ODIYIFO Daniel traa ase bɛboro mfirihyia 500 ansa na wɔrewo Yesu. Nanso, Yehowa maa Daniel nsa kaa nsɛm bi a na ebetumi ama wɔakyerɛ bere a na wɔbɛsra Yesu, anaa bere a wɔbɛpaw no sɛ Mesia, anaa Kristo no. Wɔka kyerɛɛ Daniel sɛ: “Hu na tie sɛ: Efi asɛm a ɛka sɛ wɔnsan nkyekye Yerusalem nsi n’ananmu no fi so  kosi obirɛmpɔn a wɔasra no so yɛ adapɛn ason, [ne] adapɛn aduosia abien.”—Daniel 9:25.

Sɛ yebehu bere a na Mesia no bɛba a, nea edi kan no, ɛsɛ sɛ yehu bere a nkɔmhyɛ a ɛkae sɛ Mesia no bɛba no fii ase nyaa mmamu. Sɛnea nkɔmhyɛ no kyerɛ no, ‘efi asɛm a ɛka sɛ wɔnsan nkyekye Yerusalem nsi n’ananmu so.’ Bere bɛn na wɔkaa “asɛm a ɛka sɛ” wɔnsan nkyekye Yerusalem no? Sɛnea Bible kyerɛwfo Nehemia kyerɛ no, wɔkae sɛ wɔnsan nto Yerusalem afasu no wɔ “ɔhene Artasasta afe a ɛto so aduonu” mu. (Nehemia 2:1, 5-8) Abakɔsɛm akyerɛwfo si so dua sɛ Artasasta ahenni no fii ase wɔ afe 475 A.Y.B.  mu. Enti, n’ahenni afe a ɛto so 20 no yɛ afe 455 A.Y.B. Afei, yɛahu bere a nkɔm a Daniel hyɛ faa Mesia no ho no fii ase, ɛyɛ afe 455 A.Y.B.

Daniel kyerɛɛ bere tenten a na ebedi ansa na “obirɛmpɔn a wɔasra no,” anaa Mesia Ɔkannifo no, aba. Nkɔmhyɛ no kae sɛ ebedi ‘adapɛn ason, ne adapɛn aduosia abien’ a sɛ wɔka ne nyinaa bom a ɛyɛ adapɛn 69. Saa bere yi tenten yɛ ahe? Bible nkyerɛase pii ka sɛ adapɛn yi nyɛ adapɛn a emu biara yɛ nnanson, na mmom ɛyɛ mfepɛn. Ɛkyerɛ sɛ, dapɛn biara gyina hɔ ma mfirihyia ason. Ná tete Yudafo no nim mfepɛn, anaa mmere a na wɔkyekyɛm yɛ no mfirihyia ason mfirihyia ason no yiye. Sɛ nhwɛso no, na afe a ɛto so ason biara yɛ Homeda ma Israelfo, sɛnea na wodi Homeda ɛda a ɛto so ason biara no. (Exodus 23:10, 11) Enti, na nkɔmhyɛ kwan so adapɛn 69 no yɛ mfepɛn 69 a dapɛn biara yɛ mfirihyia 7, anaa ne nyinaa bom yɛ mfirihyia 483.

Afei, nea ɛsɛ sɛ yɛyɛ ara ne akontaa a yebebu. Sɛ yɛkan fi afe 455 A.Y.B. a, mfirihyia 483 no de yɛn ba afe 29 Y.B. Saa afe no ara mu pɛpɛɛpɛ na wɔbɔɔ Yesu asu ma ɔbɛyɛɛ Mesia no! * (Luka 3:1, 2, 21, 22) So sɛnea Bible nkɔmhyɛ yi nyaa mmamu no nyɛ nwonwa?