ƐWOM sɛ Amerikafo bɛyɛ ɔha biara mu 96 na wɔkyerɛ sɛ wogye Nyankopɔn di de, nanso nnipa kakraa bi na wogye Nyankopɔn di wɔ Europa ne Asia. Wɔ aman a nnipa dodow no ara nni Onyankopɔn teasefo bi mu gyidi mpo mu no, nnipa kakraa bi gye adwene a ɛne sɛ tumi bi a yenhu na ɛmaa amansan a aniwa tua yi bae no tom. Nhomanimfo a wagye din yiye, Yukichi Fukuzawa, a ofi Japan a ne mfonini wɔ Japan sika 10,000 so no, kyerɛwee bere bi sɛ: “Wɔka sɛ wɔammɔ nipa bi wɔ ɔsoro sɛ ɔkorɔn sen ɔfoforo.” Bere a Fukuzawa de asɛmfua “ɔsoro” dii dwuma no, na ɔretwe adwene asi adebɔ so de akyerɛ ɔkwan a wɔfaa so bɔɔ nnipa. Nnipa pii gye “ɔsoro” bi a enni nipasu ho asɛm di, sɛnea na ɛte wɔ Kenichi Fukui a wɔmaa no Nobel akyɛde no fam no. Ná ogye di sɛ tumi bi a ɛkorɔn a ɛwɔ amansan yi mu a ɛne nea nyamesomfo frɛ no “Onyankopɔn” no sɛ di, nanso ɔkaa saa tumi no ho asɛm sɛ “adebɔ mu nipasu bi.”

² Ná animdefo a wɔte saa no gye di sɛ biribi anaa obi a ɔte hɔ daa na ɔyɛɛ biribiara a ɛkeka ne ho wɔ  amansan no mu no. Dɛn ntia? Susuw eyi ho hwɛ: Owia no yɛ nsoromma kɛse bi a ɛne nsase ɔpepem biako bɛyɛ pɛ, nanso ɛyɛ biribi a esua koraa wɔ Yɛn nsorommakuw no mu. Yɛn nsorommakuw no nso yɛ nsorommakuw ɔpepepem pii a ɛwɔ amansan yi mu no mu biako pɛ. Nyansahufo nhwehwɛmu kyerɛ sɛ saa nsorommakuw no mu biara mmɛn bi ho koraa na emu biara de mmirika a emu yɛ den twa ne ho. Egyee tumi kɛse bi ansa na amansan no refi ase. Hena hɔ anaa ɛhe na saa tumi no fi? Bible ka sɛ: “Momma mo ani so nhwɛ ɔsoro, na monhwɛ nea ɔbɔɔ eyinom. Ɔno na obu wɔn dɔm ano yi wɔn adi, na ɔbobɔ wɔn nyinaa din frɛfrɛ wɔn; ne tumi dodow ne n’ahoɔden kɛse nti obiara nka akyiri.” (Yesaia 40:25, 26) Saa kyerɛwsɛm yi da no adi sɛ obi na ɔde amansan no sii hɔ—‘tumi nyinaa’ Wura no.

³ Susuw nkwa a ɛwɔ asase so no nso ho hwɛ. So ebetumi aba sɛ nkwa ankasa na ɛbae sɛnea adannandifo kyerɛ no? Afifide ne mmoa ho nimdefo Michael Behe ka sɛ: “Nyansahu ama yɛanya ntease kɛse wɔ sɛnea wotumi de nnuru ahorow fra wɔ asetram no ho, nanso abɔde mu nhyehyɛe a edi mu kɛse a wohu wɔ nneɛma nketenkete mu no ama mmɔden a wɔabɔ wɔ nyansahu mu sɛ wɔbɛkyerɛ beae a nkwa fi no ayɛ kwa. . . . Nyansahufo pii aka no pen sɛ wɔanya nkyerɛkyerɛmu bi dedaw, anaasɛ ɛrenkyɛ koraa na wɔanya bi, nanso wonni biribiara a wobetumi de adi ho adanse wɔ nyansahu nhoma atitiriw mu. Nea ehia sen saa no, ntease bi a edi mu wɔ hɔ—egyina [abɔde mu nneɛma nketenkete] nhyehyɛe ankasa so—a enti ɛsɛ sɛ yesusuw sɛ nkyerɛkyerɛmu a Darwin de ma fa asetram nneɛma ho no bɛyɛ nea ntease nnim koraa.”

⁴ So wugye adwene a ɛne sɛ nnipa bae ara kwa a ɛnyɛ onyansafo bi na ɔbɔɔ wɔn no tom? Ma yensusuw nea ebinom bu no sɛ “ade a ɛyɛ nwonwa sen biara wɔ amansan no mu,” onipa amemene, no ho na yɛnhwɛ nea yebetumi aka afa ho. Amemene ntini ho Ɔbenfo Richard M. Restak ka sɛ: “Tumi a kɔmputa a ɛsen biara de di dwuma no yɛ dwuma a nwansena amemene di . . . nkyem ɔpedudu mu biako pɛ.” Onipa amemene korɔn sen nwansena de koraa. Wɔyɛɛ no sɛnea ɛbɛyɛ a  ebetumi asua kasa. Etumi siesie ne ho, ɛhyehyɛ nsɛm, na etumi sua nneɛma pii. Akyinnye biara nni ho sɛ, wubegye atom sɛ onyansafo bi na ɔhyehyɛɛ kɔmputa a ɛsen biara, a ɛte sɛ “dwuma a nwansena amemene di . . . nkyem ɔpedudu mu biako pɛ” no. Na onipa amemene no nso ɛ? *

⁵ Bɛyɛ mfe 3,000 a atwam ni, bere a na nnipa nnya ntee nwonwa a wɔn nipadua no yɛ ase nwiei mpo no, Bible kyerɛwfo bi susuw sɛnea wɔyɛɛ nipadua no ho na ɔkae sɛ: “Meda wo ase sɛ woyɛɛ me ma ɛyɛ hu ne nwonwa; wo nneyɛe yɛ nwonwa, na me kra nim saa yiye.” Bere a na onni DNA abɔde mu nneɛma nketenkete ho nimdeɛ mpo no, ɔkyerɛwee sɛ: “Meyɛ mogya tɔw nko no, w’aniwa huu me, na wo nhoma mu wɔakyerɛw ne nyinaa.” (Dwom 139:14, 16) Ná hena ho asɛm na ɔreka? Hena na ɔnam “tumi dodow” so bɔɔ biribiara a ɛwɔ amansan no mu no?

⁶ Nkyekyem a edi kan pɛɛ wɔ Bible mu no ka sɛ: “Mfiase no Onyankopɔn bɔɔ ɔsoro ne asase.” (Genesis 1:1) Ɔno ne Bible no Kyerɛwfo nso, Onii a ɔhwɛ ma wɔkyerɛw emu nsɛm no. Ɔma yehu no sɛ obi a yebetumi ne no anya abusuabɔ pa.