Ná Israelfo no atena sare so bɛyɛ mfe 40. Ná wɔako adi nkurow a ɛyɛ den pii so nkonim. Afei wɔtu kɔtenaa Moab sare so. Ɛwɔ Asubɔnten Yordan no apuei fam. Ná bere aso sɛ wɔkɔ Bɔhyɛ Asaase no so. Ná Balak yɛ Moab hene, na na osuro sɛ Israelfo no bɛko afa n’asaase. Enti ɔfrɛɛ ɔbarima bi a ne din de Baalam sɛ ɔmmra Moab mmɛdome Israelfo no.

Nanso Yehowa ka kyerɛɛ Baalam sɛ: ‘Ɛnsɛ sɛ wodome Israelfo no.’ Enti Baalam ankɔ. Ɔhene Balak san soma ma wɔkɔfrɛɛ no. Ɔhene no kaa sɛ nea Baalam pɛ biara, ɔde bɛma no. Nanso, Baalam ampene so. Afei Onyankopɔn kaa sɛ: ‘Wubetumi akɔ, nanso asɛm a mɛka akyerɛ wo nko ara na ɛsɛ sɛ woka.’

Baalam tenaa n’afurum so. Ɔde n’ani kyerɛɛ anaafo fam kɔɔ Moab. Ná Yehowa aka akyerɛ no sɛ ɛnsɛ sɛ ɔdome Israelfo no. Nanso na wayɛ n’adwene sɛ ɔbɛdome wɔn. Yehowa bɔfo yii ne ho adi mprɛnsa wɔ kwan no so. Baalam anhu ɔbɔfo no, nanso n’afurum no de, ohuu no. Nea edi kan no, afurum no de n’ani kyerɛɛ wuram. Afei afurum no kɔfam ɔfasu bi ho maa Baalam nan ka miaa ɔfasu no. Awiei koraa no, afurum no butuw kwan no mfinimfini. Emu biara no, na Baalam de abaa hwe afurum no.

Nea ɛto so mmiɛnsa akyi no, Yehowa maa afurum no kasae. Afurum no bisaa Baalam sɛ: ‘Adɛn nti na woda so ara rehwe me?’ Baalam kaa sɛ: ‘Woama mayɛ sɛ ogyimfo. Sɛ nkrante bi kura me a, anka sesɛɛ makum wo.’ Afurum no kaa sɛ: ‘Woatena me so mfe pii ni. Woahu sɛ mayɛ wo saa pɛn?’

Afei Yehowa maa Baalam huu ɔbɔfo no. Ɔbɔfo no kaa sɛ: ‘Yehowa ka kyerɛɛ wo sɛ nnome Israelfo no.’ Baalam kaa sɛ: ‘Mayɛ bɔne. Mɛsan m’akyi akɔ fie.’ Nanso ɔbɔfo no kaa sɛ: ‘Wubetumi akɔ Moab, nanso asɛm a Yehowa bɛka akyerɛ wo nko ara na ɛsɛ sɛ woka.’

 Nea ɛtoo Baalam no, osuaa biribi fii mu anaa? Daabi. Ɛno akyi no, Baalam yɛe sɛ ɔbɛdome Israelfo no. Ɔyɛɛ saa mprɛnsa. Nanso emu biara no, Yehowa maa ohyiraa Israelfo no mmom. Nea ɛbae ne sɛ, Israelfo no dii Moab so nkonim, na wɔkum Baalam. Sɛ Baalam tiee Yehowa a, wohwɛ a anka saa na ɛbɛto no?