo no kyerɛw too hɔ? Onyankopɔn nam ne honhom kronkron so na ɔne Bible akyerɛwfo no kasae. (2 Samuel 23:2) Onyankopɔn nsusuwii na wɔkyerɛwee, na ɛnyɛ wɔn ankasa de. Enti Yehowa ne Bible no Kyerɛwfo.​—Kenkan 2 Timoteo 3:16; 2 Petro 1:20, 21.

Hwɛ video a yɛato din Hena Ne Bible no Kyerɛwfo?

Yenim sɛ Bible no fi Onyankopɔn hɔ efisɛ ɛka nsɛm a ebesisi ma emu biara bam pɛpɛɛpɛ. Onipa biara nni hɔ a obetumi ayɛ saa. (Yosua 23:14) Ade nyinaa so Tumfoɔ Nyankopɔn no nkutoo na otumi di kan hu nea ɛbɛba nnipa so daakye.​—Kenkan Yesaia 42:9; 46:10.

Yɛhwɛ kwan sɛ nhoma a efi Onyankopɔn hɔ no bɛyɛ soronko, na saa na ɛte. Wɔakyekyɛ Bible ɔpepepem pii wɔ kasa ɔhaha pii mu. Ɛwom sɛ wɔkyerɛw Bible no akyɛ paa de, nanso emu nsɛm no ne nyansahu a nnipa dodow no ara gye tom hyia. Afei nso, akyerɛwfo 40 no nsɛm hyia. * Bio nso, nokware Nyankopɔn a ɔne ɔdɔ no nkutoo na obetumi ada ɔdɔ a Bible ka ho asɛm no adi, na ɛde besi nnɛ, Bible da so ara wɔ tumi a ɛsakra nkurɔfo ma wɔn abrabɔ yɛ papa. Saa nokwasɛm yi ma nnipa ɔpepem pii gye di sɛ Bible no yɛ Onyankopɔn Asɛm.​—Kenkan 1 Tesalonikafo 2:13.

Hwɛ video a yɛato din Yɛbɛyɛ Dɛn Ahu Sɛ Bible no Yɛ Nokware?

Nsɛntitiriw a Bible ka ho asɛm no mu biako ne sɛ Onyankopɔn wɔ atirimpɔw a ɔdɔ wom ma nnipa. Kyerɛwnsɛm no ka sɛnea nnipa asetena mfiase no wɔhweree hokwan a na wɔwɔ sɛ wɔbɛtena ase wɔ paradise asase so ne sɛnea awiei koraa no wɔbɛsan de paradise aba no ho asɛm.​—Kenkan Adiyisɛm 21:4, 5.

Mmara, nnyinasosɛm, ne afotu nso wɔ Onyankopɔn Asɛm no mu. Afei nso, wɔayɛ sɛnea Onyankopɔn ne nnipa adi ho kyerɛwtohɔ wɔ Bible mu, na nsɛm a ɛte saa no ma yehu Onyankopɔn nipasu. Enti, Bible no betumi aboa wo ma woahu Onyankopɔn. Ɛkyerɛ sɛnea wubetumi abɛyɛ n’adamfo.​—Kenkan Dwom 19:7, 11; Yakobo 2:23; 4:8.

Saa nhomawa yi nam ɔkwan a Yesu faa so kyerɛkyerɛe no so bɛboa wo ma woate Bible no ase. Yesu twee adwene sii Bible mu nsɛm so mmiako mmiako, na ɔkyerɛkyerɛɛ “Kyerɛwnsɛm no ase.”​—Kenkan Luka 24:27, 45.

Biribiara nni hɔ a ɛyɛ anigye kɛse sen asɛmpa a efi Onyankopɔn hɔ no. Nanso, nnipa binom ani nnye ho, na ɛhyɛ afoforo abufuw mpo. Mma w’abam mmu. Anidaso a wowɔ sɛ wubenya daa nkwa no gyina Onyankopɔn a wubehu no no so.​—Kenkan Yohane 17:3.