1. Dɛn nti na na wɔresu na wɔredi awerɛhow kɛse wɔ Silo?

SAMUEL huu awerɛhodi a na ɛrekɔ so wɔ Silo no. Ná ɛte sɛ nea nusu aguare kurow no mufo nyinaa. Afie dodow ahe mu na wɔtee sɛ mmea ne mmofra resu wɔn agyanom, wɔn kununom, wɔn mmabarimanom, ne wɔn nuabarimanom a na wɔatotɔ wɔ akono no? Nea yenim ara ne sɛ, na wɔakunkum Israel asraafo bɛyɛ 30,000 wɔ nkogu pasaa a wodii wɔ Filistifo nsam no mu, na na wɔadi kan ahwere nnipa 4,000 wɔ ɔko foforo bi mu dedaw.—1 Sam. 4:1, 2, 10.

2, 3. Awerɛhosɛm a ɛtoatoaa so bɛn na ɛmaa aniwu ne animguase kaa Silo?

² Ná eyi yɛ ɔhaw ahorow a ɛtoatoaa so baa ɔman no so no fã bi pɛ. Ná Ɔsɔfo Panyin Eli mmabarima abɔnefo baanu a wɔfrɛ wɔn Hofni ne Pinehas afa apam Adaka kronkron no afi Silo de akɔ akono. Ná wɔtaa de apam Adaka no si Kronkron mu Kronkronbea a ɛwɔ ntamadan no mu mu. Ná Adaka a ɛsom bo yi yɛ sɛnkyerɛnne a ɛkyerɛ sɛ Onyankopɔn wɔ wɔn ntam. Nkurɔfo no dii mfomso de Adaka no kɔɔ akono saa bere no susuwii sɛ ɛte sɛ sɛbɛ a ɛbɛbɔ wɔn ho ban ma wɔadi nkonim. Nanso Filistifo no ko faa Adaka no, na wokum Hofni ne Pinehas.—1 Sam. 4:3-11.

³ Ná wɔde apam Adaka a esi ahyiae ntamadan no mu wɔ Silo no ahyɛ ahyiae ntamadan no anuonyam mfehaha pii. Afei de, na enni hɔ bio. Bere a Eli a na wadi mfe 98 tee asɛm yi no, ofi n’agua so tew faa n’akyi hwee fam, na owui. N’asebea a na wayɛ okunafo saa da no ara no nso wui bere a na ɔrewo no. Ansa na ɔbea no rewu no ɔkae sɛ: “Anuonyam afi Israel kɔ nkoasom mu.” Nokwasɛm ne sɛ, na Silo rensi ne dedaw mu bio.—1 Sam. 4:12-22.

4. Dɛn na yebesusuw ho wɔ saa ti yi mu?

⁴ Ná Samuel bɛyɛ dɛn agyina huammɔdi akɛse yi ano? So na ne gyidi bɛboa no ma watumi aboa nnipa a na wɔahwere Yehowa anim dom ne n’ahobammɔ no? Ɛtɔ mmere bi a, yɛn a yɛwɔ hɔ nnɛ yi nyinaa nso hyia amanehunu, na afoforo di yɛn huammɔ ma etumi sɔ yɛn gyidi hwɛ, enti momma yɛnhwɛ nneɛma foforo a yebetumi asua afi Samuel hɔ.

5, 6. Dɛn na Bible kyerɛwtohɔ dan adwene kɔɔ so mfe 20, na dɛn na Samuel yɛe wɔ saa bere no mu?

⁵ Ɛde besi ha no, Bible kyerɛwtohɔ no dan adwene fi Samuel so kɔ apam Adaka no so, na ɛkyerɛ yɛn sɛnea Filistifo no huu amane wɔ Adaka no a wɔfa kɔe no ho ma enti ɛma wɔsan de bae no. Ɛbɛyɛ mfe 20 akyi ansa na Bible no resan abɔ Samuel din aka asɛm bio. (1 Sam. 7:2) Dɛn na na ɔreyɛ saa bere no? Ɛnsɛ sɛ yɛbɔ yɛn tirim ka biribi.

⁶ Yehu sɛ, ansa na saa mfe 20 no refi ase no, “Samuel asɛm duu Israel nyinaa nkyɛn.” (1 Sam. 4:1) Kyerɛwtohɔ no ma yehu sɛ, bere a saa bere no twaam no, afe biara na Samuel tu kwan kɔsra Israel nkurow abiɛsa, siesie wɔn ntam akasakasa, na na ɔboa wɔn ma wonya wɔn nsɛmmisa ho mmuae. Sɛ owie a, na ɔsan kɔ ne kurom Rama. (1 Sam. 7:15-17) Ɛda adi sɛ, na Samuel wɔ adwuma pii yɛ bere nyinaa, na yebetumi aka sɛ na onni ne ho adagyew koraa wɔ saa mfe 20 no mu.

7, 8. (a) Bere a Samuel yɛɛ adwumaden mfe 20 akyi no, asɛm bɛn na ɔka kyerɛɛ nkurɔfo no? (b) Nkurɔfo no yɛɛ wɔn ade dɛn wɔ awerɛhyem a Samuel de maa wɔn no ho?

⁷ Eli mma no brasɛe ne nyansakorɔn a na wɔbɔ no sɛee nkurɔfo no gyidi. Ɛbɛyɛ sɛ ɛno maa wɔn mu pii de wɔn ho kɔhyɛɛ abosonsom mu. Nanso, bere a Samuel de mfe 20 yɛɛ adwumaden akyi no, ɔkaa asɛm a edi hɔ yi kyerɛɛ nkurɔfo no: “Sɛ mo koma nyinaa na mode resan aba Yehowa nkyɛn a, ɛnde munyi ananafo anyame a ɛwɔ mo nkyɛn ne Astoret ahoni no mfi mo mu, na momfa mo koma mũ nyinaa nni Yehowa akyi na monsom ɔno nkutoo, na obegye mo afi Filistifo no nsam.”—1 Sam. 7:3.

⁸ Ná ɛyɛ den ma Israelfo no sɛ wobegye wɔn ho afi “Filistifo no nsam.” Bere a Filistifo no dii Israel asraafo no so nkonim koraa no, wɔtee nka sɛ wobetumi ahyɛ Onyankopɔn nkurɔfo no so sɛnea wɔpɛ. Nanso, Samuel maa Israelfo no awerɛhyem sɛ, sɛ wɔsan wɔn akyi ba Yehowa nkyɛn a, nneɛma bɛsesa. So na wɔpɛ sɛ wɔyɛ saa? Ɔman no tow wɔn ahoni no gui, “na wɔsom Yehowa nkutoo” maa Samuel ani gyei. Samuel frɛɛ ɔman no ma wohyiaa mu wɔ Mispa, kurow bi a ɛwɔ mmepɔw so wɔ Yerusalem atifi fam. Nkurɔfo no hyiaa mu, wodii mmuada, na wonuu wɔn ho wɔ abosom akyi a wokodii ma wɔyɛɛ bɔne pii no ho.—Monkenkan 1 Samuel 7:4-6.

9. Hokwan bɛn na Filistifo no hui sɛ wɔanya, na dɛn na Onyankopɔn nkurɔfo yɛe wɔ asiane a na ɛreba wɔn so no ho?

 ⁹ Nanso, Filistifo no tee nhyiam kɛse a Israelfo no yɛe yi ho asɛm, na wohui sɛ ɛyɛ hokwan a wɔde benya wɔn. Wɔsomaa wɔn asraafo kɔɔ Mispa sɛ wɔnkɔsɛe Yehowa asomfo no. Israelfo no tee asiane a na ɛreba wɔn so no ho asɛm. Ehu kaa wɔn ma enti wɔsrɛɛ Samuel sɛ ɔmmɔ mpae mma wɔn. Ɔyɛɛ saa, na ɔbɔɔ afɔre nso kaa ho. Bere a na ɔman no ahyiam resom no, Filistifo asraafo no bɛtow hyɛɛ wɔn so wɔ Mispa. Afei, Yehowa buaa mpae a Samuel bɔe no. Sɛ yɛbɛka a, Yehowa hwiee n’abufuw guu wɔn so. ‘Ɔmaa aprannaa boboom denneennen guu Filistifo no so saa da no.’—1 Sam. 7:7-10.

10, 11. (a) Dɛn nti na yebetumi aka sɛ aprannaa a Yehowa de baa Filistifo asraafo no so no yɛ soronko? (b) Ɔko a wofii ase wɔ Mispa no kowiee dɛn?

¹⁰ So ɛsɛ sɛ yesusuw sɛ na Filistifo no te sɛ mmofra nkumaa a sɛ wɔte sɛ aprannaa rebobom a, woguan kɔhyɛ wɔn maamenom akyi no anaa? Dabi, na saa asraafo yi yɛ mmarima akokodurufo a wɔaben wɔ akodi mu. Enti ɛbɛyɛ sɛ, na saa aprannaa no yɛ soronko koraa. So sɛnea na aprannaa no rebobom “denneennen” no na na ɛyɛ soronko? So wohui sɛ na ɛrebobom fi wim, anaasɛ na ɛregyigye wɔ mmepɔw no mu? Sɛnea ɛte biara no, ɛmaa Filistifo no adwene tu frae, na ehu kaa wɔn. Esiane sɛ na asisifo yi nhu nea wɔnyɛ nti, woguan maa Israelfo no mmom taa wɔn so. Israel mmarima no sian fii Mispa bedii wɔn so nkonim, na wotuu mmirika dii wɔn akyi twaa kwantenten kɔfaa Yerusalem anafo fam atɔe baabi.—1 Sam. 7:11.

¹¹ Saa ɔko no de nsakrae kɛse bae. Efi saa bere no, bere tenten a na Samuel yɛ ɔtemmufo no, Filistifo no suroo Israelfo no. Nkakrankakra, nkurow a Filistifo no gyei no san bedii Onyankopɔn nkurɔfo no nsam.—1 Sam. 7:13, 14.

12. Dɛn na ‘adetrenee a Samuel ma ɛkɔɔ so’ no kyerɛ, na su ahorow bɛn na ɛboaa no ma ɔkɔɔ so tuu mpɔn?

¹² Mfehaha pii akyi no, ɔsomafo Paulo de Samuel din kaa atemmufo anokwafo a “wɔmaa adetrenee kɔɔ so” no ho. (Heb. 11:32, 33) Nokwarem no, Samuel yɛɛ nea ɛteɛ wɔ Onyankopɔn ani so, na ɔboaa afoforo ma wɔn nso yɛɛ saa ara. Ɔkɔɔ so tuu mpɔn efisɛ ɔtɔɔ ne bo ase twɛnee Yehowa, na huammɔdi nyinaa akyi no, ɔkɔɔ so de nokwaredi yɛɛ n’adwuma. Ɔsan nso kyerɛɛ nea Yehowa yɛ maa no no ho anisɔ. Bere a Israel dii nkonim wɔ Mispa wiei no, Samuel ma wɔyɛɛ nkaedum bi de kaee sɛnea na Yehowa aboa ne nkurɔfo no.—1 Sam. 7:12.

13. (a) Sɛ yɛpɛ sɛ yesuasua Samuel a, su ahorow bɛn na ehia sɛ yenya? (b) Bere bɛn na wususuw sɛ ɛyɛ papa sɛ yenya su ahorow a ɛte sɛ Samuel de no bi?

 ¹³ So wopɛ sɛ ‘woma adetrenee kɔ so’? Sɛ saa a, ɛnde ɛyɛ papa sɛ wusuasua abotare, ahobrɛase, ne nneɛma ho anisɔ a Samuel daa no adi no bi. (Monkenkan 1 Petro 5:6.) Yɛn mu hena na onhia su ahorow a ɛte saa? Ɛyɛ papa sɛ Samuel nyaa su ahorow a ɛte saa na ɔdaa no adi bere a na ɔyɛ abofra no, efisɛ bere a ɔbɔɔ akwakoraa no, wodii no huammɔ yayaayaw.

14, 15. (a) Huammɔ yayaayaw bɛn na wodii Samuel bere a na ‘wabɔ akora’ no? (b) So na Samuel yɛ agya a ɔyɛ abahyɛbɔne te sɛ Eli? Kyerɛkyerɛ mu.

¹⁴ Bere foforo a wɔkaa Samuel ho asɛm no, na ‘wabɔ akora.’ Saa bere yi, na Samuel wɔ mmabarima mpanyimfo baanu a wɔfrɛ wɔn Yoel ne Abia, na ɔde asɛyɛde hyɛɛ wɔn nsa sɛ wɔmmoa no wɔ atemmu adwuma no mu. Nanso awerɛhosɛm ne sɛ, wɔmaa ne nsa sii fam. Ɛwom sɛ na Samuel yɛ ɔtreneeni ne ɔnokwafo de, nanso ne mma no de hokwan a wonyae no yɛɛ nea wɔn ankasa pɛ, wɔkyeaa atemmu na wogyee adanmude.—1 Sam. 8:1-3.

¹⁵ Da bi, Israel mpanyimfo no kɔɔ odiyifo a ne mfe akɔ anim  no nkyɛn kɔbɔɔ ne mma no sobo. Wɔka kyerɛɛ no sɛ: ‘Wo mma amfa w’akwan so.’ (1 Sam. 8:4, 5) So na Samuel nim saa? Kyerɛwnsɛm no anka. Nanso, yebetumi aka paa sɛ na Samuel nyɛ abahyɛbɔne te sɛ Eli. Esiane sɛ Eli anteɛ ne mma no so wɔ bɔne a wɔyɛe no ho na odii wɔn ni sen Onyankopɔn nti, Yehowa kaa n’anim, na ɔtwee n’aso. (1 Sam. 2:27-29) Yehowa anhu biribi a ɛte saa wɔ Samuel ho.

16. Awofo a wɔn mma atew atua te nka dɛn, na ɔkwan bɛn so na nea Samuel yɛe no betumi aboa wɔn ma wɔanya awerɛkyekye ne akwankyerɛ?

¹⁶ Kyerɛwnsɛm no anka animguase, dadwen, anaa abasamtu kɛse a Samuel faa mu bere a ɔtee nneɛma bɔne a ne mma no ayɛ no ho asɛm no. Nanso, awofo pii betumi ahu sɛnea Samuel tee nka no paa. Wɔ mmere bɔne a yɛte mu yi mu no, mmofra dodow no ara tew wɔn awofo so atua na wɔmpɛ nteɛso. (Monkenkan 2 Timoteo 3:1-5.) Awofo a wodi yaw a ɛte saa no betumi anya awerɛkyekye ne akwankyerɛ afi nea Samuel yɛe no mu. Wamma atua a ne mma no tewee no ansɛe ne gyidi ɔkwan biara so. Ɛsɛ sɛ awofo kae sɛ, sɛ kasakyerɛ ne nteɛso antumi annan wɔn mma koma mpo a, wɔn nhwɛso pa betumi aboa wɔn. Na awofo wɔ hokwan a wobetumi ama wɔn ankasa Agya, Yehowa Nyankopɔn, ani agye bere nyinaa sɛnea Samuel yɛe no.

17. Dɛn na Israel mpanyimfo no ka kyerɛɛ Samuel sɛ ɔnyɛ mma wɔn, na obuu wɔn adesrɛ no dɛn?

¹⁷ Samuel mma no ansusuw nea na wɔn pɛsɛmenkominya ne sɛnea na wɔn ani bere ade no betumi de aba no ho da. Israel mpanyimfo no kɔka kyerɛɛ Samuel sɛ: “Si yɛn so hene na ommu yɛn atɛn sɛ aman a aka no nyinaa.” So na wɔn abisade no yɛ nea na wɔde repo Samuel anaa? Anyɛ yiye koraa no, na Samuel agyina Yehowa ananmu abu ne nkurɔfo atɛn mfe pii. Nanso, afei de, na ɛnyɛ odiyifo kɛkɛ te sɛ Samuel na na wɔrehwehwɛ, na mmom na wɔpɛ ɔhene a obebu wɔn atɛn. Ná aman a atwa Israelfo ho ahyia no wɔ ahene, enti na Israelfo no nso pɛ bi! Samuel buu wɔn adesrɛ no dɛn? Yɛkenkan sɛ, “ɛyɛɛ Samuel ani so bɔne.”—1 Sam. 8:5, 6.

18. Dɛn na Yehowa kae de kyekyee Samuel werɛ nanso bere koro no ara ɛmaa bɔne a emu yɛ duru a Israelfo yɛe no daa adi?

¹⁸ Bere a Samuel de asɛm no too Yehowa anim wɔ mpaebɔ mu no, hyɛ mmuae a Yehowa de maa no yi nsow: “Nea ɔman no aka nyinaa, tie wɔn efisɛ ɛnyɛ wo na wɔapo wo; me mmom na wɔapo me sɛ minnni wɔn so hene.” Hwɛ sɛnea ɛbɛyɛ sɛ saa asɛm yi maa Samuel koma tɔɔ ne yam, nanso hwɛ sɛnea na saa nkurɔfo no adidi ade nyinaa so Tumfoɔ Nyankopɔn no atɛm! Yehowa ka kyerɛɛ ne diyifo no sɛ ɔmmɔ Israelfo no kɔkɔ wɔ amane kɛse a wobehu  wɔ onipa a wɔbɛma wadi wɔn so hene no nsam no ho. Bere a Samuel bɔɔ wɔn amanneɛ no, wɔkɔɔ so ara kae sɛ: “Dabi, ɔhene ara na obedi yɛn so.” Esiane sɛ na Samuel yɛ osetie ma ne Nyankopɔn bere nyinaa nti, ɔkɔsraa ɔhene a na Yehowa apaw no no.—1 Sam. 8:7-19.

19, 20. (a) Dɛn na Samuel yɛe de yɛɛ osetie maa Yehowa wɔ akwankyerɛ a ɔde maa no sɛ ɔnsra Saul sɛ Israel hene no ho? (b) Dɛn na Samuel kɔɔ so yɛe de boaa Yehowa nkurɔfo?

¹⁹ Nanso, ɔkwan bɛn na Samuel faa so yɛɛ n’ade? So onwiinwii yɛɛ n’ade biarabiara? So huammɔ a ɔman no dii no no sɛee ne koma ma ɔde wɔn ho abufuw hyɛɛ ne mu? Wɔ tebea a ɛte saa mu no, nnipa pii betumi ayɛ wɔn ade saa, nanso Samuel anyɛ saa. Ɔsraa Saul, na ogye toom sɛ ɔno na Yehowa ankasa apaw no. Ofew Saul ano de kyerɛe sɛ wagye no atom na ɔbɛbrɛ ne ho ase ama ɔhene foforo no. Na ɔka kyerɛɛ nkurɔfo no sɛ: “Moahu nea Yehowa apaw no no, sɛ obiara nte sɛ ɔno ɔman yi nyinaa mu?”—1 Sam. 10:1, 24.

²⁰ Samuel amfa n’adwene ansi ɔbarima a na Yehowa apaw no no mfomso so, mmom ɔde n’adwene sii adepa a na ɛwɔ ne ho no so. Ɔno ankasa de, ɔde n’adwene sii ne mũdi mu a obekura ama Onyankopɔn no so sen sɛ ɔde besi nkurɔfo a na wɔn adwene hinhim no so. (1 Sam. 12:1-4) Afei nso, ɔde nokwaredi yɛɛ n’adwuma a ɛne sɛ obetu Onyankopɔn nkurɔfo fo wɔ nneɛma ne tebea ahorow a na ebetumi asɛe wɔne Onyankopɔn ntam no ho, na ɔhyɛɛ wɔn nkuran sɛ wɔnkɔ so nni Yehowa nokware. Samuel afotu no kaa nkurɔfo no koma, na wɔpaa no kyɛw sɛ ɔmmɔ mpae mma wɔn. Ɔmaa wɔn mmuae fɛfɛ yi sɛ: “Ɛmpare me sɛ mɛyɛ Yehowa bɔne na magyae sɛ mɛbɔ mpae ama mo. Mɛkyerɛ mo nea eye ne ɔkwampa.”—1 Sam. 12:21-24.

21. Sɛ wɔde dibea anaa hokwan maa obi ma ɛyɛɛ wo yaw a, ɔkwan bɛn so na nea Samuel yɛe no betumi aboa wo?

²¹ So wɔde dibea anaa hokwan ama obi foforo ama ayɛ wo yaw pɛn? Nea Samuel yɛe no ma yehu ankasa sɛ ɛnsɛ sɛ yɛma ahoɔyaw anaa abufuw tena yɛn komam da. (Monkenkan Mmebusɛm 14:30.) Onyankopɔn wɔ nnwuma pii a mfaso wɔ so ma n’akoa biara a ɛma onya akomatɔyam.

22. Dɛn nti na na ntease wom sɛ Samuel de n’adwene sii adepa a na ɛwɔ Saul ho mfiase no so?

²² Ntease wom sɛ Samuel de n’adwene sii adepa a na ɛwɔ Saul  ho no so; ná ɔyɛ ɔbarima a ɔda nsow. Ná ɔyɛ onipa tenten, na na ne ho yɛ fɛ nso. Ná ɔyɛ ɔkokodurufo a n’adwenem abue, na na mfiase no ɔbrɛ ne ho ase. (1 Sam. 10:22, 23, 27) Nea yɛaka ho asɛm yi akyi no, na ɔwɔ akyɛde soronko bi—hokwan a ɛma otumi paw nea ɔpɛ wɔ asetena mu na osisi n’ankasa gyinae. (Deut. 30:19) So ɔde saa akyɛde no dii dwuma yiye?

23. Su pa bɛn na edii kan tu yerae wɔ Saul ho, na dɛn na ɔyɛe de kyerɛe sɛ na ɔreyɛ ahantan?

²³ Awerɛhosɛm ne sɛ, sɛ obi nya tumi foforo a su a ɛtaa di kan tu yera wɔ ne ho ne ahobrɛase. Ankyɛ koraa na Saul fii ase yɛɛ ahantan. Ɔyɛɛ n’adwene sɛ ɔrentie ahyɛde a Yehowa nam Samuel so de maa no no. Bere bi, Saul annya abotare na ɔbɔɔ afɔre a na Samuel na ɛsɛ sɛ ɔbɔ no. Samuel kaa Saul anim denneennen, na ɔhyɛɛ nkɔm sɛ ahenni no rentena n’abusua mu bio. Sɛ́ anka Saul besua biribi afi nteɛso no mu no, ɔkɔɔ so yɛɛ asoɔden a ɛkyɛn saa.—1 Sam. 13:8, 9, 13, 14.

24. (a) Dɛn na Saul yɛe de yɛɛ Yehowa so asoɔden wɔ ɔne Amalekfo akodi no mu? (b) Saul yɛɛ n’ade dɛn wɔ nteɛso a wɔde maa no no ho, na gyinae bɛn na Yehowa sii?

²⁴ Yehowa nam Samuel so ka kyerɛɛ Saul sɛ ɔne Amalekfo nkɔko. Yehowa de akwankyerɛ mae nso sɛ, wonkum Amalekfo ne wɔn hene Agag, otirimɔdenfo no. Nanso, Saul ankum Agag, na ogyaw asade a eye sen biara a na ɛsɛ sɛ ɔsɛe no no nso. Bere a Samuel bae sɛ ɔde nteɛso rebɛma Saul no, nea Saul yɛe no daa no adi sɛ wasesa koraa. Sɛ́ anka ɔde ahobrɛase begye nteɛso no atom no, oyii ne ho ano, buu ne ho bem, buu n’ani guu asɛm no so, na ɔbɔɔ mmɔden sɛ obepia asodi no ato nkurɔfo no so. Bere a Saul bɔɔ mmɔden sɛ obeyi ne ho ano no, ɔkae sɛ wɔde asade no bi bɛbɔ afɔre ama Yehowa, na ɛno maa Samuel kaa asɛm bi a nnipa pii nim yi kyerɛɛ no sɛ: “Hwɛ! Osetie ye sen afɔre.” Samuel de akokoduru kaa ɔbarima no anim, na ɔkaa gyinae a Yehowa asi kyerɛɛ no sɛ: Obegye ahenni no afi Saul nsam de ama onipa foforo—ɔbarima a ɔfata sen no. *—1 Sam. 15:1-33.

25, 26. (a) Dɛn nti na Samuel dii Saul ho awerɛhow, na ɔkwan bɛn so na Yehowa fi ayamye mu teɛɛ ne diyifo no so? (b) Bere a Samuel kɔɔ Yese fie no, asuade bɛn na onyae?

²⁵ Mfomso a Saul dii no yɛɛ Samuel yaw yiye. Asɛm no ma osu  guu Yehowa so anadwo mũ no nyinaa. Na mpo odii asɛm no ho awerɛhow maa ɔbarima no. Samuel de ne werɛ hyɛɛ Saul mu efisɛ na wahu nneɛma pa pii wɔ no ho a ɛkyerɛ sɛ ɔbɛyɛ ɔhene pa, nanso saa bere yi de, na anidaso a ɛte saa a onyae no nyinaa asa. Afei de, na Saul a onim no no asesa—ne suban asesa ma wadan n’akyi akyerɛ Yehowa. Enti, Samuel ampɛ sɛ obehu Saul anim bio. Nanso bere bi akyi no, Yehowa fi ayamye mu teɛɛ Samuel so sɛ: “Wubedi Saul ho awerɛhow akosi da bɛn, bere a mapo no sɛ onnni Israel so hene no? Fa ngo gu w’abɛn mu na sim kɔ, na meresoma wo akɔ Betlehemni Yese nkyɛn, efisɛ ne mma mu na mapaw ɔhene.”—1 Sam. 15:34, 35; 16:1.

²⁶ Yehowa atirimpɔw nnyina nnipa a wɔtɔ sin a wɔntaa nni nokware no so. Sɛ onipa biako anni Yehowa nokware a, Yehowa benya obi foforo ma wahwɛ ma N’apɛde ayɛ hɔ. Enti Samuel a na wabɔ akwakoraa no gyaee Saul ho awerɛhow di. Yehowa ka kyerɛɛ Samuel sɛ ɔnkɔ Yese fie wɔ Betlehem, ɛhɔ na okohuu Yese mmabarima a wɔn ho yɛ fɛ no. Nanso, efi nea odi kan no so na Yehowa ka kyerɛɛ Samuel sɛ mma onnyina nea n’aniwa hu so kɛkɛ nsi gyinae. (Monkenkan 1 Samuel 16:7.) Ewiee ase no, Samuel huu akumaa koraa no, Dawid; ɔno na na Yehowa apaw no!

27. (a) Dɛn na ɛboaa Samuel ma ne gyidi kɔɔ so yɛɛ den? (b) Wote nka dɛn wɔ nhwɛso a Samuel yɛe no ho?

²⁷ Wɔ Samuel nkwakoraabere mu no, obehuu no yiye sɛ na ɛfata paa sɛ Yehowa de Dawid sii Saul ananmu. Ná nitan ahyɛ Saul mã ma wabɛyɛ ɔwaefo. Nanso, Dawid daa su ahorow a ɛyɛ fɛ te sɛ akokoduru, mũdi mu kura, gyidi, ne nokwaredi adi. Bere a na Samuel nna rekɔ awiei no, ne gyidi mu kɔɔ so yɛɛ den. Obehui sɛ huammɔdi biara nni hɔ a ɛsõ ma Yehowa sɛ obesiesie, anaasɛ mpo ɔbɛma adan nhyira. Awiei koraa no, Samuel wui, na ogyaw nhwɛso pa wɔ ne nkwa nna nyinaa a anka ɛreyɛ adu mfe 100 no mu. Na ɛnyɛ nwonwa sɛ Israelfo nyinaa suu ɔbarima nokwafo a na wɔahwere no no! Ɛde besi nnɛ no, ɛsɛ sɛ Yehowa somfo biara bisa ne ho sɛ, ‘So mesuasua Samuel gyidi no bi?’