Yɛn nyinaa wɔ biribi a ɛsɛ sɛ yɛpaw. Sɛ yɛbɛsom Yehowa anaasɛ yɛbɛsom Satan ne n’adaemone. Yɛrentumi nyɛ n’abien nyinaa. Hwɛ nyansa a ɛwom sɛ yɛbɛsom Yehowa!

Sɛnea yɛahu no, adaemone ani gye ho sɛ wobepira nnipa na wɔadaadaa wɔn. Yehowa nte saa. Ɔdɔ adesamma sɛnea agya bi dɔ ne mma. Ɔne “akyɛde pa ne adekyɛde a ɛyɛ pɛ biara” Mafo. (Yakobo 1:17) Ɔmfa adepa biara nkame adesamma, sɛ ɛma ɔhwere biribi kɛse bi mpo a.—Efesofo 2:4-7.

Susuw nneɛma a Onyankopɔn Ba Yesu yɛe wɔ asase so no ho. Ɔmaa mum kasae, na anifuraefo huu ade. Ɔsaa akwatafo ne mmubuafo yare. Otuu adaemone na ɔsaa nyarewa ahorow nyinaa bi. Yesu nam Onyankopɔn tumi so nyan awufo baa nkwa mu mpo.—Mateo 9:32-35; 15:30, 31; Luka 7:11-15.

Sɛ anka Onyankopɔn bɛka atosɛm de adaadaa yɛn no, ɔka nokware bere nyinaa mmom. Ɔnnaadaa obiara da.—Numeri 23:19.

Sɛnea ananse ntontan kyere anwansena denneennen no, saa ara nso na gyidi hunu ne atosɛm akyekyere nnipa ɔpepem pii. Wosuro awufo. Wosuro adaemone. Nnome, nsɛnkyerɛnne, kaberɛkyere, ne asuman ho nsɛm haw wɔn. Gyidi ne atetesɛm ahorow a egyina Satan Ɔbonsam atosɛm so akyekyere wɔn. Saa nneɛma yi mu biara nsum Onyankopɔn nkoa afiri.

Yehowa wɔ tumi kɛse koraa sen Satan. Sɛ wosom Yehowa a, ɔbɛbɔ wo ho ban afi adaemone ho. (Yakobo 4:7) Wɔrentumi mfa kaberɛ nkyere wo. Sɛ nhwɛso no, wɔ Nigeria no, akɔmfo baasa a wɔyɛ den too Yehowa Ɔdansefo bi a wampene so sɛ obefi wɔn kurom hɔ no aduru sɛ wɔde rekum no. Bere a aduru no antumi anyɛ no hwee no, ehu kaa akɔmfo no mu biako, ɔkɔɔ Ɔdansefo no nkyɛn kɔsrɛɛ no sɛ onhu no mmɔbɔ.

Sɛ adaemone haw wo a, wubetumi abɔ Yehowa din afrɛ no na ɔbɛbɔ wo ho ban. (Mmebusɛm 18:10) Nanso sɛ wubenya ahobammɔ afi Onyankopɔn hɔ a, ɛsɛ sɛ wotwe wo ho fi ahonhonsɛmdi ne adaemone som mu biribiara ho koraa. Onyankopɔn asomfo a na wɔwɔ tete Efeso no yɛɛ saa. Wɔboaboaa wɔn nkonyaayi nhoma nyinaa ano hyewee. (Asomafo no Nnwuma 19:19, 20) Ɛsɛ sɛ Onyankopɔn asomfo a wɔwɔ hɔ nnɛ nso yɛ saa ara. Sɛe asuman, nsɛbɛ, “ahobammɔ” nhama, abosom, nkonyaayi nhoma, ne biribi foforo biara a wɔde di ahonhonsɛm.

Sɛ wopɛ sɛ wosɔ Onyankopɔn ani a, ɛnnɔɔso sɛ wobɛtwe wo ho afi atoro som ho kɛkɛ na woagyae nneɛma bɔne yɛ. Ɛsɛ sɛ wode wo ho hyɛ nokware som mu nnam so. Bible no kyerɛ nea ɛsɛ sɛ woyɛ:

Satan ne adaemone wɔ nnipa wɔ asase so a wɔkyerɛkyerɛ nneɛma bɔne na wɔyɛ. Nanso Yehowa nso wɔ nkurɔfo. Wɔne Yehowa Adansefo. (Yesaia 43:10) Adansefo ɔpepem nsia ne akyi na wɔwɔ asase so nyinaa. Wɔn nyinaa bɔ mmɔden sɛ wɔbɛyɛ nneɛma pa na wɔakyerɛ nnipa nokware no. Nsase pii so no, wubetumi ahyia wɔn wɔ Ahenni Asa so, faako a wɔde anigye bɛma wo akwaaba.

Wɔn adwuma ne sɛ wɔbɛboa afoforo ma wɔasom Onyankopɔn. Wɔne wo besua Bible no wɔ wo fie, na wɔbɛboa wo ma woasua sɛnea wobɛsom Yehowa wɔ ɔkwan pa so. Ɛnsɛ sɛ wutua ho ka. Adansefo no ani gye ho sɛ wɔbɛkyerɛkyerɛ nokware no, efisɛ wɔdɔ nnipa na wɔdɔ Yehowa Nyankopɔn nso.